Kulupila na Mutyima Onso Mudi Yehova mu Bitatyi bya Tusua

“Leza i mpakala yetu ne bukomo bwetu, mukwashi wa mu tusua wa pano pa bwipi ponka.”​—MITŌTO 46:1.

1, 2. (a) I kifwa’ka kilombola amba kunena’tu ku kanwa amba tukulupile mudi Leza kekubwenepo? (b) I kika kinenenwa amba tufwaninwe kulonga bivule kupita’ko kunena’tu amba tukulupile mudi Yehova?

 EYO, kunena amba tukulupile mudi Leza i kuyampe. Ino kulombola’kyo mu bilongwa byetu ko kupite buya. Kifwa, bishima “Mudi Leza Ye Motukulupile” bimonwanga tamba kalā pa makuta a mani ne a bityele a mu États-Unis. * Mu 1956, Kitango kya Buludiki kya États-Unis kyālupwile kijila kinena amba bino binenwa lo ke lubila lwa muzo wa États-Unis. Ino i mwiko, mwanda bantu bavule​—ke’nkapo mu États-Unis ino i kujokoloka ntanda yonso​—badi na kikulupiji kikatampe mpata mu lupeto ne mu bya bupeta kupita’ko mudi Leza.​—Luka 12:16-21.

² Ino batwe bene Kidishitu, tufwaninwe kulonga bivule, ke kunenapo’tu ku kanwa bitupu amba tukulupile mudi Yehova. “Lwitabijo . . . lwakubulwa bilongwa i lufwe,” nanshi ne kunena bitupu amba tukulupile mudi Leza nako kekudipo na buluji shi ketulombola’kopo mu bilongwa byetu. (Yakoba 2:26, MB) Mu kishinte kibadikile kino, twaivwene amba kikulupiji kyetu mudi Yehova kimwekanga patōka potumwabija mu milombelo, potukimba bwendeji bwa mu Kinenwa kyandi, ne potunyemena ku bulongolodi bwandi bwa kwituludika. Tutalei pano muswelo otukokeja kutabula ano matabula asatu mu bitatyi bya tusua.

Shi Tubajimija Kaji ne Shi Tutambula Tulupeto Tutyetye

3. I kufudilwa’ka kwa lupeto kutananga bengidi ba Yehova mu bino “bitatyi bya malwa,” ne tuyukile namani amba Leza udi na mutyima wa kwitukwasha?

³ Batwe bene Kidishitu tufudilwanga mu myanda ya lupeto pamo’nka bwa bantu bonso mu bino “bitatyi bya malwa.” (2 Temote 3:1, NW) Netu tukokeja kukombolwa pa kaji na mu kukopa kwa diso. Pakwabo tukokeja kupumbwa bya kulonga, ketwingila enka twaji twa nshikije-dyuba ino kalupeto kene katambulwa ka mu lwala. Mu byaba bya uno muswelo, tukokeja kwikonda pa ‘kumona bya kukwasha nabyo ba mu kipango kyetu.’ (1 Temote 5:8) Lelo Leza Mwine Mukatakata Mwine udi’tu na mutyima wa kwitukwasha mu bitatyi bya uno muswelo? Bine udi na nao! Eyo, Yehova ketukiñangapo ku makambakano onso etutana mu būmi mu ino ngikadilo ya bintu. Inoko shi tukulupile mudi aye, bishima bya Mitōto 46:1 bikafikidila potudi, binena’mba: “Leza i mpakala yetu ne bukomo bwetu, mukwashi wa mu tusua wa pano pa bwipi ponka.” Ino tukalombola namani amba tukulupile na mutyima onso mudi Yehova mu bitatyi bya tusua?

4. Shi tubaponena mu bufudile bwa lupeto, i bika byotufwaninwe kulomba, ne Yehova ulondololanga namani ino milombelo?

⁴ Muswelo umo wa kulombola kikulupiji kyetu mudi Yehova i kunyemena kwadi mu milombelo. Ino i bika byotukokeja kulomba? I amo, shi tudi mu bufudile bwa lupeto, padi tukasakilwa mpata tunangu tuyampe kupita mafuku onso. Bine, lomba’to mu milombelo! Kinenwa kya Yehova kitukulupija’mba: “Shi kudi ubudilwe tunangu umbukata mwenu, nabya nandi alombe’to nyeke kudi Leza, aye kyaba bulale  wakubulwa ne mitoto mine, ukamupa’to.” (Yakoba 1:5, MB) Bine, lomba Yehova tunangu​—nangu ya kwingidija biyampe buyuki, kwivwanija, ne kusansanya​—mwa kutyibila butyibi buyampe ne kutonga butongi bufwaninwe. Tata wetu wa buswe udi mūlu witukulupija amba ukevwana ino milombelo. Kadi udi na mutyima muyampe mpata wa kuningija tushinda twa boba bamukulupila na mutyima onso.​—Mitōto 65:2; Nkindi 3:5, 6.

5, 6. (a) Mwanda waka i biyampe kunyemena ku Kinenwa kya Leza mwa kutyumwina umanwi bufudile bwa lupeto? (b) I bika byotukokeja kulonga shi tusaka kutyepeja’ko kuzumbijazumbija mutyima shi tubajimija kaji?

⁵ Kukimba bwendeji mu Kinenwa kya Leza nako i muswelo mukwabo wa kulombola amba tukulupile mudi Yehova. Bivulujo byandi bitanwa mu Bible i bintu ‘bikulupilwa.’ (Mitōto 93:5, NW) Dino dibuku dilembwe ku bukomo bwa mushipiditu, nansha byodyāpwile kulembwa pano ke myaka 1 900 ne musubu, didi na madingi akulupilwa ne bujinguludi bufike’po bwitukwasha tutyumwine umanwi bufudile bwa lupeto. Tala bifwa bimo bilombola tunangu tudi mu Bible.

⁶ Solomone Mulopwe wa tunangu wānene tamba kalā’mba: “Tulo twa muntu wa kwingila mingilo i tulumbuluke, shi adye bingi, shi adye bityutyu; ino kīkuta kya mpeta kekimulekapo kulāla tulo, ehe.” (Musapudi 5:12) Kulongolola, kukenda, kukwatakanya, ne kulama bituntwa keko kudya kitatyi ne lupeto. O mwanda shi tubajimija kaji, i biyampe kukwatakanya uno mukenga na kubandaula dipya būmi bwetu, ne kuyuka kushiyañanya bintu byotusakilwa na byotwabila bitupu. Shi tusaka kutyepeja’ko kuzumbazumba kwa mutyima, i kipite buya kushinta’ko bintu bimobimo. Kifwa, lelo ke biyampepo kupēleja’ko būmi, padi na kuvilukila ku lupango lutyetye nansha na kupoteja bituntwa byomona amba kebidipo na mvubu mikatampe?​—Mateo 6:22.

7, 8. (a) Lelo Yesu wālombwele namani amba bantu bakubulwa kubwaninina bavudile kusela mutyima kūlu bya bitupu pangala pa bintu bya ku ngitu? (Tala ne kunshi kwa dyani.) (b) I madingi’ka a tunangu āletele Yesu a mwa kwepukila kuzumbijazumbija mutyima kwa bituputupu?

⁷ Yesu wāpene ano madingi mu Busapudi bwa ku Lūlu amba: “Kemukikambakanya muya wenu amba: Le tudya bika? Ne byo tutoma i bika? Nansha bya ku mubidi amba: Tuvwala ka?” * (Mateo 6:25) Yesu wādi uyukile amba, mungya kibutwila, bantu bakubulwa kubwaninina baselanga mityima kūlu pa kusokola bintu bya kyalwilo bya kwikwasha nabyo. Ino tubwanya namani ‘kuleka kukambakanya muya wetu’ ku bino bintu? Yesu wānene amba: “Badikilai bidi kusaka bulopwe.” Nansha shi tubatanwa na bikoleja’ka, tufwaninwe kutangidija nyeke butōtyi bwa Yehova kumeso mu būmi bwetu. Shi tulonge namino, nabya bisakibwa byetu bya bukile bukya ‘biketutentekelwa’po’ na Tata wetu wa mūlu. Bine, kakabulwepo mu muswelo kampanda kwitupa bitusakilwa mwa kwikadila bomi.​—Mateo 6:33.

⁸ Yesu wāletele kadi ano madingi amba: “Kemukikambakanyai mityima pa mwanda wa bya kensha, mwanda dyakensha dikekala ne byakukambakanya byadyo.” (Mateo 6:34, MB) Ke biyampepo kuzumbijazumbija mutyima bya bitupu pa bintu bikokeja kwitufikila kensha. Mufundi umo unena’mba: “Bintu bine biketufikila kumeso kebivudilepo kukwatañana na byotwakamwa amba byo biketufikila.” Nanshi kulonda na kwityepeja madingi a mu Bible a kuyuka senene bya kutangidija kumeso ne bya kulonga mu difuku dimo akokeja kwitwepukija kuzumbijazumbija mutyima kwa bituputupu.​—1 Petelo 5:6, 7.

9. Shi tubaponena mu bufudile bwa lupeto, i bukwashi’ka botukokeja kutana mu mabuku alupulwa na “umpika wabinebine ne wamanwa”?

⁹ Shi tubafikilwa na bufudile bwa lupeto, tukokeja kadi kulombola kikulupiji kyetu mudi Yehova na kwela diso mu mabuku etukwasha alupulwa na “umpika wabinebine ne wamanwa.” (Mateo 24:45, NW) Kyaba ne kyaba, dipepala Réveillez-vous! dilupulanga bishinte biselele myanda ne madingi esambila pa bikoleja bya  lupeto. Kifwa kishinte “Shi Udi mu Bulofwa​—Le Usa Kulonga’po Namani?” kya mu Réveillez-vous! wa mafuku 8 Kweji 8, 1991, kitela bulombodi bwa myanda mwanda ya mvubu ikweshe bavule bekale bashikatyije mu myanda ya misokwe ne mu ñeni kitatyi kyobaponena mu bulofwa. * Inoko, buno bulombodi bufwaninwe kukwatañana na mumweno muyampe wa mvubu minemine ya lupeto. Uno o mwanda wesambilwepo mu kishinte “Kintu kya Mvubu Mpata Kupita Lupeto,” kyalupwilwe mu nimelo imo yonka.​—Musapudi 7:12.

Shi Ubakolejibwa na Misongo

10. Lelo kifwa kya Mulopwe Davida kitulombola namani amba i kyendele’mo kukulupila mudi Yehova mu kitatyi kya misongo mikatampe?

¹⁰ Lelo i kyendele’mo kukulupila mudi Yehova abe ubela misongo mikatampe? Bine i kyendele’mo! Yehova ukwatwanga bulanda pa kumona bantu bandi babela. Ne kadi, aye udi na mutyima wa kwibakwasha. Kifwa tala mwāikadile Mulopwe Davida. Mobimwekela aye mwine wādi ubela bininge kitatyi kyaāsonekele mwikadilanga Leza na bantu boloke shi ababela. Wānene amba: “Yehova ukamutalanga pa butanda bwa misongo; ukamwadila butanda bwandi mu luba lwandi.” (Mitōto 41:1, 3, 7, 8) Kikulupiji kya Davida mudi Leza kyādi nyeke kikomo, ku mfulo wāpumputumuka mu misongo yandi. Ino i muswelo’ka otukokeja kulombola kikulupiji kyetu mudi Leza kitatyi kyotukolejibwa na misongo?

11. Shi tubaponenwa na misongo, i bika byotukokeja kulomba Tata wetu wa mūlu?

¹¹ Shi tubaponenwa na misongo, muswelo umo wa kulombola kikulupiji kyetu mudi Yehova i kumwabija mu milombelo ya kulomba bukwashi bwa kūminina. Tukokeja kumulomba etukwashe tuyuke kwingidija “ñeni mituntulu” mwa kukimbila bukomo bwa ngitu botukokeja kwikala nabo pangya ngikadilo yotudi’mo. (Nkindi 3:21) Kadi tukokeja kumulomba etupe kitūkijetyima ne kūminina mwa kutyumwina umanwi misongo yetu. Kupityidila, tukasaka kulomba Yehova etukwatakanye, ne kwitupa bukomo bwa kwikala nyeke ba kikōkeji kwadi ne kuleka kujimija bujalale bwetu nansha shi tubatanwa na bintu’ka. (Fidipai 4:13) Kulama bululame bwetu ku meso a Leza ko kwa mvubu kutabuka ne kulama būmi bwetu bwa dyalelo. Wivwane tulame bululame bwetu, nankyo Mwine Upala mpalo uketupa būmi bubwaninine, bwa kwikala bakenke nyeke ne nyekeke.​—Bahebelu 11:6.

12. I misoñanya’ka ya mu Bisonekwa ikokeja kwitukwasha tutyibe mbila miyampe mu myanda ya bundapi?

¹² Kadi kikulupiji kyetu mudi Yehova kitutononanga tunyemene ku Bible, Kinenwa kyandi, kwa kutana buludiki bufwaninwe. Misoñanya itanwa  mu Bisonekwa ikokeja kwitukwasha tutyibe mbila mifwaninwe mu myanda ya bundapi. Kifwa, tuyukile amba Bible ujidikile “bufwityi,” nanshi tukepuka bwanga nansha mundapilo o-onso ukwatañene na majende. (Ngalatea 5:19-21; Kupituluka 18:10-12) Kifwa kikwabo kya tunangu tukulupilwa tudi mu Bible i kino: “Mwendalale witabija binenwa byonso: Ino muntu mukosoke aye utadija biyampe matabula andi.” (Nkindi 14:15) Nanshi shi tusaka kundapibwa, i kipite buya kukimba kuyuka myanda ikulupilwa kupita’ko ‘kwitabija binenwa byonso.’ Ino “ñeni mijalale” iketukwasha tuyuke senene bya kutonga ne kutyiba mbila koku tuyukile bilupuka’ko.​—Tetusa 2:12, NW.

13, 14. (a) I bishinte’ka bifundija myanda ya misongo bilupwilwe mu mapepala Kiteba kya Mulami ne mu Réveillez-vous!? (Tala ne kapango pa paje 31.) (b) I madingi’ka atala pa mwa kushikatyila na misongo ya zenzeka alupwilwe mu Réveillez-vous! wa mafuku 22 Kweji 1, 2001?

¹³ Kadi tukokeja kulombola kikulupiji kyetu mudi Yehova na kukimba mu mabuku a umpika wabinebine. Mapepala Kiteba kya Mulami ne Réveillez-vous! alupulanga kyaba kimo bishinte bifundija senene myanda pala pala itala misongo ne mba kampanda. * Dimodimo ano majulunale alupulanga bishinte bya bantu babwenye kutyumwina umanwi kukolelwa, misongo, ne bulēma bwishileshile. Kadi bishinte bimo biletanga milangwe ikwatañene na Bisonekwa ne madingi a mwa kwikadila na misongo ya zenzeka.

¹⁴ Kifwa, nimelo ya Réveillez-vous! wa mafuku 22 Kweji 1, 2001 wadi na mutwe wa mwanda wa bishinte bivule unena amba “Busengi ku Babela.” Bishinte byadi bilombola misoñanya ya mu Bible ikwasha ne myanda mimweke iselelwe mu binenwa bya bantu badi bepangulwa, badi abo bene babela misongo ipungija bidyoma mu bula bwa myaka mivule. Kishinte “Mwa Kwikadila Biyampe na Misongo Yobe” kyadi kileta ano madingi amba: Longa bukomo bwa kuyuka biyampe misongo yobela. (Nkindi 24:5) Witungile bitungo bifwaninwe, kubadila’mo ne bitungo bya kukwasha bakwabo, ino yuka amba kubwanyapo kufikila pa bitungo pamo na mufikila’po bakwenu. (Bilongwa 20:35; Ngalatea 6:4) Kokolwa kwitolwela. (Nkindi 18:1) Longa kyaba kyobāya kukupempula kikale kya nsangaji ku bakwenu. (Nkindi 17:22) Kupityidila, lama kipwano kya mpwaninine na Yehova ne na kipwilo. (Nahumi 1:7; Loma 1:11, 12) Tubulwe’po kufwija’ko Yehova pangala pa bwendeji bwaitupa kupityila ku bulongolodi bwandi?

Shi Bukōkekōke bwa Ngitu Bwendelela

15. Lelo mutumibwa Polo wābwenye namani kunekenya bukōkekōke bwa ngitu yakubulwa kubwaninina, netu tufwaninwe kwikala na kikulupiji’ka?

¹⁵ “Mudi ami (ko kunena’mba mu ngitu yami) kemwikelepo nansha kimo kinengele,” ye Polo wālembele namino. (Loma 7:18) Polo wēyukīle aye mwine amba i bikomo kulwa na bilokoloko ne bukōkekōke budi mu ngitu yampikwa kubwaninina. Inoko wādi na kikulupiji amba ubwanya kwibinekenya. (1 Kodinda 9:26, 27) Namani? I na kukulupila na mutyima onso mudi Yehova. O mwanda wānene amba: “Yō! Yō! nanshi ne muntu wa malwa! Le i ani wakunyongololapo mu ngitu ya lufu luno? Nanshi nafwijako Leza padi Yesu Kidishitu Mfumwetu.” (Loma 7:24, 25)  Le batwe netu le? Netu tulwanga na bukōkekōke bwa ngitu. Ponso potulwa na buno bukōkekōke i kipēla kujimija kikulupiji kyetu, ne kulanga amba kubapu ketukibwanyapo. Ino Yehova uketukwasha shi twikale pamo bwa Polo, twiubije byabinebine mudi Aye kupita’ko mu bukomo bwa batwe bene.

16. Shi bukōkekōke bwa ngitu bwendelela, i bika byotufwaninwe kulomba, ne tukalonga namani shi tudi na kakenda kotujokelajokela’mo?

¹⁶ Shi bukōkekōke bwa ngitu bwendelela, tulombolei kikulupiji kyetu mudi Yehova na kumwabija mu milombelo. Tufwaninwe kulomba, bine kuzenza Yehova etukwashe na mushipiditu sandu wandi. (Luka 11:9-13) Kadi tufwaninwe kulomba mu muswelo wa pa bula kwīfula, kimo kya mu kipa kya mushipiditu wa Leza. (Ngalatea 5:22, 23) Ino tukalonga namani shi tudi na kakenda kotujokelajokela’mo? Nansha nankyo, ketufwaninwepo kuzoza. Ketufwaninwepo kupungila kulomba Leza wetu wa lusa na kwityepeja, amba etufwile lusa ne kwitukwasha. Yehova kakelapo nansha kuvundamina mutyima “mutyumuke munekenibwe” na bulēmi bwa mutyima wa mundamunda witopeka. (Mitōto 51:17) Shi twisāshila Yehova na mutyima wakubulwa kwididika, ne wa kwisāsa, bine uketukwasha tulwe na matompo.​—Fidipai 4:6, 7.

17. (a) Mwanda waka i biyampe kulanguluka pa muswelo wiivwana Yehova pa bukōkekōke kampanda botulwa nabo? (b) I bisonekwa’ka byokokeja kukwata ku mutwe shi tulwa na mutyima wa kalobolobo? na kukoka ludimi? na mutyima witutonwena ku kwipwija mukose kubi?

¹⁷ Tukokeja kadi kwilombola amba tukulupile mudi Yehova na kukimba bukwashi mu Kinenwa kyandi. Shi twingidija concordance (nkimbilo) ya Bible nansha dibuku Index (nondelo), tukokeja kukimba malondololo a kipangujo, ‘Lelo Yehova wiivwananga namani pa kumona bukōkekōke kampanda bondwa nabo?’ Kulanguluka pa mwiivwaninanga Yehova pa bukōkekōke kukokeja kukomeja mutyima wetu wa kusaka kumusangaja. Tukafula ku kwiivwana mwawiivwanina aye, ne kushikwa byashikilwe. (Mitōto 97:10) Bamo bamonanga amba i biyampe kukwata ku mutwe bisonekwa bisambila pa bukōkekōke kampanda bobalwa nabo. Lelo tulwanga na mutyima wa kalobolobo? Nankyo tukokeja kukwata ku mutwe bisonekwa pamo bwa Nkindi 14:17 ne Efisesa 4:31. Lelo tukolelwanga pa kukoka ludimi lwetu? Nabya tukokeja kukwatyila ku mutwe bisonekwa  pamo bwa Nkindi 12:18 ne Efisesa 4:29. Lelo tudi na mutyima witutonwena ku kwipwija mukose kubi? Nankyo tukokeja kutompa kuvuluka mavese pamo bwa Efisesa 5:3 ne Kolose 3:5.

18. Mwanda waka ketufwaninwepo kwikala na bumvu bwa kulomba bakulumpe bukwashi bwa kunekenya bukōkekōke bwetu?

¹⁸ Kukimba bukwashi bwa bakulumpe ba mu kipwilo batongelwe na mushipiditu sandu nako i muswelo mukwabo wa kulombola kwiubija kwetu mudi Yehova. (Bilongwa 20:28) I amo, bano “bantu bu byabuntu” i mpangiko ikwete Yehova kupityila mudi Kidishitu mwa kukingila ne kulela mikōko yandi. (Efisesa 4:7, 8, 11-14) Eyo, kulomba bukwashi pangala pa bukōkekōke kampanda ke kunekenepo. Tukokeja kwikala na bumvu, motutyina amba bakulumpe baketufutulula. Ino na bubine, bano bana-balume bapye ku mushipiditu baketulēmeka pangala pa kininga kyetu kya kulomba bukwashi. Kupityidila, bakulumpe baloñanga buninge bwa kwiula ngikadilo ya Yehova pa kukumba mikōko. Kekubulwe padi madingi abo asenga, mafike’po, pamo ne bufundiji bwabo butamba mu Kinenwa kya Leza byo bintu bitusakila pa kuningija mutyima wa kunekenya bukōkekōke bwetu.​—Yakoba 5:14-16.

19. (a) Satana utompanga kwingidija namani bukobakane bwa umbūmi mu ino ngikadilo? (b) Lelo kikulupiji kilomba kulonga bika ne bika?

¹⁹ Kokilengwa’ko amba Satana uyukile amba kitatyi kyandi i kityetye. (Kusokwelwa 12:12) Usakanga kwingidija bukobakane bwa umbūmi budi mu ino ntanda bu kintu kya kwituzozeja ne kwitutyumuna mutyima. Bine, twikalei na kikulupiji kikunkane mu binenwa binenwe mu Loma 8:35-39 amba: “Lelo uketukalañanya ne lusa lwa Kidishitu i ani? I bumona-malwa’ni, i bufudile, i kupangwapangwa’ni, le i nzala, i mutaka’ni, i mu kyakanwa kya lufu, i lupete lwa butapa[ni]’ni? . . . Mu byobya byonsololo tukidile b[u]shindañani monka mudi aye wakwitusanswa. Ke-ne-muntu ami ne musumininwe byamwiko, na’mba: Nansha lufu, nansha būmi, nansha bamwikeulu, nansha bēne bakatampe bene, nansha bintu bidipo panopano, nansha bikāyako kumeso, nansha bilobo, nansha bula bwa mūlu, nansha bula bwa panshi, nansha kipangwa kikwabo, shi kika, shi kika, kikamona mwakwitukalañanya ne lusa lwa Leza, ludi mudi Kidishitu Yesu Mfumwetu.” Bine, bino shabyo byo binenwa bilombola kikulupiji mudi Yehova! Inoko kino kikulupiji ke kutunukapo kwa mutyima bitupu. Ino i kikulupiji kitamba ku mbila miluji yotutyiba mu būmi bwetu bwa difuku ne difuku. Shi ke pano, tusumininwei kukulupila mudi Yehova na mutyima onso mu bitatyi bya tusua.

[Kunshi kwa dyani]

Le Ubavuluka?

• Shi tubaponenwa na bufudilwe bwa lupeto, tukokeja namani kulombola amba tukulupile mudi Yehova?

• Tukokeja kulombola namani kikulupiji mudi Leza kitatyi kyotukolejibwa na misongo?

• Shi bukōkekōke bwa ngitu bwendelela, tukalombola namani amba bine twiubijanga mudi Yehova?

[Bipangujo bya Kifundwa]

[Kapango pa paje 31]

Lelo Ukivulukile Bino Bishinte?

Shi tubakolejibwa na makambakano a misongo, tukakankamikwa shi tutanga myanda ya bakwetu babwenye kutyumwina umanwi kukolelwa, misongo, ne bulema. Tala bino bishinte byalupwilwe mu mapepala Kiteba kya Mulami ne Réveillez-vous !

“Kutyumwina Umanwi Bukōkekōke Bwami,” kishinte kyesambile mpata pa mitompwe ne pa luba lwa njia.—Kiteba kya Mulami kya Falanse kya 1 Kweji 5, 1990.

“Nansha Ke Mayumba a Byuma Keamulekejepo Kusapula.”—Réveillez-vous ! wa 22 Kweji 1, 1993.

“Disashi Dyaalamwine Būmi Bwami,” kishinte kyesambile bininge pa bulebe.—Réveillez-vous ! wa 22 Kweji 10, 1995.

“Kuyukilepo Mukekadila Būmi Bobe Kesha,” kishinte kisambile pa kutyumwina umanwi misongo ya kikona mulá kipitepite.—Kiteba kya Mulami kya Falanse kya 1 Kweji 12, 2000.

“Loida Wanekenya Kuba Talala Kwandi,” kishinte kyaimanine pa Kujinwa Bongolo.—Réveillez-vous ! wa 8 Kweji 5, 2000.

“Kwikonda Kwami na Misongo ya Kitanda kya Lubutulo.”—Réveillez-vous ! wa 22 Kweji 7, 2000.

“Kulwa Kwami na Kikandaji kya Ngitu ya Munda.”—Réveillez-vous ! wa 8 Kweji 8, 2001.

“Nanekenye Bulwi Bwami na Njia ya pa Kupwa Kubutula.”—Réveillez-vous ! wa 22 Kweji 7, 2002.

[Kifwatulo pa paje 29]

Shi tubajimija kaji, i biyampe kubandaula dipya būmi bwetu

[Kifwatulo pa paje 30]

Nsekununi ya Loida ilombola kikulupiji mudi Yehova mokipelanga muntu muswelo wa kūminina. (Tala kapango pa paje 31)

[Kifwatulo pa paje 32]

Ketufwaninwepo kwikala na bumvu bwa kulomba bukwashi bwa mwa kunekenyenya bukōkekōke bwetu