Yehova “Upala Mpalo Boba Bamukimba ne Mikeketo”

“Yewa wakwiya kudi Leza i kimwendele’mba ētabije’mba: Eyo, udi ponka, upala mpalo boba bamukimba ne mikeketo.”—BAHEBELU 11:6.

1, 2. Bengidi ba Yehova bamo balwanga namani na malango ambulwa kufwaninwa?

 “NDI Kamoni wa Yehova pano ke kintu kya myaka 30, ino nkyaneivwene bu mfwaninwe kwitwa namino,” ye Barabara unena. * “Nansha byonaingile bu pania ne kwikala na madyese mavulevule, i kutupu nansha kimo kyaunkulupije mu mutyima wami amba ndi Kamoni.” Keith nandi ulanga uno muswelo. “Misunsa mivule mine nadi nemona amba nkifwaninwepo mwanda bengidi ba Yehova badi na buluji buvule bwa kwikadila na nsangaji, ino nkyadipo nayo,” ye aye unena. “Kino kyaumfikije ku kwimona bu kipya mambo, muntu wa kulonga enka bibi.”

² Bengidi bavule ba kikōkeji ba Yehova, ba pa kala ne ba dyalelo, balwanga na malango a uno muswelo. Le nobe kyaba kimo ulañanga namino? Padi wi mutyibidilwe na makambakano pa makambakano makwabo, ino umona banabenu mu lwitabijo bu badi na būmi buyampe, bwampikwa masusu ne bwa nsangaji. Pa kino, padi wi mufule ku kumona amba Yehova kakwitabijepo nansha amba kakutele’kopo mutyima. Kokiyumbila kala kufula ku uno mulangwe. Bible witukulupija amba: “[Yehova] kafutulwilepo malwa a bakususuka, nansha kwiakwatyilwa nyanji mpika, kadi nansha  kumufya mpala yandi; pāmwelele lubila waivwene.” (Mitōto 22:24) Bino binenwa bya bupolofeto bitala padi Meshiasa bilombola amba Yehova wivwananga ba kikōkeji ne kwibapala mpalo.

3. Mwanda waka tutyinibwanga mbavu mu ino ngikadilo ya bintu?

³ Shako i kutupu wampikwa kutyinibwa mbavu mu ino ngikadilo ya bintu—enka ne bantu ba Yehova bene. Tudi mu ntanda ibikelwe na walwana mukatampe wa Yehova, ke Satana Dyabola kadi. (2 Kodinda 4:4; 1 Yoano 5:19) Bengidi ba Yehova pa kyaba kya kukingwa mu kingelengele, ino abo bo bene ba byambo batambwa’dyo na Satana. (Yoba 1:7-12; Kusokwelwa 2:10) O mwanda kutūla ne pa kabwanya kitatyi kitungwe na Leza, tufwaninwe “kūminina mu byamalwa” ne “kwipāna mu milombelo,” koku tukulupile amba Yehova witutele mutyima. (Loma 12:12, NW) Ketufwaninwepo kulanga amba Yehova Leza wetu ketuswelepo!

Bimfwa bya pa Kala bya Kūminina

4. Leta bimfwa bya bengidi ba kikōkeji ba Yehova bāūminine ngikadilo ya masusu.

⁴ Bengidi ba Yehova bavule ba pa kala bāūminine ngikadilo ya masusu. Kimfwa, Hana, wādi “ne bululu ku mutyima” mwanda wādi ñumba—ngikadilo yādi imonwa pamo bu kwelwa na Leza. (1 Samwele 1:9-11) Ino Ediya nandi pa kulondwalondwa na Yezebele inandya mfumu, wākwetwe moyo ne kulombela kudi Yehova amba: “Kubapu pano, A Yehova, fundula būmi bwami; mwanda nkitabukilepo batata kunengela, mhm.” (1 Balopwe 19:4) Mutumibwa Polo nandi kābudilwepo kulemenenwa na kubulwa kubwaninina kwandi paānene amba: ‘Ponswele kulonga kiyampe bubi budi nami.” Kupwa wābweja’ko amba: “Yo! nanshi ne muntu wa malwa!”—Loma 7:21-24.

5. (a) Ba Hana, Ediya, ne Polo bāpadilwe mpalo namani? (b) I busengi’ka botumona mu Kinenwa kya Leza shi tulwa na malango atyumuna umbidyoma?

⁵ Bine, tuyukile amba ba Hana, Ediya, ne Polo bāūminine abo bonso mu mwingilo wa Yehova, nandi wēbapala mpalo mivule. (1 Samwele 1:20; 2:21; 1 Balopwe 19:5-18; 2 Temote 4:8) Nansha namino bāendelele na kulwa na mīdimuko mivule mine ya bumuntu, kubadila’mo njia, kukunguka, ne moyo. Nanshi ketukokejapo kutulumuka shi kyaba kimo twikalanga na malango atyumuna umbidyoma. Penepa ukokeja kulonga bika shi kuzumbijazumbija mutyima kwa umbūmi kubakutwala ku kwimona amba Yehova kakuswelepo? Ukokeja kumona busengi mu Kinenwa kya Leza. Kimfwa, mu kishinte kishele kunyuma twesambīle pa binenwa bya Yesu bya amba “enka ne nywene ya ku mitwe yenu mine i mibalwe yonso” na Yehova. (Mateo 10:30, MB) Bino binenwa bikankamika bilombola amba Yehova utele mutyima bininge ku mwingidi wandi umo ne umo. Vuluka kadi kyelekejo kya Yesu kya misolwe. Shi koni kamo katyetyetyetye kaponanga panshi Yehova kuleka kwikamona mpika, le ukapūta namani meso ku kudila kobe?

6. Bible i nsulo ya busengi bwa kulwa na malango ambulwa kufwaninwa?

⁶ Le bine bantu bampikwa kubwaninina babwanya kwikala balēme ku meso a Yehova Leza, Umpangi mwine bukomo bonso? Eyo! Ke-pantu bisonekwa bivule bine mu Bible bitukulupija kino. Shi tuta mutyima ku bino bisonekwa, tukokeja kunena mwānenene mulembi wa mitōto amba: “Mu bungi bwa mifwatakanyo munda mwami kusengibwa kobe kubantōkeja ku mutyima wami, tō!”  (Mitōto 94:19) Tubandaulei binenwa bimobimo bisenga bitanwa mu Kinenwa kya Leza bitukwasha twivwanije amba tudi na mvubu kudi Leza ne amba uketupala mpalo shi twendelela na kulonga kiswa-mutyima kyandi.

“Kyabulēme” kya Yehova

7. I bupolofeto’ka bukankamika bwānene Yehova kupityila kudi Malaki ku muzo moneke?

⁷ Bayuda ba mu myaka ya katwa ka butano K.K.K. bādi mu ngikadilo ya bulanda. Babitobo bādi betabija banyema bampikwa kufwaninwa ne kwibela bu bitapwa ku madabahu a Yehova. Batyibi bādi na mboloji. Butyi, bubela, budimbidimbi, ne makoji byādi byenda muongo pa ntanda. (Malaki 1:8; 2:9; 3:5) Malaki wānene bupolofeto butulumuja ku uno muzo moneke. Mwenda myaka, Yehova wāitabija monka bantu bandi. Tutanga amba: “Bakekalanga bami i Yehova wa bibumbo unena; mu difuku dyo nkalonga kyabulēme kyami kyami’tu nakampata; kabidi nkebapandija’nka bwa muntu upandija mwana wa aye mwine umwingidila.”—Malaki 3:17.

8. I kika kinenenwa amba musoñanya udi mu Malaki 3:17 utala ne kibumbo kikatampe?

⁸ Bupolofeto bwa Malaki bufikidilanga dyalelo mu bene Kidishitu bashingwe māni a mushipiditu, babundile muzo wa ku mushipiditu wa bantu 144 000. Uno muzo i “kyabulēme” nansha “bantu bakumunwa na” Yehova. (1 Petelo 2:9) Bupolofeto bwa Malaki bukokeja kadi kukankamika “kibumbo kikatampe,” mwanda nabo “bēmene mu kifuko kya lupona, ne kya Kāna-ka-mukōko, bavwele bivwalwa bitōka.” (Kusokwelwa 7:4, 9) Abo nabo ke luombe lumo na bashingwe māni, mu bwendeji bwa Yesu Kidishitu, Mukumbi umo.—Yoano 10:16.

9. Mwanda waka bantu ba Yehova i “kyabulēme” kwadi?

⁹ Yehova umwene namani boba batongele kumwingidila? Monka munenena Malaki 3:17, wibamwene monka mumwenanga tata wa buswe wandi mwana. Kadi tala musangeja kino kishima kyatelele nakyo bantu bandi—“kya bulēme.” Malamuni makwabo alamuna’po amba “bami bami’tu,” “kituntwa kyami kya bulēme,” ne “dibwe dyami dya lubi.” Le i bika bimwena Yehova boba bamwingidila bu kya bulēme kya pa bula? Mwanda dibajinji bidi i Leza wa kufwija’ko. (Bahebelu 6:10) Ukokekalanga kwadi boba bamwingidila na mutyima umo ne kwibamona bu ba pa bula.

10. Le Yehova ukiñanga namani bantu bandi?

¹⁰ Le ukokeja kulanga kituntwa kya mvubu kyodi nakyo kyomwene bu kya bulēme bwa pa bula? Mwene uloñanga bukomo bwa kwikilama? Yehova nandi mo mwalongela na “kyabulēme” kyandi. Bine, ukiñanga bantu bandi ku matompo ne binkumbulu byonso bya umbūmi. (Musapudi 9:11) Ino Yehova ukokeja kukinga ne ukakinga bengidi bandi ba kikōkeji ku mushipiditu. Wibapanga bukomo bwibasakila pa kūminina matompo o-onso. (1 Kodinda 10:13) Pa kino, Mosesa wānene bantu ba Leza ba pa kala, bene Isalela amba: “Wikomeje mutyima wikale mwimajine biyampe, . . . mwanda Yehova Leza obe, i aye enka wenda nobe kakakushiepo, nansha kukulekelela kwine mpika.” (Kupituluka 31:6) Yehova kābudilwepo kupala bantu bandi mpalo. Aye wādi wibamwene bu “kyabulēme” kyandi.

Yehova “Upala Mpalo”

11, 12. Kwivwanija amba Yehova ye upala mpalo kuketukwasha namani tulwe na milangwe ya kutatana?

¹¹ Bukamoni bukwabo bulombola amba Yehova umwene bengidi bandi bu ba mvubu i kwibapala kwaibapala mpalo. Wālombwele bene Isalela amba: “Ntompei bidi; i Yehova wa bibumbo unena, amba: Shi nkikemushitwilakopo malolo a mūlu, ne kwimupungulwila dyese, ino kekukekalapo kyaba kibwane kya kutambula’dyo.” (Malaki 3:10) Eyo, Yehova ukapala bengidi bandi mpalo ya būmi bwa nyeke. (Yoano 5:24; Kusokwelwa 21:4) Ino mpalo yambulwa idingakene nayo yo isokola bukatampe bwa buswe ne buntu bwa Yehova. Kadi ilombola amba ukwete na mutyika boba bonso batonga kumwingidila. Shi twifunde  kumona Yehova bu kyaba bulale mu kupala mpalo nabya tukanekenya kutatana konso kotutatana pa mwitumwena Leza. Bine, Yehova witusoñanya tumumone bu Yewa upala mpalo! Polo wāsonekele amba: “Wakwiya kudi Leza i kimwendele’mba ētabije’mba: Eyo, udi ponka, upala mpalo boba bamukimba ne mikeketo.”—Bahebelu 11:6.

¹² Eyo, twingidilanga Yehova mwanda tumuswele—ke mwandapo’tu ulaile kwitupala mpalo. Inoko, kulama mu mutyima lukulupilo lwa mpalo i kwendele’mo kadi ke kwisakilapo. (Kolose 3:23, 24) Yehova byaswele boba bamukimba ne mikeketo ne kwibamona bu ba mvubu ku meso andi, o mwanda i mukwate’ko mpangiko ya kwibapala mpalo.

13. Mwanda waka mpangiko ya kikūlwa i kilomboji kikatampe kya buswe bwituswele Yehova?

¹³ Kilomboji kikatampe kilombola amba Yehova ubadikile kumona bantu bu ba mvubu ku meso andi i mpangiko ya kikūlwa. Mutumibwa Yoano wāsonekele amba: “Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Ino mpangiko ya kitapwa kya kikūlwa kya Yesu Kidishitu ipatanya patōkelela mulangwe wa amba ketudipo na mvubu ku meso a Yehova nansha amba ketuswelepo. Bine, shi Yehova wāfutyile lupoto lukomo mwanda wetu—wapāna Mwana wandi wa bunka—nanshi na bubine wituswele mpata.

14. I bika bilombola muswelo wādi umwene Polo?

¹⁴ Nanshi shi milangwe mityani ibakwiila, languluka pa kikūlwa. Bine, yuka amba kino kyabuntu Yehova ukupele’kyo ne abe. Mo mwāyukile’kyo ne mutumibwa Polo. Vuluka, wānene amba: “Yō! nanshi ne muntu wa malwa!” Ino wābweja’ko amba: “Nafwijako Leza padi Yesu Kidishitu Mfumwetu,” “wānsenswe, ne kwipana aye mwine padi ami.” (Loma 7:24, 25; Ngalatea 2:20) Polo kādipo wianya pa kunena namino. Ino wādi’tu ukulupile amba Yehova umumwene bu muntu wa mvubu kwadi. Nobe pamo bwa Polo ufwaninwe kwifunda kumona kikūlwa bu kyabuntu kikupele Leza. Yehova ke enkapo Umpandiji mwinē bukomo, ino kadi upalanga mpalo na buswe.

Dyumuka “Byakyongo” bya Satana

15-17. (a) Le Dyabola wingidijanga namani malango ambulwa kufwaninwa? (b) Le i bukankamane’ka botumwena mu byātene Yoba?

¹⁵ Padi ukimona amba i bikomo kwitabija amba busengi bwa ku bukomo bwa mushipiditu butanwa mu Kinenwa kya Leza bukutala ne abe. Padi umona amba mpalo ya kwikala’ko nyeke mu ntanda impya ya Leza i kintu kikatambula bakwabo, ino abe kufwaninwe’kyopo. Shi ulanga uno muswelo, i bika byobwanya kulonga?

¹⁶ Ujingulwile biyampe kidyumu kya Polo ku bene Efisesa kinena’mba: “Vwalai panopele yonso ya Leza, amba muyūke kwimanija mu byakyongo bya dyabola.” (Efisesa 6:11) Potutela makinga a Satana, tulañanga ponka na ponka bintu pamo bwa kusanswa bya bupeta ne busekese, bine, i amo. Ino bino byongo i bipye’mo bantu ba Leza ba pa kala ne ba dyalelo bene kumo. Ino kunena na bubine, tufwaninwe kutadija byakyongo bikwabo bya Satana—bukomo bwalonga bwa kukulupija bantu amba Yehova Leza kebaswelepo.

¹⁷ Dyabola i sendwe mu kwingidija malango a uno muswelo mwanda wa kufundula bantu kudi Leza. Vuluka binenwa bya Biledade byaānene Yoba amba: “Le muntu ekale moloke namani ku meso a Leza, a? Nansha wakubutulwa na mwana-mukaji akatōke namani, a? Monapo bidi, nansha kweji mwine keñenyangapo to-o, ehe; kadi nansha ñenyenye mine nayo keitōkangapo to-o mu meso andi, ehe. Le inoko muntu udi bwa munyambo ke pepi! Ne mwana muntu i munyambo munyambo’tu.” (Yoba 25:4-6; Yoano 8:44) Mwene umona’tu amba bino i binenwa bityumuna mu bidyoma? Nanshi ketwakilekai  Satana witutyumuna mutyima. Ku mutamba mukwabo, kudyumuka manwa a Satana kukakukwasha wikale na bukankamane ne kininga kya kulwa bulwi bwa kulonga byoloke. (2 Kodinda 2:11) Yehova wāpadile Yoba mpalo, nansha byaamulemunwine, wāmujokejeja byonso byaājimije pabidi mwanda wa kūminina kwandi.—Yoba 42:10.

Yehova “Utabukile Bukatampe Mityima Yetu”

18, 19. Leza “utabukile bukatampe mityima yetu” namani, ne “uyūkile bintu byonsololo” muswelo’ka?

¹⁸ Bine, i bikomo kutalula malango a kupungila pa mutyima shi ke male miji. Inoko, mushipiditu wa Yehova ukokeja kukukwasha bityebitye utūte “bishimikwa bīne bya bukomo . . . byakufutulula ñeni ya Leza.” (2 Kodinda 10:4, 5) Shi milangwe imbi ikimba kukutyibidila, languluka byānene mutumibwa Yoano amba: “E ponka po tūkayūkana’mba, nanshi twi bantu babinebine, ne kukēkankamija mityima yetu mu meso andi; monso mwituponeja mityima yetu; mwanda aye Leza utabukile bukatampe mityima yetu, uyūkile bintu byonsololo.”—1 Yoano 3:19, 20.

¹⁹ Le kunena’mba “Leza utabukile bukatampe mityima yetu” ko kunena namani? Kyaba kimo mutyima wetu ukokeja kwitutopeka, nakampata shi tubajingulula kubulwa kubwaninina kwetu ne bilubo byetu bitusanshija mutyima. Pakwabo i pa mwanda wa kibutwila kyetu, tudi nyeke na milangwe ya kwimona enka bityani, amba twi babitupu ne Yehova kabwanyapo kwitwitabija. Binenwa bya mutumibwa Yoano bitukulupija amba Yehova i mukatampe kutabuka ino milangwe! Umwene bipite ne bilubo byetu bine, kadi ujingulwile ne byotukokeja kulonga. Pakwabo kadi uyukile kukanina ne kusaka kwetu. Davida wāsonekele amba: “Ke-muntu uyūkile ngitu yetu; witunena’mba, i luvumbi.” (Mitōto 103:14) Eyo, Yehova wituyukile biyampe kutabuka ne motwiyukile mwine!

“Kilongo kya Būya” ne “Nkaka wa Bulopwe”

20. Le bupolofeto bwa kujokejibwa bwa Isaya bulombola bika pa mumwena Yehova bengidi bandi?

²⁰ Yehova wāpele bantu bandi ba pa kala lukulupilo kupityila kudi mupolofeto Isaya amba ukebajokeja. Byobādi ba kuselwa bu misungi mu Babiloni, buno busengi ne kikulupiji na bubine byobyādi bisakilwa boba bapungile! Yehova wāmwene kala kitatyi kya kumeso, kyobakajokela mu ntanda yabo, o mwanda wānene amba: “Kabidi abe nobe ukekala bu-kilongo kya būya mu dikasa dya Yehova, ne nkaka wa bulopwe mu dikasa dya Leza obe.” (Isaya 62:3) Na bino binenwa, Yehova wāpele bantu bandi bulēme ne ntumbo. Kadi i mulongele ne muzo wandi wa Isalela wa ku mushipiditu muswelo umo onka dyalelo. Udi pamo bwa mwiuzunzule peulu amba bonso beubandile.

21. Le ukakulupila namani amba Yehova ukakupala mpalo pa kūminina kobe kwa kikōkeji?

²¹ Buno bupolofeto byobufikidile bidi pa bashingwe māni, ino bulombola bulēme bwapele boba bonso bamwingidila. Pa kino, shi udi na malango a kutatana, nabya vuluka amba nansha byodi wampikwa kubwaninina, ukokeja kuvwikwa “kilongo kya būya” ne “nkaka wa bulopwe” na Yehova. Nanshi endelela na kusangaja mutyima wandi na kulonga kiswa mutyima kyandi na kininga. (Nkindi 27:11) Shi ulonge namino, nabya kulupila amba Yehova ukakupala mpalo pa kūminina kobe kwa kikōkeji!

[Kunshi kwa dyani]

Le Ukivulukile?

• Lelo twi “kyabulēme” kya Yehova muswelo’ka?

• Mwanda waka i biyampe kuyuka amba Yehova upalanga mpalo?

• “Byakyongo” bya Satana byotufwaninwe kudyumuka i byakyongo’ka?

• Le Leza “utabukile bukatampe mityima yetu” mu buluji’ka?

[Bipangujo bya Kifundwa]

[Kifwatulo pa paje 23]

Polo

[Kifwatulo pa paje 23]

Ediya

[Kifwatulo pa paje 23]

Hana

[Kifwatulo pa paje 24]

Kinenwa kya Leza kidi na milangwe mivule isenga pa mutyima