Milao Poikalanga Ikulupilwa

MĀNGA i miyule milao ilaibwa ino kufikidila’yo mpika. Divule mizo itunyanga kulama bipwano byobasamba basuminwe kuleka kwitamba bulwi, o mwanda bantu bayo belwanga mavita keaneneka. Napoléon wānene difuku dimo amba: “Imbikalo ilamanga milao yayo enka shi abeiningila kulama’yo, ne shi idi na kamweno kwayo.”

Lelo milao ilaya bantu nayo? I kya bulanda shi muntu kafikidijapo byanena! Nakampata shi muntu’wa i muntu oyukile ne okulupile. Bine, bantu bakokeja kutunya nansha kupela kufikijija milao yobalaile.

Bine, milao ya bantu i mishile kulampe na milao ya Leza! Milao ya Leza i ikulupilwa, yabinebine ngalwilo ne mfulo. Mulao wa Yehova Leza o-onso i ukulupilwa. Bine keutunyapo kufikidila. Isaya 55:11 wisambila pa kinenwa kya Leza kekitunyangapo kufikidila’mba: “E monka mukekadila ne kinenwa kyami kyalupuka mu kyakanwa kyami; kekikatolelapo bitupu ko ndi, ehe, nanshi kikalonga kyoki kyo nswele, kabidi kikafikijija biyampe’tu kintu kyo nekitumine.”

Shi ke pano, tufwaninwe kumona namani milao ya Leza isonekelwe mu Bible? Bine, tufwaninwe kwiikulupila. Kifwa, mutumibwa Yoano wāsonekele amba: “Talaipo bidi, kipema kya Leza byo kidi pa bantu, ne ukēkalanga nabo, nabo bakēkala bantu bandi, ne Leza mwine ukēkala nabo, ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.” (Kusokwelwa 21:3, 4) Ukeselwa ano madyese shi ulonge bino byānene Yesu amba: “Buno namino bo būmi bwa nyeke, bendelele na kwilundila’ko buyuki bwa abe, Leza umo kete wabine, ne bwa yewa owātumine, Yesu Kidishitu.”​—Yoano 17:3, NW.