Yehova, ‘Nsakwa Yetu Mikomo Mu Bitatyi Bya Tusua’
Yehova, ‘Nsakwa Yetu Mikomo Mu Bitatyi Bya Tusua’
“Lupandilo lwa boloke i lwa Yehova; aye udi nsakwa yabo mikomo mu mwaka wa tusua.”—MITŌTO 37:39.
1, 2. (a) Yesu wālombele bika pa mwanda utala bandi bana ba bwanga? (b) Leza usaka bantu bandi balonge bika?
YEHOVA i mwinē bukomo bonso. Udi na bukomo bwa kukinga batōtyi bandi ba kikōkeji monso mwasakila. Ubwanya’nka ne kutolwela bantu bandi kulampe na bantu ba ino ntanda ne kwibatūla mu kifuko kyambulwa byaka kadi kya ndoe. Inoko Yesu wālombele kudi Shandi wa mūlu pa mwanda utala bandi bana ba bwanga’mba: “Nkikulombelepo’mba wibafundule pano pantanda, anha. Nomba’mba wibalame kudi yewa Umbi.”—Yoano 17:15, MB.
2 Yehova kasakilepo ‘kwitufundula pano pa ntanda.’ Inoko, usakile twikale na bantu ba ino ntanda mwanda wa kwibasapwila musapu wandi wa lukulupilo ne wibasenga. (Loma 10:13-15) Inoko, monka mulombwela lulombelo lwa Yesu, kwikala mu ino ntanda kwitusokwelanga kudi “yewa Umbi.” Bantu bampikwa kikōkeji ne mishipiditu imbi betusanshijanga ne kwitususula, kadi bene Kidishitu kebakingilwepo ku tusua.—1 Petelo 5:9.
3. I bika bifikilanga ne batōtyi ba kikōkeji bene, ino i busengi’ka botutana mu Kinenwa kya Leza?
3 Mu ano matompo, i kyendele’mo kupungila pa mutyima kyaba ne kyaba. (Nkindi 24:10) Bible udi na nsekununi mivule ya bantu ba kikōkeji bātenwe na tusua. “Byamalwa bya moloke i bya ntanda ne ntanda,” mo munenena mulembi wa mitōto, “ino Yehova umunyongolola mu byonsololo.” (Mitōto 34:19) I amo, bintu bibi bifikilanga’nka ne “moloke” mwine. Netu kyaba kimo, pamo’nka bwa Davida mulembi wa mitōto, ‘tupungilanga ne kutyimpwa byamalwa.’ (Mitōto 38:8) Ino, tuseñwanga mutyima pa kuyuka amba “Yehova udi pa bwipi na boba ba mutyima mutyumuke, kadi upandijanga bano namino ba mushipiditu” mupondakane.—Mitōto 34:18; 94:19.
4, 5. (a) Kukwatañana na Nkindi 18:10, i bika byotufwaninwe kulonga mwa kukingilwa na Leza? (b) I matabula’ka mayampe otukokeja kutabula mwanda wa Leza etukwashe?
4 Yehova witulamine, mungya munenena lulombelo lwa Yesu. “Aye udi nsakwa [yetu] mikomo mu mwaka wa tusua.” (Mitōto 37:39) Mukanda wa Nkindi nao unena muswelo umo onka amba: “Dijina dya Yehova i bu-kitēba kikomokomo: Moloke unyemenamo ne kupanda wapanda.” (Nkindi 18:10) Kino kisonekwa kitulombola bubinebine bwa kyalwilo amba Yehova udi na mutyima wa kinyenye pa bipangwa byandi. Leza ukiñanga nakampata boloke bamukimba ne mikeketo, pamo’nka bwa batwe banyemena ne kwiubija mu kiteba kikomokomo.
5 Potuponenwa na makambakano, i muswelo’ka otukanyemena kudi Yehova wa kwitukinga? Tubandaulei matabula asatu a kamweno otukokeja kutabula shi tusaka kukwashibwa na Yehova. Dibajinji, tufwaninwe kwabija Tata wetu wa mūlu mu milombelo. Dya bubidi, tufwaninwe kulonda buludiki bwa mushipiditu sandu wandi. Ne dya busatu, tufwaninwe kukōkela ku mpangiko itūdile’ko Yehova ya kukongakena pamo na banabetu bene Kidishitu babwanya kutalaja’ko tusua twetu.
Bukomo Budi na Milombelo
6. Bene Kidishitu ba bine bamwene milombelo muswelo’ka?
6 Bashayuka bamo ba bukomo bwa ngitu banenanga amba milombelo i bwanga bundapa kikona mulá. Kwikala talala ulanguluka mu milombelo kukokeja kupwija njia, pamo’nka bwa mawi amo a bintu bya kipangila nansha kupolweja muntu pa nyuma. Inoko bene Kidishitu ba bine kebakwatyilangapo milombelo ku nzeinzei, nansha kumona’yo bu bwanga butalaja mutyima. Ino tumwene milombelo bu mīsambo ya bulēme na Umpangi. Milombelo itulomba kwikala na bwine Leza ne na kikulupiji mudi Leza. Bine, milombelo ibadilwa mu butōtyi bwetu.
7. Lelo kulombela na kikulupiji kushintulula bika, ne ino milombelo itukwasha namani tulwe na tusua?
7 Milombelo yetu ifwaninwe kwendela pamo na kikulupiji kyotukulupile mudi Yehova. Mutumibwa Yoano wāsonekele amba: “Mudi Leza tudi na kikulupizi kyampikwa kwalakana amba: Si tulombe si ki ka si ki ka mungya kiswa mucima kyandi aye uketuteleka.” (1 Yoano 5:14, Bisonekwa Bitokele) Yehova, Mwine Mukatakata, Leza umo kete wa bine kadi mwinē bukomo bonso, utele mutyima mpata ku milombelo ya kininga ilombela batōtyi bandi. Bine tuseñwanga ku mityima pa kuyuka’tu amba Leza wa buswe utejanga potumulombola kuzumbazumba kwetu ne makambakano etu.—Fidipai 4:6.
8. Mwanda waka bene Kidishitu ba kikōkeji kebafwaninwepo kwivwana bumvu nansha kwityepelwa pa kufwena Yehova mu milombelo?
8 Bene Kidishitu ba kikōkeji kebafwaninwepo kwivwana bumvu, kwityepelwa, ne kubulwa kikulupiji pobafwena kudi Yehova mu milombelo. Shako, shi tubalēmenenwa ne kutyintyidilwa na makambakano, twikalanga kyaba kimo twikaka kufwena kudi Yehova mu milombelo. Mu bitatyi bya uno muswelo, i biyampe tuvuluke amba Yehova “ukasokola lusa pa ba bimonamalwa bandi,” kadi ye “wakusenga mityima ya bakālale.” (Isaya 49:13; 2 Kodinda 7:6) Mu bitatyi bya kufudilwa ne bya tusua, mo mwine motusakilwa kunyemena na kikulupiji kudi Tata wetu wa mūlu mwanda aye ye nsakwa yetu.
9. Le lwitabijo ludi na mwingilo’ka kitatyi kyotufwena Leza mu milombelo?
9 Pa kusaka tumwene ne pa mfulo mu madyese a milombelo otupelwe, tufwaninwe kwikala na lwitabijo lwa binebine. Bible unena amba “yewa wakwiya kudi Leza i kimwendele’mba ētabije’mba: Eyo, udi ponka, upala mpalo boba bamukimba ne mikeketo.” (Bahebelu 11:6) Lwitabijo i lutabuke kwitabija’tu amba Leza udi’ko, amba “udi ponka.” Lwitabijo lwa bine lulomba kukulupila mu bukomo bwa Leza ne mu mutyima wandi wa kwitupala mpalo pangala pa kikōkeji kyotumukōkele mu būmi bwetu. “Ke-mantu meso a Yehova adi pa boloke, ne matwi andi pa kwisasa kwabo kwa pa kulombela.” (1 Petelo 3:12) Kuyuka kitatyi kyonso amba Yehova witutele mutyima na buswe kupanga milombelo yetu buluji bwa pa bula.
10. Milombelo yetu ifwaninwe kwikala namani shi tusaka kulelwa ku mushipiditu na Yehova?
10 Yehova wivwananga milombelo yetu shi tulombela’yo na mutyima wetu onso. Mulembi Mitōto wāsonekele amba: “Naite ne mutyima wami onso; nondolole abe Yehova.” (Mitōto 119:145) Milombelo yetu ke ya kajilwilopo, ya na mityima ibidi, pamo na masambila a bisela alombelwanga mu bipwilo bivule. Ino ponso potulomba Yehova na ‘mutyima wetu onso,’ binenwa byetu bifwaninwe kwikala na buluji ne na kitungo. O mwanda pa kupwa kulombela na kininga namino, mityima itutūkanga mwanda tubapu kwela ‘kiselwa kyetu padi Yehova.’ Kadi aye nandi ‘witulelanga,’ monka mulaile’kyo Bible.—Mitōto 55:22; 1 Petelo 5:6, 7.
Mushipiditu wa Leza I Mukwashi Wetu
11. I muswelo’ka umo ulondololanga Yehova kitatyi ‘kyotulomba’ nyeke bukwashi?
11 Yehova kekalangapo wivwana milombelo kete kwapwa, ino ulondololanga’yo ne kulondolola. (Mitōto 65:2) Davida wāsonekele amba: “Mu difuku dya tusua twami nkakwitanga; ke-wi-muntu abe ukangitabijanga.” (Mitōto 86:7) Yesu nandi wākankamika bandi bana ba bwanga amba “mwikale kulomba” nyeke bukwashi kudi Yehova mwanda “Shenu wa mūlu” ukapāna ‘mushipiditu sandu ku bakumulomba.’ (Luka 11:9-13) I amo, bukomo bwa Leza bwingila budi pamo bwa mukwashi, nansha musengi wa bantu bandi.—Yoano 14:16.
12. Mushipiditu wa Leza witukwashanga namani shi tubalēmenenwa na makambakano?
12 Mushipiditu wa Leza ukokeja kwitupa ‘bukomo butabukile pa bwikalwanga nabo’ kitatyi kyotulwa na matompo. (2 Kodinda 4:7) Mutumibwa Polo wāūminine bikoleja bivule, ino wānene na kikulupiji amba: “Ne mukomo wa kulonga bintu byonso mudi aye wakunkomeja.” (Fidipai 4:13) Ne bene Kidishitu bavule dyalelo nabo mo monka, milombelo yabo pa kulondololwa, bevwananga bukomo ku mushipiditu ne mu malango. Divule, makambakano akambija keebalēmenenangapo shi abapu kutambula bukwashi bwa mushipiditu wa Leza. Shi tudi na buno bukomo, tukokeja kunena mwānenene mutumibwa’mba: “Tubakalakanyibwa ku mitamba yonso, ino kujikilwa mpika; kadi, tubakolelwa, ino kufudilwa mpika; tubapangwapangwa, kadi ino kulekelelwa mpika; tubakupilwa panshi, ino koneka mpika.”—2 Kodinda 4:8, 9.
13, 14. (a) Yehova i nsakwa yetu kupityila ku Kinenwa kyandi kisonekwe muswelo’ka? (b) Kulonda misoñanya ya mu Bible i kukukwashe muswelo’ka?
13 Kadi mushipiditu sandu wāsonekeje ne kukinga Kinenwa kya Leza kisonekwe pa mwanda wa kamweno ketu. Le Yehova i nsakwa yetu namani mu bitatyi bya tusua kupityila ku Kinenwa kyandi? Dibajinji bidi i nsakwa mwanda witupanga tunangu ne bukomo bwa kulanga. (Nkindi 3:21-24) Bible utamijanga nangu yetu ne kulumbulula bukomo bwetu bwa kulanga biluji. (Loma 12:1) Shi tutanga ne kwifunda Kinenwa kya Leza kitatyi kyonso, kadi tulonda ne mokinenena, nabya twibidijanga ‘byakwivwana nabyo byetu biyuke kusansanya ne bilumbuluke ne bibi.’ (Bahebelu 5:14) Padi kodi mwimwene mwakukwashishe misoñanya ya mu Bible pa kutyiba butyibi buyampe powatenwe na bikoleja. Bible witupanga budyumuku bwa mwa kupwijija myanda ibwanya kwituletela tusua.—Nkindi 1:4.
14 Kinenwa kya Leza kitupanga nsulo mikwabo ya bukomo—lukulupilo lwa lupandilo. (Loma 15:4) Bible witulombola amba bintu bibi kebikendelelapo nyeke, mhm. Matompo onso otumona i a lupito. (2 Kodinda 4:16-18) Tudi ne “lukulupilo lwa bumi bwa nyeke. Aye Leza wampikwa bubela wetulaile bumi buno kalaa ne myaka mine keyaikele’ko.” (Tetusa 1:2, MB) Shi tusepelele monka mu luno lukulupilo, koku tuyukile amba Leza witulaile bintu biyampe kumeso, nabya tukōminina mu byamalwa.—Loma 12:12; 1 Tesalonika 1:3.
Kipwilo—Kilomboji kya Buswe bwa Leza
15. I muswelo’ka ukokeja bene Kidishitu kwikwasha abo bene na bene?
15 Mpangiko mikwabo ya Yehova itukwashanga mu bitatyi bya tusua i kipwano kyotudi nakyo mu kipwilo kya bwine Kidishitu. Bible unena’mba: “Mulunda usanswanga mafuku onso nyeke, mukimonya-malwa wilombola bu-mwanabo.” (Nkindi 17:17) Kinenwa kya Leza kikankamika bonso ba mu kipwilo bekale kwilēmeka ne kwiswa. (Loma 12:10) “Kekukēkala muntu, nansha umo, wakwisakila bya aye mwine, poso byonka bya mukwabo,” mo mwāsonekele mutumibwa Polo. (1 Kodinda 10:24) Kulama ino myanda mu ñeni kwitukwasha tuleke kumona enka matompo etu, ino tute mutyima ne ku bisakibwa bya bakwetu. Bine, shi twipānina bakwetu, nankyo ke’nkapo abo botukwasha, mhm, ino ne batwe bene tukamwena’mo nsangaji ne maloa akapēleja’ko kitundu kyetu.—Bilongwa 20:35.
16. Mwine Kidishitu umo ne umo ukokeja kukankamika bakwabo namani?
16 Bana-balume ne bana-bakaji bapye ku mushipiditu badi na mvubu mikatampe mu kukomeja bakwabo. Pa kukomeja’bo bakwabo, i biyampe bekale bantu balumbwa ne badi na kyaba kya kuteja bakwabo. (2 Kodinda 6:11-13) Kipwilo kyeselwanga bikatampe shi bonso betūdila’ko kyaba kya kufwija’ko bankasampe, kutamija betabije bapya, ne kukankamika boba bapungile. (Loma 15:7) Kadi buswe bwa bu bana na bana buketukwasha tuleke mushipiditu wa kwifwatakenya batwe bene na bene. Tufwaninwe kwibeja kulanga amba makambakano atana bakwetu i kayukeno ka kuzoza ku mushipiditu. Polo wāsoñenye bene Kidishitu biyampe amba “kankamikai bampungiji ya ku mutyima.” (1 Tesalonika 5:14) Bible ulombola amba ne bene Kidishitu ba kikōkeji bene baponenwanga na tusua.—Bilongwa 14:15.
17. I mikenga’ka ya kukomeja kipwano kyetu kya bu bana na bana bwa bwine Kidishitu yotudi nayo?
17 Kupwila kwa bwine Kidishitu i mukenga mulumbuluke wa kwisenga ne kwikankamika batwe bene na bene. (Bahebelu 10:24, 25) Kuno kwisambulwila buswe kekwimaninepo enka ku kupwila kete, ehe. Ino bantu ba Leza bakimbanga mikenga ya kwitana pamo senene mu bitatyi bikwabo bya bitupu. Shi kudi baponena mu tusua kampanda, ketukakolelwapo kukwasha lubilo lonka bakwetu mwanda tupwile kala kusamba nabo bulunda bwa pa mutyima. Mutumibwa Polo wāsonekele amba: “[Ke]kwakēkala ne po bikalañanyine ku ngitu; amba byakungitu bīkale kwilela abyo bīne buledi bumo bonka. Ino shi kimo kyakungitu kimone malwa, nabya byonsololo bibamone malwa pamo na akyo; shi kadi, kyakungitu kimo kitumbikwe ntumbo, nankyo byonsololo bibasepelela pamo na akyo.”—1 Kodinda 12:25, 26.
18. I malango’ka otufwaninwe kusumbula shi twimona bu bakolelwe mpata?
18 Kyaba kimo twimonanga bu bakolelwe mpata bakomenwa’nka ne kwenda kisense na banabetu bene Kidishitu. Tufwaninwe kulwa na ano malango mwanda aketubudija busengi ne bukwashi bukokeja kwitukwasha banabetu betabije. Bible witudyumuna’mba: “Yewa wikalañanya aye mwine ukimba kiswa-mutyima kyandi aye mwine, kadi upatana pa ñeni yonso mituntulu.” (Nkindi 18:1) Batutu ne bakaka i kilomboji kya mutyima witutele Leza. Shi twitabije ino mpangiko ya buswe, nankyo bine tukatūkijibwa mityima mu bitatyi bya tusua.
Ikala na Mumweno Muyampe
19, 20. Bisonekwa bitukwasha namani tufundule malango mabi?
19 I bipēla kwikala na malango mabi shi tubazoza ne kuvwana bulanda ku mutyima. Kimfwa, bamo pobatanwanga na bikoleja mu būmi, bashilulanga kutatana būmi bwabo bwa ku mushipiditu, bashilula kulanga amba bikoleja’bya i kayukeno kalombola amba Leza wēbela. Ino vuluka amba Yehova katompangapo muntu na “bubi.” (Yakoba 1:13) Leza “kasusulangapo musakile mutyima wandi to-o, ehe, nansha kufityija bāna ba bantu” mutyima, mhm, mo munenena Bible. (Madilo 3:33) Ino Yehova ufitwanga mpata shi bengidi bandi basusuka.—Isaya 63:8, 9; Zekadia 2:8.
20 Yehova i “Shandya byalusa, Leza wa kanye ka kusenga konso.” (2 Kodinda 1:3) Witutele mutyima, kadi uketuzunzula mu kitatyi kifwaninwe. (1 Petelo 5:6, 7) Kuyuka kitatyi kyonso amba Leza witusenswe kuketukwasha tulame mumweno muyampe, pakwabo ne kusangala. Yakoba wāsonekele amba: “Bānwe bāna betu, po muponena mu byakutompibwa mwibitela bu-bya tusepo tonka.” (Yakoba 1:2) Mwanda waka? Ulondolola’mba: “Ke-pantu pa kulumbulukila monka ukatambulanga kilukwa kya būmi kyālaīle Mfumwetu boba bamusanswa.”—Yakoba 1:12.
21. Nansha byotumona malwa, i bika bilaile Leza ku boba bamukōkele?
21 Yesu wētudyumwine kala amba mukamona bya kwimususula mu ino ntanda. (Yoano 16:33) Ino Bible ulaya amba i kutupu kiketukalañanya na buswe bwa Yehova ne bwa wandi Mwana, le “i bumona-malwa’ni, i bufudile, i kupangwapangwa’ni, le i nzala, i mutaka’ni, i mu kyakanwa kya lufu”? (Loma 8:35, 39) Bine kuyuka amba tusua to-tonso totulwa nato i twa lupito kwituseñanga pa mutyima mpata! Pano’ko bidi, byotutengele mfulo ya masusu a bantu, Yehova, Tata wetu wa buswe, witulamanga. Shi tunyemene kwadi aye wa kwitukinga, bine ukekala “mpakala ya bakumweshibwa malwa. I mpakala ya mu myaka ya kususuka.”—Mitōto 9:9.
I Bika Byotwefunda?
• I bika bifwaninwe kutengela bene Kidishitu pobakidi mu ino ntanda imbi?
• Milombelo ya kininga ikokeja kwitukomeja namani potulwa na matompo?
• I kika kinenenwa amba mushipiditu wa Leza i mukwashi?
• Tukokeja kulonga bika mwanda wa kwikwasha batwe bene na bene?
[Bipangujo bya Kifundwa]
[Kifwatulo pa paje 15]
Tufwaninwe kukimba Yehova bwa batwe banyemena mu nsakwa mikomokomo
[Kifwatulo pa paje 16]
Boba bapye ku mushipiditu bakwatakanyanga mikenga yo-yonso ya kufwija’ko bakwabo ne kwibakankamika