Bene Kidishitu—Mwitembei Momwikadile!

“Wakwitendela ēkale kwitendelela monka mudi Mfumwetu.”—1 KODINDA 1:31.

1. I mwikadilo’ka mumweke patōka udi na bavule pa mwanda utala mutōtelo?

 “BUÑUMAUMA bwa bwine Leza.” Muneni umo wa myanda itala mitōtelo wāingidije panopano uno muneneno mwanda wa kulombola mumweno umona bavule lwitabijo lwabo. Wāshintulula’mba: “Mwikadilo wenda utama mu mitōtelo mivule dyalelo ke wa kutōtapo kuluji, mhm—i mwikadilo utelwa na bubinga amba ‘buñumauma bwa bwine Leza.’” Kadi uleta na bwino buluji bwa kishima buñumauma bwa bwine Leza amba i “kubulwa kuta mutyima kwa muntu ku byonso bitala pa mutōtelo wandi.” Mungya kunena kwandi, bavule “bakulupile mudi Leza . . . ; ino kebatelepo mutyima kwadi.”

2. (a) Mwanda waka ke kya kutulumukapo shi bantu abaikala bañumauma ku mushipiditu? (b) I kyaka’ka kidi mu buñumauma ku bene Kidishitu ba bine?

² Uno mutyima wenda ku buñumauma keutulumujangapo befundi ba Bible. (Luka 18:8) Mwanda shi tutale mwendela mitōtelo yonso kikonge, tusa kumona amba kuno kubulwa kuta mutyima ku mutōtelo kwadi’nka kwa kumweka. Tamba kalā mitōtelo ya bubela yongolanga bantu ne kwibatyumuna mutyima. (Kusokwelwa 17:15, 16) Inoko, kwikala na mushipiditu wa kutōta na mityima ibidi uzambalele pi na pi ne kubulwa bupyasakane i kyaka ku bene Kidishitu ba bine. Mwanda ketufwaninwepo kwikala na mulēle mu lwitabijo lwetu ne kujimija bupyasakane bwetu mu mingilo ya Leza ne pa bubinebine bwa mu Bible. Yesu, pa kutopeka bene Kidishitu ba mu myaka katwa kabajinji ba mu kibundi kya Laodesea, wēbadyumwine baleke kwikala lufufumya, amba: “Kudipo bu-kutalala, nansha bu-kukaba. Yō! nswele, shi wadi nansha bu-kutalala, nansha bu-kukaba. E ponka nanshi pōikadile bu-lufufumya.”—Kusokwelwa 3:15-18.

Kwimona Motwikadile

3. I myanda’ka iyukanya bene Kidishitu yobafwaninwe kwitemba?

³ Bene Kidishitu bafwaninwe kwimona biyampe mobekadile shi bakimba kulwa na buñumauma bwa ku mushipiditu, kadi bafwaninwe kwitemba bine byobadi. Batwe bengidi ba Yehova kadi bana ba bwanga ba Kidishitu twi balombolwe motwikadile mu Bible. Twi “batumoni” ba Yehova, “bakwingila mīngilo pamo na Leza,” ponso potusapwila bakwetu “myanda-miyampe” na kininga. (Isaya 43:10; 1 Kodinda 3:9; Mateo 24:14) Twi bantu ‘beswele batwe bene na bene.’ (Yoano 13:34) Kadi umo ne umo wa mu batwe bene Kidishitu ba bine udi “ne byakwivwana nabyo byabo bībidile kala bya kuyūkidila ne bulumbuluke ne bibi.” (Bahebelu 5:14) Kadi twi “bimuni panopantanda.” (Fidipai 2:15) Ne kadi twielelanga’ko mwanda wa “mwikadilo [wetu] wikale wakufwaninwa umbukata mwa baJentaila.”—1 Petelo 2:12; 2 Petelo 3:11, 14.

4. Mutōtyi wa Yehova ukajingulula namani byakadipo?

⁴ Batōtyi ba bine ba Yehova bayukile kadi byokebadipo. ‘Ke ba ino ntandapo,’ pamo’nka bwa Yesu Kidishitu Mwendeji wabo kādipo wa ino ntanda. (Yoano 17:16) I besansanye na “baJentaila” “badi ne ñeni yabo mibafītyijibwe,  balobele mungi ku būmi bwa Leza mpika.” (Efisesa 4:17, 18) Pa kino, balondi ba Yesu i bapele “bumpikwa bwine-Leza, ne bya kilokoloko kya panopantanda, [ino i] bakwilemeka senene, ne bakoloka ne ba bwine-Leza ponka panopantanda.”—Tetusa 2:12.

5. Musoñanya wa ‘kwitendelela monka mudi Mfumwetu’ ulombola kwitendela kwa muswelo’ka?

⁵ Mumweno wetu muyampe otumona motwikadile ne kipwano kyotupwene na Muludiki Mubikadi wa diulu ne ntanda byo bintu bitufikija ku “kwitendelela monka mudi Mfumwetu.” (1 Kodinda 1:31) Le kuno kwitendela i kwitendela kwa muswelo’ka? Batwe bene Kidishitu ba bine twitembanga mwanda Yehova i Leza wetu. Tulondanga kino kidyumu kinena’mba: “Yewa witumbija etumbije mu kino’ki amba evwanijije ne kungyuka amba amiwa ne Yehova ulonga byalusalusa, ne mundudi, ne boloke, panopanshi.” (Yelemia 9:24) ‘Twitumbijanga’ mwanda tudi na dyese dya kuyuka Leza ne kwingidijibwa nandi mu kukwasha bakwetu.

Kikoleja Kidi’po

6. Mwanda waka bamo bamona amba i bikomo kulama mumweno mujalale wa byotudi batwe bene Kidishitu?

⁶ Na bubine, kulama mumweno mujalale wa byotudi batwe bene Kidishitu ke kwikalangapo nyeke kupēla. Nsongwalume umo watamīne mu bwine Kidishitu uvuluka kitatyi kimo kyaazozele ku mushipiditu amba: “Kyaba kimo, nemwene amba nkiyukilepo ne kyongikadile Kamoni wa Yehova kine. Nadi ngivwana bubinebine tamba ku bwanuke. Dimodimo nadi mona amba nao i mutōtelo’tu mukatampe, mwitabijibwe pamo’nka bwa mitōtelo mikwabo.” Bakwabo nabo bakokeja kwilwa byobadi pa kukokwa na bya mazua bya ino ntanda, misapu ya bisanji bya mīsambo, ne na mumweno wa būmi wampikwa bwine Leza udi’ko dyalelo. (Efisesa 2:2, 3) Kyaba kimo bene Kidishitu bamo bakokeja kwitatana abo bene ne kwalakana mvubu ya misoñanya ne bitungo byabo.

7. (a) I kwibandaula kwa muswelo’ka kufwaninwe kwibandaula bengidi ba Leza? (b) I kwepi kufile kyaka?

⁷ Le kwikala na milangwe ya kwibandaula bya binebine mu muswelo kampanda i kubi? Mhm, ke kubipo. Padi ubavuluka mutumibwa Polo wākankamikile bene Kidishitu bekale kwibandaula, amba: “[Mwibandaulei] bānwe bene, shi mudi monka mu lwitabijo; mwitompei bānwe bene.” (2 Kodinda 13:5) Pano mutumibwa wādi ukankamika kwibandaula kuyampe kwa mwa kuyukila shi buzoze kampanda bwa ku mushipiditu ke bwanze kutama, na kitungo kya kutabula matabula mafwaninwe a kwilemununa. Shi mwine Kidishitu witompa shi udi mu lwitabijo, ufwaninwe kutala binenwa ne bilongwa byandi shi bikidi bikwatañene na lwitabijo lwaetemba. Inoko shi kwibandaula kwikale kubi, kwa kusaka kwiyuka “motwikadile” ne kukimba malondololo panja pa kipwano kyotupwene na Yehova ne na kipwilo kya bwine Kidishitu, nabya kukekala kwampikwa kamweno, ne kukokeja kwitwipaya ku mushipiditu. * Bine, ketusakilepo ‘kulobeja lwitabijo lwetu uno muswelo’!—1 Temote 1:19.

Ketukingilwepo ku Bikoleja

8, 9. (a) Mosesa wālombwele namani kutatana kwandi? (b) Yehova wālondolwele namani ku kwikaka kwa Mosesa? (c) Le kukulupija kwitukulupija Leza kukukankamikanga namani?

⁸ Le bene Kidishitu betatana kyaba kimo bafwaninwe kwimona amba abatunya? Mhm, ke amopo! Na bubine, bakokeja kusengibwa pa kuyuka amba ano malango ke menipo. Nansha ke Batumoni ba Leza ba kikōkeji ba mu myaka ya kala nabo bāfikilwe na kutatana. Tala kimfwa kya Mosesa, wādi na lwitabijo, dikōkeji, ne kwipāna kukatampe mpata. Ino pobāmupele mwingilo umweka bu mumupite kipimo, Mosesa wāipangwile na kutatana’mba: “Lelo amiwa nami ne ani le?” (Divilu 3:11) Mobimwekela malondololo aādi nao mu ñeni yandi i ano: ‘Nkifwaninwepo!’ nansha amba ‘Nkibwanyapo!’ Kudi myanda kampanda ya kitamina kya Mosesa yāmulengeje padi emone bu wambulwa kufwaninwa: Wādi wa  ku muzo wa bapika. Wāpelelwe na bene Isalela. Kadi kādipo muneni wa bwino. (Divilu 1:13, 14; 2:11-14; 4:10) Wādi mukumbi, mwingilo ushikilwe bene Edipito bya mwiko. (Ngalwilo 46:34) O mwanda Mosesa wēmwene bu muntu kafwaninwepo kunyongolola bantu ba Leza bādi bamuninwe bupika!

⁹ Yehova wākulupije Mosesa na kumupa milao ibidi ikankamika, amba: “Nkekalanga nobe binebine’tu; kino kyo kikekala kiyukeno kyobe kyakuyukilapo byo nakutuma; ino kadi pokapwa kulupuja bantu mu Edipito mukengidilanga Leza mingilo pa luno lūlu luno’lu.” (Divilu 3:12) Bine, Leza wālombwele mwingidi wandi utatana amba udi nandi nyeke. Kadi Yehova wāmulombwele amba bine ne bine ponka ukanyongolola bantu bandi. Mu bula bwa myaka, Leza wādi ulaya milao ya uno muswelo ya kukwatakanya bantu bandi. Kimfwa, kupityila kudi Mosesa, wānene muzo wa Isalela kumeso kwa ao kutwela mu Ntanda ya Mulao amba: “Wikomeje mutyima wikale mwimanije biyampe, . . . mwanda Yehova Leza obe, i aye enka wenda nobe kakakushiepo, nansha kukulekelela kwine mpika.” (Kupituluka 31:6) Kadi Yehova wākulupije Yoshua amba: “Kekukekalangapo muntu wa kukwimaninapo ku meso obe mafuku onso a bumi bobe, nansha umo, . . . E monka mo nkekadila nobe; nkikakushiepo nansha kukulekelelapo kwine mpika.” (Yoshua 1:5) Kadi wālaile bene Kidishitu amba: “Ami nkikakuzobololapo, nansha patyetye pene, nansha kukulekelela mpika.” (Bahebelu 13:5) Bine, byotukwatakanibwa uno muswelo, tufwaninwe kwitemba kwikala kotwikele bene Kidishitu!

10, 11. Asafa mwine Levi wāfudile namani ku kumona monka biyampe kamweno kadi mu mwingilo wa Yehova?

¹⁰ Kupwa kwa Mosesa, pāpityile myaka tutwa tutano, mwine Levi wa kikōkeji utelwa dya bu Asafa wāsoneka pampikwa budimbidimbi kutatana kwaādi utatana kamweno kadi mu kulondalonda mwiendelejo moloke. Asafa wādi ulwa na kwingidila Leza mu matompo ne mu byamalwa, ino wāmona bamo bādi bafutulula Leza benda bakomena’ko ne kwikala na ntundubuko. Le bino byātengele Asafa namani? “Ami nami, maulu ami aswile kupona,” ye aye mwine unena. “Māyo ami asakile kushetemuka. Ke-ne-muntu nadi ne kilokoloko ku bya bakibengo, po namwene katōkwe ka babi.” Na bubine wāshilwile kutatana kamweno kadi mu kwikala mutōtyi wa Yehova. Kalanga’mba: “I binebine ke kya bitubitupu kyo natōkejeje mutyima wami, ne koija makasa āmi umbumpikwa mambo; ke-dintu dyuba dyonso ne bukata namonwemo na mpupo, ne kudingilwa madingi lubanga mo bukila, mo bukila.”—Mitōto 73:2, 3, 13, 14.

¹¹ Le Asafa wāfudile kwepi na ino milangwe ya kwalakana? Le wātunine amba kādipo na ino milangwe? Mhm. Wālombwele’yo Leza mu milombelo, na motumwena mu Mutōto wa 73. Ino kintu kyājokeje milangwe ya Asafa i kwenda kwāendele ku kipandulwamo kya tempelo. Kwine’kwa, wājingulula amba kwipāna kudi Leza ukidi monka mwiendelejo mulumbuluke. Pa kupwa kwaluja nsangaji yandi ya ku mushipiditu uno muswelo, wāivwanija amba Yehova ushikilwe bibi ne amba mu kitatyi kitungwe babi bakapebwa mfuto. (Mitōto 73:17-19) Ebiya Asafa wāsumininwa pa kwiyuka  mwaikadile ne madyese adi nao a kwikala mwingidi wa Yehova. Wālombola Leza amba: “Ngidi nobe mafuku onso nyeke; abe ubankwata kuboko kwami kwa lundyo. Ukanombolanga ku ñeni yobe, kadi ebiya ukansepelela ku ntumbo.” (Mitōto 73:23, 24) Asafa wāikele monka kwitendela mudi Leza wandi.—Mitōto 34:2.

Bādi Beyukile Biyampe Mobekadile

12, 13. Leta bimfwa bya bantu ba mu Bible bādi betemba kipwano kyabo na Leza.

¹² Muswelo mukwabo wa kuningisha mutyima wetu wa kwiyuka kotwiyukile amba twi bene Kidishitu i kubandaula ne kwiula lwitabijo lwa batōtyi ba kikōkeji bādi betemba kipwano kyobādi bapwene na Leza nansha byobādi mu byamalwa. Tala kimfwa kya Yosefa mwanā Yakoba. Aye’tu ukidi nsongwalume, bāmupoteja ku nshikani bu umpika, wāendwa nabo mu Edipito, ku tutwa twa makilometele na kudi shandi wakaminwe Leza ne ku ntanda yampikwa’mo ngikadilo ya kyanga ne ya kwikwatakanya ya kisaka kyabo. Mu Edipito, Yosefa kādipo na wa kumupa madingi a bwine Leza, kadi wādi mu ngikadilo ya kutompibwa mu mwikadila ne mu kwiubija kwandi mudi Leza. Inoko, wālongele bukomo bonso weyukanya amba i mwingidi wa Leza, wālama ne kikōkeji mu bintu byaādi uyukile amba i byoloke. Wādi witemba kwikala kwādi wikele mutōtyi wa Yehova nansha byaādi mu balwana, bine kādipo na bumvu bwa kulombola mwawiivwanina.—Ngalwilo 39:7-10.

¹³ Myaka tutwa mwanda pa kupita’po, nsongwakaji mwine Isalela wāselelwe bu umpika wa Nemani, mudyavita mwine Shidea, kāidilwepo amba aye i mutōtyi wa Yehova. Pa kumona mukenga, wāsapula pambulwa moyo bukamoni buyampe butala padi Yehova na kuyukanya Edisha amba i mupolofeto wa Leza  wa bine. (2 Balopwe 5:1-19) Mwenda myaka, Yoshia, mulopwe nkasampe, wātūdile’ko mpangiko ya mafuku mavule ya kulumbulula mutōtelo, wālongolola tempelo, ne kwalwija muzo kudi Yehova, nansha byaādi mu ngikadilo myoneke. Wādi witemba lwitabijo lwandi ne mutōtelo wandi. (2 Bilongwa, shapita 34, 35) Danyele ne bapwani nandi Bahebelu basatu nabo kebāidilwepo amba abo i bengidi ba Yehova, nansha byobādi baningilwa ne kutompibwa, ino bālamine bululame bwabo. I kimweke patōka amba bādi betemba kwikala kobādi bekele bengidi ba Yehova.—Danyele 1:8-20.

Mwitembei Momwikadile

14, 15. Le kwitumbija kwetu bu bene Kidishitu kulomba kulonga bika?

¹⁴ Bano bengidi ba Leza bāikele biyampe mwanda bādi betemba mobyendele mwimanino wabo ku meso a Leza. Lelo batwe netu dyalelo? Kwitumbija kwetu bu bene Kidishitu i kulonga bika ne bika?

¹⁵ Dibajinji bidi tufwaninwe kufwija’ko pa kubadilwa kotubadilwa mu bantu betwa pa dijina dya Yehova, pa kwitabijibwa ne kweselwa nandi. Leza kalakanangapo muntu wandi. Mutumibwa Polo wādi’ko mu kitatyi kya kavutakanya ka mitōtelo wāsonekele amba: “Mfumwetu uyūkile boba ba kwandi.” (2 Temote 2:19; Umbadilo 16:5) Bine Yehova witembanga “boba ba kwandi.” Unena’mba: “Yewa wimutenga uteñanga nkishi wa mu dīso” dyami. (Zekadia 2:8) I kimweke patōka amba Yehova wituswele. Nanshi ne kipwano kyotupwene nandi nankyo kifwaninwe kwimanina pa buswe botumuswele. O mwanda Polo unena’mba: “Shi muntu usenswe Leza, nabya ye enka wayūkibwa kudi aye.”—1 Kodinda 8:3.

16, 17. Mwanda waka bene Kidishitu, banuke ne batame, bafwaninwe kwitemba bupyani bwabo bwa ku mushipiditu?

¹⁶ Bankasampe batamijibwe bu Batumoni ba Yehova nabo bafwaninwe kwibandaula shi bwine Kidishitu bwabo bukomejibwanga na kipwano kyobapwene abo bene na Leza. Kebafwaninwepo enka kulonda lwitabijo lwa bambutwile babo. Mwanda Polo usonekele pa mwanda utala mwine Kidishitu umo ne umo amba: “Emane i kudi Mfumwami wandi, ne kupona nako monka.” Kupwa ubweja’ko amba: “Tukēshintulwila kudi Leza, muntu pandi, muntu pandi.” (Loma 14:4, 12) Nanshi kulondalonda bibidiji bya kisaka na mutyima kanyonga kekutamijangapo kipwano kiloe ne kya endaenda na Yehova.

¹⁷ Mu bula bwa mānga yonso, mudi lunkunkwa-mulongo lwa batumoni ba Yehova benda belonda. Tamba ku Abele mwana-mulume wa kikōkeji—pano kepadi kintu kya myaka tununu tusamba—kutūla ku “kibumbo kikatampe” kya Batumoni ba dyalelo, ne bibumbo bya batōtyi ba Yehova bakamona būmi bwa kumeso bwampikwa mfulo. (Kusokwelwa 7:9; Bahebelu 11:4) Batwe bano bo ba mfulo mu uno mulongo wa batōtyi ba kikōkeji. Nanshi bine tudi na bupyani bukatampe bwa ku mushipiditu!

18. Mikadila ne misoñanya yotulonda itusansanyanga namani na ntanda?

¹⁸ Kuyuka kobetuyukile bu bene Kidishitu kutala ne pa mikadila, ngikadilo, misoñanya ne byonso bituyukanya bu bene Kidishitu. I “dishinda,” ko kunena’mba mwikadilo wa umbūmi umo kete muyampe ne usangaja Leza. (Bilongwa 9:2; Efisesa 4:22-24) Bine, banwe bene Kidishitu, “tompai bintu byonso; mukwatyijei kyokya kilumbuluke”! (1 Tesalonika 5:21) Twivwanije patōka kwishila kwishidile bwine Kidishitu na ntanda mibomboke kudi Leza. Yehova ketufindilepo kwitulombola mwishidile mutōtelo wa bine na wa bubela.  Wānene kupityila kudi mupolofeto wandi Malaki amba: “Muketola ne kusansanya mubukata mwa boloke ne bapupakane, mubukata mwa yewa wingidila Leza ne yewa wampikwa kumwingidila.”—Malaki 3:18.

19. Le bene Kidishitu ba bine kebakekalapo nansha dimo na bika?

¹⁹ Kwitumbika mudi Yehova byokudi na mvubu mu ino ntanda yakavutakanya ne mityompakane, i bika biketukwasha twendelele na kwitendela mudi Leza ne kusumininwa bya binebine amba bine batwe bo bene Kidishitu? Kudi madingi akwasha atanwa mu kishinte kilonda’ko. Pobandaula bino, yuka biyampe kino amba: Bene Kidishitu ba bine kebakekalapo nansha dimo na “buñumauma bwa bwine Leza.”

[Kunshi kwa dyani]

Lelo Ukivulukile?

• Bene Kidishitu bakokeja “kwitendela monka mudi Mfumwetu” muswelo’ka?

• I ñeni’ka yowaboila ku kimfwa kya Mosesa ne kya Asafa?

• I bantu’ka ba mu Bible bādi betemba mwingilo obādi bengidila Leza?

• Kwitumbija kwetu bu bene Kidishitu kulomba bika ne bika?

[Bipangujo bya Kifundwa]

[Kifwatulo pa paje 14]

Kitatyi kimo, Mosesa wāikele kwitatana

[Bifwatulo pa paje 15]

Bengidi bavule ba Yehova ba pa kala bādi betemba mobādi bekadile