Yehova Witupanga Bisakibwa Byetu bya Difuku ne Difuku
Yehova Witupanga Bisakibwa Byetu bya Difuku ne Difuku
“Kekwikala ne mityima ībidi . . . Shenu uyūkile byo mubudilwe’byo.”—LUKA 12:29, 30.
1. Yehova udishanga namani banyema ne byoni?
LELO kodi mubandile musolwe nansha koni kakwabo kakomona mu bintu bimweka’tu bu bityakuku bya bitupu? Padi kodi mwiipangule i bika byokabwanya kudya na kukomona panshi. Ino Yesu, mu Busapudi bwa ku Lūlu, wālombwele amba tukokeja kuboila ñeni ku muswelo udisha Yehova toni. Amba: “Talaipo bidi ne ku byoni bya mūlu, kukusa kebikuse, kwangula nako kebyangula, nansha komeka umbitala, mhm: nanshi Shenu wa mūlu ye wibidisha. Lelo pa bānwe’pa ke pepi?” (Mateo 6:26) Yehova udishanga bipangwa byandi byonso mu muswelo utulumukwa.—Mitōto 104:14, 21; 147:9.
2, 3. I ñeni’ka ya ku mushipiditu yotuboila ku byetufundije Yesu kulomba bidibwa byetu bya mobukila mobukila?
2 Le penepo mwanda waka Yesu wānene mu lulombelo lwandi lwa kimfwa kulomba’mba: “Witupe ku difuku ku difuku bidibwa bifwanyinwe”? (Mateo 6:11, MB) Kudi ñeni mikata ya ku mushipiditu yotuboila ku kuno kulomba. Dibajinji, kwituvuluja amba Yehova ye Mupāni Mukatampe wa bisakibwa. (Mitōto 145:15, 16) Bantu bakokeja shabo kukuna ne kudima, ino i Leza kete ye utamija’byo ku mushipiditu ne ku ngitu. (1 Kodinda 3:7) Byonso byotudya ne kutoma i byabuntu bya Leza. (Bilongwa 14:17) O mwanda kumulomba etupe bisakibwa byetu mobukila mobukila i kumulombola amba ketumwenepo byaetupa’bya bu bintu bya ku bitupu. Inoko kuno kulomba kekwitutentwilepo kiselwa kya kwingila shi tudi na bukomo bwa kwingila.—Efisesa 4:28; 2 Tesalonika 3:10.
3 Dya bubidi, kulomba kotulomba “ku difuku ku difuku bidibwa bifwanyinwe” kulombola amba ketufwaninwepo kuzumbijazumbija mutyima bya bitupu pa dya kesha. Yesu wābwejeje’ko amba: “I binebine kemukikambakanya mityima’mba: Le tudya bika? ne byo tutoma bīne le bika? ne byo tukavwala bīne bidi pi? Ke-bintu byobya byonso i bisakasaka baJentaila, mwanda Shenu wa mūlu uyūkile ne byo mubudilwe’byo byonso. Nanshi badikilai bidi kusaka bulopwe bwa Leza, ne boloke bwandi kumo, ebiya nankyo ne byabyo byonso bikemutentekelwapo. Kadi kemukakambakanya mityima mu byakesha, ke-dintu dyakesha nadyo dikavuluka byadyo.” (Mateo 6:31-34) Kulomba “ku difuku ku difuku bidibwa bifwanyinwe” kwitukwasha twikale na būmi bupēla bwa ‘bwine Leza ne kusangela mu byotudi nabyo.’—1 Temote 6:6-8, MB.
Bidibwa bya ku Mushipishitu bya Mobukila Mobukila
4. I bika byālongekele mu būmi bwa Yesu ne bwa bene Isalela bilombola amba kudya bidibwa bya ku mushipiditu ko kwa mvubu mpata?
4 Milombelo yotulomba bidibwa bya mobukila mobukila ifwaninwe kwituvuluja ne bidibwa bya ku mushipiditu bya difuku ne difuku. Yesu wādi na nzala mikatampe pa kupwa kushikilwa mafuku mavule kudya mpika, ino wākomena Satana wāmutompele amba alamune mabwe ke mikate, wāmunena’mba: “Kisonekelwe’mba: Muntu nanshi kakamwenapo būmi mu mikate yonka, mhm, poso mu myanda yonso ītamba mu kyakanwa kya Mwine Leza.” (Mateo 4:4) Pano Yesu wātelele binenwa bya mupolofeto Mosesa, wānene bene Isalela’mba: “[Yehova] wakūbije ne kukukwatyija ne nzala, ne kukudisha ne mana o kwayukilepo, nansha bashobe bene kebayukile’opo, mhm; amba akuyukije’mba muntu nanshi kamwenepo bumi ku bidibwa byonka, mhm, muntu umona bumi poso’nka ku byonso bitambanga mu kyakanwa kya Yehova.” (Kupituluka 8:3) Muswelo wādishishe Yehova bene Isalela mana kewādipo enka wa kwibadisha bidibwa bya ku ngitu kete, mhm, ino i ne kwibafundija ku mushipiditu. Kimfwa, bādi banenwe “kuboya’byo bya difuku dimo, mo bukila mo bukila.” Shi muntu waungwija mana mavule apityile pa difuku dimo, ashele’a ādi anunka ne kubola keatambe mvinyu. (Divilu 16:4, 20) Inoko keādipo abola nansha kununka mu difuku dya busamba mobādi bongwija mana a mafuku abidi mwa kumwena bya kudya mu dya Sabado. (Divilu 16:5, 23, 24) Nanshi mana ādi ebavuluja amba bafwaninwe kukōkela ne amba būmi bwabo kebwimaninepo pa mikate yonkayonka, ino i pa kulonda “byonso bitambanga mu kyakanwa kya Yehova.”
5. Le Yehova witupanga namani bidibwa bya ku mushipiditu difuku ne difuku?
5 Ne batwe netu mo monka, tufwaninwe kudya difuku ne difuku bidibwa bya ku mushipiditu biletwa na Yehova kupityila kudi wandi Mwana. Pa kino, Yesu nandi wātongele “umpika wa binebine ne wa manwa” wa kuleya “bidibwa pa kitatyi kifwaninwe” ku ba mu kipango kya lwitabijo. (Mateo 24:45, NW) Kano kabumbo ka umpika kekaletangapo enka bidibwa bivule bya ku mushipiditu mu mabuku a kwifunda nao Bible, ino kakankamikanga umo ne umo atange Bible difuku ne difuku. (Yoshua 1:8; Mitōto 1:1-3) Pamo bwa Yesu, netu tukokeja kutambula bidibwa bya ku mushipiditu shi difuku ne difuku tulonga bukomo bwa kusaka kuyuka ne kulonga kiswa-mutyima kya Yehova.—Yoano 4:34.
Kulekelwa Bubi
6. Le i māpu’ka otulomba kulekelwa, ne Yehova udi na mutyima wa kwitulekela’o shi tubalonga bika?
6 Kulomba kulonda’po mu lulombelo lwa kimfwa i kuno: “Betulekele byamāpu byetu, monka mo tulekela netu māpu a betwapwile.” (Mateo 6:12) Pano Yesu kādipo wisambila pa māpu a lupeto, mhm. Wādi unenena pa kulekelwa kwa bubi bwetu. Mu nsekununi ya Luka ya lulombelo lwa kimfwa, tutanga kuno kulomba’mba: “Witulekele bubi bwetu, mwanda netu tulekelanga bonso betulongele bibibibi.” (Luka 11:4, MB) Nanshi shi tubalonga bubi, tudi pamo bwa batwe baapula māpu kudi Yehova. Ino Leza wa buswe udi na mutyima wa ‘kujimankanya,’ nansha kulekela mapu shi bine tubesāsa ne ‘kuvundamukila kwadi’ na kumulomba etufwile lusa pa lwitabijo lotudi nalo mu kitapwa kya kikūlwa kya Kidishitu.—Bilongwa 3:19; 10:43; 1 Temote 2:5, 6.
7. Mwanda waka tufwaninwe kulomba kulekelwa bubi difuku ne difuku?
7 Ku mutamba mukwabo, tuloñanga bubi kitatyi kyotutunyanga kufikila pa misoñanya ya boloke ya Yehova. Byotudi bapyane bubi, batwe bonso tujilulanga mu binenwa, mu bilongwa, ne mu milangwe, pakwabo tutunyanga kulonga byotunenwe kulonga. (Musapudi 7:20; Loma 3:23; Yakoba 3:2; 4:17) O mwanda tuyuke nansha ketuyukilepo amba tubaluba mu dyalelo, tufwaninwe kulomba mu milombelo yetu ya difuku ne difuku kulekelwa kwa bubi bwetu.—Mitōto 19:12; 40:12.
8. Kulomba kulekelwa bubi kufwaninwe kwitutonona tulonge bika, ne i kamweno’ka kotukamwena’mo ku mfulo?
8 Kulomba kulekelwa bubi kufwaninwe kutamba ku mutyima wa kwibandaula, kwalamuka pa mutyima ne kwisāsa kwimanine pa lwitabijo lotwitabije bukomo bwa kukūla bwa mashi āmwangile Kidishitu. (1 Yoano 1:7-9) Pa kulombola amba milombelo yetu i ya binebine, kulomba kulekelwa kwetu kufwaninwe kulondwa na “mīngilo ya kufwaninwa kwalamuka pa mutyima.” (Bilongwa 26:20) Papo tukekala na lwitabijo amba Yehova udi na kampeja-bukidi ka kwitulekela bubi bwetu. (Mitōto 86:5; 103:8-14) Ku mfulo tukekala na ndoe ya mutyima mikomo ne mwa kudingakenya’yo mwine, “ndoe ya Leza, ya kutabuka ñeni yonso,” ayo yo “īkalama mityima [yetu], ne kufwatakanya [kwetu] kwine kumo mudi Kidishitu Yesu.” (Fidipai 4:7) Ino lulombelo lwa kimfwa lwa Yesu lwitufundija bivule byotufwaninwe kulonga pa kusaka tulekelwe bubi bwetu.
Tulekelei Bakwetu, Shi Tusaka Kulekelwa
9, 10. (a) I bushintuludi’ka bwābwejeje Yesu ku lulombelo lwa kimfwa, ne i mwanda’ka waādi usaka kukoma? (b) Yesu wāletele kadi kyelekejo’ka kilombola mvubu ya kulekela bakwetu?
9 Kintu kisangaja i kino, binenwa “betulekele byamāpu byetu, monka mo tulekela netu māpu a betwapwile” byo byonka kete byāletelepo Yesu bushintuludi kampanda mu lulombelo lwa kimfwa. Pa kupwa kufudija lulombelo, wābwejeje’ko amba: “Shi mulekele bantu byo bemujilula, nankyo nenu Shenu wa mūlu ukemulekela. Ino wivwane kemulekele bantu byo bemujilula, nabya nenu nankyo Shenu wa mūlu nandi kakemulekelapo byo mujilula, ehe.” (Mateo 6:14, 15) Pano Yesu wālombwele patōka amba Yehova uketulekela enka shi netu tudi na mutyima wa kulekela bakwetu.—Mako 11:25.
10 Yesu wāletele kitatyi kikwabo kyelekejo kilombola kine kyotufwaninwe kulekela bakwetu shi tukimba Yehova nandi etulekele. Wēsambīle pa mulopwe wāfwidile lusa umpika wāmwapwile mapu mavulevule. Ino kupwa mulopwe wāpa uno mukelenge mfuto milobo mwanda wāpelele kulekela mupika mukwabo mapu matyetye mapitwe na andi kulampe kwine. Yesu wāfudija kyelekejo kyandi amba: “I enka namino ne Tata wa mūlu, aye ukemulongela monka, shi kadi bānwe bonso ku muntu, ku muntu, kemukalekele ne mutyima wa binebine mambo a bamwanenu.” (Mateo 18:23-35) Ñeni iboilwa’po idi patōka: Mapu a bubi etulekela Yehova ku muntu ku muntu i mavule mpata keabadika, matabuke mapu a bibi byonso bitulubila bakwetu. Ne kadi Yehova witulekelanga difuku ne difuku. Bine, netu tulekelei bakwetu betulubila na dimodimo.
11. I madingi’ka āletele mutumibwa Polo otukalonda shi tusaka Yehova etufwile lusa, ne i bipa’ka biyampe bikalupuka’ko?
11 Mutumibwa Polo wāsonekele amba: “Mwikale ne kanye bānwe bene na bene, ne mutyima wa kukōka, mwikale kwilekela bānwe bene, monka mwemulekele aye Leza mudi Kidishitu.” (Efisesa 4:32) Kwilekela ko kuleta ndoe mu bene Kidishitu. Polo wāsoñenye kadi amba: “Vwalai pamo bwa batongibwe ba Leza, bapandulwemo, baswedibwe, mutyima wa lusalusa ne kanye, ne bumvu, ne kikōkeji, ne kutūkija mutyima; kadi ne kwifudila bānwe bene na bene, ne kwilekela bitupu bānwe bene, shi umo wapi mambo ku mukwabo; monka mwemulekele aye Mfumwetu ne bānwe nenu mulongele monka. Ebiya pa bino byonso tentekaipo lusa, lo lwakulamankanya lufikijije.” (Kolose 3:12-14) Byonso bino i binenwe ne mu lulombelo lwētufundije Yesu amba: “Betulekele byamāpu byetu, monka mo tulekela netu māpu a betwapwile.”
Kukingwa Potutompibwa
12, 13. (a) Lelo kulomba kwilonda na kwa mfulo mu lulombelo lwa kimfwa kekushintululapo namani? (b) Mutompi wa mfulo ne ngalwilo i ani, ne milombelo yetu ya kuleka kutwalwa mu kutompibwa idi na buluji’ka?
12 Kulomba kwilonda na kwa mfulo mu lulombelo lwa kimfwa lwa Yesu i kuno: “Kebaketutwala mu kutompibwa, ehe.” (Mateo 6:13) Lelo Yesu wādi usaka kunena amba tufwaninwe kulomba Yehova aleke kwitutompa? Ke amopo, mwanda Yakoba mwana wa bwanga wāsonekele ku bukomo bwa mushipiditu amba: “Pa kutompibwa kekukinena nansha umo’mba: Natompibwa na Leza; mhm; ke-muntu Leza kayūkilepo kutompibwa ne bubi, ne aye mwine mo monka katompangapo muntu, mhm.” (Yakoba 1:13) Kadi mulembi wa mitōto wāsonekele amba: “Shi abe, Yehova, ubangile mambo nankyo le i ani, a Mfumwami, ukēmananga?” (Mitōto 130:3) Yehova katengelangapo kutala potuluba, kadi na bubine ketutompangapo amba tulube. Penepo kino kipindi kya mu lulombelo lwa kimfwa kikimba kunena bika?
13 Muntu witutompanga mwa kwitulubijija, usaka tupone mu bya kyongo byandi ne kwitubokota pa mulongo, i Satana Dyabola. (Efisesa 6:11) Aye ye Mutompi wa mfulo ne ngalwilo. (1 Tesalonika 3:5) Potulomba amba baleke kwitutwala mu kutompibwa, tulombanga Yehova amba kaketuleka tupone kitatyi kyotudi mu matompo. Tumulomba etukwashe kutyina amba “Satana waketudyumukila” ne kwitukwata mu matompo andi. (2 Kodinda 2:11) Kyotulomba i tushale “pafīta pa Mwinemukatakatamwine,” potukingwa ku mushipiditu pamo na bonso betabije bubikadi bwa Yehova mu byonso byobalonga.—Mitōto 91:1-3.
14. Mutumibwa Polo witukulupija namani amba Yehova kaketwelapo shi tumwabija kitatyi kyotutanwa na matompo?
14 Tukulupilei’tu amba shi bine tusaka kukingwa monka motwikilombwela mu milombelo yetu ne mu bilongwa byetu, Yehova kaketwelapo. Mutumibwa Polo witukulupija’mba: “Kekwadipo kyakutompa kyemutompele, nansha kimo, poso byonka bifikile pa bukomo bwa pa muntu, nanshi Leza i wabinebine, wampikwa kwimulekelela’mba: Batompibwe na bitabuke bukomo bwabo; ino nanshi, ponka pa kyakutompa, nandi ukasaula dishinda dya kupandilamo, amba mumone mwakutūkijija mutyima monka.”—1 Kodinda 10:13.
“Betunyongolole Kudi Yewa Mubi”
15. Mwanda waka pano po pene potufwaninwe kulomba kunyongololwa kudi yewa umbi?
15 Mungya bilembwa bikulupilwe bya ku makasa bya Bisonekwa bya Kingidiki bya Bwine Kidishitu, lulombelo lwa kimfwa lwa Yesu lufula na bino binenwa’mba: “Betunyongolole kudi yewa mubi.” * (Mateo 6:13) Kukingwa kudi Dyabola kudi na mvubu mpata mu kino kitatyi kya ku mfulo mwanda Satana ne bademona bandi i bapangwe mūlu, batambanga divita bashele’ko bashingwe māni, “bālamine bijila bya Leza, ne kulamata ku busapudi bwa Yesu,” pamo ne bapwani nabo ba mu “kibumbo kikatampe.” (Kusokwelwa 7:9; 12:9, 17) Mutumibwa Petelo wādyumwine bene Kidishitu amba: “Tūkijai mityima, tengelai, wimushikilwe, ke dyabola kadi, unangakana bwa ntambo ubuluma, ukimba wakubokota. Ino aye mukomenei ne bukankamane bwa mu kwitabija kwenu.” (1 Petelo 5:8, 9) Satana usaka kwimika mwingilo wetu wa busapudi, o mwanda utompa kwitukwatyija moyo kupityila kudi bengidi bandi ba pano panshi—bekale ba bipwilo, bansunga, nansha ba politike. Ino shi twimanije, Yehova uketunyongolola. Yakoba mwana wa bwanga wāsonekele amba: “Kōkelai Leza; mumukomene dyabola, nandi ukemunyema.”—Yakoba 4:7.
16. Yehova wingidijanga dishinda’ka dya kukwasha bengidi bandi badi mu kutompibwa?
16 Yehova wālekele wandi Mwana atompibwe. Ino Yesu pa kupwa kukomena Dyabola, na kwingidija Kinenwa kya Leza mwa kwikingila, Yehova wātuma mwikeulu wa kumukankamika. (Mateo 4:1-11) Ne kotudi nako mo monka, Yehova wingidijanga bamwikeulu bandi mwanda wa kwitukwasha shi tulomba na lwitabijo ne kwiubija mwadi. (Mitōto 34:7; 91:9-11) Mutumibwa Petelo wāsonekele amba: “Yehova uyūkile mwakunyongolwela boba ba bwine-Leza mo batompibwa, ne kwibalama bakondame mu malwa ku difuku dya kidye.”—2 Petelo 2:9.
Bunyongolodi bwa Kamfula-Nkonko Bubafwena
17. Yesu wātandikile bintu mobifwaninwe biyampe namani pa kwitushila lulombelo lwa kimfwa?
17 Mu lulombelo lwa kimfwa, Yesu i mutandike bintu mobifwaninwe biyampe. Bintu byotunenwe kukambakena dibajinji i kuyukana kwa buujila bwa dijina dikatampe kadi dikola dya Yehova. Kingidilwa kikafikidija kino i Bulopwe bwa Meshiasa, o mwanda tulomba buno Bulopwe bwiye konakanya ano malopwe onso nansha imbikalo ya bantu bambulwa kubwaninina, mwanda wa kiswa-mutyima kya Leza kilongeke ne pa mfulo pano panshi monka mokilongekela mūlu. Lukulupilo lwetu lwa kukekala na būmi bwa nyeke mu paladisa pano pa ntanda lwimanine pa kuyukana kwa buujila bwa dijina dya Yehova ne pa kwitabijibwa kwa bubikadi bwandi boloke mu diulu ne ntanda monso. Ebiya shi tubapu kulomba bino bintu bya mvubu, tukokeja kulomba bisakibwa byetu bya mobukila mobukila, kulekelwa bubi bwetu, ne kunyongololwa mu matompo ne mu makinga a yewa umbi, Satana Dyabola.
18, 19. Lulombelo lwa kimfwa lwa Yesu lwitukwasha namani mwa kwikadila batengele, ‘bominine ne ku mfulo kwine’?
18 Bunyongolodi bwetu bwa kamfula-nkonko kudi yewa umbi ne ngikadilo yandi ya bintu mibole kubafwena. Satana uyukile biyampe amba kubamushadila “kakitatyi katyutyu” ka kukalabela ino ntanda, nakampata bengidi ba kikōkeji ba Yehova, “bukalabale bukatampe.” (Kusokwelwa 12:12, 17) Mu kiyukeno kya bipindi bivule kya “kuvuika kwa ngikadilo ya bintu,” Yesu wālaile binkumenkume bikata, bikwabo bikitutengele kumeso’ku. (Mateo 24:3, 29-31, NW) Potumona binkumenkume bifikidila, lukulupilo lwetu lwa kunyonglolwa nalo lwenda lumweka. Yesu wānene amba: “Abyo pa kwalula kufika kabandukei, talulaipo mitwe yenu ke-pantu kukūlwa kwenu kubafwena.”—Luka 21:25-28.
19 Lulombelo lwa kimfwa lutyite senene lwālombwele Yesu bandi bana ba bwanga lwitupa buludiki bupotoloke bwa kuyuka byotufwaninwe kulomba mu milombelo yetu pano pafwena mfulo. Nanshi tusumininwei amba kufika ne ku mfulo, Yehova ukendelela na kwitupa bisakibwa byetu bya mobukila mobukila, ku mushipiditu ne ku ngitu. Kutengela kotungela mu milombelo ko kuketulengeja “tūminine ponka pa ngalwilo ya bukankamane bwetu, pototo, pō, ne kumfulo kwine.”—Bahebelu 3:14; 1 Petelo 4:7.
[Kunshi kwa dyani]
^ Mabible amo a kala, kifwa Mukanda Ukola wa Mwine Leza, ufudija Lulombelo lwa Mfumwetu na byobya bitelwa bu mvuyo ya disambila, amba: “Ke-buntu bulopwe i bobe, ne bukomo, ne ntumbo kumo, nyeke ne nyeke-ke, Amena.” Dibuku dimo (The Jerome Biblical Commentary) dinena’mba: “Mvuyo ya disambila . . . keidipo mu [bilembwa bya ku makasa] bivule bikulupilwe.”
Tupitulukei’mo
• I bintu’ka bibadilwa mu kulomba kotulomba “ku difuku ku difuku bidibwa bifwanyinwe”?
• Shintulula buluji bwa kulomba amba “betulekele byamāpu byetu, monka mo tulekela netu māpu a betwapwile.”
• Kulomba kotulombanga Yehova amba kebaketutwala mu kutompibwa kushintulula namani?
• Mwanda waka tufwaninwe kulomba amba “betunyongolole kudi yewa mubi”?
[Bipangujo bya Kifundwa]
[Kifwatulo pa paje 25]
Tufwaninwe kulekela bakwetu shi tusaka netu kulekelwa
[Kutambile Kifwatulo pa paje 23]
Lydekker