Bankasampe, Tendelai Yehova!
Bankasampe, Tendelai Yehova!
“Tendelai Yehova muno munshi, . . . balumyana ne bakajana bene kumo.”—MITŌTO 148:7, 12.
1, 2. (a) I bijika bya muswelo’ka biyukile biyampe bankasampe bavule? (b) Mwanda waka bankasampe kebafwaninwepo kutompola pa bijika bibatūdile bambutwile babo?
BANKASAMPE bavule bajingulwile bintu byokebapelwepo kishima kya kulonga. Bavule bakokeja kukutelela lubilo lonka myaka yobafwaninwe kwikala nayo kumeso kwa kupebwa lupusa lwa kutyibuluka kasuku mu kipito, kwiija nsaa kampanda bufuku nansha ke myaka yobakashilula kwendeja motoka. Kyaba kimo, nkasampe ukokeja kwikala na bivule byasaka kulonga, ino malondololo obamulondolola i amo onka amba “Ilaija bidi shi ubatama.”
2 Banwe bankasampe muyukile amba bambutwile benu bamwene amba i biyampe kwimupa bino bijika, pakwabo i mwanda’tu wa kwimukinga. Kadi muyukile senene amba Yehova usangalanga shi mukōkela bambutwile benu. (Kolose 3:20) Ino le pamo mulañanga amba mukilaija bidi kumeso kwa kushilula būmi bwenu bwinebwine? Le byonso bya kamweno i bimupelejibwe kufika’nka ne byomukatama? Bine ke amopo! Kudi mwingilo wingilwa dyalelo udi na kamweno kakatampe kutabuka bintu byonso byomwilaija. Lelo banwe bankasampe mudi na kishima kya kwilunga ku uno mwingilo? Bine mudi nakyo—kadi mwi betwe kwingila’o na Leza Mwine Mukatakata Mwine!
3. Yehova wimwita banwe bankasampe mwingile mwingilo’ka, ne i bipangujo’ka byotusa kubandaula?
3 Le i mwingilo’ka otwisambila’po? Ivwana binenwa bya kisonekwa kimanine’po kino kishinte, binena’mba: “Tendelai Yehova muno munshi, . . . balumyana ne bakajana bene kumo; ne bana-balume banunu ne bankasampe.” (Mitōto 148:7, 12) Ano o madyese makatampe omupelwe: Kutendela Yehova. Byodi nkasampe, lelo usangedile kwingila uno mwingilo? Bavule basangedile’o. Pa kuyuka mwanda waka i biyampe kusangela uno mwingilo, tubandaulei bipangujo bisatu. Kibajinji, mwanda waka mufwaninwe kutendela Yehova? Kya bubidi, i muswelo’ka omukokeja kumutendela mobifwaninwe? Kya busatu, i kitatyi’ka kiyampe kya kushilula kutendela Yehova?
Mwanda Waka Mutendele Yehova?
4, 5. (a) Kukwatañana na Mutōto wa 148, le tudi mu ngikadilo’ka ya kutendelwa? (b) Le bupangi kebukokejapo kunena nansha kulanga butendelanga Yehova muswelo’ka?
4 Buluji bukatampe bwa kutendelela Yehova i buno: aye ye Umpangi. Mutōto wa 148 witukwasha tujingulule buno bubinebine. Langa’po bidi: Shi ubafwena kibumbo kikatampe kya bantu bemba kiundaunda lwimbo luyampe lūlula masenda, wivwanga namani? Ukamona namani shi binenwa bya mu lwimbo’lwa i bishima byoyukile amba i bya bine, bilombola milangwe yoyukile amba i ya kamweno, ya nsangaji, ne ikankamika? Mwene nobe ukekala na mutyima wa kuyuka binenwa’bya ne kwilunga ku lwimbo? Bine, batwe bavule tukekala nao. Ne Mutōto wa 148 nao ulombola amba ino yo ngikadilo yodi’mo, inoko mu muswelo wa kutendelwa kupita ne ino mine. Uno Mutōto ulombola kibumbo kikatampe kitendela Yehova kiundaunda. Ino potanga uno mutōto, padi usa kumona’mo kintu kyeni. Lelo i kintu’ka?
5 Batendedi bavule batelelwe mu Mutōto wa 148 kebanenangapo nansha kulanga kwine. Kimfwa, tutanga amba dyuba, kweji, ñenyenye, mashika, luvula, ngulu, ne tungulu bitendelanga Yehova. Le bino bipangwa byampikwa būmi bikokeja kutendela namani? (Vese 3, 8, 9) Bine, bitendelanga monka mutendelela mityi, bipangwa bya mu tulunga lui, ne banyema. (Vese 7, 9, 10) Le kwabandile kupona kwa dyuba kulumbuluke nansha kumona kweji lubenji mu diulu ditoyole ñenyenye nansha kuloelelwa pa kutala banyema bakaya nansha kutulumuka pa kubandila nzaba ya ntanda ya buya bwa dyangi? Shi kodi mulonge bino, nankyo kodi ‘mwivwane’ lwimbo lwa mitendelo lutamba mu bupangi. Byonso bilongele Yehova bituvuluja amba i Umpangi mwinē bukomo bonso, ne amba kekudipo ungi mu diulu ne ntanda udi na bukomo, na tunangu ne na buswe pamo bwa aye.—Loma 1:20; Kusokwelwa 4:11.
6, 7. (a) Mutōto wa 148 ulombola amba bipangwa bya ñeni bitendelanga Yehova namani? (b) Mwanda waka mutyima ufwaninwe kwitutonona tutendele Yehova? Leta kimfwa.
6 Mutōto wa 148 ulombola kadi amba bipangwa bya ñeni nabyo bitendelanga Yehova. Mu vese wa 2, batela’mo “kibumbo” kya Yehova kya momwa mūlu, bamwikeulu batendela Leza. Mu vese wa 11, bantu ba bukomo ne ba lupusa, kimfwa balopwe ne batyibi, nabo i banenwe kwilunga mu ino mitendelo. Shi bamwikeulu bakomo baloelelwe kutendela Yehova, lelo bantu ke pepi, mwene abo bo bene bafwaninwe kumutendela? O mwanda mu vese wa 12 ne wa 13, banwe bankasampe nenu bemwita amba mwilunge mu kutendela Yehova. Le mutyima wenu wimutonwenanga ku kumutendela?
7 Ivwanai bidi kino kimfwa. Shi udi na mulunda wa pa mutyima udi na bwino buvule—padi i mu makayo, mu kupunga bintu, nansha mu minjiki—le ubulwe kumwanya mu kisaka kyenu nansha ku meso a balunda bakwabo? Bine ukamwanya. Nanshi ne kuyuka byonso bitala padi Yehova nako kukemutonona muswelo umo onka. Kimfwa, Mitōto 19:1, 2 inena amba kubandila diulu ditoyole ñenyenye kufikijanga muntu ku ‘kwela lubila.’ Shi tulanguluka pa bintu bya kutendelwa bilongele Yehova, na bubine, ketukabulwepo kusapwila bakwetu myanda yandi.
8, 9. I bubinga’ka busakila Yehova tumutendele?
8 Buluji bukwabo bukatampe bwa kutendelela Yehova i mwanda aye mwine usaka tumutendele. Mwanda waka? Le i mwanda usakanga batwe bantu tumwanye? Mhm. Batwe bantu padi tukimbanga kyaba kimo kwanibwa, ino Yehova aye i mukatampe kwitutabuka kalampe kwine. (Isaya 55:8) Kealakanangapo nansha kwalakana ngikadilo yandi. (Isaya 45:5) Ino kyasaka i mitendelo yetu ne kino kimusangajanga. Mwanda waka? Ivwana bubinga’tu bubidi. Bubajinji, uyukile amba tunenwe’nka kumutendela. Mwanda i mwitupange na kyumwa kya ku mushipiditu, mutyima wa kumutōta. (Mateo 5:3) Shi Yehova witumona tulonga kino, usangalanga, monka musangelanga bambutwile bobe shi bakumona udya bidibwa byobayukile amba i biyampe kodi.—Yoano 4:34.
9 Bwa bubidi, Yehova uyukile amba bantu bakwabo nabo banenwe kwitwivwana potumutendela. Mutumibwa Polo wātumīne nkasampe Temote mukanda wa bino binenwa’mba: “Widyumuke abe mwine, ne lufundijo lobe lwine kumo. Uminina monka mu bino bintu bino’bi, e mwakwipandijija abe mwine, ne bakukwivwana bēne kumo.” (1 Temote 4:16) I amo, pofundija bakwenu myanda itala padi Leza, umutendela ne kumutendela, nabya nabo bakayuka Yehova. Bine, buno buyuki bukebatwala ku lupandilo lwa nyeke!—Yoano 17:3.
10. Mwanda waka mutyima witutononanga tutendele Leza wetu?
10 Kudi buluji bukwabo bwa kutendelela Yehova. Vuluka kimfwa kya mulunda nobe wa pa mutyima udi na bwino. Shi ubaivwana bantu bamubepela bya bubela, bafutulula dijina dyandi, mwene po pene pokalonga bukomo bwa kumutendela? Bine, Yehova nandi ubepelwanga bya bubela mu ino ntanda. (Yoano 8:44; Kusokwelwa 12:9) O mwanda boba bamuswele bekalanga na mutyima wa kunena bubinebine padi, balombola myanda moyolokele. Lelo nobe ukimba kulombola Yehova buswe bobe, ne kumufwija’ko, ne kwilombola amba usakanga ekale Mulopwe obe pa kyaba kya Satana walwana nandi mukatampe? Ukalonga bino byonso shi utendela Yehova. Kipangujo kilonda’ko i kino, ukamutendela namani?
Muswelo Watendele Bankasampe Bamo Yehova
11. I bimfwa’ka bya mu Bible bilombola amba bankasampe bakokeja kutendela Yehova senene?
11 Bible ulombola amba divule bankasampe batendelanga Yehova senene. Kimfwa, kudi nsongwakaji mwine Isalela wāselelwe bu musungi na bene Shidea. Wāsapwidile mukaja mfumwandi pampikwa moyo myanda itala Edisha mupolofeto wa Yehova. Binenwa byandi byāfikija ku kingelengele, ne bukamoni bukatampe bwasapulwa. (2 Balopwe 5:1-17) Yesu nandi wāsapwile pakubulwa moyo paādi ukidi mwanuke. Mu byonso byālongele Yesu pa bwanuke, Yehova wātongele kusonekeja mu Bisonekwa mānga imo kete, ya popa paādi na myaka 12 wipangula na bukankamane bafundiji ba bipwilo mu tempelo mu Yelusalema ne kwibashiya mu kanwa pululu, batendela kwivwanija kwaādi wivwanije mashinda a Yehova.—Luka 2:46-49.
12, 13. (a) Yesu wālongele bika mu tempelo kumeso’tu kwa lufu lwandi, ne bantu bādi’mo bālongele’po namani? (b) Bendeji ba bipwilo bāmwene namani mitendelo yātendele banuke?
12 Yesu pa kutama, wālengeje banuke nabo batendele Yehova. Kimfwa, mafuku matyetye’tu kumeso kwa aye kufwa, wāpityije kitatyi kampanda mu tempelo ya mu Yelusalema. Bible unena’mba wālongele “bikatampe byakutendelwa” mwine’mwa. Wāpanga boba bādi bālamuna kifuko kijila ke muta wa bangivi. Kadi wāundapa bampofu ne babilemafu. Bonso bādi’mo bādi bafwaninwe kutendela Yehova ne wandi Mwana, nakampata bendeji ba bipwilo. Ino i kya bulanda, mwanda bavule mu mafuku’a kebātendelepo. Bādi bayukile amba Yesu i mutumwe na Leza, ino koku batyina bendeji ba bipwilo. Inoko kudi kisumpi kimo kya bantu bānene pakubulwa moyo. Le uyukile i bāni? Bible unena’mba: “[Babitobo] bakatampe ne basonekeji kumo, pa kumona nabya byobya bikatampe byakutendelwa byālongele [Yesu], kadi bāna banuke nabo ke basame mu njibo ya Leza’mba: Hosana! ku Mwana Davida; ebiya aba [babitobo] bakatampe, ne basonekeji ku mityima fututu. Penepo kūmvwana kudi abo amba: Lelo [Yesu] ubaivwana mo banenena’ni?”—Mateo 21:15, 16; Yoano 12:42.
13 Boba babitobo bādi bakulupile amba Yesu usa kūbija bana bādi bamutendela’ba. Lelo wēbobije? Nansha dimo! Yesu wātentulwile babitobo amba: “Eyo, kemwatangile nanshi amba, mu kyakanwa kya twana, ne mu twalukeke tukyamwa, mo muneñenye mitōto”? Bine, Yesu ne Shandi mwine bāsangedile mitendelo ya banuke batyetye’ba. Bano bana bādi balonga byobya byādi bifwaninwe kulonga bakulumpe bonso bātenwe pene’pa. Nanshi banuke’ba bāivwanije bintu byonso senene mu ñeni yabo ya bwanuke. Bāmwene uno muntu ulonga bya kutendelwa, wisamba na bukankamane ne na lwitabijo, kadi ulombola buswe bukatampe bwaswele Leza ne bantu. Na bubine wādi monka mwaādi witelela aye mwine—Meshiasa, “Mwana Davida” wālailwe. Bano banuke bāeselwe pangala pa lwitabijo lwabo mwanda bāikele na dyese dya kufikidija bupolofeto.—Mitōto 8:2.
14. Le byabuntu bidi na bankasampe bibakwashanga namani mu kutendela Leza?
14 I ñeni’ka yotuboila ku bino bimfwa? I ino: banuke bakokeja kwikala bantu batendela Yehova senene. Divule badi na kyabuntu kya kumona bubinebine patōkelela kadi mu muswelo upēla, ne balombola lwitabijo lwabo na kyanga ne bupyasakane. Ne kadi badi na kyabuntu kitelelwe mu Nkindi 20:29 amba: “Ntumbo ya bansongwalume i bukomo bwabo.” Bine, banwe bankasampe mudi na dyese dya kwikala na bukomo ne kininga—mwi bituntwa bya binebine mu kutendela Yehova. Shi ke pano, i muswelo’ka mupotoloke omukokeja kwingidija bino byabuntu?
Le Mukokeja Kutendela Yehova Muswelo’ka?
15. I bika bifwaninwe kukutonona utendele Yehova senene?
15 Kutendela Yehova senene kushilulanga mu mutyima. Kemukokejapo kutendelela Yehova senene shi mumutendela mwanda’tu wa bantu basaka mumutendele. Vulukai amba kijila kitabukile bijila byonso i kino: “Ukasanswa Yehova Leza obe, ne mutyima obe onso, ne muya obe onso, ne manwa obe onso.” (Mateo 22:37) Lelo kodi muyuke Yehova bunka bobe kupityila ku kifundwa kyobe kya Kinenwa kyandi? Bipa biyampe bilupukanga ku kuno kwifunda i mutyima wa kwiteleka amba uswele Yehova. Ne muswelo muyampe wa kulombola buno buswe i kumutendela. Shi uyukile biyampe kyokya kikutonona utendele Yehova, ne shi i kikomo, nabya ukamutendela na kyanga.
16, 17. Mwiendelejo obe udi na mwingilo’ka mu kutendela Yehova? Leta kimfwa.
16 Pano, kumeso kwa kuyuka i bika byokanena, tala bibi i bika byokalonga. Shi yewa nsongwakaji wa mu myaka ya Edisha wādi nyeke na muneneno wa kibengo, wampikwa bulēme, ne wa budimbidimbi, le ulanga bene Shidea bādi bamumunine bādi ba kuteja byanena pangala pa mupolofeto wa Yehova? Nansha dimo. Mo monka ne bantu nabo, bakata matwi ku byonena shi bamona amba udi na bulēme, wampikwa budimbidimbi, ne udi na bilongwa biyampe. (Loma 2:21) Ivwana bidi kimfwa kimo.
17 Nsongwakaji wa mu Portigale wa myaka 11 wadi ukokwa na bakwabo amba afete mafetyi a ku masomo ajilula mutyima wandi wa mundamunda mufundijibwe na Bible. Na bulēme bonso, washintulwila mwadimu wandi mwanda waka upela, ino mwadimu washilula kumusepa na kibengo. Kitatyi pa kupita’po, mwadimu watompa misunsa mivule kumufwija bumvu, na kufutulula kipwilo kyandi. Inoko, uno nsongwakaji kasha ulama bulēme bwandi. Myaka’po, uno nsongwakaji washilula kwingila bu pania wa lonso, mwingidi wa kitatyi kyonso. Ku kitango, wamona mu bantu babatyijibwa muntu umo wayukile. Ke mwadimu wandi’wa kadi! Pa kupwa kwipamba bipa ne impolo ponka, lolo mutame’wa washintulwila nkasa amba kaidilwepo nansha dimo bulēme bwa wandi mwanā masomo. Kamoni umo waile ku njibo yandi, nandi wamusapwila mwikadilo wa mwanā masomo umo waafundije. Ku mfulo bashilula kwifunda Bible, ne uno lolo nandi waitabija bubinebine bwa mu Bible. Bine, mwiendelejo obe nao i muswelo wa kutendela Yehova na bukomo!
18. Nkasampe ukokeja kulonga bika shi wikaka kushilula mīsambo itala pa Bible nansha padi Yehova Leza?
18 Le umonanga kyaba kimo amba i bikomo kushilula mīsambo itala pa lwitabijo lobe ku masomo? Yuka amba kudipo bunka. Inoko ukokeja kusaula mikenga mwanda wa bakwenu bakwipangule myanda itala lwitabijo lobe. Kimfwa, shi i kitabijibwe mungya bijila kwenu, mwene ukokeja kusela mabuku esambila pa Bible ne kutanga’o mu kitatyi kya kukōkolokwa shi kwa midi nansha nsaa mikwabo itabijibwe? Bakwenu ba ku masomo bakokeja kukwipangula bine byotanga’bya. Pa kulondolola ne kwibalombola bikusangeje mu kishinte nansha mu dibuku dyotanga, ukatulumuka’tu kodi kala mushilule mīsambo. Vuluka ne kwipangula bipangujo, kuyuka bikulupile mwanā masomo mukwenu. Teja na bulēme ne kusapula byobya byowifundile mu Bible. Monka mwikilombwela myanda mimweke, bankasampe bavule batendelanga Leza ku masomo. Kino kibapanga nsangaji mikatampe, kadi kikwashanga bavule bayuke Yehova.
19. Bankasampe bakokeja namani kwingila mwingilo senene ku kibelo ne kibelo?
19 Mwingilo wa ku kibelo ne kibelo o muswelo mufwaninwe mpata wa kutendela Yehova. Shi kwashilwile kwingila’o, ubulwe’po kwitungila’o bu kitungo? Shi wingilanga’o kala, nabya kudi bitungo bikwabo byobwanya kwitungila. Kimfwa, pa kyaba kya kunena enka bintu bimo byonka ku kibelo ne kibelo, ukokeja kukimba miswelo ya kulumbulula buneni, padi i na kulomba bukwashi kudi bambutwile bobe nansha banabetu bapye. Wifunde kwingidija Bible bininge, kulonga kujokela’mo kupya kuyampe, nansha kushilula bifundwa bya Bible. (1 Temote 4:15) Mu kwenda uyuka kutendela Yehova, mo mu kwenda uyuka bivule, kadi mo mu kwenda umona nsangaji mu mwingilo obe.
Ukashilula Kitatyi’ka Kutendela Yehova?
20. Mwanda waka bankasampe kebafwaninwepo kwimona bu banuke bininge pa kutendela Yehova?
20 Mu bipangujo bisatu byotubandaula mu kino kishinte, kino kipangujo kya mfulo kyo kipēla kulondolola. Ivwana malondololo a Bible ambulwa kafinda, amba: “Vuluka Umpangi obe mu mafuku obe pokidi nkasampe.” (Musapudi 12:1) Bine, pano po apo pa kushilula kutendela Yehova. Ino i bipēla kunena’mba: “Ami ne mwanuke nkibwanyapo kala kutendela Yehova. Nkidipo na bwino. Mfwaninwe bidi kwilaija’ko shi natama.” Bine, ke abepo umbajinji kwimona uno muswelo. Yelemia nkasampe nandi wānene Yehova amba: “A Mfumwetu Leza! Talapo bidi, nkikōkejapo kwisamba: mwanda ne mwanuke.” Yehova wāmukulupije amba kadipo ne kya kutyinina. (Yelemia 1:6, 7) Ne batwe netu mo monka, ketudipo ne kya kutyinina kine potutendela Yehova. Kekudipo kibi kibwanya kwitufikila kikakomenwa Yehova kupwija lonso.—Mitōto 118:6.
21, 22. Mwanda waka bankasampe batendela Yehova badi pamo bwa lume, ne mwanda waka kuno kwenzankanya kukankamikanga?
21 Twimukankamika banwe bankasampe amba: Kemwakikakai kutendela Yehova! Pano pomukidi banuke po pa kitatyi kinekine kya kwingila mwingilo wa mvubu wingilwa pano pa ntanda dyalelo. Shi mwingile’o, nabya mubelunga ku kintu kya kutendelwa—kisaka kya ntanda yonso kya boba batendela Yehova. Yehova uloelelwe pa kuyuka amba ne banwe’bo mubadilwa mu kino kisaka. Ivwanai bidi bino binenwa byānene mulembi wa mitōto kudi Yehova amba: “Bantu bobe bēpana abo bene ku mityima tō, mu difuku dya bukomo bobe, mu buya bwa bupandulwemo, kushilwilanga lubanga bwē! Udi ne lume lwa bunkasampe bobe.”—Mitōto 110:3.
22 Lume lwa lubanga lukelema na mikejima ya dyuba i kyelekejo kilumbuluke, mwene i amo? Bine, lutalajanga mutyima, lweñenya, ne kadi kelubadikapo mwanda i luvulevule. Uno o muswelo umwene Yehova bankasampe bamutendela na kikōkeji mu ino myaka ya malwa. Bine ne bine ponka, butongi bobe bwa kutendela Yehova busangajanga mutyima wandi. (Nkindi 27:11) Shi ke pano, banwe bankasampe, tendelai Yehova!
Usa Kulondolola Namani?
• I buluji’ka bumobumo bwa kamweno botutendelela Yehova?
• I bimfwa’ka bya mu Bible bilombola amba bankasampe bakokeja kutendela Yehova senene?
• Bankasampe bakokeja kutendela Yehova namani dyalelo?
• I kitatyi’ka kifwaninwe bankasampe kutendela Yehova ne mwanda waka?
[Bipangujo bya Kifundwa]
[Kifwatulo pa paje 18]
Shi mulunda nobe udi na bwino buvule, ubulwe kumwanya ku bantu bakwabo?
[Kifwatulo pa paje 21]
Shi usaka kulumbulula mwingilo obe, lomba bukwashi kudi Kamoni wa bwino