Iulai Yehova, Leza Wetu Wakubulwa Amba Yeu ye Yeu

“Kwa Leza kutupu kulemekwa kwa bantu’mba, yeu ye yeu.”​—LOMA 2:11.

1, 2. (a) Le i mpango’ka yādi na Yehova pa bene Kenani bonso kikonge? (b) Ino i bika byālongele Yehova, ne kino i kilupule bipangujo’ka?

 BENE ISALELA bātejeje Mosesa na katentekeji pobatūdile kitūlo mu Misanza ya Moabu mu 1473 K.K.K. Kikoleja kyādi kibatengele kumeso, bukila bwa Munonga wa Yodano. Papo Mosesa wālombola mpango ya Yehova amba Isalela ufwaninwe kutyumuna mizo mikomo isamba-ibidi ya bene Kenani yādi mu Ntanda ya Mulao. Mosesa wēbakulupije byabinebine amba: “Yehova Leza obe pakebapana ku meso obe, kabidi ukebatyumuna”! Isalela kādipo ufwaninwe kusamba nabo kipwano nansha kwibafwila lusa.​—Kupituluka 1:1; 7:1, 2.

² Inoko Yehova wānyongolwele kisaka kimo mu kibundi kibajinji kyātambilwe na Isalela bulwi. Bantu ba mu bibundi biná nabo bākingwa na Leza. Mwanda waka? Le binkumenkume bya pa kupanda kwa bano bene Kenani bitufundija bika padi Yehova? Ne tubwanya kumwiula namani?

Abaitaba ku Ntumbo ya Yehova

3, 4. I nsango’ka ya bushindañani bwa bene Isalela yāpūkije mityima ya bantu ba mu Kenani?

³ Yehova wālamine ne kulwila bantu bandi mu bula bwa myaka 40 yādi ilumbakana Isalela mu ntanda mutuputupu, kumeso kwa kutwela mu Ntanda ya Mulao. Isalela wālwile na mulopwe wa Alada mwine Kenani, kunshi kwa Ntanda ya Mulao. Yehova wākūkila bene Isalela, bāmutyumuna aye ne bantu bandi ku Holama. (Umbadilo 21:1-3) Kupwa, Isalela wāsāsuka ntanda ya Edoma, wāenda dya kuntenta kwa mu bwikike bwa kungala ne kutunduka kwa Kalunga Kafwe. Mu uno mwaba mo mwādi mushikata bidi Moabu, ino pano mwādi kemudi bene Amole. Ponka’po, Shihone Mulopwe wa Amole wāpela Isalela kupita mu yandi ntanda. Ebiya bālwa nandi pa Yahaza, mobimwekela i kungala kwa Lupongo lwa Munonga lwa Alenona, Shihone wāfwila konka. (Umbadilo 21:23, 24; Kupituluka 2:30-33) Dya kungala bityetye nako, Oka wādi ubikele mu Bashane pa bene Amole bakwabo. Oka wādi shandi mupuñame, inoko kādipo ukokeja nansha dimo kwipaka na Yehova. O mwanda Oka wāipailwe pa Edelei. (Umbadilo 21:33-35; Kupituluka 3:1-3, 11) Penepo nsango ya ano mashindañani pamo ne nsekununi ya Divilu dya Isalela mu Edipito byāenda ntumbo mu bantu ba mu Kenani. *

⁴ Isalela pa kutwela dibajinji mu Kenani, kinondanonda’tu na kwabuka Yodano, wātūdile kitūlo pa Ngilengale. (Yoshua 4:9-19) Papo kibundi kya mpembwe kya Yediko kubwipi’nka nenki. Ino Lehaba mwine Kenani pa kwivwana bilongwa bya Yehova, mutyima wāmutonwena ku kulonga kilongwa kya lwitabijo. Ku mfulo, Yehova pa konakanya Yediko, wāmupandija aye ne bonso bādi mu njibo yandi.​—Yoshua 2:1-13; 6:17, 18; Yakoba 2:25.

5. I bika byālengeje bene Ngibeone bālonge bintu na budyumuku?

⁵ Kupwa Isalela wātamba ku binekaneka bya kubwipi na munonga, wākandila mu mikuna ya pa bukata bwa ntanda. Yoshua, pa kulonda bwendeji bwa Yehova, wāingidija bunwa bwa kukala kibundi kya Ai. (Yoshua, shapita 8) Nsango ya kuno kutyumunwa kwa mwiko yāfikija balopwe bene Kenani ku kwikūkila mu bulwi. (Yoshua 9:1, 2) Bene Hivi, bekadi ba kibundi kya Ngibeone kya kubwipi bāpela kwikupa ku mutamba wabo. Yoshua 9:4 usekununa amba, “balonga bya budyumuku” na mutyima umo. Mwanda  bāivwene monka mwāivwanine Lehaba bunyongolodi bwa bantu ba Yehova pa Divilu, ne kutyumunwa kwa ba Shihone ne Oka. (Yoshua 9:6-10) Bene Ngibeone bājingulula amba i kya bulembakane kulwa na bano bantu. O mwanda Ngibeone ne bibundi bikwabo bisatu bya pabwipi​—Kefila, Belote, ne Kidiatayeadimi​—byātumina Yoshua bantunguluji beinanye bwa abo batamba kulampe mpata. Manwa abo āendeka. Yoshua wāpwana nabo kipwano ne kwibakulupija amba basa kumona lupandilo. Mafuku asatu’tu kupita’po, Yoshua ne bene Isalela bāyuka amba abebadimbe. Inoko, bādi ke batyipe kala mu dijina dya Yehova pa kipwano’kya, o mwanda bādi banenwe’nka kulama’kyo. (Yoshua 9:16-19) Lelo Yehova wāitabije’kyo?

6. Lelo Yehova wālongele namani pāsambile Yoshua kipwano na bene Ngibeone?

⁶ Bene Ngibeone bāikala ke ba kutyaba nkuni ne kuteka mema a bene Isalela, ne a “madabahu a Yehova” ādi mu tabenakulo. (Yoshua 9:21-27) Pakwabo kadi, balopwe batano bene Amole ne ba bulwi babo pa kutuyula bene Ngibeone, Yehova wātenga’po kuboko na kingelengele. Mabwe a mvula āipaya balwana bavule kutabuka boba bāipailwe na bibumbo bya bulwi bya Yoshua. Yehova wālondolola ne kwabija kwāabije Yoshua amba dyuba ne kweji bimane nkū mwanda wa kutyumuna balwana ne pa mfulo. Penepo Yoshua wānena’mba: “Kekwadipo difuku bwa dyodya, dya kunyuma’kwa nansha kumeso’kwa, dyatejeje Yehova ku diwi dya muntu; mwanda Yehova walwidile Isalela.”​—Yoshua 10:1-14.

7. I bubinebine’ka bwāyukile Petelo bulombwelwe patōka mu byāfikile bene Kenani bamobamo?

⁷ Lehaba mwine Kenani ne kisaka kyandi, pamo ne bene Ngibeone, bāakaminwe Yehova ne kulonga bintu mungya kwakamwa kwabo. Byobya byēbafikile bilombola patōka bubine bwa byānene Petelo mutumibwa mwine Kidishitu mwenda myaka’mba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”​—Bilongwa 10:34, 35.

Mwāikadile Yehova na Abalahama ne Isalela

8, 9. Lelo kubulwa ntondo kwa Yehova i kulombolwe namani mu kipwano kyandi na Abalahama ne na muzo wa Isalela?

⁸ Mwanā bwanga Yakoba wākokele milangwe pa buntu bwa Leza padi Abalahama ne pa lutundu lwandi. Abalahama wāikele “mulunda na Leza” pangala pa lwitabijo lwandi, ke pangala pa musuku wandipo, mhm. (Yakoba 2:23) Bine, lwitabijo lwa Abalahama mudi Leza ne buswe bwaādi umuswele byāleteje madyese pa lutundu lwandi. (2 Bilongwa 20:7) Yehova wāmulaile amba: “Kwesela nkakweselanga dyese, kadi mukuvudija nkakuvudija lukunwa lobe bwa ñenyenye ya mūlu, kadi ne bwa musenga udi ku mulomo wa kalunga-kamema.” Ino tala mulao udi mu vese ulonda’ko: “Mu lukunwa lobe e mo ikeselwanga dyese mizo yonso ya panopanshi.”​—Ngalwilo 22:17, 18; Loma 4:1-8.

⁹ Yehova wālombwele amba kādipo na ntondo, mwanda bintu byaālongēle Isalela bilombola byobya byakalongela boba bonso bamukōkele. Bino bintu byo bifwa bituyukija mulombwelanga Yehova buswe bwandi bwa dikōkeji ku bengidi bandi ba kikōkeji. Eyo, Isalela wādi shandi “kileme” kya Yehova, ino ke kunenapo amba bantu bakwabo kebādipo ba kumwena  mu buyampe bwandi. (Divilu 19:5; Kupituluka 7:6-8) Bine, Yehova wākūdile Isalela mu bupika bwa Edipito, wānena ne kunena’mba: “Nemuyuka, bonka banwe kasuku kete, ku mafu onso a panopanshi.” Inoko kadi kupityila kudi mupolofeto Amose ne bapolofeto bakwabo, Yehova wāleta mulao wa kutendelwa utala bantu ba mu “mizo yonsololo.”​—Amose 3:2; 9:11, 12; Isaya 2:2-4.

Yesu, Mufundiji Wakubulwa Amba Yeu Ye Yeu

10. Lelo Yesu wāiwile Shandi namani mu mwanda utala kubulwa ntondo amba yeu ye yeu?

¹⁰ Yesu, kyelekejo kyabinebine kya Shandi, wāiwile kubulwa ntondo kwa Yehova mu mwingilo waāingile pano panshi. (Bahebelu 1:3) Kintu kyāadi utele’ko mutyima mu kine kitatyi’kya, i kusokola “mikōko mijimine ya bwine Isalela.” Ino kālekelepo kusapula bukamoni kudi mwana-mukaji mwine Samadia ku mushimwa. (Mateo 15:24; Yoano 4:7-30) Kadi mudyavita umo, mobimwekela ke Muyudapo, pa kulomba Yesu bukwashi, Yesu wālonga kingelengele. (Luka 7:1-10) Bino byo bilongwa bilombola amba wādi uswele bantu ba Leza. Bana ba bwanga ba Yesu nabo bādi basapula pi na pi. Kino kyālombwele patōka amba bisakibwa bya kweselwa madyese na Yehova byādi bilonda mwikadile mutyima wa muntu, ke muzo wandipo, mhm. Bantu betyepeje, ba mityima myoloke, bādi na nzala ya bubinebine, bo bādi betaba ku myanda miyampe ya Bulopwe. Ino boba ba kwitatula ne bakibengo bādi bafutulula Yesu ne musapu wandi. O mwanda Yesu wānene amba: “Ee! A Tata, Mfumwandya diulu ne panopanshi! Nakufwija byo wasokwela’byo banuke, byobya byo wafile batunangu ne bafundijibwe. Eyo, a Tata, bikale nenki, mwanda e mo byakunengelele.” (Luka 10:21, MB) Netu shi tulongela bakwetu bintu na buswe ne na lwitabijo, nabya twibalongelanga’byo pampikwa amba yeu ye yeu, mwanda kino kyo kiswele Yehova.

11. Kubulwa amba yeu ye yeu kwāmwekele namani mu kipwilo kya bwine Kidishitu kibajinji?

¹¹ Bayuda ne boba ke Bayudapo ba mu kipwilo kya bwine Kidishitu kibajinji, bādi bonso mu ludingo lumo. Polo wāshintulwile amba: “Boba balonga biyampe bakapebwa ntumbo ne buleme, ne ndoe, kubadikila [Muyuda] ebiya kulonda muNgidiki. Ke-kuntu kwa Leza kutupu kulemekwa kwa bantu’mba, yeu ye yeu mhm.” * (Loma 2:10, 11) Kintu kyādi kilengeja bantu bamwene mu buntu bwa Yehova ke musuku wabopo, mhm, ino i mwitabilo wabo ku myanda yobādi bafunda padi Yehova ne pa byepelo biletwa na kikūlwa kya Yesu wandi Mwana. (Yoano 3:16, 36) Polo wāsonekele monka’mba: “Muyuda mwinemwine ke’nkapo yewa udi nabo mwendele muzo ne kutwejibwa ku disao dya ku ngitu, anha. Muyuda wabine i yewa udi nabo munda, mutwalwe disao dya ku mutyima, ke dya ku ngitu po mwendele mukanda musonekwe.” Penepa, Polo pa kutonta ludimi pa kishima “Muyuda” (kishintulula amba “wa Yuda,” ko kunena amba, mutumbijibwe nansha mutendelwe), wābwejeje’ko amba: “Muyuda wabine utumbijibwa na Leza, ke na bantu po, enhe.”  (Loma 2:28, 29, MB) Bine, Yehova utendelanga bonso pakubulwa amba yeu ye yeu. Le batwe netu?

12. Kusokwelwa 7:9 uleta kikulupiji’ka, ne ku bāni?

¹² Mwenda myaka mutumibwa Yoano wāmona mu kimonwa bene Kidishitu ba kikōkeji bashingwe māni pamo bwa muzo umo wa ku mushipiditu wa bantu 144 000, “batūdilwe biyūkeno ba mu bisaka byonso bya bāna ba Isalela.” Kupwa, Yoano wāmona kadi “kibumbo kikatampe . . . [kya bantu] batambile mu mizo yonso, ne mu bisaka byonso ne mu bantu, ne mu ndimi, bēmene mu kifuko kya lupona, ne kya Kana-ka-mukōko, bavwele bivwalwa bitōka, ne tunkindu ku maboko abo.” (Kusokwelwa 7:4, 9) Nanshi i kutupu musuku nansha ludimi luboololwa mu kipwilo kya bwine Kidishitu kya dyalelo. Bantu ba miswelo yonso badi na kyepelo kya kukapanda pa “malwa makatakata” āya kumeso’a ne kutoma ku “nsulo ya mema a būmi” mu ntanda impya.​—Kusokwelwa 7:14-17.

Bipa Biyampe

13-15. (a) I muswelo’ka otukanekenya kwishila kwa mikadilo ne bitamina? (b) Tela bifwa bilombola bipa biyampe bitamba ku kwilombola bulunda.

¹³ Yehova wituyukile biyampe, pamo na muyukilanga shabana muyampe bana bandi. Ne batwe netu mo monka, shi tuyuke bakwetu biyampe na kuta mutyima ku bibidiji byabo ne ku būmi bwabo bwa kunyuma, nabya kwisusa kukatyepa. Nkalañani ya tubila ikajimankana, ino bijimba bya bulunda ne buswe bikaninga. Bumo bukaloa. (1 Kodinda 9:19-23) Kino i kimweke patōka mu mwingilo wingila bamishonele ntanda-bene. Batanga bantu mutyima mu bifuko mobashikete, ku mfulo, bemona bu bana ba kibundi mu bipwilo byobadi’mo.​—Fidipai 2:4.

¹⁴ Bipa biyampe bilupuka ku kubulwa ntondo ya amba yeu ye yeu i bimweke mu matanda mavule. Akililu, utambile mu Efiopya, wemwene amba udi kasuku mu Londoni, mwipata mwa Beletanye. Bushiyena bwandi bwetuntwila’ko mwanda wadi umona amba bantu badi na mushikwa obashikilwe beni batambile mu matanda angi, kintu kimonwa divule mu bizungu bivule bya mu Bulaya. Bine, Akililu wemwenine kintu kishile paendele ku kupwila kwa bwine Kidishitu ku Njibo ya Bulopwe ya Batumoni ba Yehova! Watundailwe’ko biyampe, ne kwija mpika  wemona amba wafika kwabo. Waendelela kumeso bukidibukidi ne kutamija mutyima wandi wa kufwija’ko Umpangi bikatampe. Lubilo lonka, wakimba mikenga ya kusapwila bakwabo myanda miyampe ya Bulopwe mu mwine mwaba’wa. Kupwa, difuku dimo mupwani nandi wa busapudi wamwipangula bitungo byaetungila pano umbūmi, Akililu kishima-tentu amba nkulupile kubadilwa difuku dimo mu kipwilo kisamba Kiamharike. Bakulumpe ba mu kipwilo kyabo kya Angele pa kuyuka kino, bakwata bukidi bonka mpangiko ya kupityija dishikulu dya bantu bonso mu ludimi lwa ba Akililu. Beni bavule ne bene kibundi baitabija lwito lwa kwiya kukwatakanya kupwila kubajinji kwa bantu bonso kwa mu Kiamharike mu Beletanye. Dyalelo, bene Efiopya ne bakwabo banena Kiamharike i belunge umbumo mu kipwilo kyenda kitanta. Bavule badi’mo i bamone amba i kutupu kibakankaja kwilunga ku mutamba wa Yehova ne kulombola kino patōka na kubatyijibwa kwa bwine Kidishitu.​—Bilongwa 8:26-36.

¹⁵ Mikadilo ne bitamina i bishileshile. I kutupu bipityile bikwabo ne bidi munshi mwa bikwabo, i kwishila’tu bitupu. Batumoni ba pa kisanga kya Medita pobadi batala bengidi bapya bepāne ba Yehova babatyijibwa, badi bela nsadi ya tusepo, papo Batumoni bapempudi baile ku Beletanye basumija impolo ya nsangaji ku meso abo. Bisumpi byonso bya bene Medita ne bene Beletanye byalombwele malangatyima abyo, ino mu miswelo mishileshile, ne buswe bwabo bukatampe bobaswele Yehova bwaningishibwa na bijimba bya bulunda bwa bwine Kidishitu.​—Mitōto 133:1; Kolose 3:14.

Kunekenya Mfwatakani

16-18. Sekununa mwanda mumweke ulombola amba mfwatakani ikokeja kunekenibwa mu kipwilo kya bwine Kidishitu.

¹⁶ Wivwane buswe botuswele Yehova ne banabetu bene Kidishitu bwikale na mushike, nabya tukeula bininge Yehova mu muswelo otumona bakwetu. Mfwatakani yo-yonso yotwadi padi nayo pa mizo, nkoba, ne tubila kampanda ikapwa. Tukwate kifwa kya Alubele wāingile mu Kibumbo kya Bulwi kya Beletanye pa Divita II dya Ntanda, kupwa wākwatwa na bene Jampani pa kupona kwa Singapur mu 1942. Kupwa bāmwingidija kintu kya myaka isatu mu “ndyandya ya lufu,” kubwipi na kyokya kyayukene mwenda mafuku bu kilalo kya pa munonga wa Kwai. Divita pa kupwa, wākutululwa, ino wādi kalēma kilo 32 kete, kibanga ne myulu bityumuke, wābela ne munda mupita mashi, bisesela (binzelebinze), ne malaria. Bakutwa nandi tununu ne tununu bāmona dyemo dyabinebine, bavule ne kupanda kwine mpika. Alubele pa kumona ne kupita mu ano malwa, wājokela kwabo mu 1945 na bululu ku mutyima, kadipo usaka’tu nansha kwivwana myanda ya Leza ne bipwilo.

¹⁷ Ilene, mukaja Alubele wāikala Kamoni wa Yehova. Ino Alubele pa kusaka kusangaja mukaji, wādi katanwa ku kupwila kubala-kunga kwa pa kipwilo kya Batumoni ba Yehova ba mwabo. Nsongwalume mwine Kidishitu, mwingidi wa kitatyi kyonso utelwa dya bu Polo wākapempula Alubele mwanda wa kwifunda nandi Bible. Alubele wājingulula bukidi bonka amba Yehova utalanga bantu mungya mityima yabo. Wāpāna būmi bwandi kudi Yehova ne kubatyijibwa wābatyijibwa.

¹⁸ Ebiya Polo wāvilukila mu Londoni, wēfunda Kijapone, wēlunga ne na kipwilo kinena Kijapone. Kitatyi kyaāletele mulangwe wa kusela Batumoni bamo bakapempule kipwilo kyandi kya kala, banabetu bāmuvuluja amba Alubele udi na mfwatakani mikomo pa bene Jampani. Mwanda tamba kasha Alubele ujokela mu Beletanye, upelanga kwimona mpala na mpala na mwine Jampani ye-yense, penepa banabetu beipangula mwasa kukalongela pobasa kwitana nabo. Bine, badi bakamwa bitupu​—Alubele wēbatambwile na kisanso kya bu bana na bana ne kwikaka kwine mpika.​—1 Petelo 3:8, 9.

‘Mwikale Kubaijibwa’

19. I madingi’ka a mutumibwa Polo akokeja kwitukwasha shi tudi na mutyima wa ntondo?

¹⁹ “Kubanga bantu, amba yeu i yeu, kebiyampepo,” mo mwāsonekele Solomone Mulopwe wa tunangu. (Nkindi 28:21) Eyo, i kipēla kupwana na boba botwiyukile nabo biyampe. Ino kyaba kikwabo, tutanga mutyima bityetye ku  boba boketuyukilepo senene. Ino ntondo ya amba yeu ye yeu ke miyampepo ku mwingidi wa Yehova. Bine, tunenwe batwe bonso kulonda madingi mayampe a Polo a ‘kubaijibwa’​—i amo, tubaijei buswe botuswele banabetu bene Kidishitu ba mitamba mishileshile.​—2 Kodinda 6:13.

20. Lelo i mu bika ne bika motufwaninwe kwiula Yehova, Leza wetu wakubulwa amba yeu ye yeu?

²⁰ Twikale na madyese a kwitwa lwito lwa mūlu, nansha na kyepelo kya kwikala nyeke pano panshi, kubulwa ntondo ya amba yeu ye yeu kuketukwasha twikale umbumo, luombe lumo ne Mukumbi nandi umo enka. (Efisesa 4:4, 5, 16) Kulonga buninge bwa kwiula Yehova, Leza wetu wakubulwa amba yeu ye yeu, kuketukwasha mu mwingilo wetu wa bwine Kidishitu, mu bisaka byetu, ne mu bipwilo, bine, umbūmi bwetu bonso. Namani? Kishinte kilonda’ko kikesambila pa uno mwanda.

[Kunshi kwa dyani]

Usa Kulondolola Namani?

• Yehova wēlombwele namani amba kadipo na ntondo ya amba yeu ye yeu mu mwanda wa ba Lehaba ne bene Ngibeone?

• Yesu wēlombwele namani mu bufundiji bwandi amba kadipo amba yeu ye yeu?

• I bika biketukwasha tunekenye mfwatakani pa misaka ne tubila?

[Bipangujo bya Kifundwa]

[Kifwatulo pa paje 8]

Bushindañani bwa Isalela pa Kenani bubashilula

[Kifwatulo pa paje 9]

Yesu kēkakilepo kusapwila mwana-mukaji mwine Samadia bukamoni

[Kifwatulo pa paje 10]

Kupwila kwa bantu bonso mu Kiamharike mu Beletanye

[Kifwatulo pa paje 10]

Buswe bwa Alubele bwaādi uswele Yehova bwāmukweshe anekenye mfwatakani