“Fwenai Kudi Leza, Nandi Ukemufwena”

Kumeso ne Kunyuma—Wasokola Bukomo bwa Kushinta

SANDRA, mwana-mukaji wa mu Meksike, wadi wimona bu kavukwa-mpuya mu kyabo kisaka. Kusumbulwa ne kubulwa kisanso byadi bimuteneka ku mutyima mu bunkasa bwandi. Unena’mba: “Mu busongwakaji bwami bonso nadi nyeke netyepelwa, kadi nadi ngalakana bininge kine nkyongikadile’ko ne kikadile’ko būmi kine.”

Sandra pa kutwela ku sekondele, washilula kutoma malwa adi atūla shandi ku njibo. Mwenda mafuku, washilula kwipotela aye mwine matyupa, waikala ke nkolwankolwa. “Nkyadipo buya nansha dimo na būmi,” ye aye unena. Sandra pa kubulwa lukulupilo namino, wetumpa’ko na kwitonda bintu bileta lunjingwe. Unena’mba: “Kintu kimo kete kyadi kinkwasha ngilwe makambakano ami, i byonadi nselele mu kambukulu kami: katyupa, binini bileta lujingwe, ne dyamba dityetye.”

Sandra pa kupwa masomo a kiñanga, po pene wakuja mutwe bininge mu bunkolwankolwa. Watompa’nka ne kwiipaya. Ino wapanda.

Sandra wakimbile bukwashi bwa ku mushipiditu ne bwa mu ñeni mu bipwilo pala pala bivule ino bweleyombo. Pa kujimija lukulupilo ne pa kufudilwa, kaabija Leza kyaba ne kyaba’mba: “Le udi’pi? Kyokunkwashisha i kika?” Ino aye pa kwityepelwa mpata kutabuka mafuku onso, Kamoni wa Yehova waiya kwisamba nandi. Kino kyamufikija ku kwifunda Bible. Sandra watengelwe bininge ku mutyima pa kuyuka amba “Yehova udi pa bwipi na boba ba mutyima mutyumuke.”​—Mitōto 34:18.

Mwine obadi befunda nandi Bible wakwasha Sandra evwanije amba Yehova Leza uyukile amba twi bazoze mwanda wa bubi ne kubulwa kubwaninina byotwapyene kudi Adama. Sandra wajingulula amba Leza uyukile amba ketukokejapo kufikila na bubwaninine pa misoñanya yandi myoloke. (Mitōto 51:5; Loma 3:23; 5:12, 18) Kadi wasangele pa kwifunda amba Yehova kabambilepo meso pa bukōkekōke bwetu, ne amba ketulombangapo bipite pa byotukokeja kulonga. Mulembi wa mitōto, wāipangwile amba: “Shi abe, Yehova, ubangile mambo nankyo le i ani, a Mfumwami, ukēmananga?”​—Mitōto 130:3.

Bubinebine bwa kamweno bwa mu Bible bwatengele Sandra ku mutyima bininge i kitapwa kya kikūlwa kya Yesu Kidishitu. Yehova ufwilanga lusa bantu ba kikōkeji kupityila ku kikūlwa, wibamona bu boloke nansha byobadi bampikwa kubwaninina. (1 Yoano 2:2; 4:9, 10) Eyo, tukokeja kumona “kulekelwa kwa myanda,” ne kukwashibwa mwa kunekenenya kwityepelwa kwetu.​—Efisesa 1:7.

Sandra waboile ñeni ya kamweno ku kifwa kya mutumibwa Polo. Polo wāfwijije’ko bikatampe Leza pa buntu bwandi bwa kumulekela bilubo byandi bya pa kala ne kumukwasha mu bulwi bukomo bwaādi ulwa pa kunekenya bukōkekōke bwa kujokelajokela mu bubi. (Loma 7:15-25; 1 Kodinda 15:9, 10) Polo wālemunwine būmi bwandi, ‘wākupila ngitu yandi amba eimune bupika’ mwa kunangila nyeke mu dishinda ditabijibwe na Leza. (1 Kodinda 9:27) Kālekelepo  mutyima wandi wa kulēmenena ku bubi umutwale mu bupika.

Bukōkekōke bwa Sandra nabo bwamuzozekele, ino walwa nabo. Wadi ulombela Yehova na kininga amba amukwashe anekenye’bo, ekale ne kumufwila’ko lusa. (Mitōto 55:22; Yakoba 4:8) Sandra pa kunañuna amba Leza umutele mutyima, washinta būmi bwandi. “Ndi na nsangaji ya kufundija bakwetu Bible kitatyi kyonso,” ye aye unena. Sandra waikele na nsangaji ya kukwasha kaka wandi ne nkasandi mwana-mukaji nabo bayuka Yehova. Ne kadi mu ‘kulonga biyampe’ kwandi, wadi wingidija ne bwino bwandi bwa kiñanga ku bitango bya Batumoni ba Yehova bu mwingidi wa kwituma.​—Ngalatea 6:10.

Le bibidiji byadi bimunine Sandra nabyo? Unena na kikulupiji amba: “Ñeni yami idi tō. Nkikitomangapo malwa, mfwanka, nansha bintu bileta lujingwe. Nkidipo nabyo mvubu. Mwanda natana kyokya kyonadi nkimba.”

[Bushintuludi pa paje 9]

“Natana kyokya kyonadi nkimba”

[Kapango pa paje 9]

Misoñanya ya mu Bible Ikwasha

Ino yo misoñanya imoimo ya mu Bible ikwashanga bavule baleke bibidiji bisubijañana:

“Twioīje bātwe bene ku bubi bonso bwa ku ngitu, ne bwa ku mushipiditu, ne kufikijija bupandulwemo kutyina Leza moyo.” (2 Kodinda 7:1) Leza weselanga enka boba betōkeja ku bya disubi, bepuka bilongwa bya munyanji.

“Kwakamwa Yehova i kushikwa bubi.” (Nkindi 8:13) Kwakamwa Leza na kalēmo kakatampe kukwashanga muntu aleke bibidiji bibi, kifwa dyamba. Muntu mushinte kasangajangapo enka Yehova kete, ino wilamanga ne ku misongo ilenga moyo.

“Mufwanyinwe kukokela bambikavu ne balupusa.” (Tetusa 3:1, MB) Mu bifuko bivule, kwikala na dyamba nansha na lawa ikolwañana i kujilula kijila. Bene Kidishitu kebafwaninwepo kwikala nansha kwingidija bino bintu bipelejibwe.