‘Kuleta Myanda Miyampe ya Dyese’

“E-e! keo būya maulu pa ngulu a yewa . . . uleta myanda miyampe ya dyese.”—ISAYA 52:7.

1, 2. (a) I bintu’ka bilengeja moyo bilongeka difuku ne difuku? (b) Le bavule beivwananga namani kitatyi kyobevwana nyeke ino misapu imbi?

 DYALELO bantu ba ntanda yonso bemonanga bu batyintyidilwe na misapu imbi. Bafungula maladiyo ne kuteja misapu ilenga moyo itala pa mbá ileta lufu iponena ino ntanda. Amba bele meso ku misapu ya televijo, bamona bifwatulo bizakaja bya bana bafwa nzala balomba bukwashi. Pa kuputula mu majulunale namo batanga’nka myanda ya mabombe asabika, alala mobo, ne kwipaya bantu bampikwa mwanda kebabadika.

² Bine, bintu bilenga nzuba bilongekanga difuku ne difuku. Mwikadilo wa ino ntanda po pene wenda ubipila’ko kutabuka. (1 Kodinda  7:31) Dipepala dimo dya mu Bulaya bwa Kushika dinena’mba kyaba kimo bimwekanga amba ntanda yonso “isa kulakuka lubimbi lwa mudilo.” O mwanda mwine bantu bavule bemvwana njia pangala pa ino misapu imbi keidi mpwilo! Mukelenge umo, waipangwilwe mu bwipangudi bwalongelwe ku televijo mu États-Unis, ulombola na bubine mwiivwanino wiivwananga bantu bavule amba: ‘Shi napu kulonda misapu, ngivwananga mutyima kupēpa. Yonso i enka’tu misapu imbi. Izozejanga bantu mityima mpata.’

Myanda Ifwaninwe Kwivwanwa na Muntu Yense

3. (a) Bible usapulanga myanda miyampe’ka? (b) Mwanda waka myanda miyampe ya Bulopwe idi na mvubu kodi?

³ Mu ino ntanda ityumuna mityima namino, le mukokeja kutanwa ne misapu miyampe? Na bubine, ikokeja kutanwa’mo! I kintu kisenga ku mutyima pa kuyuka amba Bible usapulanga myanda miyampe. I myanda ilombola amba misongo, nzala, mavita, ne masusu onsololo bisa kutukijibwa na Bulopwe bwa Leza. (Mitōto 46:9; 72:12) Mwene ino yo misapu isangela muntu yense kwivwana? Na bubine batwe Batumoni ba Yehova mo motulangilanga. O mwanda tuyukene pi na pi amba tuloñanga bukomo bwa kusapula myanda miyampe ya Bulopwe bwa Leza ku bantu ba mizo yonso.—Mateo 24:14.

4. I bintu’ka bitala mwingilo byotusa kubandaula mu kino kishinte ne mu kishinte kilonda’ko?

⁴ Penepa tukalonga namani mwanda wa twendelele na kusapula myanda miyampe na nsangaji ne kusumininwa—nansha ke mu myaba mudi buñumauma mwine? (Luka 8:15) Kupituluka bityetye mu bintu bisatu bya mvubu bya mwingilo wetu wa busapudi kekukabulwepo kwitukwasha. Tusa kubandaula (1) kukanina kwetu kwa mutyima, nansha kine kyotusapwila; (2) musapu wetu, nansha bine byotusapula; ne (3) musapwilo wetu, nansha muswelo otusapula. Shi tudi na kukanina kwetu kwa mutyima kuyampe, tuyukile ne musapu wetu ne misapwilo yetu senene, nabya tukapa bantu beshileshile mukenga wa kwitabija misapu milumbuluke ipityile yonso dyalelo—ke myanda miyampe ya Bulopwe bwa Leza kadi. *

Kine Kyotusapwila Myanda Miyampe

5. (a) I kika kine kitutonona tusapule? (b) I kika kinenenwa amba kukōkela lubila lwa mu Bible lwa kusapula i kulombola Yehova amba tukuswele?

⁵ Tubandaulei pano kintu kibajinji—kukanina kwetu kwa mutyima. I kika kine kyotusapwila myanda miyampe? I enka kyokya kyādi kisapwila’yo Yesu. Wānene amba: “Nsenswe Tata.” (Yoano 14:31; Mitōto 40:8) Nanshi kine’tu kitutonona i buswe botuswele Leza. (Mateo 22:37, 38) Bible ulombola kino mwanda ukwatañanya buswe bwa kuswa Leza na mwingilo, amba: “Buno namino bo buswe bwa Leza, amba tulame mbila yandi.” (1 Yoano 5:3, NW; Yoano 14:21) Lelo mu ino mbila mudi ne lubila lwa ‘kwenda kukalonga bana ba bwanga’? (Mateo 28:19) I amo. Eyo, mwine wānene bino binenwa i Yesu, ino na bubine i bitambe kudi Yehova. Namani? Yesu wāshintulwile amba: “Nkīlongelangapo ka ami mwine nansha katyetye, ino byonka binombola Tata byo byonka byo nēsamba.” (Yoano 8:28; Mateo 17:5) Nanshi shi tulama mbila ya kusapula, nabya tulombolanga Yehova amba tukuswele.

6. Buswe botuswele Leza bwitutononanga mu miswelo’ka mikwabo amba tusapule?

⁶ Ne kadi kuswa kotuswele Yehova kwitutononanga tusapule mwanda tusakanga kubepulula bubela busalaja Satana padi aye. (2 Kodinda 4:4) Satana wātatene bubikadi boloke bwa Leza. (Ngalwilo 3:1-5) O mwanda batwe Batumoni ba Yehova tudi na mutyima wa kutuluja buvubavuba bwa Satana ne kuyukanya buujila bwa dijina dya Leza ku bantu. (Isaya 43:10-12) Pakwabo kadi, tusapulanga mwanda tubayuka ngikadilo ya Yehova ne mashinda nandi. Pa kino twimonanga amba tudi kubwipi na Leza ne mutyima witukunkanga mpata amba tumuyukanye ku bakwetu. Bine, buyampe bwa Yehova ne mashinda andi moloke bitupanga nsangaji itusonshila twisambile enka padi aye. (Mitōto 145:7-12) Tukunkwanga ku mityima  tumutendele ne kumunenena “byabuya” ku bonso betwivwana.—1 Petelo 2:9; Isaya 43:21.

7. Kutalula’mo buswe botuswele Leza, i buluji’ka bukwabo bwitutonona tusapule?

⁷ Kudi kadi buluji bukwabo bwa mvubu bwitutonona twingile uno mwingilo: Tusaka na mutyima umo kunyongolola bantu batyintyidilwe na misapu imbi yobapungulwilwa kitatyi kyonso, ne boba basusuka masusu o-onso. Potulonga namino, tukimbanga kwiula Yesu. Tala bidi kimfwa byobya bilombwelwe mu Mako shapita wa 6.

8. Nsekununi idi mu Mako shapita wa 6 ilombola amba Yesu wāivwanine bantu bika?

⁸ Batumibwa abetole ku kampanye kabo ka busapudi, kebasekunwina Yesu byonso byobalonga ne byobafundija. Yesu wayuka amba batumibwa bandi abakōka, webanena amba iyai ‘mwitūkije bidi kakyaba katyetye.’ Penepa abaikila mu bwato kebenda kwa bunka bwabo. Ino bantu nabo abashilula kwenda lubilo dya ku mbadi, penepo abedi mankuma. Le Yesu walonga’po bika? “Yesu pa kutamba wamwene kibumbo kikatampe kīne, ponkapo webafwila lusa ke-bantu badi badingakene bwa mikōko ya kubulwa mukumbi, penepo k[a]ebafundija bingi bingi.” (Mako 6:31-34) Eyo, Yesu i mukōke, ino waendelela na kusapwila bantu myanda miyampe mwanda webakwatyilwa lusa. Bine, Yesu utele bano bantu mutyima bya binebine. Webevwanina lusa.

9. I ñeni’ka yotuboila ku nsekununi idi mu Mako shapita wa 6 ilombola kukanina kwa mutyima kuyampe kotusapula nako?

⁹ Lelo i ñeni’ka yotwaboila ku ino nsekununi? I ino: Batwe bene Kidishitu tudi na kiselwa kya kusapula myanda miyampe ne kulonga bana ba bwanga. Tunenwe kwimona amba twapwile bantu mapu a kwibasapwila myanda miyampe, mwanda aye Leza “usakila bantu bonso kupanda.” (1 Temote 2:4) Ino ketwingilangapo mwingilo wetu mwanda’po’tu i kiselwa kitupelwe, ehe, ino twingila’o na mutyima wa lusa. Wivwane tulangila mpata bantu netu mwādi mwibalangila Yesu, mutyima wetu uketutonona twendelele na kwibasapwila myanda miyampe. (Mateo 22:39) Bine, kukanina kwa mutyima kuyampe kotudi nako potwingila mwingilo ko kwitukunka tusapule myanda miyampe pampikwa kuleka’byo.

Musapu Wetu—Myanda Miyampe ya Bulopwe bwa Leza

10, 11. (a) Isaya ulombola namani musapu otusapula? (b) Yesu wāletele namani “myanda miyampe ya dyese,” ne bengidi ba Leza ba dyalelo balondanga namani kimfwa kya Yesu?

¹⁰ Le tukanena bika pa kintu kya bubidi kitala mwingilo wetu—ko kunena’mba musapu wetu? Le i bika bine byotusapulanga? Mupolofeto Isaya ulombola biyampe shē musapu otusapula’mba: “E-e! keo būya maulu pa ngulu a yewa uleta myanda-miyampe, mwine wela lubila lwa ndoe, uleta myanda miyampe ya dyese, wela lubila lwa lupandilo; unena ku Ziona amba: Leza obe wabikala.”—Isaya 52:7.

¹¹ Mwanda mwine mukatampe udi mu kino kisonekwa i uno unena amba, “Leza obe wabikala,” mwanda wituvuluja musapu mwine otufwaninwe kusapula, ke myanda miyampe ya Bulopwe bwa Leza kadi. (Mako 13:10) Kadi tadija, uno vese ulombola ne mutwe wa mwanda mwine wa musapu wetu. Isaya wingidije bishima pamo bwa “lupandilo” “myanda-miyampe,” “ndoe,” ne “dyese.” Mu myaka katwa kabajinji, Yesu Kidishitu wāfikidije buno bupolofeto mu muswelo wa kutendelwa na kuleta kimfwa kya bupyasakane mu kusapula myanda miyampe ya kintu kya dyese—ke Bulopwe bwa Leza bwiya kumeso kadi. Mu ino myaka, nakampata tamba mu 1919, Batumoni ba Yehova balondanga kimfwa kya Yesu na kusapula na bupyasakane myanda miyampe ya Bulopwe bwa Leza bushimikilwe ne madyese obukaleta.

12. Misapu ya Bulopwe iteñanga namani boba betabija’yo?

 ¹² Le ino myanda miyampe ya Bulopwe iteñanga namani boba betabija’yo? Dyalelo, ino myanda miyampe ipanga bantu lukulupilo ne busengi pamo’nka na mu myaka ya Yesu. (Loma 12:12; 15:4) Ipanga bantu ba mityima myoloke lukulupilo mwanda i bayuke amba kudi bintu biyampe bibatengele kumeso. (Mateo 6:9, 10; 2 Petelo 3:13) Luno lukulupilo lukwashanga mpata boba bakaminwe Leza balame kikulupiji kyabo mu myaka īya kumeso. Mulembi wa Mitōto unena amba bano ‘kebakakwatwapo moyo wa myanda mibi.’—Mitōto 112:1, 7.

Musapu ‘Ukondapa ba Mityima Mityumuke’

13. Mupolofeto Isaya wālombwele namani byabuyabuya bitambula panopano boba betabija myanda miyampe?

¹³ Ne kadi, boba betabija myanda miyampe batambulanga busengi ne byabuyabuya tamba pano. Namani? Byabuyabuya bimobimo byātelelwe na mupolofeto Isaya paālaile amba: “Mushipiditu wa Mfumwetu Leza udi po ndi; ke-muntu Yehova wanshingile māni kusapwila myanda-miyampe ku bimonyamalwa; wantuma kūndapa ba mityima mityumuke, ne kwela lubila lwa bu-mwanapabo ku boba bakwetwe bu-misungi, ne kushitula kifungo kya boba bakutwe; kwela lubila mwaka wa buntu bulumbuluke bwa Yehova, ne difuku dya kulubwila kinongo kya Leza wetu; kusenga bonsololo badila.”—Isaya 61:1, 2; Luka 4:16-21.

14. (a) Muneneno ‘kukuta ba mityima mityumuke’ kulombola bika pa mwanda utala musapu wa Bulopwe? (b) Tulombolanga namani mutyima wa kanye udi na Yehova pa boba ba mityima mityumuke?

¹⁴ Kukwatañana na buno bupolofeto, Yesu ‘wāundapile ba mityima mityumuke’ na kusapula myanda miyampe. Bine, i kyelekejo kiyampe kashā kyāingidije Isaya. Mungya dibuku dimo dishintulula bishima bya mu Bible, kishima kya Kihebelu kyalamwinwe bu “kūndapa” kishintulula “kukuta mbū” “kingidijibwanga divule pa ‘kukuta’ kisandi mwanda wa kundapa ne kukomeja kilonda.” Muñanga wa kanye ukutanga ubela kisandi nansha bandaje pa kilonda kya muntu mwa kwikikwatakenya senene. Ne basapudi ba kanye basapula musapu wa Bulopwe nabo mo monka, bakwatakanyanga boba bonso basusuka mu muswelo kampanda. Pobakwasha boba badi mu bufudile balombolanga mutyima wa kanye udi na Yehova. (Ezekyele 34:15, 16) Mulembi wa mitōto unenena padi Yehova amba: “Undapanga ba mityima mifwe, ne kwibakuta pa byaso byabo.”—Mitōto 147:3.

Mukwashisha Musapu wa Bulopwe

15, 16. Le bimfwa bimweke umbūmi bilombola namani amba musapu wa Bulopwe ukwatakanyanga ne kukwasha boba bafudilwe?

¹⁵ Bimfwa bivule bimweke bilombola musapu wa Bulopwe moukwatakenyanga bine boba ba mityima mityumuke. Ivwana kimfwa kya Oreanna, mwana-mukaji mununu wa mu Amerika wa Kunshi wadi kakisakepo kwikala mūmi. Kamoni wa Yehova washilwile kupempula Oreanna ne kumutangila Bible ne Dibuku Dyami dya Mānga ya mu Bible. * Dibajinji uno lolo mutyumuke mutyima wadi uteja  butangi koku ulēle mu butanda, meso papo mapūte, ubinza kyaba ne kyaba. Kepaijijepo, washilula kulonga bukomo bwa kushikata pa butanda ne kuteja butangi. Mwenda mafuku, washilula kushikata pa kityi mu pitapita, kailaije mufundiji wa Bible. Kupwa lolo’u washilula kutanwa ku kupwila kwa bwine Kidishitu ku Njibo ya Bulopwe. Pa kukankamikwa na byobya byaivwene ku kuno kubungakana, waanza kupāna mabuku esambila pa Bible ku yense upityila kwandi. Kupwa Oreanna wabatyijibwa aye na myaka 93, ke Kamoni wa Yehova. Musapu wa Bulopwe i mumupe monka nsangaji ya kwikala mūmi.—Nkindi 15:30; 16:24.

¹⁶ Musapu wa Bulopwe upānanga bukwashi enka ne ku boba bayukile amba misongo yabo isa kwibapitula’nka panō. Ivwana kimfwa kya Maria wa mu Bulaya bwa Kushika. Wadi ubela luba kelupu, kakidipo ne na lukulupilo lwine. Wadi upepwa mutyima kitatyi kyaile kumumona Batumoni ba Yehova. Inoko, pa kushilula kwifunda mpango ya Leza, būmi bwandi bwaikala monka na kitungo. Wabatyijibwa ke musapudi wa kyanga kya binebine. Mu myaka ibidi ya kuvuya būmi bwandi, meso andi adi mayule lukulupilo ne nsangaji. Maria wafwile na lukulupilo lukomo mu lusangukilo.—Loma 8:38, 39.

17. (a) Musapu wa Bulopwe ukwashanga namani mu būmi bwa boba betabija’o? (b) Abe nobe kodi mwimwene bika bilombola amba Yehova “ubandulanga bonso babandamine panshi”?

¹⁷ Bine myanda ya uno muswelo ilombola amba musapu wa Bulopwe ukwashanga boba babila bubinebine bwa mu Bible. Bantu badila lufu lwa muntu obaswele bekalanga monka na bukomo pa kupwa kuyuka lukulupilo lwa lusangukilo. (1 Tesalonika 4:13) Boba bekonda na bulanda ne mwa kusokwela bidibwa bya bisaka byabo nabo basokolanga bulēmantu ne kininga pa kupwa kuyuka amba Yehova kakebelwapo shi bekale nyeke bamukōkele. (Mitōto 37:28) Kadi na bukwashi bwa Yehova, bavule balēmenenwe na kupepwa kwa mityima basokolanga bityebitye bukankamane, pakwabo banekenya’nka ne ino misongo mine. (Mitōto 40:1, 2) Bine, na bukomo bupāna Kinenwa kyandi, Yehova “ubandulanga bonso babandamine panshi.” (Mitōto 145:14) Potumona myanda miyampe ya Bulopwe bwa Leza isenga ba mityima mityumuke mu mwaba wetu ne mu kipwilo kya bwine Kidishitu, bine tuvulukei kyaba ne kyaba amba tudi nanshi na myanda miyampe milumbuluke ipityile yonso dyalelo!—Mitōto 51:17.

“Lulombelo Lwami Kudi Leza”

18. Le Polo wātenekelwe namani pāpelele Bayuda myanda miyampe, ne mwanda waka?

¹⁸ Nansha musapu wetu byoudi mulumbuluke kupita yonso, ino bavule bapelanga’o. Penepa tukalonga’po namani? Tukalonga mwālongele mutumibwa Polo. Divule wādi usapwila Bayuda, ino bavule umbukata mwabo bādi bapela musapu wa lupandilo. Kupela kwabo kwātenekele Polo mpata. Wānena’mba: “Nalemenenwa nakampata, ne kufītwa nyeke, ku mutyima wami.” (Loma 9:2) Polo wākwatyilwe Bayuda baādi usapwila lusa. Wāivwene bulanda mwanda bāpelele myanda miyampe.

19. (a) Mwanda waka i kyendele’mo shi tubatyumukwa mutyima kyaba kimo? (b) I bika byākweshe Polo endelele na kusapula?

¹⁹ Netu tusapulanga myanda miyampe pa  mwanda wa lusa. O mwanda twiivwananga bibi shi bantu bavule botusapwila bapela musapu wa Bulopwe. Kwiivwana namino kulombola amba tudi na mutyima wa binebine wa kulangila būmi bwa ku mushipiditu bwa boba botusapwila. Inoko, tuvulukei monka kimfwa kya mutumibwa Polo. Le i bika byāmukweshe endelele na kusapula? Nansha kupela kwāpelele Bayuda myanda miyampe byokwāfītyije Polo mutyima, ino kālangilepo amba ndeke kusapwila Bayuda bonso mwanda kekudipo ne ubwanya kukwashibwa mwine. Wādi ukulupile amba kukidi bamo bakokeja kwitabija Kidishitu. Pa kino, wālombwele muswelo waādi umwene umo ne umo wa mu Bayuda na kusoneka amba: “Kyo nsakidila ku mutyima wami, ne lulombelo lwami kudi Leza, i pa bene Isalela boba bonka’mba, bapande.”—Loma 10:1.

20, 21. (a) I muswelo’ka otukokeja kwiula Polo mu mwingilo? (b) I bika bitala pa mwingilo wetu byotukabandaula mu kishinte kilonda’ko?

²⁰ Pano tala bintu bibidi byānene Polo ukoma. Mutyima wandi wādi usaka bantu bamo basokole lupandilo, ne kadi wādi ulomba Leza pa uno mwanda. Dyalelo nadyo tulondanga kimfwa kya Polo. Tudi na mutyima wa kusokola yense ukishele ukokeja kuteja myanda miyampe. Kadi twendelelanga na kulomba Yehova amba etukwashe tusokole bantu ba uno muswelo mwanda wa twibakwashe balonde dishinda dikebatwala ku lupandilo.—Nkindi 11:30; Ezekyele 33:11; Yoano 6:44.

²¹ Inoko pa kufikila bantu bavule na musapu wa Bulopwe, ketufwaninwepo’nka kuta mutyima ku bine byotusapula ne kine kyotusapwila’byo, ino i ne ku muswelo otusapula’byo. Uno o mwanda otukabandaula mu kishinte kilonda’ko.

[Kunshi kwa dyani]

Lelo I Bika Byowefunda?

• I buluji’ka botusapwilanga?

• I musapu’ka mwine otusapulanga?

• I byabuyabuya’ka bīmwena boba betabija musapu wa Bulopwe?

• I bika biketukwasha twendelele na mwingilo wetu?

[Bipangujo bya Kifundwa]

[Kifwatulo pa paje 26]

Milombelo itukwashanga twendelele mu mwingilo