Kukimbakimba “Dilungo Dimo Dileme Mpata” Dyalelo

“Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno.”—MATEO 24:14, MB.

1, 2. (a) Bayuda ba mu myaka ya Yesu bādi bamwene namani Bulopwe bwa Leza? (b) Ino Yesu wālongele bika mwanda wa kwivwanija bantu Bulopwe senene, ne i bipa’ka byālupukile’ko?

 PĀILE Yesu pano pa ntanda, Bulopwe bwa Leza wādi mwanda utelwe’ko mutyima mpata mu Bayuda. (Mateo 3:1, 2; 4:23-25; Yoano 1:49) Ino dibajinji, bavule umbukata mwabo kebādipo bemvwanije bukata ne lupusa lwabo; nansha kujingulula amba i umbikalo wa mūlu mpika. (Yoano 3:1-5) Enka ne balondi bamo ba Yesu kebādipo bemvwanije Bulopwe bwa Leza i bulopwe’ka, ne bine byobādi bafwaninwe kulonga bine i bika pa kusaka beselwe madyese a kwikala balopwe pamo na Kidishitu.—Mateo 20:20-22; Luka 19:11; Bilongwa 1:6.

² Bityebitye, Yesu wāfundija bandi bana ba bwanga na kitūkijetyima bufundiji buvule, kubadila’mo ne lukindi lwa dilungo dilēme mpata lwisambilwe’po mu kishinte kishele kunyuma, wēbalombola kamweno kadi mu kulonga buninge bwa kukimba Bulopwe bwa mūlu. (Mateo 6:33; 13:45, 46; Luka 13:23, 24) Kino kyēbatengele ku mityima mpata, o mwanda ne kwija kwine mpika, bāikele ke basapudi bakankamane ne bampikwa kukōka ba myanda miyampe ya Bulopwe kufika’nka ne kulampe kwine ku mfulo kwa ntanda, monka mwikilombwela patōka mukanda wa Bilongwa.—Bilongwa 1:8; Kolose 1:23.

3. I bika byānene Yesu pa mwanda utala Bulopwe mu kino kitatyi kyetu?

³ Le dyalelo nadyo? Madyese a kwikala mu paladisa ya pano pa ntanda ikaludikwa Bulopwe i mapebwe midiyo ne midiyo ya bantu. Yesu pa kunena bupolofeto bukatampe butala pa “mfulo ya panopantanda,” wānene’tu patōka amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.” (Mateo 24:3, 14, MB; Mako 13:10) Kadi wāshintulwile amba uno mwingilo mukatakata ukengilwa mu bikoleja ne makambakano makomokomo, enka ne kupangwapangwa pa mulongo. Inoko, wāletele kino kikulupiji amba: “Enka yewa ukominyina tu ne kumfulo, ye ukapanda.” (Mateo 24:9-13, MB) Byonso bino bilomba kwisuminwa ne kwipāna kwa binebine na mwālongele nsunga wa mu lukindi lwa Yesu. Lelo dyalelo kudi bantu badi na lwitabijo ne bupyasakane bwa uno muswelo mu kukimbakimba Bulopwe?

Nsangaji ya Kusokola Bubinebine

4. I lupusa’ka ludi na bubinebine bwa Bulopwe pa bantu dyalelo?

⁴ Nsunga wa mu lukindi lwa Yesu wāsepelele pa kusokola kyaādi ukimba, ke “dilungo dimo dileme mpata” kadi. Ino nsangaji yāmufikije ku kulonga bukomo bwandi bonso mwafwila’tu kwikala na dino dilungo. (Bahebelu 12:1) Dyalelo nadyo, bubinebine butala padi Leza ne pa Bulopwe bwandi bikokanga bantu ne kwibakunka ku mityima. Kino kituvuluja byanene Tutu A. Macmillan, wasonekele myanda yandi ya mwaadi ukimbila Leza ne mpango Yandi mu dibuku Lwitabijo Lwenda Lutama (Angele). Wanene amba: “Byonsokwele ami, bikisokolwanga mwaka ne mwaka na tununu ne tununu twa bantu. Kadi i bantu pamo’nka bwa abe ne ami, mwanda i batambe mu mizo yonso, lukoba, ludingo lwa umbūmi ne nkongo yonsololo. Bubinebine kebusañunangapo bantu. Bukokanga bantu ba miswelo yonsololo.”

5. I bipa’ka biyampe byotumwene mu lapolo wa mwaka wa mingilo wa 2004?

 ⁵ Bubinebine bwa bino binenwa i bumweke patōka mwanda mwaka ne mwaka kudi tutwa twa tununu twa bantu ba mityima miyampe bakunkwanga na myanda miyampe ya Bulopwe bwa Leza ne kupāna būmi bwabo kudi Yehova ne kulonga kiswa-mutyima kyandi. Ne mu mwaka wa mingilo wa 2004, washilwile mu Kweji 9, 2003 kutūla ku Kweji 8, 2004, namo i monka na monka. Mu ino myeji 12, bantu 262 416 balombwele patōka kwipāna kobepēne kudi Yehova na kubatyijibwa mu mema. Kino kyalongekele mu matanda 235, mwendeje Batumoni ba Yehova bifundwa bya Bible 6085387 yenga ne yenga mwanda wa kukwasha bantu ba ludingo lo-lonso lwa umbūmi, ba mu mizo mivule, bisaka, ne ndimi bayuke bubinebine bupāna būmi budi mu Kinenwa kya Leza.—Kusokwelwa 7:9.

6. I bika bikokeja kunenwa pa kwilundila’ko kwendelela kumeso mu ino myaka?

⁶ Mwanda waka twābwenye bino byonso? Na bubine Yehova ye wakokēle bantu ba mityima myoloke kwadi. (Yoano 6:65; Bilongwa 13:48) Inoko, ketwidilwepo mushipiditu wa kwisuminwa ne bukomo bwa zenzeka bwalongele boba bepēne abo bene mu kulondalonda Bulopwe. Tutu Macmillan wasonekele aye na myaka 79, amba: “Tamba ngivwana dibajinji milao ilailwe muzo wa muntu ubela ne ulwa na lufu, lukulupilo lwami mu uno musapu usokwelwe mu Bible kelwatalele nansha dimo. Tamba penepa nsumininwe kusokwela’ko bivule bifundija Bible mwanda wa mone muswelo wa kukwasha bakwetu bakimba pamo bwa ami buyuki bwa kuyuka Yehova, Leza Mwinē bukomo bonso, ne mpango yandi miyampe itala pa bantu.”

7. I myanda’ka mimweke ilombola nsangaji ne kipyupyu kikalanga na boba basokola bubinebine?

⁷ Kino kipyupyu kimo kyonka kimwekanga ne mu bengidi ba Yehova ba dyalelo. Tala kimfwa kya Daniela wa mu kibundi kya Vienne, mu Otrishe. Wanene amba: “Tamba ku bwanuke bwami, Leza ye mulunda nami wa pa mutyima. Nadi nsaka nyeke kuyuka dijina dyandi mwanda kondi kishima ‘Leza’ kekyadipo kilombola amba i muntu. Ino ami pa kubwanya myaka 17, Batumoni ba Yehova baiya ku njibo yami. Baunshintulwila byonso byonadi nsaka kuyuka padi Leza. Ku mfulo nasokola bubinebine, bine, kyadi kya kutendelwa! Nasangele mpata, nashilwididila kusapwila muntu ye-yense.” Kyanga kyandi kekyaijijepo kyamufikija ku kubengwa na bakwabo ba ku masomo. “Ino ami,” ye Daniela unena, “nadi mona amba i bupolofeto bufikidila, mwanda nafundile amba Yesu walombwele balondi bandi amba bakashikibwa ne kupangwapangwa pangala pa dijina dyandi. Nadi na nsangaji mpata, ngivwana’nka ne masenda mu ngitu.” Lubilo lonka Daniela wepāna kudi Yehova, ne kubatyijibwa, washilula kulondalonda bitungo bya mwingilo wa bumishonele. Pa kupwa kusongwa, aye ne mulumyandi Helmut, bashilula kusapwila bantu batambile mu Afrika, mu Shine, mu Filipine, ne mu India, bashikete mu Vienne. Ba Daniela ne Helmut pano i bamishonele mu ntanda imo ya mu bwikike bwa kushika ne kupona kwa Afrika.

Kebalekele’byopo

8. I muswelo’ka umo muyampe ulombola bavule amba baswele Leza ne kukōkela ku Bulopwe bwandi?

⁸ Bine, mwingilo wa bumishonele i muswelo umo’tu ulombola bantu ba Yehova dyalelo amba bamuswele ne kukōkela ku Bulopwe bwandi. Pamo bwa nsunga wa mu lukindi lwa Yesu, boba bengila uno mwingilo bendanga mu bula bwa ntanda pa mwanda wa Bulopwe. Bine, bano bamishonele kebendangapo kukakimba myanda miyampe ya Bulopwe; ino abo bakatwadilanga’yo bantu ba mu mafinko onso a ntanda, bebafundija ne kwibakwasha bekale bana ba bwanga ba Yesu Kidishitu. (Mateo 28:19, 20) Mu matanda mavule, bōmininanga bikoleja bikomokomo. Ino kūminina kwabo kwibapadilwanga mpalo mikata.

9, 10. Bamishonele bemwenanga myanda’ka isangaja mu matanda a kulampe, kimfwa mu Centrafrikene?

⁹ Tala kimfwa kya mu Centrafrikene, mwatenwe bantu 16184 ku Kivulukilo kya lufu lwa Kidishitu mu mwaka wadi’mo, buvule bwa  basapudi ba Bulopwe ba mu mine ntanda’i butwela’mo kintu kya misunsa isamba-ibidi. Mu bibundi bivule bya ino ntanda i mutupu mudilo wa nshinga, o mwanda bantu bebidile kwingila mingilo yabo ya bukile bukya panja mu mwemba wa mutyi. O mwanda i kipēla ne bamishonele nabo kwingila wabo mwingilo mu muswelo umo onka—kwendeja bifundwa bya Bible panja mu mwemba wa mutyi. Kino kekiletangapo enka mwinya ne kyelevwe, ino kidi na kamweno kakwabo. Bantu badi na kibutwila kya kuswa Bible ne mīsambo itala pa myanda ya Leza, pamo’nka na muswilanga bantu ba mu mizo mikwabo mīsambo itala pa makayo ne mwikadilo wa kūlu. Divule bapityeshinda batalanga byobalonga, kupwa nabo baiya kwilunga ku kifundwa.

¹⁰ O mwanda padi pendeja mishonele umo kifundwa kya Bible panja, nsongwalume wikalanga bukila bwa balabala waile kumunena amba byokebakimpempulangapo, kensake nami mishonele āye twifunde nandi Bible. Bine, mishonele wasangele, wakamupempula, pano nsongwalume’u wendelela bukidibukidi. Mu ino ntanda, bampulushi bavudile kwimika Batumoni mwishinda, ke pa mwandapo wa kwibakuta nansha kwibafutyija lupeto, mhm, ino i pa mwanda wa kwibalomba manimelo a Kiteba kya Mulami ne Réveillez-vous! nansha kwibafwija’ko pangala pa kishinte kampanda kyebasangeje mpata.

11. Nansha byokudi bikoleja, bamishonele ke balale myaka bamonanga mwingilo wabo muswelo’ka?

¹¹ Bavule bātwelele mu mwingilo wa bumishonele pano kepadi myaka 40 nansha 50 bakingilanga nyeke na kikōkeji mu budimi. Bine, kino i kimfwa kya lwitabijo ne kūminina ku batwe bonso! Ba mulume ne mukaji bamo baingile bu bamishonele mu matanda asatu pala pala mu myaka 42 ishele kunyuma. Mulume unena’mba: “Shako makambakano adi’ko. Kimfwa, twalwile na malaria mu bula bwa myaka 35. Ino ketwealakenye nansha dimo amba mwanda waka twaikele bamishonele.” Mukajandi nandi ubweja’ko amba: “Kwadi nyeke bintu bivule bya kwikadila na mutyima wa kufwija’ko. Mwingilo wa budimi wadi uleta nsangaji, ne byadi bipēla kusokola bifundwa bya Bible. Shi ubamone befundi bāya ku kupwila, ne kwiyuka abo bene na bene, kidi pamo’nka bwa bana ba mu kisaka kimo betana kitatyi ne kitatyi.”

Bamona Byonso “bu byampikwa Kamweno”

12. I muswelo ukokeja kulombola muntu amba bine utendelanga bulēme budi na Bulopwe?

¹² Nsunga paāsokwele dilungo dilēme mpata, wāendele “kukapoteja byonso byaadi nabyo, wapota dilungo’dya.” (Mateo 13:46, MB) Uno mutyima wa kujimija byonso bimonwa bu bya mvubu ko kayukeno kayukanya boba batendela bya binebine bulēme budi na Bulopwe. Mutumibwa Polo wāpelwe madyese a kukekala na Kidishitu mu ntumbo ya Bulopwe, wānene amba: “Nebimone bu byampikwa kamweno pa mwanda wa kino kitabukidile byonso kino’ki: nayuka Kidishitu Yesu Mfumwami. Pa mwanda wa aye napele biyampe byonso bya ami mwine, nebimone byonso’nka bwa bintya na’mba ngikale’nka ne Kidishitu bu kamweno kami.”—Fidipai 3:8, MB.

13. Le mukelenge umo wa mu Tsheke walombwele namani amba uswele Bulopwe?

¹³ Ne dyalelo nadyo mo monka, bavule bene badi na mutyima wa kushinta bintu bivule mu būmi bwabo mwanda wa kukeselwa madyese a Bulopwe. Kimfwa, mu Kweji 10, 2003, dilekitele wa myaka 60 wa masomo a mu Tsheke watambwile dibuku Buyuki Butwala ku Būmi bwa Nyeke, dikwasha pa kwifunda Bible. Pa kupwa kutanga’dyo, ponka’pa wakimba Batumoni ba Yehova ba mwabo ba kwifunda nabo Bible. Penepa waendelela biyampe ku mushipiditu ne kushilula kutanwa ku kupwila konso. Le milangwe yandi ya kulwila kuvotwa bu mukulu wa kibundi, kupwa ne kufwila kwikala mu Kitango kya Bakala Ñeni nayo le? I muleke’yo ne kutonga kufwila kintu kikwabo—ke kufwila bu musapudi wa Bulopwe kadi. Unena’mba: “Nadi mpāna mabuku mavule esambila pa Bible ku bana bami ba masomo.” Pano walombwele patōka kwipāna kwandi kudi Yehova na kutokenibwa yense mu mema ku kitango kya mu Kweji 7, 2004.

14. (a) Myanda miyampe ya Bulopwe ifikijanga bavule bene ku kulonga bika? (b) I bipangujo’ka bilanguluja bifwaninwe kwiipangula umo ne umo?

 ¹⁴ Bavule bene kujokoloka ntanda betabanga muswelo umo onka ku myanda miyampe ya Bulopwe. Balupukanga mu ntanda imbi, bavūla bumuntu bwabo bwa kala, bashiya balunda nabo ba kala, ne kuleka kulondalonda bitungo bya bwine ntanda. (Yoano 15:19; Efisesa 4:22-24; Yakoba 4:4; 1 Yoano 2:15-17) Mwanda waka baloñanga bino byonso? Mwanda abajingulula amba madyese a Bulopwe bwa Leza i mapite kadi i matabuke kulampe kwine bintu byo-byonso bibwanya kwibapa ino ngikadilo ya bintu. Le nobe umwene myanda miyampe ya Bulopwe uno muswelo? Mutyima obe ukutononanga ushinte mwikadila wa būmi bobe, misoñanya yabo, ne bitungo byobe amba bikwatañane na byobya bisaka Yehova kodi? Shi ushinte uno muswelo, ukangula madyese mavule, dyalelo ne mu mafuku āya kumeso.

Mwangulo Pano Ubanane

15. Bupolofeto bwālaile amba i bika bikalonga bantu ba Leza mu mafuku a mfulo?

¹⁵ Mulembi wa mitōto wāsonekele amba: “Bantu bobe bēpana abo bene ku mityima tō, mu difuku dya bukomo bobe.” Mu bano bepāna mudi ‘bankasampe badi pamo bwa mano a lumé’ ne “kibumbo kya ntanda ne ntanda” kya “bāna-bakaji bakusapula myanda.” (Mitōto 68:11; 110:3) Le i bipa’ka bilupukile ku kininga ne kwipāna kwa bano bantu ba Yehova—bana-balume ne bana-bakaji, banuke ne batame—mu ano mafuku a mfulo?

16. Leta kimfwa kilombola bengidi ba Leza mobafikila pa kukwasha bakwabo bayuke Bulopwe.

¹⁶ Kaka umo pania, musapudi wa Bulopwe usapula kitatyi kyonso mu India, wadi wiipangula muswelo ukokeja kukwashibwa midiyo ibidi ne kupita ya bantu ba matwi majike ba mu ntanda’ya nabo bayuke Bulopwe. (Isaya 35:5) Ku mfulo watyiba mbila ya kwiandikija ku masomo a mu Bangalore afundija ludimi lwa batumama. Kupwa wayuka kusapwila babitwi bavule lukulupilo lwa Bulopwe, penepo kwabundwa ne bisumpi bya kifundwa kya Bible. Mu mayenga matyetye onka, kintu kya bantu dikumi ne babidi bashilula kutanwa ku kupwila ku Njibo ya Bulopwe. Uno kaka pania pa kwenda ku masobo a butundaile, wetana na nsongwalume wakitwi wa ku Calcutta wamwipangwile bipangujo bivule ne wadi usaka mpata kuyuka myanda mivule itala padi Yehova. Inoko kwadi kikoleja. I kino: Uno nsongwalume wadi unenwe kujokela ku Calcutta, ku makilometele 1 600 mwanda wa kukafunda masomo, kadi kwine’kwa kekwadipo Batumoni bayukile ludimi lwa batumama. Ino aye walonga bukomo bwa kunekenya shandi amutume kukafundila masomo ku Bangalore mwa kwendelela  na kifundwa kyandi kya Bible. Uno nsongwalume waendelele ku mushipiditu biyampe, ne mwaka pa kupita’po wāpāna būmi bwandi kudi Yehova. Kadi nandi wefunda Bible na babitwi bavule bene, kubadila’mo ne mulunda nandi mobātamine. Musambo wa India pano uteakanyanga’ko mpangiko ya bapania befunde ludimi lwa batumama mwa kukwashisha uno mwaba wa babitwi.

17. Sekununa nobe myanda ikankamika idi mu lapolo wa mwaka wa mingilo wa 2004 pa paje wa 21 kutūla ku wa 24.

¹⁷ Pa paje wa 21 kutūla ku wa 24 mu dino dipepala, ukamona lapolo wa ntanda yonso wa mwingilo wa budimi wa Batumoni ba Yehova wa mu mwaka wa mingilo wa 2004. Witūdile’ko kyaba kya kumubandaula, usa kwimwena nobe bukamoni bulombola amba bantu ba Yehova kujokoloka ntanda yonso batele mutyima bininge ku kukimbakimba “dilungo dilēme mpata” dyalelo.

Endelela Bidi na “Kusaka Bulopwe bwa Leza”

18. Yesu kātelelepo myanda’ka mu lukindi lwandi lwa nsunga wendakana, ne mwanda waka kātelele’yopo?

¹⁸ Shi tujokele ku lukindi lwa Yesu lwa nsunga wendakana, tukamona amba Yesu kātelelepo kadilo kādi ka kushala nako nsunga’wa pa kupwa kupoteja byonso byaādi nabyo. O mwanda bamo bakokeja kwipangula’mba: ‘Le nsunga’wa wādi wa kumona bidibwa, bivwalwa, ne njibo kwepi pa kupwa kushala makasa? Le penepo kamweno kādi mu dilungo dyandi dilēme i kamweno’ka?’ Eyo, mungya mumweno wa ku ngitu, bino bipangujo i byendele’mo. Ino mwene Yesu wāsoñenye bandi bana ba bwanga amba: “Badikilai bidi kusaka bulopwe bwa Leza, ne boloke bwandi kumo, ebiya nankyo ne byabyo byonso bikemutentekelwapo”? (Mateo 6:31-33) Mwanda mwine wimanine’po lukindi i kulombola kwipāna kwa na mutyima onso kudi Leza ne kupyasakena Bulopwe. Le kudi ñeni yotuboila’ko?

19. I ñeni’ka mikatampe yotuboila ku lukindi lwa Yesu lwa dilungo dilēme mpata?

¹⁹ Nansha shi twefundile panō myanda miyampe ya kutendelwa nansha shi tukimbanga Bulopwe ne kusapwila bakwetu madyese obukaleta pano ke makumi a myaka, tufwaninwe kwendelela kuta mutyima’nka ku Bulopwe. Ano shao i mafuku a makambakano, inoko tudi na bubinga buluji bwitukulupija amba tukimbanga kintu kya binebine ne kya kamweno kupita byonso—pamo bwa dilungo dyāsokwele nsunga. Bimbidikita bya ntanda ne kufikidila kwa bupolofeto bwa mu Bible i bukamoni bulombola amba bine pano ketudi “pamfulo ya panopanotanda.” (Mateo 24:3) Nanshi, pamo bwa nsunga wendakana, tupyasakenei Bulopwe bwa Leza na mutyima onso ne kusangela madyese otudi nao a kusapula myanda miyampe.—Mitōto 9:1, 2.

Lelo Ukivulukile?

• Mu bula bwa myaka, i bika bilengeje kwikale kwilundila’ko kwa batōtyi ba bine?

• I mushipiditu’ka udi na boba bengila mwingilo wa bumishonele?

• I kushinta’ka kushinta bantu pangala pa myanda miyampe ya Bulopwe?

• I ñeni’ka mikatampe yotuboila ku lukindi lwa Yesu lwa dilungo dilēme mpata?

[Bipangujo bya Kifundwa]

 [Tabulo pa paje 21-24]

LAPOLO WA NTANDA YONSO WA BATUMONI BA YEHOVA WA MWAKA WA MINGILO WA 2004

 (Tala mulami mutampwe)

[Kifwatulo pa paje 26]

Dyalelo bamishonele i beselwe mpata pamo’nka bwa nsunga wendakana

[Kifwatulo pa paje 27]

“Bantu bobe bēpana abo bene ku mityima tō”