“I Dijike Kipunzu mu Mutyima Wami”

“NEMUFWIJA’KO na mutyima wami onso pangala pa kyabuntu kilumbuluke kya dibuku Approchez-vous de Jéhovah. I dijike kipunzu mu mutyima wami​—kisakibwa kya kwimona amba Yehova unswele ne kunkena. Pano nemone amba bine ndi kubwipi na Yehova ne na wandi Mwana muswedibwe. Nsakanga kulombola muntu yense dino dibuku ne kupa’dyo baswe bami bonso.” Uno o muswelo weivwene Kamoni wa Yehova umo pa kupwa kutanga dibuku dya mapaje 320 dyalupwilwe ku Kitango kya Distrike kya mu mwaka wa 2002 ne 2003, kyadi na mutwe wa mwanda unena’mba “Basapudi ba Bulopwe Bapyasakane.” Tubandaulei bidi myanda imoimo idi mu dino dibuku dipya ne mwanda waka dyalupwilwe.

Myanda Imoimo Idi mu Dibuku Dipya

Lelo i myanda’ka idi mu dino dibuku dipya? I myanda yonso ilombwelwe mu bishinte bibidi bya kwifunda bidi mu ino nimelo​—ne mikwabo’po mivule! Dino dibuku didi na mashapita 31, imo ne imo idi na bula busenselela ku bula bwa kishinte kya kwifunda kya mu Kiteba kya Mulami. Kupwa’tu myanda ya ñanjilo ne mashapita asatu mabajinji, dibuku i dyabanibwe mu bipindi biná, kipindi ne kipindi kisambila pa imo ya mu ngikadilo mikatampe ya Yehova. Kipindi ne kipindi kishilula na kubandaula mu kīpi ngikadilo isambilwa’po. Mashapita matyetye alonda’ko esambila pa muswelo ulombolanga Yehova ngikadilo’ya. Kadi kipindi ne kipindi kidi na shapita umo wisambila padi Yesu. Mwanda waka? Mwanda Yesu wānene amba: “Wakumona ami nankyo wamone ne Tata mwine.” (Yoano 14:9) Yesu, kifwa kibwaninine kīsokwele kya Yehova, wālombwele patōkelela mwikadile ngikadilo ya Leza na bilongwa byandi bitenga ku mutyima. Ku mfulo, kipindi ne kipindi kivuya na shapita umo witufundija muswelo wa kwiula Yehova mwa kulombwela mu būmi bwetu ngikadilo isambilwa’po. Dino dibuku dipya, mu myanda yodisambila pa ngikadilo ya Yehova, i dinyemene ku mikanda yonso ya mu Bible.

Dibuku Approchez-vous de Jéhovah didi kadi na myanda mikwabo ya pa bula. Kushilwila pa shapita wa 2, shapita ne shapita udi na kapango kanena’mba: “Bipangujo bya Kulangulukila’po.” Bisonekwa ne bipangujo biletelwe kebiletēlwepo kupituluka mu shapita. Ino i biletwe mwanda wa kukukwasha ulanguluke bininge pa mwanda wisambilwa’po na kwingidija Bible. I kipite buya utange kisonekwa ne kisonekwa na katentekeji. Ebiya kunkamana pa kipangujo, longa buninge bwa kukimba muswelo okibwanya kukukwasha mu myanda ikutala. Kulanguluka kwa uno muswelo kukakutenga ku mutyima ne kukufwenya bininge kudi Yehova.​—Mitōto 19:14.

Bifwatulo bya mu dibuku Approchez-vous de Jéhovah byefundilwe byabinebine ne kulongololwa amba bikale kufundija ne kukunka muntu ku mutyima. Mashapita dikumi ne asamba-abidi adi na bifwatulo biyampe biyule pa mapaje matuntulu bilombola myanda ya mu Bible.

Mwanda Waka Dyalupwile?

Mwanda waka dibuku Approchez-vous de Jéhovah dyalupwilwe? Kitungo kikatampe kya dino dibuku dipya i kwitukwasha tuyuke Yehova biyampe mwa kuningishisha kipwano kyotupwene na Leza wetu.

Lelo kudi muntu olanga ubwanya kumwena byabuyabuya mu dibuku Approchez-vous de Jéhovah, kifwa mwifundi wa Bible ne tutu nansha kaka mwine Kidishitu kakisapulanga? Lelo abe mwine nobe​—kodi kala mushilule kutanga dino dibuku dipya? Shi kwashilwile, ubulwe’po kwitūdila’ko kitatyi kya kushilwididila kutanga’dyo panopano? Tūla’ko kyaba kya kulanguluka pa byobya byotanga. Tukusakila dino dibuku dipya dikukwashe ufwene mpata kudi Yehova Leza, amba umone kusapula myanda miyampe ya Bulopwe bwandi na nsangaji ne bupyasakane bukatampe!