Lwitabijo Lumo Lwabine lwa Bwine Kidishitu Ludi’ko

YESU KIDISHITU wāshimikile mutōtelo nansha kipwilo kimo kete. Kino kipwilo wādi umbidi umo, kisaka kimo kya ku mushipiditu. Ko kunena amba kwādi kubungakana kwa bantu batongwe na mushipiditu sandu wa Leza​—bonso bayukane ku meso a Leza bu bandi “bāna.”​—Loma 8:16, 17; Ngalatea 3:26.

Yesu wāfundije amba kudi dishinda dimo kete dingidija Leza pa kutwala bantu ku bubinebine ne ku būmi. Yesu wāshintulwile buno bubinebine bwa mvubu pa kudingakanya dishinda ditwala ku būmi bwa nyeke na dishinda dyendwa’mo. Wānena’mba: “Twelelai pa kakibelo katyetye, ke-kintu kyokya kibelo i kikatampe kyenda kukoneka, ne dishinda nadyo monka, kadi bakatwela monka i bangi bangi. Ino kabelo ka kutwala ku bumi a! a! a! butyeko! ne dishinda monka: ne bakwikamona i batyetye.”​—Mateo 7:13, 14; Yoano 14:6; Bilongwa 4:11, 12.

Kipwilo Kikutyile Umbumo

Ketufwaninwepo kulanga amba kipwilo kya mu myaka katwa kabajinji kyādi “kitango kya bantu badi ntanda yonso, kya konso pi na pi, kilongololwe senene na motuyukile dyalelo shi twisambila pa kipwilo kya katolika,” mo munenena dibuku dimo. (The New Dictionary of Theology) Mwanda waka? Dinena monka’mba “mwanda’tu wa buluji bwa amba kitango kya bantu kilongololwe, kya konso pi na pi namino kekyādi’kopo.”

I kutupu muntu ukokeja kupatanya mulangwe wa kunena amba kipwilo kibajinji kya bwine Kidishitu kekiifwenepo nansha dimo na ino ngikadilo ya bipwilo ibundile bitango bilongololwe shē yotumona dyalelo. Inoko nakyo kyādi kilongololwe. Kipwilo ne kipwilo kekyādipo kīludika akyo kine bwa pala. Ino bipwilo byonso byādi bitabije lupusa lwa kitango kyendeji kyādi mu Yelusalema. Kino kitango​—kya batumibwa ne bakulumpe ba mu kipwilo kya Yelusalema​—kyādi kilama bumo bwa kipwilo bu “umbidi umo” wa Kidishitu.​—Efisesa 4:4, 11-16, BB; Bilongwa 15:22-31; 16:4, 5.

Lelo i bika byāfikile kino kipwilo kimo kete kyabine? Lelo kyo akyo kyāikele ke Kipwilo kya Katolika kikomokomo? Le kyāalamukile ke ngikadilo ya bipwilo bya Mishoni bya majina mulwi mulwi milale mu bipindibipindi yotumona dyalelo’ni, nansha kudi kintu kingi kyālongekele?

“Ñano” ne “Kiyombo Kibi”

Pa kutana malondololo, tubandaulei na katentekeji byobya byānene Yesu amba byo bikalongeka. Padi ukatulumuka pa kuyuka amba Yesu wādi uyukile amba kipwilo kyandi kikajimankana ku meso a bantu ne amba wādi wa kuleka ino ngikadilo ya bulanda yendelele mu bula bwa tutwa twa myaka.

Yesu wākwatañenye kipwilo kyandi na “bulopwe bwa mu madiulu,” amba: “Bulopwe bwa mu madiulu budingakene pamo bwa muntu umo wakunyine nkunwa miyampe mu budimi bwandi. Bufuku bantu po badi balele, walwana nandi waiya wakusulula kiyombo kibi mu ñano, waenda. Penepa misele pa kumena yapa mivungu, kiyombo kibi nakyo kyasokoka. Bengidi ba mwine budimi baiya ke bamunena’mba: ‘A mfumwetu, lelo kwakunyinepo nkunwa miyampe mu budimi bobe? Le kubatambe kino kiyombo kibi nako i kwepi?’ Nandi webalondolola’mba: ‘I unshikilwe walonga nabya.’ Bengidi bamwipangula monka’mba: ‘Le usakile tukebifundule’mo?’ Aye’mba: ‘Anha, mwanda pa kufundula kiyombo kibi padi mwakafundwila’ko ne ñano. Mwikilekei kitamine pamo kufika’nka ne ku mwangulo. Pa kyaba’kya nkanena bangudi’mba: ‘Fundulai dibajinji kiyombo kibi mwikikute bita bita mukekisoke, pa kupwa mukongwije ñano pa kitala kyami.’”​—Mateo 13:24-30, MB.

Yesu wāshintulwile amba aye ye “mukushi.” “Nkunwa miyampe” ifunkila pa bandi bana ba  bwanga babine. “Walwana” i Satana Dyabola. “Kiyombo kibi” nakyo i bene Kidishitu ba bubela bēkujije mu kipwilo kibajinji kya bwine Kidishitu. Kadi wānene amba ukaleka “ñano” ne “kiyombo kibi” bitamina pamo kufika ne ku “mwangulo,” ukangulwa mu kitatyi kya “kuvuika kwa ngikadilo ya bintu.” (Mateo 13:37-43, NW) Lelo bino byonso byādi bishintulula namani?

Kipwilo kya Bwine Kidishitu Kibaoneka

Kinondanonda na lufu lwa batumibwa, bafundiji batupondo bādi befile mu kipwilo bāshilwile kwikitādila. Bādi besamba “byalupatalupata, mwanda wa kukokela bāna-babwanga ko badi.” (Bilongwa 20:29, 30) Ponka’po bene Kidishitu bavule ‘bābomboka mu lwitabijo.’ ‘Bāvundamukila ku mfumo.’​—1 Temote 4:1-3; 2 Temote 4:3, 4.

Kufika mu myaka katwa ka buná K.K. “Bwine Kidishitu bwa Katolika bwāikala ke mutōtelo wa mbulumatadi . . . wa Umbikalo wa Loma,” mo munenena dibuku dimo. (The New Dictionary of Theology) Kwādi “kwikūkila kwa ekelezya ne kitango kya basivile”​—kwityanga kwa Kipwilo na Leta kyādi kintu kishile mpata na nkulupilo ya bene Kidishitu babajinji. (Yoano 17:16; Yakoba 4:4) Dino dibuku dimo dyonka dinena amba mubundilo ne mwikadilo onso wa kipwilo, pamo ne nkulupilo yakyo ya kyalwilo byāshintyile shintē “na lupusa lwa kusakasaka kusoba pamo myanda yonso ya K[ipwanino] K[ikulu] na bisela bya kine platon kya panopano.” Bine, pamo na mwālaile’kyo Yesu Kidishitu, bandi bana ba bwanga babine bāvulankanibwe ku meso a bantu ino bene Kidishitu ba bubela koku benda bavudila’ko.

Bemvwaniki ba Yesu bādi bayuke biyampe mwādi mukomene kushiyañanya ñano na biyombo bibi, kifwa mpopwe, ikalanga miifwane potō na ñano mu buyo. Nanshi pano Yesu wādi uleta kyelekejo kya kulombola amba mu kitatyi kampanda, bikakoma kushiyañanya bene Kidishitu babine na ba bubela. Ino ke kunenapo amba kipwilo kya bwine Kidishitu kyālekele kwikala’ko, ke-pantu Yesu wālaile amba ukendelela kuludika banababo ba ku mushipiditu ‘mafuku onso nyeke kufika ne ku kuvuika kwa ngikadilo ya bintu.’ (Mateo 28:20) Yesu wānene amba ñano ikamena’nka kumena. I bine, mu bula bwa myaka, bene Kidishitu babine​—umo umo nansha kisumpi​—kebādipo babulwa kulonga buninge bwa kulamata ku bufundiji bwa Kidishitu. Ino kebākidipo babundile kitango, nansha bulongolodi buyukane, bumweka ku bonso. Inoko kebādipo pamo bwa ngikadilo ya mitōtelo ya bupondo yādi ifutulwija ne kupunikija dijina dya Yesu Kidishitu mu bula bwa mānga yonso.​—2 Petelo 2:1, 2.

“Muntu Mwine Bupondo Mwine Akasokoke”

Mutumibwa Polo wālaile kintu kikwabo kyādi kya kumwekeja patōka ino ngikadilo ya mitōtelo ya bubela. Wāsonekele amba: “Kemukongolwa na muntu, nansha patyetye pene, ke-dintu dyodya difuku [dya Yehova] kedikafikangapo, nankyo poso kupondoka bidi kukabadikile, ne muntu mwine bupondo mwine akasokoke.” (2 Tesalonika 2:2-4) Uno “muntu mwine bupondo” ke ungipo, i kabumbo ka bendeji ba bipwilo kepele ako kene kyepelo kya kuludika kipwilo kya “bwine Kidishitu.” *

Bupondo bwāshilwile mu mafuku a mutumibwa Polo. Bwāvudila’ko pāpwile kufwa batumibwa ne pāikele kujimankana lupusa lobāshile. Polo wānene amba bukayukena ku “kusomba kwa Satana, ne bukomo bonso, ne biyūkeno, ne bingelengele bya bubelabubela.” (2 Tesalonika 2:6-12) Bine, kino kilombola na bubine bonso mwikadile mingilo ingilanga bendeji bavulevule ba bipwilo mu bula bwa mānga!

Bendeji ba Katolika, pa kukimba kubingija binenwa byabo amba Katolika Loma kyo kipwilo kyabine kimo kete, banenanga amba babo babitobo bakulu “i bapyane batumibwa babajinjijinji kupityila ku kwipingakanapingakana tamba’nka ku ngalwilo.” Ino na bubine, uno mulangwe wa kwipingakana kwa batumibwa keudipo na kyalwilo kiluji mu mānga ne mu Bisonekwa mwine. Kekudipo kiluji kilombola amba ngikadilo ya kipwilo yālupukile’ko kupwa kwa lufu lwa batumibwa ba Yesu yādi iludikwa na mushipiditu sandu wa Leza.​—Loma 8:9; Ngalatea 5:19-21.

Ino le bipwilo bikwabo byābutukile ku kyokya kitelwa bu Kupanduka kwa Bipwilo nabyo le? Lelo byājokele ku kyelekejo kya kipwilo kibajinji kya bwine Kidishitu? Le byājokeje butōki bwa kipwilo kibajinjibajinji kya bwine Kidishitu? Eyo, kinondanonda na Kupanduka kwa Bipwilo, Bible wāikele kusambakana mu bantu bavule mu ndimi yabo. Inoko mānga ilombola amba bino bipwilo byāendelele na kufundija mfundijo mitupe. *​—Mateo 15:7-9.

 Ino yuka kino. Yesu wālaile patōkelela amba kipwilo kyandi kyabine kikajokejibwa mu bula bwa kitatyi kitelwa bu kuvuika kwa ngikadilo ya bintu. (Mateo 13:30, 39, NW) Kufikidila kwa bupolofeto bwa mu Bible kulombola amba tudi mu kine kitatyi’kyo. (Mateo 24:3-35, NW) Byobidi namino, umo ne umo motudi ufwaninwe kwiipangula amba, ‘Lelo kyakyo kipwilo kimo kyabine kidi kwepi?’ Bine, kifwaninwe kujiulwa pampikwa kufufukuta.

Padi ye uno ulanga amba kodi kala musokole kino kipwilo. Ino i kipite buya kutadija shi bine usokwele’kyo. Mwanda waka? Mwanda kudi enka kipwilo kyabine kimo kete, mokyādi kikadile’ko mu myaka katwa kabajinji. Lelo kashā kodi mushikate kubandaula shi kipwilo kyenu kikwatañene mpata na kyelekejo kyāshile kipwilo kya bwine Kidishitu kya mu myaka katwa kabajinji ne shi kilondanga bufundiji bwa Yesu Kidishitu mu kamo ne kamo? Ubulwe’po kushilula kubandaula’kyo pano? Batumoni ba Yehova bakasangala mpata kukukwasha mu kubandaula kobe.​—Bilongwa 17:11.

[Kunshi kwa dyani]

[Bifwatulo pa paje 5]

Lelo kipwilo kyenu kilondanga kyelekejo kyāshile kipwilo kya bwine Kidishitu kya mu myaka katwa kabajinji mu kusapula ne kufundija?