Bwine Kidishitu bwa Bine Bukitundubuka

MWINGILO wa Yesu Kidishitu wāshilwile pano pa ntanda mu myaka katwa kabajinji. Musapu wandi wādi ukankamika, uleta kitōkeji, kadi utenga bantu kebatulumuka. Bavule bādi bamwivwana paādi wisamba bādi bakunkwa bininge na binenwa byandi.—Mateo 7:28, 29.

Yesu wāpelele pambulwa moyo kwilunga na bendeji ba kasusu ba bipwilo ne ba politike ba mu myaka yabo’ya, ino aye wādi ulumbwa na bantu bitupu bonso. (Mateo 11:25-30) Wādi uyukile lupusa lwa mishipiditu imbi lwādi luzambalele pano panshi, ino wālombola bukomo bwāmupele Leza pa ino mishipiditu. (Mateo 4:2-11, 24; Yoano 14:30) Yesu wāletele kitōkeji na bwino pa kukwatañana kwine kukwatañene masusu na bubi, kadi na buswe wālombola amba Bulopwe bwa Leza bo bukanyongolola bantu lonso. (Mako 2:1-12; Luka 11:2, 17-23) Wāfundwile dimo dyonka kupwididile kilenda kya fukutu kyādi kipūtyilwe tamba kala bumuntu bwinebwine bwa Shandi, ne kuyukanya wāyukanya dijina dya Leza patōka ku bonso bādi basaka kupwana Nandi kipwano kya kasuku.—Yoano 17:6, 26.

Ke kya kutulumukapo shi bana ba bwanga ba Yesu bāsambakenye uno musapu wa bukomo bukidi nansha byokwādi kupangwapangwa na bantu ba politike ne ba bipwilo. Mu kintu kya myaka 30 kete, bipwilo bya Bwine Kidishitu bityikinya bantu byāshimikilwe mu Afrika, mu Azia, ne mu Bulaya. (Kolose 1:23) Bubinebine bupēla bwāfundije Yesu bwāmunikile mu mityima ya ba kwityepeja, bantu ba mityima myoloke mu Umbikalo wa Loma onso.—Efisesa 1:17, 18.

Le bano bana ba bwanga bonso bapya bādi na misokwe, bibidiji, ndimi, ne mitōtelo mishileshile bādi ba kwilunga namani mu “lwitabijo lumo,” pamo na mwēlwityile mutumibwa Polo? (Efisesa 4:5, MB) Lelo i bika byādi bya kwibabambakanya pamo ‘besambe kya kanwa kimo kyonka,’ pampikwa kwiketa pala pala? (1 Kodinda 1:10) Byotumona kwityiba pala pala kwa boba betela bu bene Kidishitu dyalelo, i biyampe tubandaule byāfundije’po Yesu mwine.

Kyalwilo kya Bumo bwa Bwine Kidishitu

Yesu, kitatyi kyaādi ku meso a Pontyusa Pilato, wātelele kyalwilo kya bumo bwa bwine Kidishitu. Wānene amba: “Po pa mwanda o nabutwidilwe pano, ne o naīdile pano panshi na’mba, nkebasapwile bya binebine, bonso badipo ba binebine nankyo bēvwane diwi dyami.” (Yoano 18:37) Nanshi kwitabija bufundiji bwa Yesu ne bukwabo budi mu Bible, Kinenwa kya Leza kya ku bukomo bwa mushipiditu, lo lupusa lwine lukutyila bana ba bwanga ba bine ba Kidishitu umbumo.—1 Kodinda 4:6; 2 Temote 3:16, 17.

 Eyo, bana ba bwanga ba Yesu bādi ba kwiipangula kyaba kimo bipangujo bifwaninwe ne kwikala na lupotopoto umbukata mwabo. Ino i bika byādi bya kwibakwasha? Yesu wāshintulwile amba: “Poso ponka pa kwiya aye [m]upishiditu wa binebine, ye ukemulombola ku bya binebine byonsololo, ke-muntu kakēsambengapo bya aye mwine, mhm. Nanshi kyonka kyāivwana kyo kyonka kyākēsamba kadi aye ukemusapwilanga ne bya kumeso.” (Yoano 16:12, 13) Nanshi mushipiditu sandu wa Leza o wādi wa kukwasha bana ba bwanga ba Yesu kwivwanija bubinebine pa kwenda busokolwa bityebitye na Leza. Kadi, mushipiditu wādi wa kulupula kipa, kimfwa buswe, nsangaji, ne ndoe, bino nabyo byādi bya kuleta bumo umbukata mwabo.—Bilongwa 15:28; Ngalatea 5:22, 23.

Yesu kāsakilepo kwikale kwiketa nansha kwilala umbukata mwa bandi bana ba bwanga; kadi kāletelepo lupusa kwa kushintulula bubinebine bwa Leza mungya bibidiji bya kishi nansha bya butōtyi bya bantu bobakatana. Ino bufuku bwa mfulo bwaādi nabo, wālombele na kininga’mba: “Ke pa mwanda wabo bonka o nombelela, mhm, i ne pa mwanda wa boba bakwabo bakangitabija pa mwanda wakasapula bano. Amba bonsololo bēkale bamo bonka, monka mwikadile abe Tata mudi ami, ami nami monka mudi abe, ino abo nabo betwikale monka mudi bātwe, mwanda wa kunena’mba, ba pano pantanda bētabije byo ntuminwe kudi abe.” (Yoano 17:20, 21) Nanshi bumo bwa bine mu mushipiditu ne bubinebine kyo kiyukeno kiyukanya bana ba bwanga ba Kidishitu tamba penepa kufika ne mu ano mafuku. (Yoano 4:23, 24) Inoko, bipwilo bya dyalelo kebidipo umbumo, i bikalañane pala pala. Mwanda waka?

Mwanda Waka Bipwilo I Bikalañane

Kintu kine kilengeje kwikale nkulupilo ne bilongwa bishileshile kulampe mu boba betela bu bene Kidishitu dyalelo i kino: kebalametepo ku bufundiji bwa Yesu. Musoneki umo wanene amba: “Monka mokyāikadile pa kala, ne dyalelo dine mo monka, bene Kidishitu bapya ba dyalelo bavudile kusela mu Bible bintu byonso bibasangaja—ino bapela byobya bimweka bu kebikwatañenepo na bibidiji bya mutōtelo wabo wa kibutwila.” Kyo kyonka kino kyālaile Yesu ne batumibwa bandi.

Kimfwa, mutumibwa Polo wātumīne Temote mutadi nandi mukanda wa ku bukomo bwa mushipiditu amba: “Mwaka ukāyako o bakapela lufundijo lukomo, ino abo byo badi ne matwi a luo, bakasakanga abo bene bafundiji ba milwi na milwi, ba monka mwikadile kilokoloko kyabo; kadi bakajikanga matwi abo ku byabinebine bakavundamukileko ku byamfumo.” Le bene Kidishitu bonso bādi ba kongolwa? Mhm. Polo wābwejeje’ko amba: “Abe nanshi, wikale kwibēja mu bintu byonso, mona’tu onka malwa, uyūke mīngilo yobe ya busapudi, ne bwingidi bobe nabo bulumbuluke, senene, shē.” (2 Temote 4:3-5; Luka 21:8; Bilongwa 20:29, 30; 2 Petelo 2:1-3) Temote ne bene Kidishitu bakwabo ba kikōkeji bālondele ano madingi a ku bukomo bwa mushipiditu.

Bene Kidishitu Bakidi Umbumo

Pamo bwa Temote, bene Kidishitu ba bine dyalelo bebejanga na kupela milangilo ya bantu, ino betabijanga enka binena Bisonekwa pangala pa nkulupilo yabo ya bufundiji. (Kolose 2:8; 1 Yoano 4:1) Kadi Batumoni ba Yehova beulanga bene Kidishitu ba mu myaka katwa kabajinji na kwingila mwingilo wabo wa busapudi mu matanda 230 ne kupita, basapula musapu wādi usapula Yesu, ke myanda miyampe ya Bulopwe yobasapula ku bantu ba pi na pi kadi. Ivwana bidi miswelo iná mikatampe yobeula Yesu abo bonso pamo ne kulonda bwine Kidishitu bwa bine nansha shi bashikete kwepi.

Nkulupilo yabo imanine pa Kinenwa kya Leza. (Yoano 17:17) Mumpele umo wa mu palwase ya mu Belejike wāsonekele pangala pa Batumoni ba Yehova amba: “Kintu kimo kyotuboila ñeni kobadi i mutyima wabo wa kusaka kuteja Kinenwa kya Leza ne kininga kyabo kya kusapula bukamoni bwakyo.”

Batengele Bulopwe bwa Leza amba bo bukapwija makambakano a ntanda yonso. (Luka 8:1) Mu Barranquilla, mu Kolombi, Kamoni umo wesambile na Antonio, mwana-mulume ulamete bininge ku kitango kya politike. Kamoni kekupilepo ku wandi mutamba, nansha  kubingija mulangwe kampanda wa politike mikwabo. Ino wanene Antonio befunde nandi Bible, aye ne banababo bana-bakaji ku bitupu. Lubilo lonka Antonio wamona amba Bulopwe bwa Leza na bubine lo lukulupilo lumo kete lukanyongolola balanda ba mu Kolombi ne ba mu matanda makwabo onso.

Balēmekele Dijina dya Leza. (Mateo 6:9) Batumoni ba Yehova pobetene musunsa umbajinji na Maria, mwine Katolika mwipāne wa mu Ostrali, webalekele bamulombole padi dijina dya Leza mu Bible. Kupwa walonga’po namani? “Ponamwene dijina dya Leza musunsa umbajinji mu Bible, nadidile. Nakunkilwe ku mutyima pa kuyuka amba pano najingulula dijina dya bunka dya Leza ne amba mbwanya kwiditela.” Maria waendelele na kwifunda Bible, ne ye musunsa wandi umbajinji umbūmi wa kuyuka amba Yehova i muntu udi’ko ne amba ubwanya kupwana nandi kipwano kya mpwaninine.

I balungwe Umbumo na Buswe. (Yoano 13:34, 35) Julunale umo (The Ladysmith-Chemainus Chronicle) wa mu Kanada, unena’mba: “Nansha shi wi mwitabije, nansha kwitabije mu kipwilo kampanda, ukokeja nobe kukupidila makasa Batumoni ba Yehova 4 500 baingile mwingilo wa nshikije dyuba mu yenga ne kipindi ushele kunyuma, pa kūbaka Njibo ya Kubungakena’mo pa kiwanza kya tupindi 2 300 twa metele imo momu na momu mu Cassidy . . . Kwingila kobaingile na nsangaji pambulwa kwipotomeja, kwiketa pala pala nansha kwisakila ntumbo i kiyukeno kiyukanya bene Kidishitu ba bine.”

Bine abe mwine ubemwena bukamoni. Kitatyi kikonda befundi ba teoloji, bamishonele, ne bana ba Bipwilo bya Kine Kidishitu na kimpumpu kya tuvulubi mu bipwilo byabo, bwine Kidishitu bwa bine abo papo bwenda butundubuka ntanda yonso. Bine, bene Kidishitu ba bine bavuijanga mwingilo wibapelwe wa kusapula ne kufundija Kinenwa kya Leza. (Mateo 24:14; 28:19, 20) Ekale wi umo wa mu boba “babinza ne badila” pangala pa bya munyanji bilongeka ano mafuku ne pa tuvutakanya twa kwiketa pala pala kwa mu Bipwilo bya Kine Kidishitu, nankyo tubakwite wilunge na Batumoni ba Yehova mu butōtyi bwa bene Kidishitu badi umbumo, betōtela Yehova, Leza umo kete wa bine.—Ezekyele 9:4; Isaya 2:2-4.