Le Unenwe Kwikala mu Kipwilo Kampanda?

‘NKIFWANINWEPO enka kwikala mu kipwilo kampanda, nansha kwenda nyeke ku shikola pa kusaka kwitabija mudi Leza!’ Mo mulangilanga bavule pa mwanda utala kwitabila mu kipwilo nansha mu bulongolodi kamukaya bwa mutōtelo. Ino na bubine, bamo banenanga’mba bemonanga bu badi kubwipi na Leza shi babandila bupangi panja kutabuka’ko kutanwa ku kupwila mu njibo itōtelwa’mo. Dyalelo, bavule balanga amba kwilunga ku kipwilo nansha mutōtelo kampanda ke akyopo kisakibwa pa kukulupila mudi Leza.

Bakwabo nabo bamwene bintu mu muswelo ungi mpata. Basangelanga kwitabila mu kipwilo ne kwenda’ko amba kyo kya mvubu shi muntu usaka kwitabijibwa na Leza. Nanshi kipangujo kya kuyuka shi kwilunga ku kipwilo kudi binebine na mvubu i mwanda utala umo ne umo, ke enkapo wa befundi basaka kuyuka bibalwa ne myanda ya bipwilo. Kipwano kyetu na Leza byokitalwa na uno mwanda, mwene i biyampe tuyuke Leza aye mwine mwamwena uno mwanda? Shi ke pano, i ñeni’ka yotuboila ku binena Bible, Kinenwa kyandi pa uno mwanda?

Mwāikadile Leza na Bantu ba pa Kala

Pano kepadi kintu kya myaka 4 400 na pāile dilobe dikatampe dyākubije ntanda yonso. Kino kinkumbulu i kikomo kwilwa, kadi bantu ba pi na pi badi na mfumo ya ino mānga ya pa kala. Nansha byoidi mishile mu mufumikilo, ino idi na myanda mikatampe imo yonka, kimfwa inena amba i enka bantu batyetye ne banyema bamo bāpandile.

Le boba bāpandile ku Dilobe’dya i bantu’tu bāikele na dyese dya kupanda ku bonakani’bwa? Nsekununi ya mu Bible itulombola amba ke amopo. Shi tutale biyampe, Leza kālombwelepo muntu ne muntu kwiya kwa Dilobe. Ino wālombwele Noa, Noa nandi wādyumuna bantu ba mu myaka yabo  kwiya kwa Dilobe.—Ngalwilo 6:13-16; 2 Petelo 2:5.

Pa kupanda, muntu wādi ufwaninwe’nka kubadilwa mu kano kakisumpi ka bantu bekwasha ne kwitabija buludiki bwa Leza bwāpelwe Noa. Nansha ke banyema bene bādi mu safini, bāpandile mwanda bābadilwe mu kano kakisumpi. Misoñanya mipotoloke yāpelwe Noa amba akwate mpangiko mifwaninwe ya mwa kupandijija būmi bwa banyema.—Ngalwilo 6:17–7:8.

Tutwa twa myaka pa kupita’po, lutundu lwa Noa lwa munda mwa Shema lwāmunwa bupika mu Edipito. Inoko mpango ya Leza yādi ya kwibanyongolola ne kwibatwala mu ntanda yaālaile nkambo wabo Abalahama. Pano napo, uno mwanda kewāsokwedilwepo umo ne umo, poso enka boba bātongelwe bu bendeji—Mosesa ne Alone mwanabo. (Divilu 3:7-10; 4:27-31) Bano bapika pa kupwa kunyonongololwa kisumpi kyonso pamo mu Edipito, bāpebwa Bijila bya Leza ku Lūlu lwa Shinai, bāikala ke muzo wa Isalela.—Divilu 19:1-6.

Mwine Isalela umo ne umo wādi ubwanya kunyongololwa enka shi welunga na kisumpi kitongelwe na Leza ne kulonda buludiki bwa bendeji bātongelwe kwendeja kino kisumpi. Kwākwetwe kadi ne mpangiko amba bene Edipito nabo belunge na kano ka kisumpi kāyukene ku bonso amba i ketabijibwe na Leza. O mwanda Isalela pa kutamba mu Edipito, bano bantu bāendele nabo, nabo bāeselwa madyese na Leza.—Divilu 12:37, 38.

Kupwa, mu myaka katwa kabajinji namo, Yesu wāshilwile mwingilo wandi wa kusapula, ungwija bantu pamo bu bandi bana ba bwanga. Wādi nabo bu kisumpi, nansha byaādi uta mutyima na buswe ku muntu ne muntu mungya bisakibwa byandi. Wānene batumibwa bandi 11 ba kikōkeji amba: “Bānwe mudi boba bakushikilwa nami mu kutompwa kwami konso. Nami eyo nkemutongela bulopwe monka mwāntongele Tata.” (Luka 22:28, 29) Kupwa, mushipiditu sandu wa Leza wāpebwa bana ba bwanga abo bonso kisumpi pamo.—Bilongwa 2:1-4.

Bino bimfwa bilombola patōka amba pa kala Leza wādi nyeke wingila na bantu bandi bekele mu kisumpi kilongololwe. Ino bantu batyetye kete bāingile na Leza umo ne umo pa bula—kimfwa Noa, Mosesa, Yesu, ne bakwabo—wēbengidije mwanda wa kwisamba na kisumpi kampanda kyobādi belungile nakyo. Nanshi kekudipo bubinga bwa kulangila amba Leza ubwanya kushinta mwikadilo wandi na bengidi bandi dyalelo. Ino, kino kilupula kipangujo kikwabo kinena’mba: Lelo kwilunga’tu ku kisumpi kampanda kya mutōtelo kubwene? Tusa kwisambila pa kino kipangujo kya mvubu mu kishinte kilonda’ko.

[Kifwatulo pa paje 4]

Tamba kalā Leza wingilanga na bantu bandi badi mu kisumpi kilongololwe