Lwendo Lulampe Lupadilwe Mpalo
Lwendo Lulampe Lupadilwe Mpalo
LAPOLO uno utamba mu République Démocratique ya Congo amba bana-bakaji babidi ba munda mumo bakutyile lwendo lulampe mu bifuko mulwibwa divita mwanda wa kukatanwa ku Kitango kya Distrike “Tumbijai Leza Ntumbo” mu Lisala. Kutentekela pa bufundiji bwa ku mushipiditu ne pa kisense kya bwine Kidishitu kyobadi batengele ku kitango, badi babila kadi kwitana na bantunguluji batamba ku Kinshasa ku bilo ya musambo ya Batumoni ba Yehova. Ntanda nayo byoyadi mu divita, badi kebalale myaka pampikwa kumona muntu utamba ku musambo, o mwanda pano badi bakimba kukebamona.
Bano bana-bakaji ba munda mumo baendele lwa bwato tamba kwabo ku Basankusu kutūla ne ku Lisala, lwendo lwa makilometele 300 batyibuluka mu dito ne minonga ibidi mituntulu. Balele mayenga asatu mu luno lwendo. Abo bonso babidi byobadi bengidi ba kitatyi kyonso, umo udi’mo pano ke myaka 3 mukwabo nandi ke myaka 19, baboile uno mukenga mwanda wa kusambakanya myanda miyampe ya Bulopwe mu lwendo lwabo. Basapwile kintu kya nsaa 110 ku boba bobadi betana nabo mu lwendo, kadi bapēne matrakte 200 ne mapepala 30.
Badi benda bavuwa mu munonga wa byovwe ne bañwena bavudile mu kino kifuko kya ntanda. Kebadipo babwanya kwenda bufuku—ke-pantu i bikomo kuvuwa mu mfindi! Kadi bāpityile mu bifuko bivule bilaminwe na basola.
Nansha luno byolwadi lwendo lulampe ne lupungija, bano bakaka baeselwe pangala pa bukomo bwabo. Abo bonso babidi bafwijije’ko bininge ne badi na nsangaji pa kutanwa ku kitango mu Lisala. Mityima yabo yadi myake lubimbi lwa kusangela bubinebine, kadi bakankamikilwe na kisense kya batutu ne bakaka 7 000 batenwe’ko. Kitango pa kupwa, bekoka monka na bino bijika mu lwendo lwa kujokela kwabo, kobatene bisaka byabo bikomo nkē.