Imanijai Nyeke, Munekenye ne Lubilo Lutwala ku Būmi

LANGA’PO shi usa kwenda pa dijiba papukuma kimpumpu kikatampe, le ukakanda mu kyombo kya muswelo’ka? Lelo ukakanda mu kakyombo kapena’ni nansha mu kyombo kikomo, kijalale senene? Bine, kukabulwepo kutonga kyombo kikomo, mwanda kyo kibwanya kupāla mantanki makomokomo.

Ne pano potwenda tupita mu bimpumpu ne byaka bya ino ngikadilo ya bintu napo mo monka, tutanwanga na bikoleja bijingija mutyima. Kifwa, bankasampe kyaba kimo kimo balumbakananga, ne kusela mityima kūlu pa mwanda wa milangwe ne bisela bipuakanya bya ino ntanda. Boba bashilwile panopano lwendo lwa bwine Kidishitu nabo bakokeja kwimona bu bakubulwa kwimanija. Nansha ke boba bemanije myaka mivule mu kwingidila Leza na kikōkeji nabo bakokeja kutompibwa mwanda kebamwenepo kufikidila kwa byonso byobatengele.

Ino kwiivwana namino ke kyenipo. Bengidi ba kikōkeji ba Yehova, pamo bwa Mosesa, Yoba, ne Davida, nabo bēmwene kyaba kimo amba abashetuka. (Umbadilo 11:14, 15; Yoba 3:1-4; Mitōto 55:4) Ino bādi nyeke bemanije, kasha balamata kudi Yehova mu būmi bwabo bonso. Kifwa kyabo kilumbuluke kitukankamikanga twikale bemanije, ino Satana Dyabola aye usaka kwitulumbakanya mu lubilo lwitutwala ku būmi bwa nyeke. (Luka 22:31) Penepo tukokeja namani kwikala bemanije, ‘bakomo mu lwitabijo’? (1 Petelo 5:9) Ne i muswelo’ka otukakomeja banabetu betabije?

Yehova Usaka Twikale Bemanije

Ekale twi ba kikōkeji kudi Yehova, nabya nandi kakabulwepo nyeke kwitukwasha tulame bujalale bwetu. Davida kaimba wa mitōto wātenwe na makambakano mavule, ino wādi ukulupile mudi Leza, wāimba ne kwimba’mba: “[Yehova] wangabwile mu lubao lwa malwa, ne mu nembo ya ntoto; kadi wantūla maulu ami pa kidibwe, ne ku kankamija mwikadilo wami.”​—Mitōto 40:2.

Yehova wituningishanga tulwe “divita dilumbuluke dya mu lwitabijo” amba ‘tukwatyije būmi bwa nyeke.’ (1 Temote 6:12, MB) Ne kadi witupele byonso bitusakilwa amba tushale bajalale, tutambule ne bushindañani mu bulwi bwa ku mushipiditu. Mutumibwa Polo wāsoñenye bene Kidishitu nandi amba “kankamanai mudi Mfumwetu, ne monka mu bukomo bwa bulobo bwandi,” kadi “vwalai panopele yonso ya Leza, amba muyūke kwimanija mu byakyongo bya dyabola.” (Efisesa 6:10-17) Le i bintu’ka bibwanya kwitushetula? Ne i muswelo’ka otukokeja kukomena ino mpusa ya kyaka?

Dyumuka Byobya Bibwanya Kukuzozeja

I biyampe kuvuluka uno mwanda wa mvubu: Butyibi bonso botukwata budi na lupusa luyampe nansha lubi pa bujalale bwetu bwa bwine Kidishitu. Kifwa, bankasampe banenwe kukwata butyibi mu myanda ya kaji kobakengila, masomo malamala ne busongi. Batame nabo padi basakilwa  kukwata butyibi bwa kwa kuvilukila ne kaji ka ntentekelo. Mobukila mobukila tukwatanga butyibi bwa motusa kupityijija difuku ne myanda mikwabo mivule mine. Lelo i bika biketukwasha tukwate butyibi buyampe bukatuntwila ku bujalale bwetu batwe bengidi ba Leza? Mwine Kidishitu umo ke mwije unena amba: “Ponso ponsaka kukwata butyibi, nombanga Yehova ankwashe. Nkulupile amba i kipite buya kwitabija ne kulonda madingi adi mu Bible, aletwa ku kupwila kwa bwine Kidishitu, apāna bakulumpe, ne atanwa mu mabuku esambila pa Bible.”

Ponso potukwata butyibi, i kipite buya kwiipangula amba: ‘Le shi pabapite myaka itano nansha dikumi, le nkasangela buno butyibi bonkwata dyalelo’ni, nansha nkealakanya? Lelo noñanga bukomo bwa kujingulula shi butyibi bwami bukashetula bujalale bwami bwa ku mushipiditu nansha shi bukalundila’ko kwendelela kwami kwa ku mushipiditu?’​—Fidipai 3:16.

Kupona mu matompo nansha kwitūla mu kyaka kya kujilula bijila bya Leza ke kufikije banabetu bavule babatyijibwe ku kwikala na būmi bulumbakane. Bamo bapañwanga pa kipwilo pa mwanda wa bubi bobalongele kwisāsa mpika, abo pa kupwa kulonga buninge bwa kujokejibwa kadi bapangwa dikwabo​—pamo ne kwija kwine mpika​—enka pa mwanda wa bubi bumo bonka. Le i pa mwanda wa kulomba kokebalombelepo bukwashi bwa Leza bwa ‘kujila pakatampe pene byobya bibibibi, ne kulamatyididila ku byobya bilumbuluke?’ (Loma 12:9; Mitōto 97:10) Batwe bonso tufwaninwe ‘kolola mashinda a kwenda’mo maulu etu.’ (Bahebelu 12:13) Shi ke pano, tubandaulei bintu bimobimo bitukwasha tulame bujalale bwetu bwa ku mushipiditu.

Endelela na Kwimanija mu Mingilo ya Bwine Kidishitu

Kintu kibajinji kitukwasha tunyeme nyeke kukōka mpika lubilo lwetu lutwala ku būmi i kuvudilwa bya kulonga mu mwingilo wa kusapula Bulopwe. Eyo, mwingilo wetu wa bwine Kidishitu i kintu kya mvubu mpata kitukwasha tulame mityima ne ñeni yetu ibambile pa kulonga kiswa-mutyima kya Leza ne pa mpalo ya būmi bwa nyeke. O mwanda Polo wāsoñenye bene Kodinda amba: “Bānwe bāna betu, bakuswedibwa, [imanijai], ne kujina kwine mpika, muvudilwe pakatampe pene, mafuku onso nyeke, monka mu mīngilo ya Mfumwetu, pa mwanda o mwayūka’mba, kuputumina kwa mu mīngilo yenu kekudipo kwa bitubitupu mudi Mfumwetu; ehe.” (1 Kodinda 15:58) ‘Kwimanija’ kishintulula ‘kwimana pamo nshinkidingi.’ ‘Kujina mpika’ nako, mu ludimi lubajinjibajinji, kukokeja kuleta buluji bwa ‘kuleka kwikutulula ku ñanga kokutyilwe.’ O mwanda kuputumina mu mwingilo wetu kukokeja kwitūjadika pamo mu lwendo lwetu lwa bwine Kidishitu. Kukwasha bantu bayuke Yehova kwitupanga nsangaji ne kitungo mu būmi bwetu.​—Bilongwa 20:35.

Polina, mwine Kidishitu wāingile myaka 30 ne kupita mu mwingilo wa kitatyi kyonso ne wa bu mishonele, unena’mba: “Mwingilo i bulami mwanda kusapwila bakwetu bukamoni kunkulupijanga ami mwine amba ndi na bubinebine.” Kikulupiji kya uno muswelo kilupukanga ne ku kwingila mingilo mikwabo ya bwine Kidishitu kitatyi ne kitatyi, kifwa kukatōta ku kupwila ne kwifunda Bible kasuku na kininga.

Bajadikwe na bu Bana na Bana bwa Buswe

Kubadilwa mu bulongolodi bwa batōtyi babine nako kudi na bukomo bukatampe bwitukwasha twikale bajalale. Bine, i dyese ne dyese’po kwilunga umbumo na buno bu bana na bana bwa buswe bwa ntanda yonso! (1 Petelo 2:17) Kadi netu tukokeja kukwasha banabetu betabije bekale na bujalale.

Bandaula bilongwa bya bukwashi bya Yoba, muntu moloke. Nansha ke Edifaza, musengi wa bubela, wāitabije amba: “Binenwa byobe bibaimanija yewa utelemba, ino ubakankamika manwi ampikwa bukomo.” (Yoba 4:4) Lelo netu ketudi pepi mu kukwasha bakwetu? Umo ne umo umbukata mwetu udi na kiselwa kya kukwasha banababo ba ku mushipiditu bekale kūminina mu mwingilo wa Leza. Ponso potudi na batutu ne bakaka, tulongei mwendele bino binenwa binena’mba: “Komejai makasa makōke, ne kuningisha manwi ampikwa bukomo.” (Isaya 35:3) Ubulwe’po kwitungila kitungo kya kukomeja ne kukankamika mwanenu mwine Kidishitu umo nansha babidi ponso powitana nabo? (Bahebelu 10:24, 25) Binenwa bikankamika bya kwibatendela ne kwibafwija’ko pangala pa bukomo bobalonga bwa kusangaja  Yehova bikokeja kwibakwasha bemanije mu lubilo lutwala ku būmi lobanyema.

Bakulumpe bene Kidishitu babwanya kulonga bivule na kukankamika bapya. Padi bakebakankamika na kwibapa milangwe ya kamweno, na kwibadingila madingi mayampe emanine pa Bisonekwa nansha na kwingila nabo pamo mu mwingilo wa budimi. Mutumibwa Polo wādi nyeke ukwatakanya mikenga ya kuningisha bakwabo. Wādi na mutyima wa kumona bene Kidishitu ba mu Loma mwa kwibakomejeja ku mushipiditu. (Loma 1:11) Wādi umwene batutu ne bakaka bandi ba mu Fidipai bu ‘tusepo twandi ne kilukwa kyandi,’ o mwanda wēbasoñenye amba “mwimanijei pototo, pō, mudi Mfumwetu.” (Fidipai 4:1) Kadi Polo wāivwene makambakano ādi na banababo ba mu Tesalonika, penepa wātuma Temote amba ekale ‘kwibakankamika ne kwibasenga ku mityima kutyina kwakekala nansha umo wakashetulwa na byamalwa.’​—1 Tesalonika 3:1-3.

Ba mutumibwa Polo ne Petelo bāyukile ne kutendela bukomo bwa kikōkeji bwādi bulonga batōtyi nabo. (Kolose 2:5; 1 Tesalonika 3:7, 8; 2 Petelo 1:12) Netu nanshi ketukibambilai meso pa bukōkekōke bwa banabetu, ino tubambilei’o pa ngikadilo yabo milumbuluke ne pa kunekenya kobanekenya bulwi bwa kushala bemanije, balēmeke Yehova.

Wivwane twikale na mifutululo ne mipondolwela, nabya tukokeja, batwe kuyuka mpika, kukoleja bamo batunya kulama kwimanija kwabo mu lwitabijo. Bine, i kyendele’mo tuvuluke amba banabetu i basusuke “ne kususuka, ne kusansana” mu ino ngikadilo ya bintu! (Mateo 9:36) Mu kipwilo kya bwine Kidishitu mo mobatengele kutana busengi ne kutūkijibwa mityima. Nanshi tulongei batwe bonso buninge bwa kutamija banabetu betabije ne kwibakwasha bemanije nyeke.

Kyaba kimo, bamo baketulongela bintu bibwanya kuzozeja kwimanija kwetu. Lelo tukaleka kinenwa kitapa nansha kilongwa kibi kituzozeje mu mwingilo otwingidila Yehova? Bine, ketwakilekai muntu nansha umo etukokele pafula mu kwimanija kwetu!​—2 Petelo 3:17.

Milao ya Leza Itujadikanga Pamo

Milao ya Yehova ya būmi bwa kutendelwa bwīya kumeso mu Bulopwe bwandi itupanga lukulupilo ne kwitukwasha twikale nyeke bemanije. (Bahebelu 6:19) Kadi kikulupiji kyotukulupile amba Leza ufikidijanga nyeke milao yandi kitukunkanga ‘tushale balanguke, bominine mu lwitabijo.’ (1 Kodinda 16:13; Bahebelu 3:6) Padi lwitabijo lwetu lutompibwanga pa kumona amba milao imo ya Leza ibaije kufikidila mpika. O mwanda i kipite buya tudyumuke kutyina amba twakongolwa na bufundiji bwa bubela, uyuka twasasukila pafula mu byotukulupile.​—Kolose 1:23; Bahebelu 13:9.

Kifwa kityani kya bene Isalela bākubile mwanda wa kubulwa kobabudilwe lwitabijo mu milao ya Yehova kifwaninwe kwikala bu kidyumu kotudi. (Mitōto 78:37) Ketwakiifwanai nabo, ino batwe twimanijei koku twingidila Leza na mutyima wa kupēlakana mu ano mafuku a mfulo. Mukulumpe umo wa bwino wanene amba: “Mobukila mobukila monanga difuku dya Yehova pamo’nka bwa adyo dīya kesha.”​—Yoela 1:15.

Eyo, difuku dikatampe dya Yehova kedidi pa kibelo. Inoko, kekudipo kyotukwatyilwa moyo mwanda tudi pabwipi na Leza. Wivwane tulamate ndamatyidile ku misoñanya yandi myoloke, kasha twimanija nshinkidingi, ketukabulwepo kunekenya lubilo lutwala ku būmi bwa nyeke!​—Nkindi 11:19; 1 Temote 6:12, 17-19.

[Kifwatulo pa paje 21]

Le uloñanga bukomo bwa kukwasha bene Kidishitu nobe bekale nyeke bemanije?

[Kutambile Kifwatulo pa paje 19]

The Complete Encyclopedia of Illustration/J. G. Heck