Yehova Ulelele Boba Bamukulupile

“Kanye ka lusa lobe ne byabinebine byobe bīkale kundela nyeke.”—MOTŌTO 40:11.

1. Mulopwe Davida wālombele Yehova bika, ne pano kulomba kwandi i kwitabijibwe namani?

 MULOPWE Davida wa mu Isalela wa kala ‘wādi ukulupile Yehova,’ o mwanda wānene’nka kunena amba Yehova “wabandamine ko ndi, kaivwana lwito lwami.” (Mitōto 40:1) Wēmwenine na meso misunsa mivule muswelo ulelanga Yehova boba bamuswele. O mwanda Davida wālombele Yehova amulele nyeke. (Mitōto 40:11) Davida ubadilwa mu bana-balume ne bana-bakaji ba kikōkeji balailwe kukamona “lusangukilo lutabukilemo buya,” mwanda ulaminwe mu luté lwa Yehova amba i muntu ukapebwa ino mpalo. (Bahebelu 11:32-35) Bine, būmi bwandi bwa mu mafuku a kumeso budi na lukulupilo lwa binebine. Dijina dyandi i disonekwe mu “mukanda wa kivulukilo” wa Yehova.—Malaki 3:16.

2. Bisonekwa bitukwasha namani twivwanije buluji bwa kulelwa na Yehova?

² Nansha ba kikōkeji batelelwe mu Bahebelu shapita 11 byobāikele’ko kumeso kwa Yesu Kidishitu kwiya pano panshi, ino bādi na būmi bukwatañene na byobya byāfundije Yesu amba: “Yewa wakusanswa muya wandi aye ukamujiminanga, nanshi yewa ushikilwe muya wandi panopantanda aye ukēkala nao, ne ku būmi bwa kulādila nyeke ne nyeke.” (Yoano 12:25) Nanshi kulelwa na Yehova kekushintululapo amba ketukafikilwapo na masusu nansha kupangwapangwa nansha kumo. Ino i kulamibwa ku mushipiditu mwanda wa twikale na mwimanino mulumbuluke ku meso a Leza.

3. I kilomboji’ka kilombola amba Kidishitu Yesu wālaminwe na Yehova, ne i bipa’ka bilupukile’ko?

³ Nansha ke Yesu mwine wāpangilwepangilwe ne kufutululwa byamalwa, kadi ku mfulo balwana nandi bābwanya kumwipaya lufu lwa mwiko, lusansa mutyima. Ino ke kunenapo amba kino kyētupile na mulao wa Leza wa kulama Meshiasa. (Isaya 42:1-6) Lusangukilo lwa Yesu mu difuku dya busatu kinondanonda na lufu lwandi lwa munyanji i kilomboji kilombola amba Yehova wāivwene kudila kwandi—monka mwaāivwanine lwito lwa Davida. Mwanda Yehova wāitabile Yesu na kumupa bukomo bwa kulama bululame. (Mateo 26:39) Yesu pa kulamibwa mu uno muswelo, i mutambule kubulwa kufwa momwa mūlu, ne midiyo ya bantu badi na lwitabijo mu kikūlwa kyandi nabo bakamona būmi bwa nyeke.

4. I kikulupiji’ka kipelwe bene Kidishitu bashingwe mani ne “mikōko mikwabo”?

 ⁴ Tukokeja kukulupila amba Yehova udi na mutyima ne ubwanya kulela bengidi bandi dyalelo monka mwaālongele mu myaka ya ba Davida ne Yesu. (Yakoba 1:17) Banababo na Yesu bashingwe māni batyetye bakishele pano panshi bakokeja kukulupila mulao wālaile Yehova amba: “Bupyane bwa kubulwa kubola, nansha kujilulwa, nansha kujimina kwine mpika, bwimubīkilwe mūlu, bānwe balamininwe bukalama ku bukomo bwa Leza pa kwitabija ku lupandilo lulongolwele kala kusokolwa kuno kumfulo kwa mwaka.” (1 Petelo 1:4, 5) “Mikōko mikwabo,” idi na lukulupilo lwa pano panshi, nayo ikokeja kwikala na kikulupiji mudi Leza ne mu mulao waālaile kupityila kudi mulembi wa mitōto amba: “Yō! swai Yehova, bānwe bapandulwemo bandi bonsololo; Yehova ulelele babinebine.”—Yoano 10:16; Mitōto 31:23.

Balamibwe ku Mushipiditu

5, 6. (a) Le bantu ba Leza balaminwe namani mu ano mafuku? (b) I kipwano’ka kipwene bashingwe māni na Yehova, ne i kipwano’ka kyapwene na boba bakulupile kwikala pano panshi?

⁵ Mu ano mafuku, Yehova i mutūle’ko mpangiko ya kulama bantu bandi ku mushipiditu. Nansha byokebakingwepo ku kupangwapangwa nansha ku bikoleja ne binkumbulu bya umbūmi, ino i mwibape na dikōkeji bukwashi ne bukankamane bobasakilwa pa kulama kipwano kya pabwipi kyobapwene nandi. Kyalwilo kishimikilwe’po kino kipwano i lwitabijo lobetabije mu mpangiko ya Leza ya buswe ya kuleta’ko kitapwa kya kikūlwa. Bamo mu bano bene Kidishitu ba kikōkeji i bashingwe māni na mushipiditu wa Leza mwanda wa kwikala balopwe bakabikala na Kidishitu momwa mūlu. I batelwe bu boloke pa kwikala ke bana ba Leza ba ku mushipiditu, ne bino binenwa bitala pobadi amba: “Aye wetunyongolwele mu lupusa lwa fukutu, wetutundulwila umbulopwe bwa Mwana wa lusa lwandi. E monka mo twamwena bukūdi bwetu, ke kulekelwa kwa mambo etu kadi.”—Kolose 1:13, 14.

⁶ Bene Kidishitu bakwabo bavule ba kikōkeji i bakulupijibwe amba nabo bakamwena mu mpangiko ya Leza ya kikūlwa. Tutanga’mba: “Mwanā muntu kaīdile kwingidilwa mīngilo, mhm, nanshi poso ayeko ebēngidile, ne kupana būmi bwandi ke kikūlwa kya bangi bangi.” (Mako 10:45) Bano bene Kidishitu batengele kukaloelelwa mu kitatyi kya “byana bya bene bya ntumbo bwa bāna ba Leza.” (Loma 8:21) Pano’ko bidi, basangedile bulunda bobapwene umo ne umo na Leza ne kulonga buninge bwa binebine bwa kukomeja kino kipwano.

7. Yehova ulamanga bantu bandi dyalelo ku mushipiditu kupityila ku bika ne bika?

⁷ Muswelo umo Yehova walama bantu bandi ku mushipiditu i kwibapa kwaebapele mpangiko ya bufundiji bwendelela kumeso. Kino kibakwasha bafikile pa kuyukidija mpata bubinebine. Kadi Yehova wibapanga buludiki bwa  endaenda kupityila ku Kinenwa kyandi, bulongolodi bwandi, ne mushipiditu sandu wandi. Mu bwendeji bwa “umpika wa binebine, udi na manwa,” badi pamo’nka bwa kisaka kya mizo ne mizo. Kano kabumbo ka umpika kavuijanga bisakibwa bya ku mushipiditu, ne bisakibwa bya ku ngitu bine bya ba mu kisaka kya bengidi ba Yehova pobidi na mvubu—pampikwa kubanga muzo ne kisaka kobatambile.—Mateo 24:45.

8. Yehova wikulupīle ba dikōkeji bandi namani, ne wibakulupije bika?

⁸ Yehova kālaminepo Yesu ku ngitu pobāmutambile kudi balwana nandi, mo monka kalamangapo bene Kidishitu mu dino dishinda dyalelo. Inoko kino kekilombolapo amba Leza ketutōkelwepo mutyima. Nansha dimo! Ino akyo kyo kilombola kikulupiji kyaebakulupile amba bakamwitabila mu mwanda wa lupata lwa kuyuka muludiki wa diulu ne ntanda. (Yoba 1:8-12; Nkindi 27:11) Yehova kakelwapo ba dikōkeji bandi, “mwanda Yehova uswele kutyiba-mambo ne kulekelela bapandulwemo bandi mpika; balelelwe nyeke.”—Mitōto 37:28.

Kulelwa na Kanye ka Buswe ne na Bubinebine

9, 10. (a) Le binebine bya Yehova bikalela bantu bandi namani? (b) I muswelo’ka ulombola Bible amba Yehova ulelanga ba dikōkeji bandi kupityila ku kanye kandi ka buswe?

⁹ Davida, mu lulombelo lwandi lusonekelwe mu Mitōto 40, wālombele Yehova amulele na kanye ka buswe ne na bubinebine bwandi. Bubinebine bwa Yehova ne buswe bwaswele boloke bimulomba kuyukanya patōkelela misoñanya yandi. Boba balonda misoñanya yandi i balamibwe bininge ku njia, moyo, ne makambakano aponena boba bapela kulonda’yo. Kimfwa, twikiñanga batwe bene ne boba botuswele ku makambakano azozeja mutyima shi twepuka kutoma bintu bileta lunjingwe, malwa, busekese, ne būmi bwa bikandangobo. Enka ne boba basāsuka mu dishinda dya Yehova dya binebine—na mwāsāsukile’mo Davida kyaba kimo—i bakulupijibwe amba Leza ukidi “kifyamo” kya banonga-bibi besāsa. Bantu ba uno muswelo bakokeja kwela kabobo na nsangaji amba: “Ukandelanga ne ku tusua.” (Mitōto 32:7) Bine kino i kilomboji kikata kya kanye ka buswe ka Leza!

¹⁰ Kimfwa kikwabo kya kanye ka buswe ka Leza i kino: Leza udyumunanga bengidi bandi besansanye na ino ntanda imbi, yasa konakanya panopano. Tutanga’mba: “Kemukisanswa panopantanda, nansha byapanopantanda bīne. Shi muntu usenswe panopantanda, nankyo lusa lwa Tata keludipo mudi aye, mhm. Ke-bintu byonsololo bidi panopantanda, kilokoloko kya ngitu, ne kilokoloko kya meso, ne ntumbo ya kwitatula ya būmi, kebidipo bya Tata, mhm, i bya panopantanda.” Shi tuteja kino kidyumu ne kwikilonda, nabya tukokeja kulama būmi bwetu nyeke ne nyekeke, mwanda kisonekwa kibweja’ko amba: “Ino panopantanda papitanga, ne kilokoloko kyapo kīne kumo; nanshi yewa ulonga kiswa-mutyima wa Leza aye wikele nyeke.”—1 Yoano 2:15-17.

 Kulamibwa na Bukomo bwa Kulanga, Kusansanya, ne Tunangu

11, 12. Shintulula bukomo bwa kulanga, kusansanya, ne tunangu mobikokeja kwitulamina.

¹¹ Solomone mwanā Davida wāsonekele ku bukomo bwa mushipiditu pangala pa boba bakulupile kwitabijibwa na Leza, amba: “Kusansanya kukakulama; kwivwanija kukakulela.” Kadi wāsoñanya’mba: “Mona ñeni, . . . Kokazobolola’byopo kadi bikakulaminina, wibisanswe, nabyo bikakulamanga.”—Nkindi 2:11; 4:5, 6.

¹² Twingidijanga bukomo bwa kulanga shi tulanguluka pa byobya byotwifunda mu Kinenwa kya Leza. Kulanguluka kwitukwashanga tutamije kusansanya kukatampe kwituyukija bya kutangidija kumeso. Kino kidi na kamweno, mwanda batwe bavule tuyukile—pakwabo na kwimwena myanda—amba bantu bafikilwanga na bikoleja shi abatangidija bintu bibi kumeso, ku kusaka kwabo nansha pampikwa kuyuka. Ntanda ya Satana itutūdilanga bitungo bya kwikala bampeta, batumbe, ne ba lupusa, ino Yehova aye unena ukoma mvubu ya bitungo bya ku mushipiditu. Kutunya kutangidija bintu bya ku mushipiditu ko kufikijanga bisaka ku kupomoka, bulunda ku kupwa, ne bitungo bya ku mushipiditu ku kutalala. Mfulo mfulō, muntu ushala makasa, pakwabo uponena mu ngikadilo ya bulanda yālombwele Yesu amba: “Shi muntu apete panopantanda ponso ke pandi, ne būmi wējimija monka, lelo nankyo kyāmwenamo i kika?” (Mako 8:36) Nanshi kya tunangu i kulonda madingi anene Yesu amba: “Badikilai bidi kusaka bulopwe bwa Leza, ne boloke bwandi kumo, ebiya nankyo ne byabyo byonso bikemutentekelwapo.”—Mateo 6:33.

Kyaka Kidi mu Kwisakila Enka Abe Mwine

13, 14. Kwisakila kushintulula bika, ne mwanda waka ke biyampepo kwikala nako?

¹³ Bantu badi na kipangila kya kwisakila abo bene. Ino shi bya kwisakilasakila ne tumweno twa muntu bimutādile mu būmi bwandi, papo makambakano keabulwepo kumweka. O mwanda Yehova witufundijanga kwepuka kwisakila pa kulama bulunda botusambile nandi. Kwisakila i “kuta mutyima enka ku bintu byosaka abe mwine, ku bisakibwa byobe nansha tumweno tobe.” Mwene mo mwikadile bantu bavule dyalelo? Nanshi Bible wālaile bya bine amba mu “mafuku a kumfulo” a ngikadilo ya bintu ya Satana, “bantu bakēsanswa abo bene,” ko kunena amba bakekala ba mwino, besakila.—2 Temote 3:1, 2.

¹⁴ Bene Kidishitu i bemvwanije tunangu tudi  mu lubila lwa Bible lwa kuta mutyima ku tumweno twa bakwabo, kwibaswa monka mwiswedile muntu mwine. (Luka 10:27; Fidipai 2:4) Bantu bavule bene bamonanga amba i bikomo kulonga, inoko kyo kya kamweno shi tusaka kwikala na busongi buyampe, kipwano kya nsangaji mu kisaka, bulunda buloe. Nanshi mwingidi wa bine wa Yehova kafwaninwepo nansha dimo kubikalwa na kibutwila kya kwisakila mu būmi wabulwa’nka ne kulondalonda tumweno twa mvubu. Mwanda tumweno tubajinji ne twa mvubu i twa Yehova, Leza watōta.

15, 16. (a) Ngikadilo ya kwisakila itwalanga muntu kwepi, ne pamo bwa bāni? (b) Na bubine, i kwepi kufulanga muntu udi na kampeja-bukidi ka kutyibila bakwabo mambo?

¹⁵ Ngikadilo ya kwisakila itwalanga ku kwimona bu moloke, uyuka muntu waikala na ñeni mīpi ne na mwididi. Bible unena na bubinga’mba: “Abe mukelenge, kwikañanya i kutupu’ko, shi wi ani, shi wi ani, utyiba mambo; pōtyibilanga mukwenu mambo wiponejanga ne abe mwine; ke-wi-muntu abe utyiba’o nobe uloñanga byonka bintu bimo.” (Loma 2:1; 14:4, 10) Bendeji ba bipwilo ba mu mafuku a Yesu bādi basumininwe amba abo i boloke ne amba badi na nsambu ya kutyibila Yesu ne balondi bandi mambo. Pa kino, bētūdile abo bene bu batyibi. Abo pa kupūta meso pa bilubo byabo abo bene, bāfula ku kwiponeja abo bene mu kidye.

¹⁶ Yudasa, mulondi wa Yesu wāmwabile, nandi wāshilwile kutyibila bakwabo mambo. Kitatyi kimo bādi mu Betani, Madia kaka wa Lazalasa wāshinga Yesu māni a mwenye, penepa Yudasa wāfitwa mpata. Wāshilula kunena utompola’mba: “Le kika le ano mani kyo keapotelwe, nansha tutwa tusatu twa ndenadi, bābila balanda.” Ino nsekununi ibweja’ko bushintuludi amba: “Byānene nabya kewadi mwanda wa kudidila balanda lusa, mhm, ke-muntu aye wadi ngivi, kadi e yenka wadi wikele ne na mukolo wa bintu kusela.” (Yoano 12:1-6) Netu ketwakikalai nansha dimo pamo bwa Yudasa nansha bwa bendeji ba bipwilo, bādi na kampeja-bukidi ka kutyibila bakwabo mambo, ku mfulo beponeja abo bene.

17. Lombola kyaka kidi mu kwianya ne mu kwikulupila bipitepite.

¹⁷ Ino i kya bulanda, mwanda bene Kidishitu babajinji bamobamo, nansha byokebādipo bangivi pamo bwa Yudasa, ino bāponene mu mitatulo, kebeanya. Yakoba wāsonekele pangala pabo amba: “Bānwe mwitumbija mu kwisweja kwenu.” Kupwa wābweja’ko amba: “Kwitumbija konso kudi namino i kubi.” (Yakoba 4:16) Kwitatula pangala pa byotulongele nansha madyese otudi nao mu mwingilo wa Yehova i kwiobolwela musala. (Nkindi 14:16) Tuvulukei byāfikile mutumibwa Petelo, wēkulupile kyaba kimo kaianya’mba: “Nansha bonso bakakukolelwa, ami, mhm, kukukolelwa mpika. . . . Nanshi nankyo mfwa’tu nobe pamo, nkikupelepo.” Na bubine, ketudipo kya kwianinya. Byonso byotudi nabyo, tudi nabyo pa mwanda wa kanye ka buswe ka Yehova. Kuvuluka kino kuketulama tuleke kwianya.—Mateo 26:33-35, 69-75.

18. Yehova umwene mitatulo namani?

¹⁸ I betulombole amba: “Kwitatula kubadikidila bonakane, kadi ne mushipiditu wa kwizunzula ubadikidila kupona.” Mwanda waka? Yehova ulondolola’mba: “Kwitatula, ne kibengo . . . nashikwe’byo.” (Nkindi 8:13; 16:18) Ke kya kutulumukapo shi Yehova wālobele pa kumona “bilongwa bya mutyima mukomo wa mulopwe wa Ashidia, ne ntumbo ya kwitatula kwa meso andi”! (Isaya 10:12)  Yehova wāmupele mfuto. Panopano ponka ntanda yonso ya Satana, pamo ne bendeji bayo ba kibengo ne mitatulo, bamweka ne kebamweka, bonso basa kupebwa mfuto. Nanshi ketwakikolwa kwikala na luvumba lwa kwisakila ludi na bano balwana na Yehova!

19. Bantu ba Leza betembanga bika ino koku kadi betyepeje?

¹⁹ Bene Kidishitu ba bine badi na bubinga bonso bwa kwitemba kwikala kobekele bengidi ba Yehova. (Yelemia 9:24) Ino kadi, badi na bubinga bonso bwa kwikala betyepeje. Mwanda waka? Mwanda “abo bonso i bapye-mambo, bakadikile pa ntumbo ya Leza.” (Loma 3:23) Pa kulama mwimanino wetu wa bu bengidi ba Yehova, tufwaninwe kwikala na ngikadilo pamo bwa ya mutumibwa Polo, wānene amba “Kidishitu Yesu waīle panopantanda kupandija babipya-mambo; nanshi ami, ye mwine mutabukemo.”—1 Temote 1:15.

20. Yehova ulamanga bantu bandi dyalelo namani, ne mu mafuku āya kumeso’a usa kwibalama namani?

²⁰ Batwe bantu ba Yehova tutūlanga tumweno twetu kunyuma na nsangaji mwanda wa kutangidija tumweno twa Leza kumeso, o mwanda tukulupile amba Yehova ukendelela na kwitulama ku mushipiditu. Ne kadi tukulupile amba pasa kuposoka kyamalwa kibūke, Yehova ukalama bantu bandi, ke enkapo ku mushipiditu, ino i ne ku ngitu. Potusa kutwela mu ntanda impya ya Leza, tusa kwela kabobo amba: “I-i, uno i Leza wetu o twadi tukulupile, nandi wetupandija; uno’u i Yehova o twadi tukungila, tukasangala ne kusepelela mu lupandilo lwandi.”—Isaya 25:9.

Le Ukivulukile?

• Mulopwe Davida ne Yesu Kidishitu bālaminwe namani?

• Yehova ulamanga bantu bandi dyalelo namani?

• Mwanda waka tufwaninwe kuleka kwisakila batwe bene bipitepite?

• Mwanda waka tufwaninwe kwitemba ino koku kadi twityepeje?

[Bipangujo bya Kifundwa]

[Kifwatulo pa paje 19]

Yehova wālamine ba Davida ne Yesu namani?

[Kifwatulo pa paje 21]

I muswelo’ka ulelelwe bantu ba Leza dyalelo ku mushipiditu?

[Bifwatulo pa paje 22]

Nansha byotwitumbija mwanda twingidilanga Yehova, ino twikalei nyeke betyepeje