Bible Ukokeja Kukwasha Buluo Bwenu
Bible Ukokeja Kukwasha Buluo Bwenu
BULUO—ku bamo, i kishima kibapa milangwe isangaja. Ku bakwabo, i kishima kibasansa mutyima. Mwana-mukaji umo utompola’mba: “Nemonanga’tu amba kendi mulubulwe kala. Ne mulumbwe kadi ndi na bushiyena kyaba kyonso.”
Lelo i bika bifikijanga bantu babidi ku kukalañana abo bantu bapikile mpiko ya kwiswa ne kwikena? Kintu kibajinji i kubulwa kuyuka byenda na biya na buluo. “Tukujanga mutwe mu kino kijimba pampikwa kufundijibwa kantu ko-konso,” mo munenena mulembi umo wa julunale ya kiñanga.
Ke bavulepo dyalelo badi’ko na kabuyuki pa uno mwanda, mo munenena bwifundi bulongelwe na Mpangiko ya Muzo Itala Maluo, bukimbi bwaimaninwe na Inivelesite ya Rutgers mu New Jersey, États-Unis. “Bavule mu buno bwifundi i boba batamīne mu buluo bwambulwa’mo nsangaji, nansha badi na bambutwile babo belubule,” mo mwasonekele batangidiji ba mpangiko. “Bayukile na bubine buluo butyani mobukolela, ino kebayukidijepo mwikadile buluo buyampe. Bamo bakokeja’tu kunena amba buluo buyampe i bobwa ‘bwishidile na bwa bambutwile bami.’”
Lelo bene Kidishitu abo i bakingwe ku makambakano a buluo? Mhm. Tala bene Kidishitu bamo ba mu myaka katwa kabajinji, bāpelwe madingi a kuleka ‘kusaka kwilamununa’ mu buluo bwabo. (1 Kodinda 7:27) I kimweke patōka amba buluo bwa bantu babidi bampikwa kubwaninina kebubulwangapo tukoba, inoko bukwashi budi’ko. Balume ne bakaji bakokeja kulumbulula kipwano kyabo na kulonda misoñanya ya mu Bible.
Shako, Bible ke kitabopo kya myanda ya maluo. Ino byasonekelwe ku bukomo bwa Yewa wāshilwile mpangiko ya busongi, nanshi misoñanya yandi ibwanya kwitukwasha. Yehova Leza wānene kupityila kudi mupolofeto wandi Isaya amba: “Ami ne Yehova Leza obe ukulombola kakumwenamo wakukukunkuja pa dishinda dyokōkeja kwenda. E-e, shi watejeje ku bijila byami! longa nankyo ndoe yobe yaikele’nka bwa munonga, ne boloke bobe bwa mantanki a kalunga-kamema.”—Isaya 48:17, 18.
Lelo buswe bomwadi mwiswele na mwinē pobe bubashilula kutalala? Le wimonanga’mba udi pa buluo bubudilwe buswe? Mukaji umo utwelele buluo pano ke myaka 26 wanene amba: “I bikomo kushintulula bisanso bitapa muntu udi mu kipwano kya uno muswelo ku mutyima. Bisansanga nyeke kadi kitatyi kyonso.” Pa kyaba kya kulubuka pa buluo bomona amba kebukusangejepo, mwene i biyampe kukimba kulonga’po kintu kampanda kya kupwija makambakano? Kishinte kilonda’ko kikalombola balume ne bakaji misoñanya ya mu Bible ikwasha buluo bwabo mu kintu’tu bidi kimo—mu kupika mpiko.