Wiubije mu Mushipiditu wa Leza Pashinta Bintu Umbūmi

“Pyasakana umone kwitabijibwa kudi Leza.”—2 TEMOTE 2:15.

1. Le i kushinta’ka kukokeja kuleta bikoleja mu būmi bwetu bwa ku mushipiditu?

 NTANDA itujokolokele ishintanga nyeke. Tumwene kwendelela kutulumukwa kwa sianse ne busendwe, pamo ne koneka kwa malwa kwa misoñanya ya mu mwikadilo. Monka motwamwenanga mu kishinte kishele kunyuma, bene Kidishitu bafwaninwe kukomena mushipiditu wa ino ntanda ulwa na Leza. Ino penda pashinta ntanda, netu tushintanga mu miswelo mivule. Twadi banuke pano ketudi batame. Tukokeja kumona nansha kujimija bupeta, bukomo bwa ngitu nansha baswe betu. Kuno kushinta konso ketusakanga’kopo, kadi kukokeja kwituletela bikoleja bipya ne bikomo mu būmi bwetu bwa ku mushipiditu.

2. I muswelo’ka wādi ushinta būmi bwa Davida?

² Ke bavulepo batanwanga na kushinta kwa myanda ya umbūmi na kokwa kwātene Davida, mwanā Yese. Davida wāshintyile na mu kukopa kwa diso, aye wādi nkasampe mukumbi wambulwa kuyukana wāikala ke kalala wa ntumbo mu muzo. Kupwa wāikala njokolokei, upangwa pamo’nka bwa nyema na mulopwe wa mukao. Ku mfulo, Davida wāikala ke mulopwe mushindañani. Kupwa wāsusulwa na bipa bilula byātambile ku bubi bwandi bukatampe. Wāmona malwa a binkumbulu ne kukalañana kwa kisaka kyandi. Ino kadi wāpetele, wānunupa, ne kwimwena tuntelentele twiyanga na bununu. Kuno kushinta kuvule kwāshintyile būmi bwa Davida kwāmupele kikulupiji ne kwiubija kwa lonso mudi Yehova ne mu mushipiditu Wandi. Wāpyasakene amba amone “kwitabijibwa kudi Leza,” ne Leza nandi wāmwesela. (2 Temote 2:15) Tukokeja kuboila ñeni ku muswelo wāpwijije Davida myanda ya mu būmi bwandi, nansha ngikadilo yetu byoishidile ya yandi. Kimfwa kyandi kibwanya kwitwivwanija muswelo otukokeja kwendelela kumona bukwashi bwa mushipiditu wa Leza kitatyi kishinta myanda mu būmi bwetu.

Kwityepeja kwa Davida—Kimfwa Kilumbuluke

3, 4. Lelo Davida wāshintyile ngikadilo namani aye wādi nkasampe mukumbi wambulwa kuyukana ke muntu wa ntumbo mu muzo?

³ Davida paākidi mwanuke, kādipo muntu wa ntumbo mu kisaka kyabo. Pāfikile mupolofeto Samwele mu Betelema, shandya Davida wālombwele enka bana basamba-babidi bana-balume mu bana mwanda. Davida, nkasa ku bonso, wāshele ukumba mikōko. Ino Yehova wātonga Davida amba ye ukekala mulopwe wa Isalela. Penepa bāita Davida mu ntanda mwaādi. Kupwa, Bible unena’mba: “Samwele wayata lusengo lwa māni’lwa, ne kumushinga umbukata mwa bamwanabo; kadi [m]ushipiditu wa Yehova watentama byamwiko’tu padi Davida, kushilwila dyodya difuku ne kumeso kwine.” (1 Samwele 16:12, 13) Bine, Davida wādi ukulupile mu mushipiditu’wa mu būmi bwandi bonso.

⁴ Ne kwija mpika uno nkasampe mukumbi wātumba mu muzo onso. Wāitwa kukengidila mulopwe ne kumombela minjiki. Kupwa wāipaya Ngodiata kalala ka mavita, kampangala mukalabale wādi utyinwa ne na basola ba myaka na myaka mu Isalela. Ino Davida pa kutangidila bana-balume ba bulwi, wātyumuna bene Fidishitia. Bantu bāmuswa mpata. Bābunda ne lwimbo lwa kumutumbija. Mafuku kunyuma, mudingidi umo wa Mulopwe Solo wātelele nsongwalume Davida amba “uyukidije kōmba biyampe” lunsense, ino wābweja’ko ne kubweja amba “i kalāla kakomokomo, muntu wa bulwi ne ñeni ya kwisamba, [kadi] mulumbuluke.”—1 Samwele 16:18; 17:23, 24, 45-51; 18:5-7.

5. I bika byādi bikokeja kwitatwila Davida, ino tuyukile namani amba ketatwidile’byopo?

⁵ Ntumbo, buya bwa mpala, busongwalume, kwisamba bya ñeni, bwino bwa buomba, bukomokomo mu bulwi, ne katōkwe ku meso a Leza—Davida wādi na byonso bino. Kimo ne kimo kya mu bino bintu kyādi kibwanya kumupa mitatulo, ino kekudipo nansha kimo kyāmupele mitatulo. Tala mwālondolwedile Davida pāmupele Mulopwe Solo wandi mwana amba amusonge. Na kwityepeja konso, Davida wānena’mba: “Lelo ne ani, ne bumi bwami i bwa ka, nansha difu dya tata mu Isalela, amba ngikale muko wa mulopwe, a?” (1 Samwele 18:18) Mufundi umo wisambila pa uno vese amba: “Byādi bisaka kunena Davida i bino: amba muyukeno wandi, nansha kyepelo kyandi mu kibundi, nansha musuku wandi, kebikokejapo nansha dimo kumuvwika bulēme bwa kwikala muko wa mulopwe.”

6. Mwanda waka tufwaninwe kutamija kwityepeja?

⁶ Davida wādi mwityepeje mwanda wādi uyukile amba Yehova ye mukatampe upityile mu miswelo yonso bantu bakubulwa kubwaninina. Davida wātulumukile pa kuyuka amba Leza ubañanga muntu. (Mitōto 144:3) Ne kadi wāyukile amba nansha shi waikala mukatampe namani i pa mwanda’tu wa Yehova wityepeja, wiikija mwa kumukwatakenya, kumukinga, ne kumulama. (Mitōto 18:35) Bine, netu tuboilei’ko ñeni milumbuluke! Bwino bwetu, bya nkuo byotulonga, ne madyese etu a mwingilo kebifwaninwepo kwitupa mitatulo. “Le kyōdi nakyo kyampikwa kukupebwa i kika?” mo mwāsonekele Polo. Ne “shi watambwile’kyo, le penepo kadi, kyo witendelela i kika? na abe kapelwe’kyo.” (1 Kodinda 4:7) Nanshi tufwaninwe kutamija kwityepeja ne kulama’ko nyeke shi tukimba kwikala na mushipiditu sandu wa Leza ne kwitabijibwa nandi.—Yakoba 4:6.

“Kekwikwatyilwa Kinongo”

7. Le i mukenga’ka wa kwipaya Mulopwe Solo wādi na Davida?

⁷ Ntumbo ya Davida keyālangwilepo mitatulo mu mutyima wandi, ino yāmupapamwinine mukao wa lufu wa Mulopwe Solo wāfundwilwe mushipiditu wa Leza. Shako Davida kādipo na kibi kyaālongele, ino wānyemena mu ntanda mutuputupu mwanda wa kupandija būmi bwandi. Kyaba kimo, Mulopwe Solo mwaādi ulondalonda Davida, wātwelele mu muta, aye kuyuka mpika amba Davida ne bapwani nandi bāfyeme monka mu muta’mwa. Bantu ba Davida bāmwene amba dino i dyese dya Leza dya kwipaya Solo. Tufwatakanyei bidi mobekadile mu mfindi ya mu muta, basongola Davida’mba: “Talapo bidi, difuku dyakunenene Yehova amba: Monapo nkapana walwana nobe mu kuboko kobe, kadi ukamulonga mo kikunengelele kodi.”—1 Samwele 24:2-6.

8. Mwanda waka Davida wādi wikaka kulubula kinongo?

⁸ Ino Davida wāpela kusanshija Solo. Wālombola lwitabijo ne kitūkijetyima, wāshiya myanda’ya mu makasa a Yehova. Kupwa, mulopwe wātamba mu muta, ebiya Davida kāmwela mabila amba: “Yehova atyibe padi abe ne ami, kadi Yehova ukandubwila kinongo kodi; ino kuboko kwami kekukekalapo padi abe.” (1 Samwele 24:12) Davida wādi uyukile amba Solo i mulube, ino kalubwilepo kinongo; kadi kānenenepo Solo bibi nansha kumushinika bishima kufula. Mu byaba bikwabo bivulevule, Davida wādi wikaka kupwija aye mwine myanda. Ino wākulupile enka mudi Yehova amba ye aye wa kolola bintu byonso.—1 Samwele 25:32-34; 26:10, 11.

9. Mwanda waka ketufwaninwepo kujokeja kibi ku kibi shi betulwa ne kwitupangapanga?

⁹ Nobe, pamo’nka bwa Davida, ukokeja kutanwa mu ngikadilo mikomo. Padi bakulwanga nansha kukupangapanga kudi bakwenu ba ku masomo, ba ku kaji, kudi ba mu kisaka nansha bantu bakwabo bambulwa kwitabija. Kokolwa kwaluja kibi ku kibi. Wiubije mudi Yehova, na kulomba mushipiditu sandu wandi ukukwashe. Padi bano bampikwa kwitabija bakatengwa na mwiendelejo obe muyampe ne kwitabija baitabija. (1 Petelo 3:1) Nansha bikale namani, abe yuka amba Yehova umwene ngikadilo yodi’mo ne ukalonga’po kintu mu kitatyi kifwaninwe. Mutumibwa Polo wāsonekele amba: “Bānwe baswedibwe! kekwikwatyilwa kinongo, ehe, kōkelai bukalabale; ke-kintu i kisonekwe’mba: Kinongo i kyāmi mwine, nkamulubwila; mo munenena Yehova namino.”—Loma 12:19.

‘Imvwana Madingi’

10. Le Davida wāponene mu bubi namani, ne i muswelo’ka waātompele kufya’bo?

¹⁰ Myaka ibapite’po. Davida pano ke mulopwe muswedibwe wa kitenta kikatampe. Lwendo lwandi lwa umbūmi lwa kikōkeji kya kutendelwa, pamo ne ñimbo ya mitōto ya buya bwa dyangi itendela Yehova yaāsonekele, byādi bimumwekeja amba uno muntu kabwanyapo nansha dimo kuponena mu bubi bukatampe. Ino bubela, wāponena’mo. Dyuba dimo, mulopwe wāmona aye pa musaka wa njibo, mwana-mukaji muyampe oya mema. Wāipangula bantu. Ebiya Davida pa kuyuka amba i Bafesheba ne amba Udia wandi mulume i mwende ku divita, wātumanya bakamulete ne kusambakana wāsambakena nandi pamo. Kupwa, mwana-mukaji wāimita dimi. Yo! bumvu’byopo shi uno mwanda usokoke! Mungya Bijila bya Mosesa, makoji i bubi butwala muntu ku lufu. Mulopwe wālangile amba padi bubi bukokeja kufibwa. Penepa wātuma mawi ku bādi ku divita, amba Udia alukile bidi ku Yelusalema. Davida wāfwatakanya amba Udia usa kulāla kwandi na Bafesheba, ino kutupu. Pano Davida wāfudilwa, wājokeja Udia ku divita na mukanda wa kupa Yoabe, mudyavita wa bashidika. Uno mukanda wādi unena amba Udia ufwaninwe kutūlwa popa pananine bulwi mwa kwipailwa’ye. Yoabe wālongela monka, ne Udia wāipaibwa. Bafesheba pa kupwa kudila madilo mungya kibidiji, Davida wāmuyata ke wandi mukaji.—2 Samwele 11:1-27.

11. Le Natana wātūdile Davida mwanda’ka, ne Davida wālongele’po namani?

¹¹ Nkuku ya Davida yāmwekele amba ibamwitaba, nansha byaādi uyukile amba Yehova umwene mwanda onso ngalwilo ne mfulo. (Bahebelu 4:13) Myeji yāpita’po, mwana wābutulwa. Penepo mupolofeto Natana wātumwa na Leza, wākamona Davida. Mupolofeto wātūdila mulopwe mwanda wa mpeta wādi na mikōko mivule, inoko wāyata ne kwipaya mukōko umo kete wādi muswedibwe na mwinē’o mulanda. Ino mānga yātenga mutyima wa boloke wa Davida, ino kumuvuluja’po nshintulwilo yayo minemine mpika. Davida wāponeja ponka’pa mambo a mpeta. Wānena Natana na bukalabale amba: “Muntu walonga kine kino’ki i mufwaninwe kufwa”!—2 Samwele 12:1-6.

12. Yehova wātyibīle Davida butyibi’ka?

¹² Mupolofeto wāmutentulula’mba: “Muntu’wa i enka abe’o.” Davida wētyibile mambo aye mwine. Na bubine, kufitwa mutyima kwa bukidi kwa Davida kwāmukwatyije aye mwine bumvu bukatampe ne bulanda ku mutyima. Wāshala mu kanwa pululu, kāteje Natana umusapwila butyibi kebukonkolokwa bwa Yehova. Kekwādipo mwanda wa kumusangaja ne kumusenga. Bine, Davida wāfutulwile mwanda wa Yehova pa kulonga bibi. Mwene wāipaije  Udia ku kipete kya balwana? O mwanda kipete kekyādipo kya kutaluka mu njibo ya Davida. Mwene wāyete mukaja Udia mu bufyafya? Bine, kino kilongwa kibi kyādi kya kumufikila nandi, ino ke umbufyafyapo, i ku meso a bantu bonso.—2 Samwele 12:7-12.

13. Lelo Davida wāitabile namani ku madingi a Yehova?

¹³ Bya dyese, Davida kātuninepo mambo andi. Kālobēlepo nansha mupolofeto Natana. Kātopekelepo bakwabo nansha kukimba kwibingija mu byaālongele. Davida pa kusabilwa bubi bwandi, wāitabija kilubo, amba: “Napi mambo padi Yehova.” (2 Samwele 12:13) Mutōto wa 51 ulombola kwitopeka kwaētopekele mpata ne kwisāsa kwandi kwa mushike. Wāabija Yehova amba: “Kokansonsolola mu kifuko kyobe; kadi kokantekuna mushipiditu obe ukola.” Wādi uyukile amba Yehova, pa lusa lwandi, kakafutululapo “mutyima mutyumuke [ne] munekenibwe” na bubi. (Mitōto 51:11, 17) Davida wēubije nyeke mu mushipiditu wa Leza. Eyo, Yehova kākingilepo Davida ku bipa bilula byātambile ku bubi bwandi, inoko wāmufwidile lusa.

14. I muswelo’ka otufwaninwe kwitaba ku madingi a Yehova?

¹⁴ Batwe bonso twi bakubulwa kubwaninina kadi tulubanga. (Loma 3:23) Kyaba kimo tukokeja kulonga bubi bukatampe pamo bwa Davida. Yehova, pamo bwa tata wa buswe udingila bandi bana, ulemununanga boba bamwingidila. Madingi shao adi na kamweno, inoko asansanga kwitabija. Bine, pakwabo ‘afityija mutyima fututu.’ (Bahebelu 12:6, 11) Ino shi ‘twivwana madingi,’ nankyo tukapwana na Yehova. (Nkindi 8:33) Pa kusaka kweselwa madyese a mushipiditu wa Yehova, i biyampe twitabije kulemununwa ne kulonga bukomo bwa kwitabijibwa na Leza.

Kemukakulupila Bupeta Bwakubulwa ne Mwa Kukulupidila

15. (a) Le bantu bamo basupakanyanga bupeta bwabo mu mashinda’ka? (b) I muswelo’ka wāsakile Davida kwingidija bupeta bwandi?

¹⁵ Kekudipo kilombola amba Davida wādi dibajinji mufuke ku makasa nansha wa ku kisaka kya bampeta. Ino paāikele ke mulopwe, wāikele na bya bupeta bya ntanda ne miseke. Monka moyukile, bavule bongwijanga bya bupeta, bakimba kupetela’ko na makomwa-meso, pakwabo bengidija bupeta bwabo bya mwino. Bakwabo nabo busupakanyanga lupeto mwanda wa kwitumbija. (Mateo 6:2) Ino Davida wāingidije bupeta bwandi mu muswelo mwishile. Wāsakile kupeja nabo Yehova bulēme. Wānena Natana amba nkimba kūbakila Yehova tempelo ya kutūla’mo dikumbo dya kipwano, dyādi dikidi mu Yelusalema “mu kisandi-kyamakupo.” Ponka’po Yehova wāsangela milangwe ya Davida, ino wānena kupityila kudi Natana amba ukōbaka tempelo i Solomone, mwanā Davida.—2 Samwele 7:1, 2, 12, 13.

16. Davida wāteakenye lūbako lwa tempelo muswelo’ka?

¹⁶ Davida wāungwije bintu bya kukakwasha mu uno mwingilo mukatampe wa lūbako. Kadi wānena Solomone amba: “Nalongolola bya njibo ya Yehova, talenta tununu katwa ya nsahabu, ne kanunu ka tununu ka talenta ya ndalama; kabidi mukuba ne lubwe byampikilwa kutompa; mwanda i bya ntanda ne miseke: mityi ne mabwe mene nalongolola; ino nobe ukalunda ku  abyo.” Davida wāletele kyabuntu mu bupeta bwandi talenta ya nsahabu 3 000 ne talenta ya ndalama 7 000. * (1 Bilongwa 22:14; 29:3, 4) Eyo, bya kupāna byāpēne Davida na buntu kekwādipo kukimba kwilombola, ino i kilomboji kya lwitabijo ne kwipāna kwandi kudi Yehova Leza. Wādi uyukile amba Yehova ye Nsulo ya bupeta bwandi, o mwanda wāmunene amba: “Bintu byonso bīya kodi i bya abe mwine byo tukupa.” (1 Bilongwa 29:14) Mutyima wa buntu wa Davida wāmutonwene alonge byonso byabwanya kulonga mwa kukwatakenya mutōtelo utōka.

17. Le madingi adi mu 1 Temote 6:17-19 atala bampeta ne balanda bene namani?

¹⁷ Ne batwe netu monka na monka, tukokeja kwingidija bituntwa byetu mwanda wa kulonga bilumbuluke. Kupita’ko kulondalonda būmi bwa bya bupeta, i biyampe tukimbe kwitabijibwa na Leza—dino dyo dishinda dya tunangu ne nsangaji ya bine. Polo wasonekele amba: “Bampeta ba panopantanda wibakome’mba: Kemukīkala ne mutyima wa kwilemeka, ne kukulupila bupeta bwa kubulwa ne mwakukulupidila, poso konka kudi Leza wakwitupa bintu byonso bya ntanda ne miseke byakuloelelwa monka. Amba balonge biyampe, senene, kadi bēkale bampeta ba mu mīngilo milumbuluke, ne mutyima wa kupyasakana mu kupana, ne mu kukwasha bakwabo bonso, ko kwibīkila bupeta bwa ku mwaka wakāyako ke kyalwilo, amba bakwatyije ku būmi nabo i būmi bulumbuluke.” (1 Temote 6:17-19) Twikale bampeta nansha balanda, twiubijei mu mushipiditu wa Leza ne kulondalonda būmi bulengeja umo ne umo ekale “mpeta kudi Leza.” (Luka 12:21, MB) Kekudipo kitabukile mvubu na kwitabijibwa na Tata wetu wa mūlu, wa buswe.

Ikalai Kwitabijibwa Kudi Leza

18. Davida wāshidile bene Kidishitu kimfwa kilumbuluke namani?

¹⁸ Davida wādi ukimba kwitabijibwa na Yehova mu būmi bwandi bonso. Wāabije mu lwimbo lumo amba: “Bamfwileko lusa, abe Leza, bamfwileko lusa; ke-muntu muya wami ūbe mudi abe.” (Mitōto 57:1) Kikulupiji kyandi mudi Yehova kekyādipo kya bitupu. Mwanda Davida wānunupile “mubwanye mafuku” senene. (1 Bilongwa 23:1) Davida uvulukwanga bu umo wa mu batumoni ba Leza bādi na lwitabijo lwa kutendelwa, nansha byaālongele bubi bukatampe.—Bahebelu 11:32.

19. I muswelo’ka otukokeja kwitabijibwa kudi Leza?

¹⁹ Ponso potanwa na ngikadilo ishintashinta, vuluka amba Yehova wākwatakenye Davida, wāmuningisha, ne kumulemununa, ne abe nobe mo monka, ukokeja kukulongela monka. Mutumibwa Polo nandi wātenwe na myanda mivule ishintashinta mu būmi bwandi pamo’nka bwa Davida. Ino nandi wāūminine na kikōkeji na kwiubija mu mushipiditu wa Yehova. Wāsonekele amba: “Ne mukomo wa kulonga bintu byonso mudi aye wakunkomeja.” (Fidipai 4:12, 13) Shi twiubija mudi Yehova, nankyo nandi uketukwasha tunekenye. Bine usakanga tunekenye. Shi tumwivwana ne kufwena kwadi, nabya uketupa bukomo bwa kulonga kiswa-mutyima kyandi. Ne shi twendelela na kwiubija mu mushipiditu wa Leza, tukekala bantu ba “kwitabijibwa kudi Leza” tamba pano ne myaka yonso nyeke ne nyekeke.—2 Temote 2:15.

[Kunshi kwa dyani]

Usa Kulondolola Namani?

• Tufwaninwe kwilama namani ku mitatulo?

• Mwanda waka ketufwaninwepo kulubula kinongo?

• I muswelo’ka otufwaninwe kumona madingi?

• Mwanda waka tufwaninwe kukulupila mudi Yehova kupita’ko mu bupeta?

[Bipangujo bya Kifundwa]

 [Kifwatulo pa paje 28]

Davida wākulupile mu mushipiditu wa Leza ne kukimba kwitabijibwa nandi. Lelo nobe mo molongelanga?

[Kifwatulo pa paje 30]

“Bintu byonso bīya kodi i bya abe mwine byo tukupa”