Busengi ku Boba Basusuka

BANA-BALUME ne bana-bakaji ba kikōkeji ba pa kala pobādi basusuka, bādi balombela na kininga amba Leza amone kwibaludika. Ino, bādi kadi bakimba miswelo ya kupēleja’ko masusu abo, kimfwa na kulonga bukomo bwa kwepuka basusujañani. Kimfwa Davida, kukulupila kwaādi ukulupile mudi Yehova pamo ne bukomo bwaālongele byo byāmukweshe ōminine byamalwa. Le batwe netu dyalelo?

Shi ususuka, kubulwangapo kuboya ñeni ya mwa kupwijija makambakano obe. Kimfwa, shi ubaponena mu bulofwa, mwene uloñanga bukomo bwa kukimba kaji kafwaninwe ka kukwatakanya kisaka kyobe ne abe mwine? (1 Temote 5:8) Nansha shi ususuka na misongo kampanda, mwene ukimbanga bundapi bufwaninwe bwa kukukwasha? Mwanda usangaja i uno wa kuyuka amba Yesu, muntu wādi na bukomo bwa kwa Leza bwa kundapa miswelo ne miswelo ya mba, wāyukile amba ‘babela basakilwanga ñanga.’ (Mateo 9:12) Ino byamalwa byobe padi i bikomo mwa kufundwila; pakwabo bikulomba kwendelela na kūminina’byo.

Le kyokusapwidila’byo Yehova Leza mu milombelo i kika? Kimfwa, shi tukimba kaji, kulomba koku tukulupile mudi Leza kuketukwasha tukomene matompo o-onso a kwitabija kaji ketupe na misoñanya ya mu Bible. Ne kadi tukepuka kujiminina “kulampe kwine na lwitabijo” pangala pa lwiso nansha kusanswa kwa lupeto. (1 Temote 6:10, MB) Bine, ponso potukwata butyibi bukatampe butala pa kaji, pa kisaka nansha pa bukomo bwa ngitu yetu, tulondei madingi a Davida wānene amba: “Ela kiselwa kyobe padi Yehova, nandi ukakulelanga; kakalekapo moloke kujina, nansha patyetye pene.”—Mitōto 55:22.

Kadi milombelo itamba ku mutyima iketukwasha twikale na ñeni mijalale kutyina amba masusu aketutyintyidila. Mwine Kidishitu umo wa bine, ke mutumibwa Polo kadi, wāsonekele amba: “Mu byonso byo musaka muyūkije’byo kudi Leza monka mu kulombela, ne mu kumwisashilapo, ne kumufwija ponka.” Le milombelo ya binebine iketusenga namani? “Ndoe ya Leza, ya kutabuka ñeni yonso, īkalama mityima yenu, ne kufwatakanya kwenu kwine kumo mudi Kidishitu Yesu.” (Fidipai 4:6, 7) Bine ndoe ya Leza ‘itabukile ñeni yonso.’  O mwanda ikokeja kwitufukatyija mityima shi tubalēmenenwa na kupepwa kwa mutyima. ‘Ikalama mityima yetu ne kufwatakanya kwetu kwine kumo,’ kwitulekeja kulonga bintu na kansontomokela ne pambulwa tunangu, bintu bibwanya kwitubwejeja’ko masusu otususuka kala.

Milombelo ikokeja kulengeja bintu byashinta. Mutumibwa Polo paādi mukutwe mu Loma, wānene na kwityepeja bene Kidishitu nandi amba balombele pangala pandi. Mwanda waka Polo wēbalombele kino? Wāsonekele amba: “Nemwisashila ne kininga kikatampe ponka na’mba, mulonge kino’ki amba, ndubulwe kwako ko mudi bukidibukidi.” (Bahebelu 13:19) Mu muneneno mukwabo, Polo wāyukile amba kuteja kukateja Yehova milombelo ya kininga ya banababo betabije kukokeja padi kushinta kitatyi kya aye kukutululwa.—Filemone 22.

Le milombelo ikashinta ngikadilo yetu ya masusu? Eyo ibwanya kushinta’yo. Ino tuyuke amba Yehova Leza kakokejapo padi kulondolola milombelo yetu motusakila. Polo wālombele misunsa mivule pangala pa “mwiba mu ngitu,” kepabulwe i makambakano a ku ngitu. Ino pa kyaba kya kumopola mu masusu’a, Yehova wānene Polo amba: “Buntu bwami i bukubwanine; ke-buntu bukomo bwami bufikile ponka pa bubwanine monka umbukōkekōke.”—2 Kodinda 12:7-9.

Nanshi masusu etu akokeja kukoma kupwa ponka na ponka. Inoko tukekala na mukenga wa kulombola amba tukulupile mudi Tata wetu wa mūlu. (Yakoba 1:2-4) Yuka amba nansha shi Yehova Leza katalwilepo masusu otususuka, inoko “ukasaula dishinda dya kupandilamo, amba [t]umone mwakutūkijija mutyima monka.” (1 Kodinda 10:13) O mwanda mwine Yehova utelwa bu “Leza wa kanye ka kusenga konso; wakwitusenga mu byamalwa byetu byonso.” (2 Kodinda 1:3, 4) Leza witupanga bukomo bwa kūminina, ne kadi tudi na lukulupilo lwa būmi bwa nyeke.

Bible, Kinenwa kya Leza kilaya amba Yehova “ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika.” (Kusokwelwa 21:3, 4) Le umona amba i bikomo kukulupila amba kukekala ntanda yambulwa’mo masusu? Padi i bikomo kodi, nakampata shi wikondanga nyeke na byamalwa. Nansha nankyo, Leza ulaile kwitunyongolola ku moyo ne binzengele, kadi mpango yandi ikafikidila binebine.—Isaya 55:10, 11.

[Bifwatulo pa paje 9]

Wadi mutyumukwe mutyima pano wanyongololwa