Yehova I Mubale “Nywene ya ku Mitwe Yenu”

“Kekudipo [musolwe] nansha umo wa ayo uponanga panshi Shenu kuyuka mpika. Ino banwe, enka ne nywene ya ku mitwe yenu mine i mibalwe yonso.”—MATEO 10:29, 30, MB.

1, 2. (a) Mwanda waka Yoba wālangile amba Leza wāmwela? (b) Lelo binenwa bya Yoba bilombola amba wāvundamine Yehova? Shintulula.

 “NAKWABIJA abe ne kungitabapo mpika; naimana, kadi umandila. Ubālamuka kodi wakunsusula; wampangapanga ku bukomokomo bwa kuboko kobe.” Mwana-mulume wānene bino binenwa wādi mu malwa makatampe, kadi na bubine wāmwene’o! Bimunanwa byandi byonso byājimine, kimpengele kya kiponka na ponka kyātukija bandi bana, na pano aye mwine wāponena mu misongo mikomo. Dyandi i Yoba, ne masusu asansa mutyima amutene i masonekwe mu Bible pa mwanda wetu.—Yoba 30:20, 21.

² Binenwa bya Yoba bikokeja kumweka bu wāvundamine kudi Leza, ino ke amopo. Yoba wādi’tu wisamba na bululu bwa njia yādi ku mutyima wandi. (Yoba 6:2, 3) Kādipo uyukile amba Satana ye nsulo ya matompo andi, o mwanda wāfwatakenye amba Leza wāmwela. Pa kino, Yoba wānene’nka ne Yehova amba: “Lelo mwanda ka ofīla mpala yobe, ne kuntūla bu-walwana nobe, a?” *—Yoba 13:24.

3. Potufikilwa na byamalwa, i bika byotukokeja kulanga?

³ Dyalelo, bantu ba Yehova bavule basusukanga na bikoleja bya zenzeka bilupuka ku mavita, ku kushinta kwa politike ne mushikatyilo, ku bimpengele bya ntanda, ku bununu, ku misongo, ku bulanda bwa ntyō, ne ku kukankajibwa na imbikalo. Padi nobe ususukanga na matompo kampanda nansha kamukaya. Ukokeja ne kulanga kyaba kimo amba Yehova wefi mpala yandi kodi. Na bubine uyukile binenwa bidi mu Yoano 3:16 amba: “Leza byāsenswe bapanopantanda nenki, wapana Mwana wandi wa bunka.” Inoko, posusuka ne kumona bunyongolodi mpika, ubwanya kwiipangula amba: ‘Lelo bine Leza unswele? Le umwene ano masusu amfikila? Lelo aye mwine untele’tu ne ami uno mutyima?’

4. I ngikadilo’ka yaendaenda yāuminine Polo, ne kino kikokeja kwitutala mu mashinda’ka?

⁴ Ivwana byobya byātene mutumibwa Polo. “Kwaumpebwa mwiba mu ngitu, ke mukendi wa Satana wakunkupila,” mo mwāsonekele, kupwa wābweja’ko amba: “Pa kino kintu kino namwisashila Mfumwetu disatu na’mba: Kimfundukepo.” Yehova wāivwene kuzenza kwandi. Inoko, monka mwālombwedile’kyo Polo kekwāikelepo kingelengele kya kupwija makambakano andi. Ino Polo wādi unenwe kukulupila mu bukomo bwa Leza wa kumukwasha alwe na “mwiba mu ngitu.” * (2 Kodinda 12:7-9) Padi nobe pamo bwa Polo udi na matompo aendaenda. Pakwabo wiipangulanga amba, ‘Byobimweka amba Yehova kadipo na kyalonga pa matompo ami, le ko kunena’mba kayukilepo ngikadilo yondi’mo’ni, nansha kantele’kopo mutyima?’ Na bubine, malondololo i mhm! Kuta kutele Yehova mwingidi ne mwingidi wandi wa kikōkeji  mutyima i kumweke mu byobya byānene Yesu kudi batumibwa bandi kinondanonda na kwibatonga. Tutalei bino binenwa mobitukankamikila dyalelo.

“Kemukikwatwai moyo”—Mwanda Waka?

5, 6. (a) Le Yesu wākweshe namani batumibwa baleke kukwatwa moyo wa byobya bibatengele ku meso? (b) Polo wālombwele namani kikulupiji mudi Yehova wādi umutele mutyima?

⁵ Batumibwa bāpelwe bukomo na Yesu, enka ne “lupusa lwa kupangamo bibanda, ne lwa kūndapa bantu babela mbá, ya miswelo ne miswelo, ne bulema bwine.” Ino, kino kekyādipo kishintulula amba kebakatanwapo na matompo ne bikoleja. O mwanda Yesu wēbalombwele kamo ne kamo katala pa byobya byādi bya kwibatana. Inoko, wēbasoñenye amba: “Kemukakwatwa moyo boba bakwimwipaya yonka ngitu, kuyūka mwakwipaīla mutyima mpika, poso o mukatyina moyo i yewa uyūkile kona mutyima ne mubidi byonso mu Ngehena.”—Mateo 10:1, 16-22, 28.

⁶ Pa kukwasha batumibwa bemvwanije mwanda waka kebafwaninwepo kukwata moyo, Yesu wēbapele’po ne byelekejo bibidi. Wēbanene amba: “Lelo kebapotangapo misolwe ibidi ku kalupeto katyetye kamo? Ino nanshi kekudipo nansha umo wa ayo uponanga panshi Shenu kuyuka mpika. Ino banwe, enka ne nywene ya ku mitwe yenu mine i mibalwe yonso. Kemukikwatwai moyo, banwe mutabukile misolwe mingimingi buleme!” (Mateo 10:29-31, MB) Tala, Yesu wākwatañenye kukwatwa moyo pangala pa byamalwa na kukulupila mudi Yehova utele mutyima muntu ne muntu. Mobimwekela, mutumibwa Polo wādi na kino kikulupiji. Wāsonekele amba: “Shi Leza i wetu, nankyo uketulonga bubi i ani? Aye nanshi wakubulwa kwelela Mwana kunyuma wa aye mwine, ino wamusokwela padi bātwe bonso, ino abulwe namani kwitupa bintu byonso ke byabuntu ponka padi aye?” (Loma 8:31, 32) Nansha ulwanga na bikoleja’ka, nobe ukokeja kukulupila amba Yehova ukutele nobe mutyima shi ulamine dikōkeji kwadi. Tusa kwivwanija kino shi tubandaule senene kidyumu kya Yesu ku batumibwa bandi.

Bulēme bwa Musolwe

7, 8. (a) Le misolwe yādi imonwa namani mu myaka ya Yesu? (b) Mobimwekela, mwanda waka Mateo 10:29 wingidije kishima kya Kingidiki kya kutyepeka “misolwe”?

⁷ Byānene Yesu bilombola biyampe muswelo Yehova watele mwingidi wandi umo ne umo mutyima. Ivwana bidi myanda itala misolwe. Mu myaka ya Yesu, misolwe yādi idibwa, ino byoyādi yōna mwangulo, yadi imonwa bu kipupo. Misolwe yādi mivule kutabuka, o mwanda yādi ipotwa ku bei tyipi, ko kunena amba misolwe ibidi yādi ipotwa,  mu lupeto lwa dyalelo, na masantime atano a dolala. Masantime dikumi ādi apota ke misolwe inápo, ino i itano—wa butano wa ngelo’wa wādi umonwa bu wambulwa bulēme!—Luka 12:6.

⁸ Langa’po bidi kadi bukata bwa kano koni kene. Shi wenzankanye’ko na toni tukwabo, ukamona amba ne musolwe mukulu mwine i mutyetye bininge. Ino kishima kya Kingidiki kyalamwinwe bu “misolwe” mu Mateo 10:29 kifunkila pa kamusolwe katyetye. I kimweke patōka amba Yesu wādi usaka batumibwa bafwatakanye koni katyuñunuñunu kampikwa mvubu. Monka munenena dibuku dimo amba, “Yesu utela koni katyetye bininge kadi wekatyepeka mpata!”

9. I mwanda’ka mwine wimanine’po kyelekejo kya Yesu kya misolwe?

⁹ Kutela kutelele Yesu misolwe i kulombole mwanda patōka: Byobya bimona bantu bu byampikwa bulēme i bya mvubu kudi Yehova Leza. Kadi Yesu wānene ukoma buno bubinebine na kubweja’ko amba i kutupu musolwe nansha umo “uponanga panshi” Yehova kuyuka mpika. * Ñeni yotuboila’po i mimweke. Shi Yehova Leza uyukile koni katyetyetyetye, kampikwa bulēme, na bubine kadipo mwa kwidilwa kuta mutyima ku makambakano a bantu batongele kumwingidila!

10. Le binenwa bya amba: “Enka ne nywene ya ku mitwe yenu mine i mibalwe yonso” bishintulula bika?

¹⁰ Yesu wānene kadi mu kyelekejo kyandi kya misolwe amba: “Enka ne nywene ya ku mitwe yenu mine i mibalwe yonso.” (Mateo 10:30, MB) Kuno kunena kwīpi ako’ko kwa mushike kutyityija mwanda wa Yesu wimanine’po kyelekejo kya misolwe. Ivwana bidi: Mutwe wa muntu udi na kintu kya nywene 100 000. Divule dine, lunywene lumo lwiifwene potō na lukwabo, ne i kutupu utanga mutyima ku lunywene kampanda. Ino lumo ne lumo luyukilwe ne kubalwa na Yehova Leza. Pa kino, le kudi kadi kamwanda ka mu būmi bwetu Yehova kaidilwe? Na bubine Yehova wivwanije bupunga bwa mwingidi wandi umo ne umo. Eyo, “ubandilanga pa mutyima.”—1 Samwele 16:7.

11. Le Davida wānene namani pangala pa kikulupiji kyandi mudi Yehova umutele mutyima?

¹¹ Davida, muntu wa bikoleja na byonka, wādi ukulupile amba Yehova umuyukile. Wāsonekele amba: “Abe Yehova, ubamandaula ubangyūkidija. Uyūkile mushikatyilo wami ne kutaluka kwami, uyūkile kufwatakanya kwami abe kulampe.” (Mitōto 139:1, 2) Nobe ukokeja kukulupila amba Yehova ukuyukile ne abe. (Yelemia 17:10) Kokapeja kwimona amba kudipo na bulēme bubwanya kujingululwa na Yehova umo byonso!

“Ubīke Impolo Yami mu Mutyibi Obe”

12. Tuyukile namani amba Yehova ujingulwile biyampe byamalwa bimona bantu bandi?

¹² Yehova kayukilepo enka bengidi bandi umo ne umo, ino upotolwelele ne byamalwa bimona muntu ne muntu. Kimfwa, bene Isalela pa kususulwa bu bapika, Yehova wānene Mosesa amba: “Binebine namone disusu dya bantu bami badi mu Edipito, kabidi naivwana madilo abo pa mwanda wa tulala twa mingilo ya kitungo kyabo, ino ngyukile misongo ya mityima yabo.” (Divilu 3:7) Bine, i kintu kitusenga pa kujingulula amba potudi mu matompo, Yehova umwene byonso bilongeka ne  wivwene kudila kwetu! Bine, kashityilepo mutyima ku masusu etu.

13. I bika bilombola amba Yehova wivwaninanga bengidi bandi lusa?

¹³ Mutyima utele Yehova boba basamba nandi bulunda i mumweke ne mu muswelo waādi wivwanina lusa bene Isalela. Nansha divule masusu byoādi alupuka ku kūmija nshingo kwabo, ino Isaya wāsonekele bitala padi Yehova amba: “Mu disusu dyabo dyonsololo aye wasusulwa.” (Isaya 63:9) Nobe byodi mwingidi wa kikōkeji wa Yehova, kulupila nanshi amba posusuka, Yehova nandi ususukanga. Mwene kino kifwaninwe kukutonona ulwe na makambakano pakubulwa moyo ne kwendelela na kulonga byobwanya mu mwingilo wandi?—1 Petelo 5:6, 7.

14. I ngikadilo’ka yādi’ko pābundilwe Mutōto wa 56?

¹⁴ Mulopwe Davida wādi usumininwe amba Yehova umutele mutyima ne amba ususukanga pamumona ususuka, o mwanda Mutōto wa 56 waābundile padi pamulondalonda Mulopwe Solo amwipaye ulombola’kyo patōka. Davida wānyemene ku Ngata, ino wātyina amba shi bene Fidishitia bāmujingulule basa kumukwata. Wāsoneka’mba: “Banshikilwe basaka kumina ami dyuba dyonso ne bukata; ke-bantu i bavule bene balwa nami ne kwitatula ponka.” Davida pa kutanwa mu ino ngikadilo ya kyaka, wālombele kudi Yehova. “Dyuba dyonso ne bukata bavutakanya myanda yami,” ye aye wānene. “Mifwatakanyo yabo yonso i ya kunonga bibibibi.”—Mitōto 56:2, 5.

15. (a) Le Davida wādi usaka kunena bika pa kulomba Yehova atule impolo yandi mu mutyibi nansha mu mukanda? (b) Shi ūminina ngikadilo izozeja lwitabijo, tukokeja kukulupila bika?

¹⁵ Kupwa, monka mokisonekelwe mu Mutōto wa 56:8, Davida wānena bino binenwa bisangaja amba: “Abe ubalanga ko nangakananga kwami; ubīke impolo yami mu mutyibi obe; lelo keīdipo umukanda obe’ni?” Bine, bino bilombola mutyima wa kanye ka buledi bwa Yehova! Shi tudi na njia, tukokeja kwabija Yehova na impolo. Enka ne Yesu muntu mubwaninine nandi wāabije uno muswelo. (Bahebelu 5:7) Davida wādi usumininwe amba Yehova umumwene ne amba ukavuluka dyemo dyandi, pamo bwa ulama impolo yandi mu mutyibi wa biseba nansha pamo bwa usoneka’yo mukanda wandi. * Padi nobe umona amba impolo yobe ikokeja’nka ne kudinga mutyibi wa kiseba nansha kuyuja mapaje mavule a kitabo. Shi kidi namino, nabya kubudilwepo busengi. Bible witukulupija amba: “Yehova udi pa bwipi na boba ba mutyima mutyumuke, kadi upandijanga bano namino ba mushipiditu wa kwisasapo.”—Mitōto 34:18.

Kwikala Umpwani wa Leza wa pa Mutyima

16, 17. (a) Tuyukile namani amba Yehova kedilwepo makambakano ebatana? (b) Le Yehova ulongele bika mwanda wa bantu bandi bapwane nandi?

¹⁶ Yehova byayukile kubala ‘nywene ya ku mutwe wetu’ nanshi kino kitupa mulangwe wa mwikadile butadi ne buledi bwa Leza wetu otutōta. Nansha byotukungila ntanda impya yalaile mukekala mutupu masusu ne misongo, tuyukei amba Yehova ulongelanga bantu bandi kintu kya kutendelwa tamba’nka pano. Davida wāsonekele amba: “Bupwani bwa Yehova budi ku boba bamwakaminwe; kadi ukebalombolanga kipwanino kyandi.”—Mitōto 25:14.

¹⁷ ‘Bupwani na Yehova.’ Bine, uno mulangwe umweka bu mukomo kwivwana ku bantu bakubulwa kubwaninina! Ino, Yehova wita boba bamwakaminwe bekale bapempudi ba mu kipema kyandi. (Mitōto 15:1-5) Le Yehova ulongelanga bano bapempudi bika? Wibalombolanga kipwano kyandi, mo munenena Davida. Yehova wibakulupile, kadi usokwelanga “kifibwe kyandi” ku bapolofeto mwanda wa bayuke mpango yandi ne byobafwaninwe kulonga pa kwikala na būmi bukwatañane nayo.—Amose 3:7.

18. Le tuyukile namani amba Yehova usaka tupwane nandi?

 ¹⁸ Bine, i kintu kisangaja pa kuyuka amba bantu bampikwa kubwaninina bakokeja kupwana na Yehova Leza, Mwine Mukatakata Mwine. Eyo, aye mwine witusoñanya kino. Bible unena’mba: “Fwenai kudi Leza, nandi ukemufwena.” (Yakoba 4:8) Yehova usaka netu tufwene kwadi na kupwana nandi. O mwanda i mutabule kala matabula a kutūla’ko kino kipwano. Kitapwa kya kikūlwa kya Yesu i kitushitwile dishinda dya kusamba bulunda na Leza Mwinē Bukomo bonso. Bible unena’mba: “Bātwe tumuswele mwanda aye ye umbajinji kwituswa.”—1 Yoano 4:19.

19. Le kūminina kuningijanga namani kipwano kyotupwene na Yehova?

¹⁹ Kino kipwano kiniñanga ponso potūminina matompo makomo. Mwanā bwanga Yakoba wāsonekele amba: “Kwitūkija mutyima [“kūminina,” NW] nako kwikale kulumbuluka biyampe, shē, amba mufikije pa butuntulu, ne kubwanya kwa kubulwa ne kyo mukimba.” (Yakoba 1:4) Le “kulumbuluka” kulupuka ku kūminina matompo nako i kulumbuluka’ka? Vuluka “mwiba mu ngitu” wa Polo. Le kūminina’o kwandi kwalupwile bika? Polo wēsambile pa matompo andi amba: “Penepo nanshi, nkētumbika ne mutyima tō mu bukōkekōke bwami, e nabyako, amba bukomo bwa Kidishitu bungikale po ndi. Po pa mwanda ne mwanda pene pano’pa o naloelelwa, ne ku mutyima tō, mu bukōkekōke, ne kutukibwa, ne mu kubulwa bintu, ne mu kupangwapangwa, ne mu bufudile, pa mwanda wa Kidishitu; ke-ne-muntu popa po ndi mukōkekōke popo nkomene.” (2 Kodinda 12:9, 10) Bintu byēmwenine Polo byālombwele amba Yehova wāmupele bukomo bwādi bumusakila—enka ne “bukomo butabukile pa bwikalwanga nabo”—amba ekale kūminina. Kadi kino nakyo kyāmufwenenye kudi Kidishitu ne kudi Yehova Leza.—2 Kodinda 4:7; Fidipai 4:11-13.

20. Tukakulupila namani amba Yehova uketukwasha ne kwitusenga potutanwa na bikoleja?

²⁰ Padi Yehova ye ulekele matompo obe endelele. Shi kidi namino, yuka amba ulaile boba bamwakaminwe amba: “Ami nkikakuzobololapo, nansha patyetye pene, nansha kukulekelela mpika.” (Bahebelu 13:5) Ukemwena buno bukwashi ne busengi. Ke-pantu Yehova ‘i mubale nywene ya ku mutwe obe.’ Umwene kūminina kobe. Wivwene busanshi bobe. Kadi ukutele mutyima bya binebine. Kakelwapo nansha dimo ‘mingilo yobe ne buswe bobe bo walombwele pa dijina dyandi.’—Bahebelu 6:10.

[Kunshi kwa dyani]

Le Ukivulukile?

• I myanda’ka ikokeja kufikija muntu ku kwimona amba Leza wamwela?

• I ñeni’ka yotuboila ku kyelekejo kya Yesu kya misolwe ne ku kubalwa kwa nywene ya ku mitwe yetu?

• Le kubika impolo mu “mutyibi” nansha mu “mukanda” wa Yehova kudi na buluji’ka?

• I muswelo’ka otukokeja kumona “bupwani na Yehova”?

[Bipangujo bya Kifundwa]

[Kifwatulo pa paje 19]

Mwanda waka Yehova kātalwilepo “mwiba mu ngitu” ya Polo?

[Kifwatulo pa paje 20]

I ñeni’ka yotuboila ku kyelekejo kya Yesu kya misolwe?

[Kutambile Kifwatulo]

© J. Heidecker/VIREO

[Kifwatulo pa paje 22]

Shi tutanga Bible kitatyi ne kitatyi, tukakulupila amba Leza witutele mutyima umo ne umo