I Kwepi Kukokeja Kutanwa Busengi Bwabinebine?
I Kwepi Kukokeja Kutanwa Busengi Bwabinebine?
“Leza Shandya Mfumwetu Yesu Kidishitu . . . wakwitusenga mu byamalwa byetu byonso.”—2 KODINDA 1:3, 4.
1. ngikadilo’ka ibwanya kufikija bantu ku kusakilwa nakampata busengi?
MISONGO ityumwina muntu panshi ibwanya kumulangija amba kubapu, būmi bwandi bubaoneka lonso. Bintenshi, bimpumpu, ne nzala nabyo bishiyanga bantu mu musala. Divita dibwanya kupitula ba mu kisaka, kōna mobo nansha kufikija benē mobo ku kushiya bituntwa byabo. Mboloji nayo ikokeja kulangija bantu amba kebadipo na kwa kunyemena. Bonso baponenwa na bino byamalwa i bōminwe, basakilwa busengi. Lelo i kwepi kobakokeja kwibutana?
2. I kika kinenenwa amba busengi bupāna Yehova i bwishile na bukwabo?
2 Bantu nansha malongolodi amoamo aloñanga buninge bwa kuleta busengi. Bine, binenwa bya kanye bitendelwanga mpata. Bukomo bwa kupāna bya bukwashi nabo bwangulanga’ko bantu mu mafuku matyetye. Ino enka Yehova, Leza wabine, ye ubwanya kupwija bibi byonso jimejime ne kupāna bukwashi busakwa bwa kwimika lonso bino byamalwa. Bible unenena padi amba: “Atotwe ne kutotwa Leza Shandya Mfumwetu Yesu Kidishitu, Shandya byalusa, Leza wa kanye ka kusenga konso; wakwitusenga mu byamalwa byetu byonso, mwanda wa kunena’mba, tumone mwakwibasengela netu boba badi mu byamalwa, shi bika, shi bika, ponka pa kanye ka kwitusenga ko twasengibwa bātwe bene kudi Leza.” (2 Kodinda 1:3, 4) Le Yehova wituseñanga namani?
Kujula Miji Iletele Makambakano
3. Le busengi bwa Leza i bukajule namani miji ileta makambakano a bantu?
3 Kisaka kyonso kya muntu kipyene kubulwa kubwaninina kutambile ku bubi bwa Adama, bulupwile makambakano keabadika atwala enka ku lufu. (Loma 5:12) Kadi bintu bibabipila’ko mwanda Satana Dyabola ye aye ‘mwine mulopwe wa ino ntanda.’ (Yoano 12:31; 1 Yoano 5:19) Inoko Yehova kekelepo enka kufwila bantu lusa kete pa ngikadilo ya bulanda yobekonda nayo. Ino i mutume ne wandi Mwana wa bunka bu kikūlwa kya kunyongolola bantu, witulombola ne kwitulombola amba tukokeja kunyongololwa ku bibi byonso bilupukile ku bubi bwa Adama shi tulombole lwitabijo mudi Wandi Mwana. (Yoano 3:16; 1 Yoano 4:10) Pakwabo kadi Leza ulaile amba Yesu Kidishitu, upelwe lupusa lonso lwa mūlu ne lwa pano panshi, ukonakanya Satana ne yandi ngikadilo imbi ya bintu yonso mituntulu.—Mateo 28:18; 1 Yoano 3:8; Kusokwelwa 6:2; 20:10.
4. (a) I bika bitupele Yehova mwanda wa kuningisha kikulupiji kyetu mu milao yandi ya kwitunyongolola? (b) I muswelo’ka witukwasha Yehova tujingulule kitatyi kikafika bunyongolodi?
4 Leza ulamine bukamoni buvulevule bulombola amba byonso byalayanga bifikidilanga mwanda wa kwitukulupija mu milao yandi. (Yoshua 23:14) Ulamine mu Bible nsekununi ya byaālongele pa kunyongolola bengidi bandi mu ngikadilo imweka ku meso a bantu amba i mikomo kunyongolola’mo bantu. (Divilu 14:4-31; 2 Balopwe 18:13–19:37) Ne kadi, kupityila kudi Yesu Kidishitu, i mulombole amba mu mpango yandi mudi ne kubelula bantu “bulema bonso,” ne kusangula bafwile. (Mateo 9:35, MB; 11:3-6) Lelo byonso bikafika kyaba’ka? Bible ulondolola na kulombola mwikadile mafuku a mfulo ya ino ngikadilo ya bintu, anenwe kubadikila madiulu mapya ne ntanda impya ya Leza. Bushintuludi bwa Yesu bukwatañene bininge na bitatyi byotudi’mo.—Mateo 24:3-14; 2 Temote 3:1-5.
Busengi ku Bantu Badi mu Tusua
5. Yehova pa kusenga Isalela wa kala, le wākokele milangwe yabo pa bika?
5 Tuboilanga ñeni ya busengi bupāna Yehova mu bitatyi bya tusua ku bintu byaādi ulongela Isalela wa kala. Webāvulwije bamuyuke aye i Leza wa muswelo’ka. Wāningisha kikulupiji kyabo mu milao yandi. Yehova wākweshe bapolofeto bandi bamone kushiyañanya Leza mūmi ne wabine na bankishi kebakokejapo kwipandija ne kupandija batōtyi babo. (Isaya 41:10; 46:1; Yelemia 10:2-15) Yehova pa kunena kupityila kudi Isaya amba, “Sengai, sengai, bami bantu,” wātonwene mupolofeto wandi engidije byelekejo ne bilomboji bya mu mingilo Yandi ya bupangi mwa kumwekejeja patōka bukatampe bwa Yehova amba ye Leza umo kete wabine.—Isaya 40:1-31.
6. Kyaba kimo Yehova wādi uleta bilomboji’ka bimo bilombola kitatyi kya kufika bunyongolodi?
6 Kyaba kikwabo, Yehova wādi usenga bantu bandi na kwibatelela kitatyi, kya kubwipi nansha kya kulampe, kya kwibanyongolola. Kifwa, pāfwenene bunyongolodi bwa bene Isalela bādi basusulwa mu Edipito, wēbalombwele amba: “Pano kubashyala kinzengele kimo kikwabo kyo nkamuletelako Felo ne pa Edipito pene, ebiya ukemulekelela mwende.” (Divilu 11:1) Ne pāile mizo isatu mīkute mu kimo kutamba Yuda mu mafuku a Mulopwe Yehoshafata napo monka na monka, Yehova wēbasapwidile amba usa kwibalwila mu “dyakesha.” (2 Bilongwa 20:1-4, 14-17) Kadi ne bunyongolodi bwabo bwa kutamba mu Babiloni nabo bwāsonekelwe na Isaya kintu kya myaka 200 kumeso, Yelemia nandi wātela ne myanda pala pala kubwipi kwa myaka katwa kumeso kwa kunyongololwa’bo. Bine, buno bupolofeto bwādi bukankamika bengidi ba Leza pādi penda pafwena kitatyi kya bunyongolodi!—Isaya 44:26–45:3; Yelemia 25:11-14.
7. Le i bika byādi divule bibadilwa mu milao ya bunyongolodi, ne kino kyāshintyile namani būmi bwa bantu ba kikōkeji mu Isalela?
7 Ketwakilwai’ko amba mu milao yādi isenga bantu ba Leza divulevule mwādi ne myanda īsambila padi Meshiasa. (Isaya 53:1-12) Ino myanda yādi ipa bantu ba kikōkeji ba nkongo ne nkongo lukulupilo ponso pobādi batanwa na matompo mavule. Tutanga mu Luka 2:25 amba: “Talaipo, mwadi mwikele mu Yelusalema muntu, dijina dyandi Shimioni, ebiya yewa muntu wadi mutūkanye, wa mutyima umo mu bya Leza, utengele bukwashi [nansha busengi] bwa Isalela [ke kwiya kwa Meshiasa kadi], ino [m]ushipiditu [s]andu wadi umwikadilako.” Shimioni kādipo widilwe lukulupilo lwa mu Bisonekwa lwa kwiya kwa Meshiasa, kadi mutyima wa kutengela kufikidila kwalo kewātunyinyepo kushinta būmi bwandi. Kādipo upotolwele mobikafikidila, ne kadi kēmweninepo mwāfikidile lupandilo lwālailwe, inoko wāsangala pa kujiula Yewa ukaleta “bupandiji” bupāna Leza.—Luka 2:30.
Busengi Bubaila Mudi Kidishitu
8. Le bukwashi bwāpēne Yesu budi namani shi wibudingakanye na byādi bilanga bantu amba byo byobasakilwa?
8 Yesu Kidishitu pa kwingila mwingilo wandi pano panshi, kādipo uleta nyeke bukwashi bwādi bulanga bantu amba bo bwibasakilwa. Bamo bādi babila kumona Meshiasa wa kwibakūla mu lupungu lwa Loma lobādi bashikilwe. Ino Yesu kātonwenepo bantu ku kufwila kwalamuna mushikatyilo; ino wēbanene amba “lubulai . . . bya Kesala kudi Kesala.” (Mateo 22:21) Mu mpango ya Leza mwādi bintu bivule, ke enkapo kukūla bantu ku bupika bwa umbikalo kampanda wa kipolitike, mhm. O mwanda bantu pobāsakile kubikika Yesu bulopwe, aye wēbanene amba kyaidile i “kupana muya wandi ke kikūlwa kya bavule bene.” (Mateo 20:28; Yoano 6:15) Kino kekyādipo kitatyi kya aye kubikala bu mulopwe, kadi Yehova ye wādi wa kumupa lupusa lwa kubikala, ke kibumbopo kya bantu ba nketekete ku mityima, mhm.
9. (a) I musapu’ka wa busengi wādi usapula Yesu? (b) Yesu wālombwele muswelo’ka mvubu ya musapu mu ngikadilo yādi itanwa’mo muntu ne muntu? (c) Mwingilo wa Yesu wāadile kyalwilo’ka?
9 Busengi bwāile na Yesu bwādi bumweka mu “myanda-miyampe ya bulopwe bwa Leza.” Ino yo misapu yāsapwile Yesu ko-konso kwaādi wenda. (Luka 4:43) Wānene ukoma mvubu ya uno musapu mu makambakano atana bantu bukile bukya na kulombola byakalongela muzo wa muntu bu Meshiasa Mulopwe. Wāpele basusuka buluji bupya bwa kwikadila na būmi pa kubelula bampofu kebamone ne batumama kebanena (Mateo 12:22; Mako 10:51, 52), pa kukomeja bidyoma bya ba bulema (Mako 2:3-12), pa kubelula mba mikomo ya bantu nandi bene Isalela (Luka 5:12, 13), ne pa kwibanyongolola ku misongo mibimibi. (Mako 5:25-29) Wātūkija ba mu bisaka bavule mutyima pa kwibasangwila babo bana bafwe. (Luka 7:11-15; 8:49-56) Wālombola bukomo bwadi nabo bwa kutalaja bimpumpu ne kutalaja nzala ya bibumbo bya bantu na kwibapa bidibwa. (Mako 4:37-41; 8:2-9) Ne kadi, Yesu wāfundije bantu misoñanya ya mwa kwikadila, mwa kulwila senene na makambakano ebatana, misoñanya iyuja mu mityima yabo lukulupilo lwa kutengela buludiki boloke bukaludikwa na Meshiasa. Nanshi pādi pengila Yesu mwingilo wandi, kādipo usenga enka boba bādi bamuteja na mutyima wa lwitabijo, ehe, ino wāadile kyalwilo kya kukankamika ne bantu ba mu myaka tununu ne tununu īya kumeso.
10. I bika byotubwanya kumona kupityila ku kitapwa kya Yesu?
10 Yesu wāelele būmi bwandi bwa bu muntu bu kitapwa, wāsangulwa ke mūmi momwa mūlu, ebiya myaka 60 ne musubu kupita’po, mutumibwa Yoano wāsoneka’mba: “Twanwe twana twami, bīne bino’bi nemusonekela, na’mba, kemukapya mambo. Kadi shi muntu apye mambo, nankyo tudi ne Nsenga-Mukwashi udi kudi Tata, ke Yesu Kidishitu moloke kadi. Kadi aye Mwine i kipwanino kya myanda yetu; kadi ke kya yetupo yonka, mhm, i ne kya ya bapanopantanda bonso.” (1 Yoano 2:1, 2) Batwe bonso twi basengibwe byabine na bine na byabuyabuya bimwenwa mu kitapwa kya Yesu kya bu muntu mubwaninine. Tuyukile amba tulekelwanga bubi bwetu, ne kwikala na mutyima wa mundamunda utōka, kwikala mu kipwano kya kwitabijibwa na Leza, ne kyepelo kya būmi bwa nyeke.—Yoano 14:6; Loma 6:23; Bahebelu 9:24-28; 1 Petelo 3:21.
Mushipiditu Sandu I Musengi
11. I mpangiko’ka mikwabo ya busengi yālaile Yesu kumeso kwa lufu lwandi?
11 Yesu wādi na batumibwa bandi mu kyolwa kya mfulo kumeso kwa lufu lwandi lwa bu kitapwa, penepa wēbalombola mpangiko mikwabo ya kwibasenga ikwetwe na Shandi wa mūlu. Wānena’mba: “Nkalomba kudi Tata ino aye ukemupa Nsenga-mukwashi mukwabo [musengi; Kingidiki, pa·raʹkle·tos] wakwikala nandi mafuku onso nyeke. Ke [m]ushipiditu wa binebine kadi.” Kupwa wēbakulupija’mba: “Aye Nsenga-mukwashi, [m]ushipiditu [s]andu, ukatuma Tata mu dijina dyami, aye ukemulombolanga byonsololo, ne kwimuvulula byonso byo nemusapwila bino.” (Yoano 14:16, 17, 26) Le mushipiditu sandu wādi wa kwibasenga namani?
12. I kika kinenenwa amba mwingilo wa mushipiditu sandu wa kuningisha luté lwa bana ba bwanga ba Yesu i mulete busengi ku bavule bene?
12 Batumibwa bāfundijibwe bufundiji buvule na Yesu. Na bubine kebādipo ba kwilwa bintu byobādi bemwena na meso, ino le bādi ba kuvuluka byobya byonso byaānene? Le bufundiji bwa kamweno bwādi bwa kujimina mwanda wa luté lwabo lwakubulwa kubwaninina? Yesu wēbakulupije amba mushipiditu sandu ‘ukebavuluja byonso byāebasapwidile.’ O mwanda, myaka mwanda kupwa kwa lufu lwa Yesu, Mateo wābwenye kusoneka Evanjile imbajinji, yaāsekunwine’mo Busapudi bwa Yesu bwa ku Lūlu butenga ku mutyima, byelekejo byandi bivulevule bya myanda ya Bulopwe, ne myanda pala pala itala mīsambo yandi ya kiyukeno kya kwikala’po kwandi. Myaka 50 ne musubu kupita’po, mutumibwa Yoano nandi wāsoneka nsekununi ikulupilwa iyudile’mo bintu bivule bya mu mafuku matyetye a mfulo ya būmi bwa Yesu bwa pano panshi. Bine, ino nsekununi ya ku bukomo bwa mushipiditu ikitukankamika ne dyalelo dino!
13. Le mushipiditu sandu wāikele namani ke mufundiji wa bene Kidishitu babajinji?
13 Mushipiditu sandu kewēbavulwijepo’nka binenwa kete, ino wāfundije bana ba bwanga, wēbaludika mwa kwivwanina ne pa mfulo mpango ya Leza. Yesu wālombwele bandi bana ba bwanga bintu bivule paādi nabo, inoko kudi bintu byokebāivwanijepo biyampe. Ino pa kukunkwa na mushipiditu sandu mwenda myaka, ba Yoano, Petelo, Yakoba, Yude, ne Polo bāsonekēle’ko nshintulwilo mikwabo ya bintu byādi bya kumweka mu mpango ya Leza. Pa kino, mushipiditu sandu wāikele ke mufundiji, wāleta kikulupiji kyabinebine amba baludikwanga na Leza.
14. Mushipiditu sandu wākweshe bantu ba Yehova mu bika ne bika?
14 Byabuntu bya mushipiditu bya bingelengele nabyo byālombwele patōka amba Leza kakitabijepo Isalela wa ku ngitu, ino waitabija kipwilo kya bwine Kidishitu. (Bahebelu 2:4) Bipa bya mushipiditu byādi bimweka mu būmi bwa bantu nabyo byādi bilomboji bikatampe biyukanya bana ba bwanga babine na bine ba Yesu. (Yoano 13:35; Ngalatea 5:22-24) Kadi mushipiditu o onka wāningishe ba mu kipwilo bonso bāikala batumoni basapula na bukankamane ne pakubulwa moyo.—Bilongwa 4:31.
Bukwashi mu Mitabakano Mikomo
15. (a) I mitabakano’ka yākambije bene Kidishitu ba pa kala ikambija ne ba dyalelo bene? (b) I kika kinenenwa amba yewa ukankamikanga bakwabo ukokeja kyaba kimo nandi kusakilwa kukankamikwa?
15 Boba bonso bepēne kudi Yehova, badi na dikōkeji kwadi, bapangwapañwanga mu muswelo kampanda. (2 Temote 3:12) Ino kudi bene Kidishitu bavule bafikilwanga na mitabakano mikomo kutabuka. Mu ino myaka, bamo batambwanga na bibumbo bya bantu, bakwabo belwa mu makomponi a malwa, mu tuso, ne mu makomponi a twaji twa mwiko. Imbikalo nayo ke mikwate’ko na kwibapangapanga nansha kuleka bantu ba kujilula bijila basusujañana bya bunyema ino kupebwa’bo mfuto mpika. Kadi, bene Kidishitu bakambanga na misongo mikatampe ne na bikoleja byūmija bisaka umeso. Mitabakano ikokeja ne kufikila mwine Kidishitu mupye ukwashanga bakwabo betabije kupwija makambakano abo. Mu byaba bya uno muswelo, yewa ukankamikanga bakwabo nandi ukokeja kusakilwa kukankamikwa.
16. Davida pa kufikilwa na mitabakano mikatampe, wātambwile bukwashi muswelo’ka?
16 Davida paādi ulondwalondwa na Mulopwe Solo wādi usaka kumwipaya, wānyemene kudi Leza, Mukwashi wandi, kamwabija’mba: “Ivwana lulombelo lwami, abe Leza.” Kupwa amba: “Mu mutalela wa mumapapa obe e mo ngubanga.” (Mitōto 54:2, 4; 57:1) Le Davida wātambwile bukwashi? Eyo, wātambwile’bo. Mu kitatyi’kya, Yehova wāingidije Ngade mupolofeto ne Abiata kitobo bu ba kulombola Davida buludiki, kadi wāingidija ne Yonafane mwanā Solo ke wa kukankamika nsongwalume Davida. (1 Samwele 22:1, 5; 23:9-13, 16-18) Kadi Yehova wālekele bene Fidishitia bāye beele pa ntanda, mwanda wa kukalakanya Solo aleke kumulondalonda.—1 Samwele 23:27, 28.
17. Yesu pa kufikilwa na mitabakano mikomo, wānyemene kwepi?
17 Ne Yesu Kidishitu mwine nandi wāfikilwe na mitabakano mikomo ku mfulo kwa būmi bwandi bwa pano panshi. Wādi ujingulwile biyampe mwiendelejo wandi mowādi ukokeja kumwekeja dijina dya Shandi wa mūlu ne bipa byowādi wa kulupula mu būmi bwa kumeso bwa muzo onso wa muntu. O mwanda wālombele na kininga, enka ne “misongo mīne mikata.” Penepo Leza wāmona amba i biyampe Yesu akwatakanibwe mobifwaninwe mu bino bitatyi bya makambakano.—Luka 22:41-44.
18. I busengi’ka bwāpēne Leza ku bene Kidishitu babajinji bādi bapangwapangwa byamalwa?
18 Kupangwapangwa kwa bene Kidishitu kupwa kushimikwa kwa kipwilo kya mu myaka katwa kabajinji kwādi kupangwapangwa kusansa mutyima mpata, kwāpalakenye bonso bādi mu Yelusalema, kwāshala’nka batumibwa kete. Bana-balume, bana-bakaji bādi bakulumunwa mu mobo abo. Le Leza wēbapele busengi’ka? Wēbapele kikulupiji kya mu Kinenwa kyandi amba badi na “bupeta bwa nyeke butabukile kunengela,” bupyani bwabinebine bobakapyana pamo na Kidishitu momwa mūlu. (Bahebelu 10:34, MB; Efisesa 1:18-20) Mu kwenda basapula, mo mobādi benda bamona bukamoni bulombola amba mushipiditu wa Leza udi nabo, ne kino kyādi kibapa buluji bukwabo bwa kusepelela.—Mateo 5:11, 12; Bilongwa 8:1-40.
19. Nansha Polo byaāpangilwepangilwe bya mwiko, ino wādi umwene namani busengi bupānanga Leza?
19 Mwenda mafuku, Solo (Polo) wādi upangapanga bene Kidishitu byamalwa, nandi bāshilula kumupangapanga mwanda’po’tu wāikele ke mwine Kidishitu. Mu kisanga kya Saipusa, mwādi ñanga wa majende wāsakile kukalakanya mwingilo wa Polo na bongojani ne bundalandala. Mu Ngalatea, Polo wāaswa mabwe, bamushiya mupungile. (Bilongwa 13:8-10; 14:19) Mu Masedonya namo bāmukupila nsonde. (Bilongwa 16:22, 23) O mwanda pa kupwa kutambwa na kibumbo mu Efisesa, wāsonekele amba: “Twadi balemenenwe byamwiko [“mu mitabakano mikomo,” NW] kutabuka ne pa bukomo bwetu, ino twafudilwe ke lufu lonka. I binebine twadi, ke twitabija bātwe bene mundamunda twa’amba, i lufu.” (2 Kodinda 1:8, 9) Ino mu uno mukanda umo onka mo mwāsonekele Polo binenwa bisenga pa mutyima byotwatelanga mu musango wa 2 kino kishinte.—2 Kodinda 1:3, 4.
20. I bika byotusa kubandaula mu kishinte kilonda’ko?
20 Le nobe ubwanya namani kusenga bakwenu? Kudi bavule bene mu ano mafuku basakilwa buno busengi kitatyi kyobapepwa mityima, pa mwanda wa kimpengele kiponena tununu ne tununu twa bantu, nansha byamalwa byobekonda nabyo abo bene. Mu kishinte kilonda’ko, tukabandaula muswelo wa kusenga bakwetu mu ino myanda yonso.
Lelo Uvulukile?
• I kika kinenenwa amba busengi butamba kudi Leza budi na mvubu mikatampe?
• I busengi’ka bwāletelwe kupityila kudi Kidishitu?
• Mushipiditu sandu wēlombwele namani bu musengi?
• Leta bifwa bya busengi bwāpēne Leza kitatyi kyādi bengidi bandi mu mitabakano mikomo.
[Bipangujo bya Kifundwa]
[Bifwatulo pa paje 23]
Bible witulombola amba Yehova wāsengele bantu bandi na kwibanyongolola
[Bifwatulo pa paje 24]
Yesu wādi usenga bantu na kufundija, na kubelula babela, ne na kusangula bafwile
[Kifwatulo pa paje 26]
Yesu wātambwile bukwashi butamba monwa mūlu