I Kika Kiilanga Batumoni ba Yehova Kwenu?

NTANDA yonso iyukile kininga kidi na Batumoni ba Yehova mu mwingilo wabo wa ku njibo ne njibo. Inoko bantu bamo beipangulanga kine kiilanga Batumoni ku abo mobo nyeke nyeke, nakampata shi kebasangedilepo musapu wabo musunsa umbajinji obaile kwibapempula. Mikanda ibidi itambile mu Rusi itukwasha tuyuke bubinga bwine bobailanga.

“Kunena na bubine,” ye Masha, nsongwakaji wa myaka 19 wa mu Khabarovsk unena, “mafuku kunyuma, nadi ngepuka Batumoni ba Yehova pamo’nka bwa kipupo kyonyema.” Ino pa kupwa kutanga manimelo abala-anga a mapepala alupulwa na Batumoni, mumweno wandi washinta. Masha usoneka’mba: “Ao onso adi asangaja kadi aleta kitōkeji, ino kya mvubu kutabukidila, akufikijanga ku kumona ntanda mu muswelo mwishile. Bityebitye nashilula kwivwanija kine kifwaninwe kwikadila bantu na būmi.”

Mu kibundi kikwabo kya Ussuriysk, ku kintu kya makilometele 80 kungala kwa Vladivostok, Svetlana wasonekele amba: “Nashilwile’tu panopano kutanga Kiteba kya Mulami ne Réveillez-vous ! Ano mapepala o asakibwa dyalelo mu ano etu mafuku. Nasepelela bishinte byonso. Bine asangaja, afundija, ne kuleta kitōkeji. Nemufwija’ko! Mwafwai’ko bikatampe pa kwikala’ko mu ino ntanda ne pa kwingila uno mwingilo muyampe kadi wa mvubu mpata.”

Batumoni ba Yehova kujokoloka ntanda yonso batele mutyima ku kino kipangujo kilanguluja kya mutumibwa Polo, kya’mba: “Lelo bakevwana namani, musapudi mpika?” (Loma 10:14) Ubulwe’po kwitūdila’ko minite mityetye ya kuteja Batumoni pobasa kwiya kukupempula? Nobe ukasangela musapu usenga udi mu Bible, Kinenwa kya Leza.

LELO UKETABIJA KUPEMPULWA?

Nansha byotudi mu ino ntanda ya masusu, ukokeja kutana nsangaji itamba ku buyuki bwa binebine butala padi Leza, Bulopwe bwandi, ne mpango yandi milumbuluke itala padi bantu, na kwifunda Bible. Shi usaka kuyuka myanda mivule nansha shi usaka muntu kampanda āye ku yobe njibo kwifunda nobe Bible ku bitupu, nankyo tuma mukanda kudi Batumoni ba Yehova, B.P. 634 Limete, Kinshasa, République démocratique du Congo, nansha ku adelese imo mu alombwelwe pa paje 2.