‘Talai! Uno I Leza Wetu’
‘Talai! Uno I Leza Wetu’
Myanda īsambilwe mu bino bishinte bibidi bya kwifunda īmanine pa dibuku Approchez-vous de Jéhovah, dyalupwilwe ku kitango kya distrike kyalongelwe ntanda yonso mu 2002 ne 2003.—Tala kishinte “I Dijike Kipunzu mu Mutyima Wami” pa paje 29
“I-i, uno i Leza wetu o twadi tukulupile, nandi wetupandija; uno’u i Yehova.”—ISAYA 25:9.
1, 2. (a) Yehova wāityile mukulutuba Abalahama namani, ne kino kitufikija ku kwiipangula kipangujo’ka? (b) Bible witukulupija namani amba kipwano na Leza kibwanika?
“MULUNDA NAMI.” Mo mwāityilwe mukulutuba Abalahama na Yehova, Umpangi wa diulu ne ntanda. (Isaya 41:8) Langa’po bidi—muntu bitupu kusamba bulunda na Mfumu Mubikadi wa diulu ne ntanda! Padi ukeipangula’mba, ‘Le binebine nami mbwanya kufwena kudi Leza namino?’
2 Bible witukulupija amba tubwanya binebine kufwena kudi Leza. Abalahama wādi mufwene kwadi mwanda “waitabije Leza.” (Yakoba 2:23) Ne dyalelo nadyo mo monka, Yehova “ulamine bantu boloke bwandi bulunda.” (Nkindi 3:32, BB) Bible witusoñanya mu Yakoba 4:8 amba: “Fwenai kudi Leza, nandi ukemufwena.” I kimweke patōka amba, shi tutabule matabula a kufwena kwadi, nandi ukalongela monka. Bine, ukafwena kotudi. Ino le binenwa bino kya ku bukomo bwa mushipiditu bilombola amba batwe—bantu ba bubi, bakubulwa kubwaninina—bo batabula ditabula dibajinji? Mhm. Kupwana na Yehova kubwanika mwanda aye ke mutabule kala matabula abidi makatampe a kwitufwenya kwadi.—Mitōto 25:14.
3. Yehova i mutabule matabula’ka abidi etukwasha tusambe nandi bulunda?
3 Dibajinji, Yehova wākwete mpangiko amba Yesu ekale “kupana muya wandi ke kikūlwa kya bavule bene.” (Mateo 20:28) Kino kitapwa kya kikūlwa kyo kitushitwidile dishinda dya kufwena kudi Leza. Bible unena’mba: “Bātwe tumuswele mwanda aye ye umbajinji kwituswa.” (1 Yoano 4:19) Na bubine, Leza “ye umbajinji kwituswa” mwanda wātūdile’ko kyalwilo kya batwe kusamba nandi bulunda. Dya bubidi, Yehova i mwisokwele kotudi. Mu bulunda bo-bonso botusambanga, kipwano kyanzanga na kuyuka binebine bumuntu bwa mukwenu, washilula kutendela ne kwanya ngikadilo yandi kampanda. Langa’po buluji bwa kino kintu. Shi Yehova wādi mwifye, Leza wampikwa kuyukana, longa ketubwanyapo kufwena kwadi. Ino pa kyaba kya kwifya, aye usakanga batwe tumuyuke. (Isaya 45:19) O mwanda i mwisokwele mu Bible, Kinenwa kyandi, mu muswelo otupēlelwa kwivwana—kino i kilomboji kilombola amba wituswele, witusakila netu tumuyuke amba i Tata wetu wa mūlu.
4. Lelo tukamona namani Yehova ponso potwenda tuyuka senene ngikadilo yandi?
4 Le kashā kwamwene mwana mutyetye ulombola balunda nandi shandi, koku umufunka na kusepelela, witemba’ye ne kwitemba, amba “Uno ye tata”? Batōtyi ba Leza nabo badi na buluji bwa kwitembela Yehova. Bible wālaile kala amba kudi kitatyi kikela bantu ba kikōkeji kabobo amba: “I-i, uno i Leza wetu.” (Isaya 25:8, 9) Mu kwenda kujingulula ngikadilo ya Yehova, netu mo mu kwenda kumona amba tudi na Tata mulumbuluke kupita bonso kadi Mulunda netu wa pa mutyima byabinebine. Eyo, kupotolola ngikadilo ya Yehova kwitupanga buluji buvule bwa kufwenena kwadi. Pano tubandaulei ngikadilo iná mikatampe ya Yehova—bukomo, boloke, tunangu, ne buswe, mungya mwitusokwedile’yo Bible. Mu kino kishinte tukesambila pa ngikadilo isatu imbajinji.
“Mutabuke mu Bukomokomo”
5. Mwanda waka i kyendele’mo kwita Yehova kasuku kandi bu ‘Mwinē Bukomo Bonso,’ ne wingidijanga namani bukomo bwandi bwa kitenteji?
5 Yehova i “mutabuke mu bukomokomo byamwiko’tu.” (Yoba 37:23) Yelemia 10:6 unena’mba: “Kekudipo nansha umo mwine [udingak]ene nobe, a Yehova; wi mukatakata, kabidi dyobe dijina i dikatampe mu bukomokomo.” Yehova udi na bukomo bwakubulwa mfulo, i kutupu kipangwa kidingakene nandi. O mwanda witwa kasuku kandi bu ‘Mwinē Bukomo Bonso.’ (Kusokwelwa 15:3) Yehova wingidijanga bukomo bwandi bwa kitenteji mwanda wa kupanga, konakanya, kukinga ne kwaluja bintu. Tubandaulei’tu bidi bifwa bibidi kete—bukomo bwandi bwa kupanga ne bukomo bwandi bwa kukinga.
6, 7. Dyuba didi na bukomo bwa muswelo’ka, ne dilombola bubinebine’ka bwa mvubu?
6 Kitatyi kyoimananga panja mu dyuba kampumpu bushipo, wiivwananga kikoba kyobe namani? Wivwananga kyanga kya dyuba. I amo, kwine’kwa i kwivwana koivwananga mwikadile bukomo bwa Yehova bwa kupanga. Le dyuba didi na bukomo bwa muswelo’ka? Munda mwadyo, musalukanga kyanga kya madengele 15 000 000°C. Shi wadi amba ukokeja kusela kaluseke katyetye bwa mutwe wa lupengele munda mwa dyuba, wekatundulwila pano panshi, longa kubwanyapo kwimana ku makilometele 150 na pokadi kusokwa nako mpika! Ku sekonde ne sekonde, dyuba dilupulanga kyanga kya bukomo budingakene na bwa tutwa twa midiyo ya mabombe a nyukilia aladika. Ino ntanda ijokolokanga na kwisubwila bifikile ku ino nkelwa ya kyanga kitulumukwa. Shi yadi kubwipi, longa mema onso a panshi i mōme pō; kadi shi yadi kulampe, longa i mekwate bwa dibwe mbū. Shi yadi kulampe nansha kubwipi longa pa umbuo wetu kepadipo kyumi nansha kimo.
7 Bantu bavule i basūle dyuba, nansha būmi bwabo byobwimanine pa adyo. Enka namino, babulwa ne kuyuka byotubwanya kwifundila ku dyuba. Mitōto 74:16 wisambila padi Yehova amba: “Ubalongolola kitōkeji ne dyuba kumo.” I kyabine, dyuba ditumbijanga Yehova, mwine “wāpangile diulu ne ntanda.” (Mitōto 146:6) Adyo dino i kimo’tu kya mu bipangwa bya ntanda ne ntanda bitufundija mwikadile bukomo bukatampe bwa Yehova. Shi twendelele na kwifunda myanda ya bukomo bwa Yehova bwa kupanga, po pene tukekala na luzakalo lukatampe.
8, 9. (a) Le i kyelekejo’ka kya kanye kilombola mutyima wa Yehova wa kukinga ne kulama batōtyi bandi? (b) Mukumbi wa mu myaka isekunwinwe mu Bible wādi ulama mikōko yandi namani, ne kino kitufundija bika padi Mukumbi wetu Mukatampe?
8 Yehova wingidijanga kadi bukomo bwandi bukatampe mwanda wa kukinga bengidi bandi ne kwibakwatakanya. Bible i mwingidije bifwa binane abyo’ko bitenga ku mutyima bilombola milao ya Yehova ya kwitukinga. Tala kifwa Isaya 40:11. Pano Yehova widingakanya na mukumbi, bantu bandi nabo na mikōko. Tutanga’mba: “Ukadisha luombe lwandi bwa mukumbi; ukakwatakanya twana-twamikōko mu kuboko kwandi, ne kwituselela mu kyadi kyandi; ne kukunkuja bityebitye yoya yamusha twana.” Lelo ukokeja kumona na mutyima obe byesambilwa’po mu uno vese?
9 Banyema ba bukomo butyetye pamo bwa mikōko kebavudilepo. Mu myaka isekunwinwe mu Bible, mukumbi wādi unenwe kwikala mukankamane pa kukinga mikōko yandi ku bampumpi, ku tuzenza-ntambo, ne ku bantambo kwine. (1 Samwele 17:34-36; Yoano 10:10-13) Ino bitatyi bikwabo, kukinga mikōko kwādi kulomba kwikala na kanye. Kifwa, shi mukōko ubabutwila kulampe na kipopole, mukumbi wādi unenwe kukwatakanya namani kana ka mukōko kakilendalenda? Wādi wikasela mu “kyadi” kyandi—mu mpapo ya mutwelo wandi, pakwabo mu bula bwa mafuku mavule. Le penepo kana ka mukōko kādi kabwanya namani kufika mu kyadi kya mukumbi? Kana ka mukōko kādi kakokeja kufwena mukumbi, mwa kumupolwejeja ku kulu. Ino mukumbi ye wādi ubandama, wātekuna kana ka mukōko, wēkatūla mu kifuko mwakubulwa kyaka, ke mu kyadi kyandi kadi. Bine, kino i kyelekejo kya kanye kilombola mutyima wa Mukumbi wetu Mukatampe wa kukinga ne kulama bengidi bandi
10. I kwitukinga’ka kwitukinga Yehova dyalelo, ne mwanda waka kuno kwitukinga i kwa kamweno nakampata?
10 Yehova uloñanga bintu bivule, ke enkapo’tu kuleta mulao wa kwitukinga. Mu myaka isekunwinwe mu Bible, wālombwele kupityila ku bingelengele amba uyukile “mwakunyongolwela boba ba bwine-Leza mo batompibwa.” (2 Petelo 2:9) Le dyalelo nadyo? Eyo, tuyukile biyampe amba pano kakingidijangapo bukomo bwandi mwanda wa kwitukinga ku binzengele byonso. Inoko witupanga kintu kitabukile bulēme—kwitukinga ku mushipiditu. Leza wetu wa buswe witukiñanga ku bibi bya ku mushipiditu pa kwitukumbanya na bintu byonso bitusakilwa mwa kūminina matompo ne kulama kipwano kyetu kilēme kyotupwene nandi. Kifwa Luka 11:13 unena’mba: “Lelo ino bānweko babi, muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana [m]ushipiditu [s]andu ku bakumulomba?” Buno bukomo bukatampe bwitukwasha tunekenye matompo o-onso etutana. (2 Kodinda 4:7) Nanshi Yehova kasakangapo kulama būmi bwetu mu myaka ibala-inga kete, ehe, ino usakanga kwibulama nyeke ne nyekeke. Na ino milangwe mu ñeni, tukamona amba bine masusu o-onso a mu ino ngikadilo ya bintu i “apela, kadi i a kakitatyi katyutyutyutyu.” (2 Kodinda 4:17) Mwene bino byonso bitufwenyanga kudi Leza wingidija bukomo bwandi na buswe pa mwanda wetu?
‘Yehova Uswele Boloke’
11, 12. (a) Mwanda waka boloke bwa Yehova bwitufwenyanga kwadi? (b) Le Davida wāfudile ku kunena bika pa boloke bwa Yehova, ne bino binenwa bya ku bukomo bwa mushipiditu bituseñanga namani?
11 Yehova uloñanga byonka byendele’mo kadi byoloke, uloñanga’byo nyeke pampikilwa mboloji. Boloke bwa Yehova Leza ke ngikadilopo ya buñumauma, ya kasumalomo itupalula kwadi, ehe, i ngikadilo yanibwa itufwenya kwadi. Bible ulombola patōka mwikadile ino ngikadilo isangamuna mutyima. Shi ke pano, tubandaulei bidi miswelo isatu ingidijanga’mo Yehova boloke bwandi.
12 Dibajinji, boloke bwa Yehova bumutononanga elombole mwaikadile wabinebine kadi wa dikōkeji ku bengidi bandi. Davida mulembi wa mitōto wēmwenine uno muswelo ulombolanga Yehova boloke bwandi. Le Davida wāfudile ku kunena bika pangala pa byaāmwene aye mwine ne milongelo ya Leza yaēfundile? Wānene amba: “Mwanda Yehova uswele kutyiba-mambo [“boloke,” NW] ne kulekelela bapandulwemo bandi mpika; balelelwe nyeke.” (Mitōto 37:28) Bine, kino i kikulupiji kitusenga mpata! Leza wetu kakalekelelapo nansha dimo boba badi na dikōkeji kwadi. O mwanda tukulupilei mu mutyima wandi wa kwifwenya kotudi, mutyima wa kilelo. Bine, boloke bwandi bo bwitukulupija uno muswelo!—Nkindi 2:7, 8
13. Mutyima utele Yehova babimonya-malwa i mumweke muswelo’ka mu Bijila byaāpele Isalela?
13 Dya bubidi, boloke bwa Leza buyukile kubanga bisakibwa bya babimonya-malwa. Mutyima wa Yehova wa kusāsaketa boba bafudilwe i mumweke patōka mu Bijila byaāpele Isalela. Kifwa, Bijila byādi bitūle’ko mpangiko ya kulela bana ba nshiye ne bakaji ba bishala. (Kupituluka 24:17-21) Yehova wādi uyukile būmi bwa makambakano bwādi na bisaka bya uno muswelo, o mwanda wādi aye mwine Shabo Mutyibi kadi Mukingi wabo. (Kupituluka 10:17, 18) Wādyumwine bene Isalela amba shi mumweshe malwa bana-bakaji ne bana batyetye bakubulwa mukwashi, ami nkevwana kwabija kwabo. “Bukalabale bwami bukanana,” ye aye unena mu Divilu 22:22-24. Nansha bukalabale bwa Leza byokebubadilwapo mu ngikadilo yandi mikatampe, inoko ukwatwanga nsungu myendele’mo pa bantu balongela ku kusaka bilongwa bya mankufi, nakampata shi boba balongwa’byo i babimonya-malwa kala.—Mitōto 103:6.
14. I kika kilombola patōka kubulwa mboloji kwa Yehova?
14 Dya busatu, Bible witukulupija mu Kupituluka 10:17 amba Yehova “kabangilepo bantu amba yeu e yeu, mhm, nansha kutambula mpalo ya majikakanwa.” Yehova i mwishile kulampe na bantu badi na bukomo nansha na lupusa, ke-pantu aye kongolwangapo na bupeta nansha na mumwekelo wa panja wa muntu. Kadipo na ntondo nansha na maviyo. Kintu kilombola binebine amba kadipo na mboloji i kino: Kyepelo kya kwikala batōtyi bandi babine, ba kukamona būmi bwa nyeke, kekipelwepo enka bakelenge ba majina babala-banga, mhm. Bilongwa 10:35 unena’mba: “Mu mizo yonso enka umutyina, ulonga bilumbuluke nabya ye waitabijibwa kudi aye.” Kino kyepelo i kipebwe bantu bo-bonso, pampikwa amba yewa ye kazembe yeu i kapwaipwai, yewa i wa lukoba kansangwa, nansha amba mwanda’po ushikatanga mu ntanda kankenge. Mwene buno bo boloke bwabinebine butabukile bonso? I amo, kwivwanija kwa boloke bwa Yehova senene kwitufwenyanga kwadi!
‘E! Munshi Bula’mo mwa Tunangu twa Leza!’
15. Tunangu i bika, ne Yehova witulombolanga namani?
15 Mutumibwa Polo wāelele kabobo katanwa mu Loma 11:33, amba: ‘E! munshi bula’mo . . . mwa tunangu ne buyuki bwa Leza!’ I bine, potubandilanga bintu bishileshile bilombola mubaile tunangu twa Yehova, twakamwanga, kekudipo nansha kimo kyotubwanya kumusendulula’mo. Le tukokeja kushintulula namani ino ngikadilo? Tunangu to tupwanyanga pamo buyuki, kusansanya, ne kwivwanija, kadi twingidijanga byonso pamo. Yehova utekanga mu nkulwe ya buyuki ne kwivwanija kwandi, o mwanda utyibanga nyeke butyibi bupite kulumbuluka, ne kwibufikidija mu muswelo muyampe mpata.
16, 17. Bupangi bwa Yehova bulombola namani bukatampe bwa tunangu twandi? Leta kifwa.
16 Lelo i bintu’ka bimo bilombola patōka tunangu twa Yehova? Mitōto 104:24 unena’mba: “Ē! abe Yehova; mīngilo yobe īdi pangi pangi pene! I mu ñeni [“tunangu,” NW] mo weīpangile yonsololo. Ntanda i miyūle bupeta bobe.” I byabine, mu kwenda kuyuka bintu bilongele Yehova, po pene twenda twakamwa tunangu twandi. Bine, bafundi ba sianse ke befunde bintu bivule mu bipangwa bya Yehova! Kudi’nka ne bupunga bumo butelwa bu biomimetike, bwimanine pa kwiula mwikadile bintu bya kipangila.
17 Kifwa, padi kodi mubandile bukonde bwa tanda–kumbidi mobwikadile. I kipungwa kya kamfula-nkonko. Myonji yabo imo imwekanga ku meso bitupu bu ipēla kutyiba, ayo nanshi myumu kupita ne nsambo ya kilonda, mikomo kutabuka ne myonji isukilwe nayo kotyi kasabwe na bidyanga. Lelo ubaivwana mukomene buno bukonde? Fwatakanya bidi shi bukonde bwa tanda-kumbidi bwadi amba bukokeja kubaijibwa pamo bwa bwanda bwa biluwe bya lui. Longa i bukonde bumo bukomo, bwimika nansha ke amviyo upita mūlu lubilo! Bine, Yehova i mulonge bino byonso ‘mu tunangu.’
18. Le tunangu twa Yehova i tumweke namani mu kwingidija kwāingidije bantu basoneke Bible, Kinenwa kyandi?
18 Bukamoni bwine bukatampe bulombola tunangu twa Yehova butanwa mu Bible, Kinenwa kyandi. Madingi a tunangu adi’mo etulombolanga muswelo mulumbuluke wa kwikala umbūmi. (Isaya 48:17) Ino tunangu twa Yehova ketudingakanibwa i tumweke patōka ne mu muswelo wālembelwe Bible. Namani? Yehova wātongele, na tunangu twandi, kwingidija bantu pa kulemba Kinenwa kyandi. Shi wādi amba wāingidije bamwikeulu pa kyaba kya bantu, le Bible wadi wa kwikala na uno muneñenya witukoka namino? Mhm, longa bamwikeulu bēkwete’ko na kulombola mwikadile Yehova mungya mumweno wabo mwitupite kipimo, balombola mobepānine kwadi. Ino binebine le twadi ba kujingulula senene mumweno wa bintu udi na bipangwa bibwaninine bya ku mushipiditu, bidi na buyuki, bupotolodi, ne bukomo butabukile bwetu kulampe kwine?—Bahebelu 2:6, 7.
19. I kifwa’ka kilombola amba kwingidija bantu bu basoneki i kupe Bible kyanga ne muneñenya witukoka?
19 Kwingidija bantu bu basoneki i kupe Bible kyanga ne muneñenya witukoka kashā. Balembi ba Bible bādi bantu ba malango pamo’nka na otudi nao. Bādi bantu bampikwa kubwaninina, bafikilwa na matompo ne mitabakano pamo’nka bwa batwe. Kyaba kimo bālembele ne kwitela amba ami, pa myanda itala malango abo, ne bikambija byobādi bekonda nabyo. (2 Kodinda 12:7-10) Bāsonekele binenwa kebikokejapo kwisambwa na mwikeulu. Kifwa, ivwana binenwa bya Davida bidi mu Mutōto wa 51. Mungya bilembwa bya kūlu, Davida wāsonekele uno mutōto aye ke mupwe kulonga bubi bukatampe. Wāsaba byonso byādi mu mutyima wandi, wēalakanya bininge, kālombe Leza amufwile’ko lusa. Tutanga mu vese wa 2 ne wa 3 amba: “Ngoije senene, shē, ku bubi bwami, kadi untōkeje ku bupya-mambo bwami. Ke-ne-muntu ami naitabija kujilula kwami, kadi bupya-mambo bwami budi nyeke mu kifuko kyami.” Ivwana vese wa 5: “Talapo bidi, byo nabu[twid]ilwe umbubi, kadi i mu bupya-mambo mwāñimityile lolo.” Vese wa 17 ubweja’ko amba: “Bitapwa bīne bya Leza i mushipiditu mutyumuke; mutyima mutyumuke munekenibwe, abe Leza, kukafutulula’opo, mhm.” Lelo kumwenepo muswelo wādi ujingwa uno mulembi mutyima? Le i ani shi ke’nkapo muntu wampikwa kubwaninina ubwanya kusaba patōka malangatyima a uno muswelo?
20, 21. (a) I kika kinenenwa amba nansha Bible wāsonekelwe na bantu, inoko udi na tunangu twa Yehova? (b) I kika kikesambilwa’po mu kishinte kilonda’ko?
20 Yehova wāingidije bano bantu bampikwa kubwaninina, wētupa’nka byobya bitusakilwa—bilembwa bisonekwe “ku bukomo bwa mushipiditu wa Leza” abyo’ko ne kavumba’mo ka bu muntu. (2 Temote 3:16, NW) Bine, bano balembi bādi baludikwa na mushipiditu sandu. Nanshi i tunangu twa Yehova tobāsonekele, ke twa abo benepo. Tuno to tunangu tufwaninwe kukulupilwa binebine. Tuno tunangu tudi peulu mpata kupita twetu, o mwanda Leza witukoma na buswe amba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.” (Nkindi 3:5, 6) Shi tusaka kufwena kudi Leza wetu wa tunangu tonso, nankyo tulondei ano madingi a tunangu.
21 Ngikadilo ya Yehova milēme, mine mitabuke yonso kunengela i buswe. Muswelo ulombolanga Yehova buswe ukesambilwa’po mu kishinte kilonda’ko.
Lelo Ukivulukile?
• I matabula’ka atabwile Yehova mwanda wa kwitukwasha tusambe nandi bulunda?
• I bifwa’ka bimobimo bilombola bukomo bwa Yehova bwa kupanga ne bukomo bwandi bwa kukinga?
• Yehova wingidijanga boloke bwandi mu mashinda’ka?
• Lelo tunangu twa Yehova i tumweke namani mu bupangi bwandi ne mu Bible?
[Bipangujo bya Kifundwa]
[Kifwatulo pa paje 20]
Yehova ulelele na kanye mikōko yandi pamo bwa mukumbi uselele kana ka mukōko mu kyadi kyandi
[Kifwatulo pa paje 22]
Tunangu twa Yehova i tumweke mu muswelo wāsonekelwe Bible