Bupyani Bokokeja Kukulupila

“SHI ubatambula mukanda utamba kudi ‘muntu kampanda’ amba kudi bupyani bobakushila bukutengele kuno, ino kebudipo na dijina, sopoka. Padi kudi ndalandala usaka kukongola.”

Kino kyo kidyumu kyatūdile Mwingilo Utala Poshita wa mu États-Unis pa diteba dyao dya Entelenete. Mwanda waka? Mwanda tununu ne tununu twa bantu batambwile mukanda unena’mba, ‘Mulongo obe wafu ino wakushila bupyani.’ Penepa bavule batumine madolala 30 pakwabo ne kupita ku bantu ba budimbidimbi mwanda wa bebashintulwile kwine kudi bupyani ne muswelo obakokeja kulembeja’bo mu dyabo dijina. Ino kya bulanda, bafwilwa balume nobe. Bonso balondolwele batambwile mukanda umo onka—kadi kekudipo nansha umo wadi na dyese dya kutambula bupyani’bo.

Nkuku ya uno muswelo ipyanga’mo boba badi na kyaka kya kibutwila kya kusaka kupyana bintu. Ino Bible wisambilanga biyampe pa boba bashila bakwabo bupyani amba: “Muntu mulumbuluke ushila bankana bandi bupyani.” (Nkindi 13:22) Ne kadi Yesu Kidishitu nandi wānene uno mwanda uyukene kadi obaswele kudi bavule mu Busapudi bwandi bwa ku Lūlu amba: “Dyese dyo dyabo bakōkele, ke-bantu boba bakapyana ntanda yonso.”—Mateo 5:5.

Binenwa bya Yesu bituvuluja byobya byānene Davida Mulopwe wa Isalela wa kala ku bukomo bwa mushipiditu pano kepadi tutwa twa myaka, amba: “Bakikōkeji bakapyananga ntanda; kadi bakēsangaja mu bungi bwa ndoe.”—Mitōto 37:11.

‘Kupyana ntanda’—kino i kyepelo kisangaja kashā! Ino le tukokeja kukulupila amba ino nayo ke nkukupo ya kusaka kudimba bantu mwa kwibadīla kantu kampanda? Bine, tukokeja kukulupila. Mwanda ntanda i kipindi kya bupangi bwa kutendelwa bwa Yehova, Mulongi ne Mwinē’yo, udi na mbila ya kupyanika’yo ye-yense wasakile. Yehova wālaile kupityila kudi Mulopwe Davida bupolofeto butala padi Yesu Kidishitu wandi Mwana muswedibwe amba: “Nombe bidi, nkupe mizo yakupyana yobe, ne mfulo ya panopantanda mīne ke ya bupeta bobe.” (Mitōto 2:8) Pa kino, mutumibwa Polo wāshintulwile amba Yesu ye “wātongele ke mpyana wa bintu byonso.” (Bahebelu 1:2) Tukokeja nanshi kukulupila amba panena Yesu amba ba kikōkeji “bakapyana ntanda yonso,” unenanga usumininwe, kadi amba udi na lupusa lufwaninwe lwa kufikidija uno mulao wandi.—Mateo 28:18.

Inoko kipangujo kinekine kishele i kino: Le uno mulao ukafikidila namani? Konso kotwela meso dyalelo, tumona amba enka  ba kasusu ne ba manyengenyenge bo babwina ne kuyata byonso byobasaka. Lelo kudi kashala kakapyanikwa bakōkele? Ne kadi, ntanda idi mu musala, luvula ne mema ayo i byoneke, ne bya bupeta byayo bine bitūtwa na bantu ba makomwa-meso ne ba mumweno mwīpi. Lelo bine kukashala ntanda miyampe ya kupyana? Tubakwite utange kishinte kilonda’ko, umone malondololo a bino bipangujo ne a bikwabo bya mvubu.

[Kifwatulo pa paje 3]

Le nobe ubadilwa mu boba bakapyana bupyani bwa binebine?