Kupāna Kusangaja Leza

YESU ne bandi bana ba bwanga bādi badya bidibwa bya musonso mu Betani na balunda ba pa mutyima babala-banga, ba Madia, ne Mata, ne Lazalasa wādi ukisangulwasangulwa nabo bādi’po. Ino Madia pa kuyata ndalabo wa māni a lupoto lukande kashinga’o Yesu ku maulu, Yudasa Isakadiota wāfitwa, kātompola. Amba: “Le kika le ano mani kyo keapotelwe, nansha tutwa tusatu twa ndenadi [kintu kya mfutwa ya mwaka mutuntulu], bābila balanda”? Ne bakwabo nabo mo monka, bāshilula kutompola.​—Yoano 12:1-6; Mako 14:3-5.

Ino Yesu wālondolola’mba: “Mulekei, . . . balanda mudi nabo pano nyeke, kadi monso mo muswila muyūkile ne mwakwilongela biyampe, ino ami kemudipo nami nyeke, mhm.” (Mako 14:6-9) Bendeji ba bipwilo bya Bayuda bādi bafundija amba kupāna byabuntu i kuyampe, kadi amba kukokeja’nka ne kufikija ku kulekelwa bubi. Ino Yesu aye wālombwele patōka amba kupāna kusangaja Leza kekwimaninepo’nka pa kupāna byabuntu bya kukwasha balanda kete.

Tutalei bityetye mwādi mupāninwa mu kipwilo kya bwine Kidishitu kibajinji, nabya netu tuyuke miswelo imoimo ya mwa kukwashisha bakwetu amba tusangaje Leza na kupāna kwetu. Ne kadi, tukayuka kupāna kwa pa bula kukokeja kulongela bakwetu biyampe kutabuka.

‘Kupāna Byabuntu bya ku Lusa’

Mu byaba bivule Yesu wākankamikile bana bandi ba bwanga ‘kupāna byabuntu bya ku lusa,’ nansha na mwalamwina Mabible makwabo bino bishima amba “pānai bya bukwashi” ne amba “pānai ku bitango bya bukwashi.” (Luka 12:33; New English Bible ne A Translation in the Language of the People, wa Charles Williams) Inoko Yesu wādyumwine bantu beepeje na mushipiditu wa kwimwekeja utumbija mwine upāna pa kyaba kya kutumbija Leza. Wānene amba: “Pa kupana byabuntu byobe kokivumija kapulu kumeso obe pamo na banzazangi ba mu shinakoka ne ba mu mikenza’mba, tutumbijibwe ntumbo ku bantu.” (Mateo 6:1-4) Bene Kidishitu babajinji bālondele kino kidyumu, o mwanda bāepukile mushipiditu wa kwimwekeja bu bene Leza wādi na bendeji ba bipwilo ba mu myaka yabo’ya, ino bātonga kukwasha bafudilwe na kwibengidila ne kwibapa byabuntu kufula.

Kifwa mu Luka 8:1-3, tutanga’mo amba Madia Madaleni, Njoana, Susana, ne bana-bakaji bakwabo bādi bakwasha Yesu ne bandi batumibwa  na “bya bupeta bwabo” mu kitalala kinyā. Shako, bano bana-balume kebādipo bafudilwe, ino bāshile misokwe yabo mwanda wa kwipāna na bukomo bwabo bonso enka mu mwingilo. (Mateo 4:18-22; Luka 5:27, 28) Na bubine, bano bana-bakaji bātumbije Leza pa kukwasha boba bana-balume bavuije ne pa mfulo mwingilo wēbapele Leza. Kadi Leza nandi wēbatendele, mwanda wālamine mu Bible nsekununi ya buntu bwabo mwanda wa nkongo ikatanga’yo mu myaka īkaya’ko ikaboile’ko ñeni.​—Nkindi 19:17; Bahebelu 6:10.

Dokasa nandi wādi mwana-mukaji “muyūlwe munda mwandi mīngilo miyampe, ne byabuntu kudi balanda.” Wādi ulongela bakaji ba bishala bafudilwe bivwalwa mu kibundi kyabo kya Yopa kya ku mbadi kwa dijiba. Ketuyukilepo shi wādi wibapotela’byo nansha shi wādi wibasonena’byo. Inoko mingilo yandi miyampe yāikele kumuswija na boba baādi ukwasha, ne Leza mwine nandi wāmwesela pangala pa mutyima wandi wa buntu.​—Bilongwa 9:36-41.

Kutononwa na Mutyima Muyampe Kudi na Mvubu

Lelo i bika byātonwene bano bantu bekale na mutyima wa kupāna? Ke enkapo mutyima wa lusa onkaonka utonwena ku kusaka kukwashañana. Ino abo bādi bemona bu badi na kiselwa kya kulonga difuku ne difuku byobabwanya kulonga mwanda wa kukwasha badi mu bulanda, mu byamalwa, mu misongo ne mu bikambija bikwabo. (Nkindi 3:27, 28; Yakoba 2:15, 16) Kuno ko kupāna kusangaja Leza. Dibajinji kutononwanga na buswe bwa mushike bwa kuswa Leza ne kyaka kya kusaka kwiula bumuntu bwandi bwa lusa ne buntu bwandi.​—Mateo 5:44, 45; Yakoba 1:17.

Mutumibwa Yoano wānene ukoma mvubu idi mu kupāna kwa uno muswelo paāipangwile amba: “Yewa udi ne bintu bya panopantanda, utalanga mwanabo ubudilwe’byo washita pa mutyima wa kanye, lelo penepo lusa [“buswe,” NW] lwa Leza lwikele mudi aye namani?” (1 Yoano 3:17) Kilondololwa kidi patōka. Buswe bwa Leza bo butononanga bantu bekale na buntu. Bine, Leza utendelanga ne kupala mpalo boba balombola mushipiditu wa buntu pamo bwa aye. (Nkindi 22:9; 2 Kodinda 9:6-11) Le umonanga buntu bwa uno muswelo dyalelo? Ivwana bidi byobya byalongekele panopano mu kipwilo kya Batumoni ba Yehova.

Mwine Kidishitu mwana-mukaji mununu wadi na njibo ikimba kulongololwa byabinebine. Ino wadi bunka bwandi ne wa kisaka wa kumukwasha mpika. Myaka mivule, njibo yandi yadi ipwidilwa’mo kupwila kwa bwine Kidishitu, kadi divule wadi udya pamo na muntu ye-yense wadi witabija lwito lwandi. (Bilongwa 16:14, 15, 40) Kipwilo kyonso pa kumona bufudile bwandi, kyekuta umbumo kukamukwasha. Bamo baleta lupeto, bakwabo bakengila. Mu mayenga matyetye onka, bengidi ba kwituma bamwelela’ko musaka umpya, baūbaka mwa koila mupya, bashinwina ne kupenta njibo yonso ya munshi mwa etaje, ne kumubikila tubatyi tupya mu mpishi. Kupāna kwabo  kekwakweshepo enka lolo mufudilwe’wa, ino kwalungile pamo kipwilo kyonso ne balondakani baana amba kino kyo kifwa kya kupāna kwabine kwa bwine Kidishitu.

Miswelo ya kukwasha muntu ne muntu i mivule. Mwene tukokeja kushikatyila pamo na mwanā nshiye? Mwene tubwanya kupotela bakaji ba bishala banunu botuyukile bintu nansha kwibasonena bivwalwa? Lelo tubulwepo kwendela mufudilwe bidibwa nansha kumupa lupeto? Kekitulombepo enka kwikala bampeta pa kusaka kukwasha bakwetu. Mutumibwa Polo wāsonekele amba: “Wivwane shi udi ne mutyima wa kupeja bukidi, nabya kibaitabijibwa monka mwikadile bintu [bidi na muntu], ke mu bya kadi nabyo, mhm.” (2 Kodinda 8:12) Lelo Leza uketwesela madyese enka shi tutambika muntu bukwashi batwe bene? Mhm.

Le Bukwashi bwa Bavule Nabo?

Kyaba kimo bukomo bwa muntu ne muntu pa bula kebubwanangapo. Tala, Yesu ne batumibwa bandi bādi na kibīko kya abo bonso kya kukwasha balanda, ne kadi bādi batambula byabuntu bya kukwasha bantu bobādi batana mu mwingilo wabo. (Yoano 12:6; 13:29) Ne bipwilo bya mu myaka katwa kabajinji nabyo monka na monka, byādi bikonga mukongo shi kudi bafudilwe, biteakanya ne bukwashi bwa bavule bene kipukwi.​—Bilongwa 2:44, 45; 6:1-3; 1 Temote 5:9, 10.

Mukongo umo wa uno muswelo wālongelwe kubwipi na mwaka wa 55 K.K. Bipwilo bya mu Yudea byāponene mu bulanda, kepabulwe padi i pa mwanda wa nzala mikatampe yāikele’ko kinondanonda na penepa. (Bilongwa 11:27-30) Mutumibwa Polo wādi nyeke utele balanda mutyima, wākankamika bipwilo bilete bukwashi, enka ne bya kulampe kwine, kifwa bya ku Masedonya. Wāimanina aye mwine mukongo ne kutwika’o bantu betabijibwe bakatwale’o. (1 Kodinda 16:1-4; Ngalatea 2:10) Ne aye ne bakwabo bene, kekudipo wādi ufutwa pangala pa mingilo yabo.​—2 Kodinda 8:20, 21.

Batumoni ba Yehova nabo dyalelo bapejanga kukakukila bakwabo shi abaponenwa na kimpengele. Kifwa, mu bushipo bwa mwaka wa 2001, bimpumpu bya mvula byaletele malobe makatampe mu Houston, Texas, Etats-Unis. Mobo 723 matuntulu a Batumoni aoneka, mavule mene apomoka. Komite wa bukwashi mu bitatyi bya bimpengele wimaninwe na bakulumpe bene Kidishitu babwenye bisakibwa wabundwa lubilo lonka mwanda wa kupikula bisakibwa ne kulupula lupeto lwa kukwasha Batumoni ba mu kifuko’kya balwe na makambakano ne kulongolola mobo abo. Bengidi ba kwituma batambile mu bipwilo bya kubwipi, baiya kwingila mingilo yonso. Kamoni umo wafwijije’ko mpata pa buno bukwashi, wafula’nka ne kukuleta lupeto lwaatambwile ku kitango kyabo kya bwangudi mwanda wa kulongolola njibo yandi amba lutūlwe mu kibīko kya bukwashi lumone kukwasha bantu bakwabo bafudilwe.

 Inoko pa mwanda utala bitango bya bukwashi, tufwaninwe kudyumuka kwabija kuvulevule kobetwabija. Bitango bya bukwashi bimobimo bifutanga bendeji kapetwa kavule ne kusupakanya lupeto kapwila, ino bishila bene batūdilwa’lo tulupeto tutyetye bininge. Nkindi 14:15 unena’mba: “Mwendalale witabija binenwa byonso: Ino muntu mukosoke aye utadija biyampe matabula andi.” Nanshi i biyampe kubandaula myanda yonso na katentekeji.

Kupāna Kulongela Bakwetu Biyampe Kutabuka

Kudi kupāna kudi na mvubu kupita ne byabuntu bine. Yesu wēsambile pa kuno kupāna paālondolwele nsongwalume mpeta muludiki wāipangwile kyafwaninwe kulonga akamone būmi bwa nyeke. Yesu wāmunene amba: “Enda bidi kapoteje byōdi nabyo, ukape balanda, nabya ukamonanga ne byabuleme mūlu, ebiya wiye koūnonda.” (Mateo 19:16-22) Ivwana, Yesu kānenepo’tu amba, ‘Pa’byo balanda ne kumona ukamona būmi,’ ehe. Ino wābwejeje’ko amba, “Ebiya wiye koūnonda.” Mu muneneno mukwabo, kupāna byabuntu i kuyampe ne i kwa kamweno, ino kwikala mwanā bwanga wa Kidishitu kulombanga bivule.

Kine kyādi kitele Yesu mutyima i kukwasha bantu ku mushipiditu. Kumeso’tu kwa lufu lwandi, wālombwele Pilato amba: “Po pa mwanda o nabutwidilwe pano, ne o naīdile pano panshi na’mba, nkebasapwile [bu]binebine.” (Yoano 18:37) Nansha Yesu byāadi ukwasha balanda, undapa babela, ne kudisha ba nzala, ino mwingilo waābadikile kufundija bandi bana ba bwanga i kusapula. (Mateo 10:7, 8) Bine, mu bufundiji bwandi bwa mfulo wēbasoñenye amba: “Endai nanshi mukafundijei mizo yonso ya bantu nabo ke bāna-babwanga.”​—Mateo 28:19, 20.

Kunena na bubine, busapudi kebukapwijapo makambakano onso a ntanda. Inoko, kusapwila bantu ba miswelo yonso myanda miyampe ya Bulopwe bwa Leza kutumbijanga Leza mwanda busapudi bo bufikidija kiswa-mutyima kya Leza ne kupa boba betabija musapu wa Leza mukenga wa kukamona tumweno twa nyeke. (Yoano 17:3; 1 Temote 2:3, 4) Ubulwe’po kuteja Batumoni ba Yehova pobāya kwisamba nobe kyaba kikwabo? Kyobāya nakyo i kyabuntu kya ku mushipiditu. Kadi bayukile amba uno o muswelo mupite yonso wa kukupa kyabuntu.

[Bifwatulo pa paje 6]

Kudi miswelo mivule ya kulombola amba tutele bakwetu mutyima

[Kifwatulo pa paje 7]

Kusapula kotusapula myanda miyampe kusangajanga Leza ne kukapeja bantu tumweno twa nyeke