“Umpika wa Binebine” Wapite Ditompo!

“Mwaka ubafika wa kutyiba mambo . . . kushilwila pa njibo ya Leza.”—1 Petelo 4:17.

1. Le i bika byātene Yesu paāile kupempula “umpika”?

 YESU wātongele “umpika” tamba mu dya Pentekosa 33 K.K. amba ape “ba mingilo” bandi bidibwa pa kitatyi kifwaninwe. Mu 1914, Yesu wābikikwa ke Mulopwe, ne bukidi bonka wākapempula uno “umpika.” Wātana bavule bene ba mu uno umpika belombole bu ‘ba binebine ne ba manwa.’ O mwanda wātūdile uno umpika pa “bintu byandi byonso.” (Mateo 24:45-47, NW) Inoko kwādi ne mupika mubi, kādipo wa binebine nansha wa manwa.

“Mupika Mubi”

2, 3. I kwepi kwātambile “yewa mupika mubi,” ne byāshilwile namani?

² Yesu wātelele mupika mubi pa kupwa’tu kwisambila pa “umpika wa binebine ne wa manwa.” Wānene amba: “Shi yewa mupika mubi ukafwatakanya munda’mba: Mfumwami waije kwiya. Ashilule kukupila bapika bakwabo, ne kudya, ne kutoma na bankolwankolwa. Ino mfumwandi pa kufika mu dyodya dyuba dya kubulwa kutámo aye mutyima, ne kitatyi kyampikwa kuyūka aye, nandi ukamukupila byamalwa, ukapebwa byandi pamo na banzazangi ko kwakēkala ne madilo ne kwishenkanya meno.” (Mateo 24:48-51) Kishima “yewa mupika mubi” kikokela milangwe yetu pa binenwa bya Yesu bibadikile bitala pa umpika wa binebine ne wa manwa. I amo, “mupika mubi” i mutambe monka mu umpika wa binebine. * Namani?

³ Kumeso kwa 1914, bavule mu bādi babadilwa mu kabumbo ka umpika wa kikōkeji bādi babila kwitana na Musoñañani mūlu mu mwine mwaka’wa, ino nkulupilo yabo keyāfikidilepo. Pa kino ne pa buluji bukwabo, bavule bātyumuka mityima ne bantu babala-banga bābila bululu. Bamo mu bano bāalamukile ke ‘bakupila’ boba bādi banababo na binenwa ne kwilunga na “bankolwankolwa,” ko kunena amba bitango bya bendeji ba Bipwilo bya Kine Kidishitu.—Isaya 28:1-3; 32:6.

4. Le Yesu wālongele namani yewa “umpika umbi” ne boba bonso balombola uno mushipiditu?

⁴ Bano bādi dibajinji bene Kidishitu bēlombwele bu “mupika mubi,” ne Yesu wēbapa mfuto na ‘kumukupila byamalwa.’ Muswelo’ka? I na kwibapela kwaēbapelele ne kujimija bājimija lukulupilo lwabo lwa kwenda mūlu. Inoko kēbaonakanibwepo ponka na ponka. Bādi bafwaninwe bidi kususuka kitatyi kampanda na kudila ne kwishenkanya meno “mu fukutu ya panja” pa kipwilo kya bwine Kidishitu. (Mateo 8:12) Tamba mu mene mafuku mabajinji’a, bashingwe māni bakwabo balombolanga uno mushipiditu umbi, wa kwiyukanya abo bene bu “mupika mubi.” Kadi bamo ba mu “mikōko mikwabo” nabo beulanga kuno kubulwa kikōkeji. (Yoano 10:16) Bano balwana bonso na Kidishitu i bafule ku kwelwa “mu fukutu ya panja” ya ku mushipiditu.

5. Le umpika wa binebine ne wa manwa wālongele namani bintu bishile na “mupika mubi”?

⁵ Nansha nankyo, umpika wa binebine ne wa manwa wātwelele mu matompo amo onka pamo na “yewa mupika mubi.” Ino, pa kyaba kya kubila bululu, aye wēsendulula. (2 Kodinda 13:11, NW) Buswe bobādi baswele Yehova ne banababo bwāningile. Ku mfulo bāikala ke “kipanda, ne kyalwilo kya [bu]binebine” mu ano  ‘mafuku a mfulo’ a mitabakano.—1 Temote 3:15; 2 Temote 3:1.

Bajike ba Ñeni ne Bivila

6. (a) Lelo Yesu wāelekeje namani manwa a kabumbo ka umpika wa binebine? (b) Kumeso kwa 1914, i musapu’ka wādi usapula bene Kidishitu bashingwe māni?

⁶ Yesu pa kupwa kutela “umpika mubi,” wāletele byelekejo bibidi bilombola mwanda waka bene Kidishitu bashingwe māni bakekala ba binebine ne ba manwa ino bakwabo kutupu. * Wāelekeja mwanda utala manwa amba: “Bulopwe bwa mūlu budingakene pamo na dikumi dya bajike batekuna binanu byabo ke bakatundaila nabyo musoñañani. Ino byo badi aba batano bo bañeni, batano bakwabo nabo bivila. Ebiya byobya bivila bo batekwine binanu byabo bitupu manipo mpika. Ino boba bamanwa abo baselele mani mu byō byabo, ne binanu byabo kumo.” (Mateo 25:1-4) Bajike dikumi betuvuluja bene Kidishitu bashingwe māni kumeso kwa 1914. Bāpikwile mafuku bayuka amba Yesu Kidishitu, musoñañani kasa kumweka. O mwanda ‘bāendele kukamutundaila,’ bāsapula pambulwa moyo amba “myaka ya baJentaila” isa kufula mu mwaka wa 1914.—Luka 21:24.

7. I kitatyi’ka ne mwanda waka bene Kidishitu bashingwe māni ‘bāponene mu tulo buku’?

⁷ Bine kebētupilepo. Myaka ya Bajentaila yāfudile mu mwaka wa 1914, ne Bulopwe bwa Leza buludikwa na Kidishitu Yesu bwāshilula. Ino bino byonso byālongekele mūlu mwampikwa kumweka. Pano panshi napo, bantu bāanjile kususuka na “malwa” ālailwe. (Kusokwelwa 12:10, 12) Kitatyi kya kutompibwa kyāshilula. Bene Kidishitu bashingwe māni kebāivwanijepo bintu senene, o mwanda bāmwene amba ‘musoñañani waije.’ Mwingilo mulongololwe wa kusapwila bantu bonso wāzoza, kisengele wimane onso, mwanda bāvutakanibwe ne kulwibwa na ntanda. Pamo bwa bajike ba mu kyelekejo, “bakunuka, bapona ne mu tulo buku” mu buluji bwa ku mushipiditu, monka mwāladile tulo bene Kidishitu ba dijina bitupu bampikwa kikōkeji kinondanonda na pāfwile batumibwa ba Yesu.—Mateo 25:5; Kusokwelwa 11:7, 8; 12:17.

8. I bika byālengeje kwelwe lubila amba: “E! musoñañani waiya,” ne kyādi kitatyi kya bene Kidishitu bashingwe māni kulonga bika?

⁸ Kupwa mu 1919 kwāmweka kintu kitulumukwa. Tutanga’mba: “Ebiya ke pa bukata bwa bufuku kwatamba lubila’mba: E! musoñañani waiya kamutundaileiko. Ponkapo po pa kulanguka bajike abo bonso, ke balongolola binanu byabo.” (Mateo 25:6, 7) Enka pāikele bintu byonso’nka bwa fukutu, ye lwito lwa kwisakanya nalo lwāivwanikwa! Mu 1918, Yesu, “mukendi wa kipwano,” wāile ku tempelo ya ku mushipiditu ya Yehova kupempula ne kusubula kipwilo kya Leza. (Malaki 3:1) Papo bene Kidishitu bashingwe māni bādi banenwe kukamutundaila mu bipango bya pano panshi bya tempelo. Kino kyo kyādi kyabo kitatyi kya ‘kweñenya.’—Isaya 60:1; Fidipai 2:14, 15.

9, 10. Mu 1919, mwanda waka bene Kidishitu bamo bādi ba “ñeni” ino bakwabo “bivila”?

⁹ Ino ilaija! Mu kyelekejo’kya bansongwakaji bamo bāikele na makambakano. Yesu wābwejeje’ko amba: “Kwivwana kudi bivila ke binena bañeni amba: Mwitupeikopo bānwe badi ne mani enu, mwanda binanu byetu ke bisake kubula.” (Mateo 25:8) Kinanu kekibwanyapo kutēma shi i mutupu māni. Nanshi māni a kinanu etuvuluja Kinenwa kya Leza kya bubinebine ne mushipiditu sandu wandi, bipanga batōtyi ba bine bukomo bwa kwikala basedi ba mwinya. (Mitōto 119:130; Danyele 5:14) Kumeso kwa 1919, bene Kidishitu bashingwe māni ba manwa bākimbile na kininga kunañuna  kiswa-mutyima kya Leza kobadi, nansha byobādi na buzoze bwa lupito. O mwanda lubila lwa kumunika pa kwelwa’lo, abo bādi kala beteakanye.—2 Temote 4:2; Bahebelu 10:24, 25.

¹⁰ Ino bene Kidishitu bashingwe māni bamo kebādipo beteakanye kwipāna nansha kwielela’ko na kininga—nansha byobādi babila mpata kwikala na Musoñañani. O mwanda pābwene kitatyi kya kwipāna mu kusapula myanda miyampe, abo kebādipo beteakanye. (Mateo 24:14) Bādi basaka enka ne kuzozeja bupyasakane bwa bapwani nabo, pamo bwa abo balomba bakwabo bebape’ko māni abo. Mu kyelekejo kya Yesu, bajike ba ñeni bālondolwele namani? Bālondolwele amba: “A! mwanda wa kutyina’mba padi ketubwanwa’opo ne bātwe ne bānwe kumo. Nanshi endai ku bapota’o mukēpotele bānwe bene.” (Mateo 25:9) Ne bene Kidishitu bashingwe māni ba dikōkeji mu 1919 nabo mo monka, bāpelele kulonga kyo-kyonso kibwanya kutyepeja bukomo bwabo bwa kumunika mwinya. Ne kupita bāpita ditompo.

11. I bika byāfikīle bajike bivila?

¹¹ Yesu ufudija’mba: “Abo [bajike bivila] pa kwenda’mba tukapote, kuno kunyuma musoñañani ufika, ino boba badi batengele kala nabo batwelela nandi pamo mu masobo ne kinjilo bashitako. Penepo kitatyi pa kupitapo boba bajike baendele nabo baiya’mba: Abe mfumwetu! Abe mfumwetu betushilwileko. Kwivwana mwādi webalondolola’mba: I binebine byo nemunena’mba: Nkimuyūkilepo.” (Mateo 25:10-12) Bine, bamo kebādipo beteakanye pa kwiya kwa Musoñañani. O mwanda bākomenwe kupita ditompo, bājimija ne kyepelo kya kutanwa ku masobo a butundaile a mūlu. Yō, bine i kya bulanda kashā!

Kyelekejo kya Talenta

12. (a) Lelo Yesu wāelekeje mwanda wa kwikala wa binebine na bika? (b) Muntu wāendele “lwendo lwa kwenda kulampe” i ani?

¹² Yesu upwa’tu kwelekeja mwanda wa manwa, wāelekeja mwanda wa kwikala wa binebine. Amba: “Budi pamo bwa muntu wadi ne mutyima wa lwendo lwa kwenda kulampe, ino waita bapika bandi webashīla lupeto lwandi abo bonso. Au talenta ītano; mukwabo ībidi; ungi nandi īmo—wa byandi, wa byandi, monka mwikadile ñeni yabo—ponkapo aye ke lwendo.” (Mateo 25:14, 15) Muntu uno wa mu kyelekejo i Yesu aye mwine, wāendele “lwendo lwa kwenda kulampe” paākandile mūlu mu mwaka wa 33 K.K. Ino kumeso kwa kukanda, Yesu wāshile “lupeto lwandi” ku bandi bana ba bwanga ba kikōkeji. Namani?

13. Le Yesu wāteakenye namani mwingilo mukatampe wa budimi ne i muswelo’ka waāpele “bapika” bandi lupusa lwa kusungulula lupeto?

¹³ Yesu paādi wingila pano panshi, wāshilwile na kuteakanya mwingilo mukatampe wa budimi na kusapula myanda miyampe ya Bulopwe mu ntanda ya Isalela yonso. (Mateo 9:35-38) Ino kumeso kwa “kwenda kulampe,” wāpana buno budimi ku bandi bana ba bwanga ba kikōkeji, amba: “Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana,  ne dya [m]ushipiditu [s]andu. Kadi ne kwibalombola balaminine byonso byo nemulaīle ami mwine.” (Mateo 28:18-20) Yesu pa kunena bino binenwa, wāpele “bapika” bandi lupusa lwa kusungulula lupeto’nka ne byajoka, “wa byandi, wa byandi, monka mwikadile ñeni yabo.”

14. Mwanda waka bonso kebādipo bakokeja kusokola buvule bumo bonka bwa lupeto?

¹⁴ Kunena namino kulombola amba bene Kidishitu ba mu myaka katwa kabajinji kebādipo abo bonso na bukomo ne ngikadilo ya muswelo umo. Bamo, kimfwa Polo ne Temote, kebādipo na bibakoleja pa kwipāna ne pa mfulo mu mwingilo wa kusapula ne kufundija. Ngikadilo ya bakwabo padi keyādipo ibashila bwanapabo bwa kwingila. Kimfwa, bene Kidishitu bamo bādi bapika, bakwabo nabo ba misongosongo, banunu, nansha na biselwa bya bisaka. Shako madyese amo pa kipwilo keādipo apebwa bana ba bwanga bonso. Bana-bakaji bashingwe māni ne bana-balume bamo bashingwe māni kebādipo na kiselwa kya kufundija mu kipwilo. (1 Kodinda 14:34; 1 Temote 3:1; Yakoba 3:1) Ino bene Kidishitu bonso bashingwe māni, nansha shi badi mu ngikadilo’ka—bana-balume ne bana-bakaji—bāpelwe mwingilo wa kusungulula lupeto, na kukwatakanya mikenga ne ngikadilo yobatanwa’mo mu mwingilo wa bwine Kidishitu. Ne banababo ba mu ano mafuku nabo badi enka namino.

Kitatyi kya Kutompibwa Kibashilula!

15, 16. (a) Le kitatyi kya kubala lupeto kyābwene kyaba’ka? (b) I mikenga’ka mipya ‘ya kusungulula’ yāpelwe bantu ba kikōkeji?

¹⁵ Kyelekejo kyendelela’mba: “Kitatyi kikatampe kīne pa kupitapo mfumwabo waiya, waponena kubala nabo mpeto yandi.” (Mateo 25:19) Mu 1914—kitatyi kilampe kine tamba mu mwaka wa 33 K.K.—Kidishitu Yesu wāanza kwikala’po kwandi bu mulopwe. Myaka isatu ne kipindi pa kupita’po, mu mwaka wa 1918, wāiya ku tempelo ya Leza ya ku mushipiditu mwa kufikijija byānene Petelo amba: “Mwaka ubafika wa kutyiba mambo . . . kushilwila pa njibo ya Leza.” (1 Petelo 4:17; Malaki 3:1) Kino kyo kyādi kitatyi kya kubala lupeto.

¹⁶ Le bapika, banababo na Yesu bashingwe māni, bālongele bika na “talenta” ya Mulopwe? Tamba mu 33 K.K. ne kuya kumeso, enka ne ku myaka ilumba ku 1914, bavule bādi bengila na bukomo mu mwingilo ‘wa kusungulula’ lupeto lwa Yesu. (Mateo 25:16) Nansha ke mu divita  dibajinji dya ntanda, bādi’nka na mutyima mukomo wa kwingidila Mfumwabo. O mwanda kyādi kyendele’mo bano ba kikōkeji bapebwe mikenga ya ‘kusungulula.’ Mwanda kitatyi kya mfulo ya ino ngikadilo ya bintu kyāfikile. Myanda miyampe yādi inenwe kusapulwa ntanda yonso. “Byangulwa bya pano pantanda” byādi binenwe’nka kwangulwa. (Kusokwelwa 14:6, 7, 14-16, MB) Bantu ba mfulo ba mu kabumbo ka ñano bādi bafwaninwe kumonwa, ne “kibumbo kikatampe” kya mikōko mikwabo nakyo kukongakanibwa.—Kusokwelwa 7:9; Mateo 13:24-30.

17. Le bene Kidishitu bashingwe māni ‘bāsangele pamo na mfumwabo’ muswelo’ka?

¹⁷ Mwangulo i kitatyi kya nsangaji. (Mitōto 126:6) Nanshi kyādi kyendele’mo mu mwaka wa 1919 Yesu atwike banababo bashingwe māni ba kikōkeji biselwa bivulevule, na kunena’mba: “Wadi wabinebine mu tutyetye, nkakupa nanshi bikwabo byabuleme bukatampe. Iya kuno tusangale nami pamo.” (Mateo 25:21, 23, MB) Inoko nsangaji ya Mfumwabo ukibikikwabikikwa bu Mulopwe wa Bulopwe bwa Leza yo nsangaji mikatampe byamwiko. (Mitōto 45:1, 2, 6, 7) Kano kabumbo ka umpika wa binebine nako i kasangale pa kwimanina Mulopwe ne pa kutantyija tumweno twandi twa pano panshi. (2 Kodinda 5:20) Kuloelelwa kwabo i kumweke mu binenwa bya bupolofeto bidi mu Isaya 61:10 binena’mba: “Nkasepelela byamwiko’tu mudi Yehova, mūya wami ukekala na tusepo mudi Leza wami; mwanda waumvwika ne bivwalwa bya lupandilo.”

18. Mwanda waka bamo bākomenwe kupita matompo, ne byēbekadila namani?

¹⁸ I kya bulanda mwanda bamo bākomenwe kupita matompo. Tutanga’mba: “Yewa watambwile talenta īmo waiya kamunena’mba: Abe mfumwami! Nakuyūkile byōdi muntu ukola, kwangula nako wangula’tu ne ko kwakushile, kuboya kadi uboya’tu ne ko kuludile. Po panengele moyo ami, penepo ke ñenda kwiījika talenta yobe panshi. Wiīmone bidi, i ya abe mwine īno.” (Mateo 25:24, 25) Ne bene Kidishitu bashingwe māni bamo nabo kebēpēnepo mu ‘kusungulula.’ Kumeso kwa 1914 kebādipo basapwila bakwabo lukulupilo lwabo na kyanga, bāpela ne kushilula kwingila monka mu 1919. Le Yesu wālongele namani pa buno bwabo bukope? Wēbayata madyese abo onso. ‘Wēbela panja padi fututu pobakekala na madilo ne kwishenkanya meno.’—Mateo 25:28, 30.

Kutompibwa Kukyendelela

19. Le kutompibwa kukyendelela namani, ne bene Kidishitu bonso bashingwe māni i basumininwe kulonga bika?

¹⁹ Bine, bavule mu boba badi ba kwikala bapika bashingwe māni ba Kidishitu mu kitatyi kya ku mfulo bādi kebashilwile kwingidila Yehova popa pāile Yesu kutompa bengidi mu 1918. Le ko kunena’mba abo ababulwe kuno kutompibwa? Nansha dimo. Kutompibwa kwāshilwile shako mu myaka ya 1918 ne 1919, kitatyi kyāpityile umpika wa binebine ne wa manwa, kabumbo konso kikonge, ditompo. Ino mwine Kidishitu mushingwe māni umo ne umo utompibwanga kufika’nka ne pakatūlwa kiyukeno kya lonso. (Kusokwelwa 7:1-3) Pa kino, banababo na Kidishitu bashingwe māni i basumininwe ‘kusungulula’ lupeto na kikōkeji. I basumininwe kwikala ba manwa, na kulama māni mavule kutyina amba mwinya wabo wakaleka kumunika. Kadi bayukile amba shi umo ne umo wafika ku mfulo ya lwendo lwandi na kikōkeji,  Yesu ukamutambula mu kīkalo kya mūlu.—Mateo 24:13; Yoano 14:2-4; 1 Kodinda 15:50, 51.

20. (a) Le mikōko mikwabo dyalelo i misumininwe kulonga bika? (b) Bene Kidishitu bashingwe māni bayukile bika?

²⁰ Ba mu kibumbo kikatampe kya mikōko mikwabo nabo beulanga banababo bashingwe māni. Bayukile amba buyuki bobayukile mpango ya Leza bwibatwikile kiselwa kikatampe. (Ezekyele 3:17-21) O mwanda na bukwashi bwa Kinenwa kya Yehova ne mushipiditu sandu wandi, nabo balamine māni abo mavule na kwifunda ne na kupwila. Kadi bamunikanga mwinya wabo pa kwingila mwingilo wa kusapula ne kufundija, kuno i ‘kusungulula’ kobasungulula lupeto pamo na banababo bashingwe māni. Inoko bene Kidishitu bashingwe māni bayukile amba talenta yēbapebwe mu makasa abo. Bafwaninwe kukeshintulwila pa muswelo obengidija bintu bya pano panshi bya Mfumwabo. Nansha byobadi batyetye, kebabwanyapo kutwika ba mu kibumbo kikatampe kiselwa kyabo. Po pa mwanda umpika wa binebine ne wa manwa wendelelanga na kutangidila mwingilo wa kutala lupeto lwa Mulopwe, ne kufwija’ko banababo bepāne ba mu kibumbo kikatampe pangala pa bukwashi bobamukwasha. Bano nabo bayukile kiselwa kidi na banababo bashingwe māni, kadi i basangele madyese a kwingila munshi mwa butadi bwabo.

21. I kidyumu’ka kitala bene Kidishitu bonso tamba mu 1919 kufika ne mu ano etu mafuku?

²¹ Shi ke pano, nansha bino byelekejo bibidi byobitutōkejeja myanda ya mu 1919 nansha mu myaka’ya, ino bibetupe misoñanya itala bene Kidishitu bonso ba mu ano mafuku a mfulo. Eyo, kidyumu kyāletele Yesu ku mfulo kwa kyelekejo kya bajike dikumi kitala shakyo dibajinji bene Kidishitu bashingwe māni kumeso kwa mwaka wa 1919, inoko musoñanya udi’po utala mwine Kidishitu ye-yense. Batwe bonso nanshi tutei mutyima ku binenwa byānene Yesu amba: “Mwikale kutengela nanshi, ke-mwi-bantu kemuyūkile shi dyuba ka? shi dyuba pi?”—Mateo 25:13.

[Kunshi kwa dyani]

Le Ukokeja Kushintulula?

• Yesu wāile kupempula balondi bandi kitatyi’ka, ne i bika byaātene?

• Mwanda waka bene Kidishitu bamo bashingwe māni bātamije mushipiditu wa “yewa mupika mubi”?

• Tukelombola batwe bene namani amba twi ba ñeni ku mushipiditu?

• Pa kwiula banababo na Yesu bashingwe māni, i muswelo’ka otukendelela na ‘kusungulula’ lupeto?

[Bipangujo bya Kifundwa]

[Kapango pa paje 29]

LE YESU UKĀYA KITATYI’KA?

Mu Mateo shapita 24 ne 25, i banene amba Yesu ‘ukāya’ mu miswelo mishileshile. Kanenwepo kukuta lwendo ne ‘kwiya’ pano. Ino ‘wiyanga’ mu buluji bwa kuta kwata mutyima ku muzo wa muntu nansha ku balondi bandi, divule i pa mwanda wa kidye. O mwanda ‘wāile’ mu 1914 mwanda wa kushilula kwikala’po kwandi bu Mulopwe mubikikwe. (Mateo 16:28; 17:1; Bilongwa 1:11) Mu 1918 ‘wāile’ bu mukendi wa kipwano, wāshilula butyibi pa boba betela amba bengidilanga Yehova. (Malaki 3:1-3; 1 Petelo 4:17) Ku Amakedona ko ‘kwaiya’ kutyibila balwana na Yehova mambo.—Kusokwelwa 19:11-16.

Kwiya (nansha kufika) kutelelwe misunsa mivule mu Mateo 24:29-44 ne 25:31-46 i kokwa kwakāya kitatyi kya “malwa makatakata.” (Kusokwelwa 7:14) Ino kwiya kutelelwe misunsa kampanda mu Mateo 24:45 kutūla ku 25:30 kufunkila pa butyibi bwatyibila boba betela bu bandi bana ba bwanga tamba mu 1918 ne kuya kumeso. O mwanda kekyendele’mopo kunena kimfwa amba kupalwa kwa umpika wa binebine, butyibi bwa bajike babivila, ne butyibi bwa umpika wa mulēle wāfile talenta ya Mfumwetu bikekala’ko ‘pakāya’ Yesu ku kyamalwa kibūke. Kino kikalombola amba bashingwe māni bavule kebakatanwapo ba binebine mu kine kitatyi’kya ne bikalomba kwibapingakena. Inoko, Kusokwelwa 7:3 ulombola amba mu kine kitatyi’kya mo mukatūlwa bapika bonso ba Kidishitu “biyūkeno” bya lonso.

[Kifwatulo pa paje 27]

“Mupika mubi” kāeselwepo madyese mu 1919

[Kifwatulo pa paje 28]

Bajike ba ñeni bādi beteakanye pāile musoñañani

[Kifwatulo pa paje 30]

Umpika wa binebine wikwete’ko na ‘kusungulula’ lupeto

Mupika wa mulēle kasungulwile’lopo

[Bifwatulo pa paje 31]

Bashingwe māni ne kibumbo kikatampe bakyendelela na kumunika mwinya