Lelo Leza ye wa Kulambika Makambakano Etu?

PABELELE mwanā Marion mwana-mukaji misongo mikatampe ya bongolo, Marion kabudilwepo kulonga kyokya kibwanya kulonga bavule umbukata mwetu. * Wāabije Leza. Unena’mba: “Nkilangapo amba kudi kitatyi kikwabo na kyokya kyonafudilwe ne kwivwana bushiyena.” Mwenda mafuku, misongo ya wandi mwana yaningila’ko, penepa Marion waanza kwalakana Leza’mba: “Mwanda waka bino bibamfikila?” Kadipo wivwanija mwanda waka Leza wa buswe ne uta bantu mutyima wamwela uno muswelo.

Uno mwanda watene Marion ufikilanga bavule. Bantu bavule bene kujokoloka ntanda bemonanga bu belwe na Leza kitatyi kya bikambija. Lisa wanene kinondanonda na kwipaibwa kwa wandi munkana amba: “Neipangulanga ne pano ‘bipangujo amba mwanda waka LEZA.’ Nkijimijepo lwitabijo lwami lonso mudi Leza, ino kelukiningilepo.” Lolo mukwabo nandi wanene pa kupwa kutanwa na kizumba kya lufu lwa wandi mwana amba: “Leza kaumpelepo busengi nansha bumo pa kyokya nkyatene. Kalongelepo kakintu nansha kamo ka kunta mutyima nansha kunkwatyilwa lusa.” Ubweja’ko amba: “Nkibwanyapo kulekela Leza nansha dimo.”

Bavule bevwaninanga Leza bululu kitatyi kyobamona bintu bilongeka pano pa ntanda. Bamona balanda ba tyō, bafwa nzala, bakwabo bapepeketa bu balefije banyema mavita, bana bavule bafwilwa bambutwile lwa SIDA, ne midiyo ne midiyo ya bangi nabo basusuka na misongo pala pala. Pa bino binkumbulu ne bikwabo, bavule batwikanga’byo Leza amba kadipo ne kyalonga kine.

Ino bubinebine i buno: Leza kafwaninwepo kutopekwa pangala pa makambakano asusula bantu. Ne kadi kudi bubinga bwa mvubu bulombola amba Leza usa panopano ponka kupwija bibi byobapapamwinine muzo wa muntu. Tukwita utange kishinte kilonda’ko, usa kwimwena amba Leza witutele mutyima bya binebine.

[Kunshi kwa dyani]