Busengi ku Boba Babija wa Kwibakwasha

BIBLE ke dibukupo dya bundapi bwa misongo ya mu ñeni. Inoko ditupanga busengi ne bukwashi tumone kusangela būmi nansha byobudi buyule tukoba. Bisonekwa binena byabine amba: “Muntu mubutulwe ne mwana-mukaji, i wa mafuku matyetye, muyule tusuwa.” (Yoba 14:1) Eyo, kubulwa kubwaninina kwetu kwitobolwelanga byamalwa. Ino le mwine uletela bantu masusu i ani?

Bible umutela patōka amba i mushipiditu umbi witwa dya bu Dyabola ne bu Satana. Ye aye “ñongoji wa panopantanda ponso” ulengeja tuvutakanya twikoka na bana ba bantu. Ino Bible witulombola kadi amba kitatyi kyandi kekisa kufula. (Kusokwelwa 12:9, 12) Panopano ponka byamalwa byonso biletele Satana pa bekadi ba ino ntanda bisa kupwijibwa na bukomo bwa Leza. Mungya Bible, ntanda impya kadi myoloke ilailwe na Leza ikafudija kukunguka ne kutyumukwa mutyima kwa bantu.​—2 Petelo 3:13.

Bine, kuyuka amba masusu a bantu i a lupito i busengi bukatampe kashā! Mu buludiki bwa Bulopwe bwa Leza bwa mūlu bupelwe Yesu Kidishitu, mboloji ne masusu bikapwa. Bisonekwa binena pangala pa Mulopwe ubikikilwe na Leza amba: “Aye ukanyongolola mupando pa kwita; ne balanda ba kubulwa wakwibakwasha. Ukebafwila lusa balanda ne badi makasa, kadi ne myuya ya badi makasa ukeīpandijanga. Ukakūla muya wabo ku bongojani ne bikungulu bya bulobo; kadi mashi abo akēkalanga maleme mu meso andi.”​—Mitōto 72:12-14.

Kitatyi kya kufikidila bino binenwa bya bupolofeto kibafwena pabwipi mpata. Tukokeja kukekala na būmi bwa nyeke mu paladisa pano panshi mu ngikadilo milumbuluke. (Luka 23:43; Yoano 17:3) Kuyuka ino milao ya mu Bisonekwa isenga ku mutyima kupānanga lukulupilo ne busengi ku boba babija wa kwibakwasha.

[Kutambile Kifwatulo pa paje 32]

Kana-kakaji kapepwa mutyima: Photo ILO/J. Maillard