Mukanda Kudi Noa

“NOA muswe wami, nkendi mutange misunsa mivule mu Bible myanda ikutala, ne muswelo owapopele safini, mowāpandile abe ne kisaka kyobe pa Dilobe.”

Ino yo ñanjilo ya mukanda wa Minnamaria, nsongwakaji wa myaka 15, waatūdile ku ekizame ya bana ba masomo ba myaka 14 kutūla ku 21. Ekizame yateakanibwe na mingilo ya poshita ya mu Felande, na Kisumpi kya Badimu ba Ludimi lwa mu Felande, ne Kitango kya Bulembi kya mu Felande. Bana ba masomo badi banenwe kulemba mukanda wimanine pa dibuku kampanda. Byadi kadi bilomba kutumina’o mwine dibuku nansha muntu utelelwe’mo. Badimu batongele mikanda 1 400 ne kupita mu yoya yasonekele bana ba masomo ne kutuma’yo ku bemaniji ba ekizame. Katango ka bemaniji katonga’po mukanda upityile yonso, ebiya ke mikanda dikumi ilonda’po, kupwa ke dikumi ya mfulo ku buya. Minnamaria wasangele mpata mwanda mukanda wandi wabadilwe mu kitutula kya busatu ku buya.

Mwanda waka Minnamaria, mwanā masomo nsongwakaji, watumīne Noa mukanda, aye muntu wādi’ko pano kepadi kintu kya myaka 5 000? Unena’mba: “Bible dyo dibuku dibajinji dyangile mu ñeni. Bantu ba mu Bible bo bongibidile nakampata. Ntañanga myanda mivule ibatala, o mwanda nebamona bu bantu bōmi. Natongele Noa mwanda būmi bwandi i busangaja kadi i bwishile kulampe na bwami.”

Mukanda wa Minnamaria kudi Noa ufula na bino binenwa’mba: “Ukidi kimfwa kya lwitabijo ne kya kikōkeji. Būmi bobe bukankamikanga bonso batanga Bible balonge bintu bikwatañene na lwitabijo lwabo.”

Uno mukanda wa nkasampe mutangi wa Bible ulombola patōka amba na bubine Bible “i wa būmi ne bukomo” pa bonso, banuke ne batame bene kumo.—Bahebelu 4:12.

[Kifwatulo pa paje 32]

LELO UKETABIJA KUPEMPULWA?

Nansha byotudi mu ino ntanda ya masusu, ukokeja kutana nsangaji itamba ku buyuki bwa binebine butala padi Leza, Bulopwe bwandi, ne mpango yandi milumbuluke itala padi bantu, na kwifunda Bible. Shi usaka kuyuka myanda mivule nansha shi usaka muntu kampanda āye ku yobe njibo kwifunda nobe Bible ku bitupu, nankyo tuma mukanda kudi Batumoni ba Yehova, B.P. 634 Limete, Kinshasa, République démocratique du Congo, nansha ku adelese imo mu alombwelwe pa paje 2.