Kukimbakimba Ndoe ya Mutyima

ALBERT wādi mulume wa nsangaji na bana babidi bayampe. Ino wādi umona amba kudi kintu kyabudilwe mu būmi bwandi. Kitatyi kyaādi wikonda pa kusokola kaji, wēkujije mu politike ne kwikala umo wa mu kitango kya Kisosialiste. Mwenda mafuku wāfula ne ku kubadilwa mu kitango kya Kikoministe kya mwabo.

Inoko lubilo lonka, Albert wāfityilwa kitango kya Kikoministe. Wātyiba kipwano kyandi na politike ne kwipāna aye yense ku kisaka kyandi. Kukimba nsangaji ya kisaka kwaikala ke kitungo kyandi umbūmi. Inoko, Albert wādi’nka wimona bu mubulwe kintu kampanda munda mwandi; wadi umpumbwe ndoe ya binebine ya mutyima.

Ino ke’nkapo Albert ulongele bino. Midiyo ne midiyo ya bantu pa kutana kitungo kiluji mu būmi bwabo i batompe kulonda mifwatakanyo, mafilozofi, ne bipwilo palapala. Mu ntanda ya Kushika, kitango kimo kya bantoma-dyamba kitelwa bu hipie kyadi, mu myaka ya 1960, kisumpi kitomboke kipela misoñanya yonso ya kishi ne ya mwikadilo. Nakampata bankasampe badi bakimba nsangaji ne buluji bwa būmi bwabo na kutoma bintu bileta lunjingwe ne na kulonda mafilozofi a boba betwa bu baguru ne a babitobo bakatampe ba kitango kyabo. Inoko, kitango kya bano bantoma-dyamba kekyaletelepo nsangaji ya binebine. Pa kyaba kya nsangaji, bankasampe bavule betumpile mu bitomibwa bya kwitonda ne mu buenda, bintu byafikije bibundi ku kushetemuka ne ku kavutakanya.

Mu bula bwa tutwa twa myaka, bavule i bakimbe nsangaji mu bupeta, mu lupusa, ne mu masomo. Ano mashinda onso i mafule ku kutyumuna bantu mityima. Yesu wānene amba “bumi  bwa muntu kebudipo mu bungi bwa byabupeta byandi.” (Luka 12:15, Myanda Miyampe ku Bonso) Kadi kwipeka mu kulondalonda byabupeta divule kubudijanga muntu nsangaji. Bible unena’mba: “Boba batele mityima’mba, tusakwikala bampeta, nabya abaponena mu kutompibwa, abapi mu dikinga, ne mu bya kilokoloko kya bulembakane, ne kya byakwiletelela, bino bidi namino bitūkija bantu [ku] koneka, ne umbufudile. Ke-kuntu kusanswa kwa lupeto kyo kitako kya bubi bonso miswelo ne miswelo; mo mudi kongwelwa bamobamo . . . abapu kwitapatapa ku misongo ya ntanda ne ntanda.”—1 Temote 6:9, 10.

Penepa muntu ukokeja namani kusokola ndoe ne kitungo umbūmi? Lelo i mwanda wa kufufukuta, pamo bwa kwasa mu kitondo kekimweka mu fukutu bwī? Mhm, ke amopo. Mu kishinte kilonda’ko, tusa kumona amba malondololo otutondwa ne a kamweno emanine na bubine pa bisakibwa bya mvubu mpata, bisakilwa enka bantu kete.

[Kifwatulo pa paje 3]

Lelo kulondalonda bupeta, lupusa, ne masomo kukakupa ndoe ya mutyima?