“Endelelai na Kukesha”—Kitatyi Kya Kidye Kibafika!

“Endelelai na kukesha, mwanda kemuyukilepo difuku dine dīya Mfumwenu.”—MATEO 24:42, NW.

1, 2. Yesu wādingakenye senene kwiya kwandi na bika?

 LELO i bika byowadi wa kulonga shi ubayuka amba kudi ngivi unangakana mu wenu mukenza, ukimba kupomona mobo? Na bubine, wadi wa kukesha mwanda wa kulama baswe bobe ne bintu byobe bya bulēme. I amo, mwanda ngivi kabadikilangapo bidi kutuma mukanda amba yao ngiya. Ino, wiyanga bya kitulumukila, kulaya mpika.

² Yesu nandi wāingidije pavule pene kyelekejo kya muswelo wiyanga ngivi. (Luka 10:30; Yoano 10:10) Wādyumwine pa mwanda utala binkumenkume bya kulongeka mu kitatyi kya mfulo ne bya kutwala ku kwiya kwandi kufikidija butyibi amba: “Nanshi endelelai na kukesha, mwanda kemuyukilepo difuku dine dīya Mfumwenu. Ino yukai kino, amba shi mwinē njibo wadi uyukile pa kilo kine kīya ngivi, longa waendelele na kutala kadi longa kalekelepo amba njibo yandi ipomonwe.” (Mateo 24:42, 43, NW) Pano Yesu wādingakenye kwiya kwandi na mwiilanga ngivi—pampikwa kulaya.

3, 4. (a) Lelo kuteja kidyumu kya Yesu kitala pa kwiya kwandi kulomba bika ne bika? (b) I bipangujo’ka biipangulwa?

³ Kyelekejo kya Yesu i kifwaninwe mwanda difuku dya kwiya kwandi kediyukenepo. Yesu wābadikile kunena enka mu buno bupolofeto bumo bonka’mba: “Mwendele dyodya difuku nansha nsa mine, kekudipo uyukile. Ne bamwikeulu badi umadiulu bene, nansha Mwana mwine, kebayukile’dyopo, poso’nka Tata kete ye uyukile’dyo.” (Mateo 24:36, MB) O mwanda mwine Yesu wāsoñenye bemvwaniki bandi amba: “Ikalai beteakanye.” (Mateo 24:44, NW) Boba bateja kidyumu kya Yesu kebakabulwepo kwiteakanya, kwiendeja mobifwaninwe, pampikilwa kubanga kitatyi kyo-kyonso kisa kufika Mufikidiji wa butyibi bwa Yehova.

⁴ Shi ke pano, kudi bipangujo bimo bya kamweno bya kwiipangula: Le kidyumu kya Yesu kitala enka bantu ba ino ntanda’ni, nansha ne bene Kidishitu ba bine nabo bafwaninwe ‘kwendelela na kukesha’? Mwanda waka ‘kwendelela na kukesha’ i kwa kampeja-bukidi, ne kulomba kulonga bika ne bika?

I Kidyumu ku Bāni?

5. Tuyukile namani amba kidyumu kya ‘kwendelela na kukesha’ kitala bene Kidishitu ba bine?

⁵ Bine ne bine ponka, Mfumwetu ukāya pamo bwa ngivi kudi bantu ba ino ntanda, bapelele kuteja kidyumu kya kinzengele kyafwena’ki. (2 Petelo 3:3-7) Ino kudi bene Kidishitu ba bine nako? Mutumibwa Polo wātumīne banababo betabije mukanda’mba: “Bānwe bene muyūkile kala biyampe byonka’mba, difuku dya Mfumwetu dīyanga pamo bwa ngivi wa bufuku.” (1 Tesalonika 5:2) Eyo, ketwidilwepo nansha dimo amba ‘difuku dya Yehova dīyanga.’ Ino le kino kifwaninwe kwitulekeja kwendelela na kukesha? Yuka amba Yesu wādi unena bandi bana ba bwanga amba: “Mwanda pa nsaa yokemulangilapo amba yo ayo, Mwanā muntu waiya.” (Mateo 24:44, NW) Kumeso kwa kino, Yesu wasoñenye bandi bana ba bwanga basakesake nyeke Bulopwe, kupwa wēbadyumuna’mba: “Tengelai mwanda Mwana Muntu ukaya’nka pa kitatyi kyo kemutelepo  mutyima.” (Luka 12:31, 40, MB) Mwene kibamweka’tu patōka amba Yesu wādi ulangila balondi bandi paādyumwine amba: “Endelelai na kukesha”?

6. Mwanda waka tufwaninwe ‘kwendelela na kukesha’?

⁶ I kamweno’ka kadi mu ‘kwendelela na kukesha’ ne ‘kwikala beteakanye’? Yesu wāshintulwile amba: “Babidi bakēkalanga mu budimi kukaselwa umo, kukashale umo. Bāna-bakaji babidi nabo bakēkala pa kupela bukula, kukaselwa umo pakashale umo.” (Mateo 24:40, 41) Boba ‘bakaselwa,’ nansha bakapandijibwa, i boba bakatanwa beteakanye pakonakanibwa ino ntanda yambulwa bwine Leza. Ino bano ‘bakashala,’ bakonakanibwa mwanda badi balondalonda mwikadilo wa būmi bwa kwisakila. Mu bano mudi ne boba bamunikilwe kitōkeji dibajinji ino abo kwendelela na kukesha mpika.

7. Kubulwa kuyuka kitatyi kikafika mfulo kwitupele mukenga wa kulonga bika?

⁷ Nanshi kuyuka koketuyukilepo difuku dine dikafula ino ngikadilo minunu i mukenga otupelwe wa kulombola amba twingidilanga Leza na mutyima utōka tō. Namani? Padi mfulo ikokeja kumweka amba keikafikapo dyalelo ne kesha. I kya bulanda mwanda bene Kidishitu bamo bamonanga namino, o mwanda bupyasakane bwabo mu mwingilo wa Yehova bubatalala. Inoko, twepēne batwe bene pampikwa kwilea kudi Yehova amba tukamwingidila. Boba bayukile Yehova bajingulwile amba kupyasakana kwa mbó wimene kolamba bulembe kekukamusangajapo. Ke-muntu aye umonga byobya bidi mu mityima.—1 Samwele 16:7.

8. Kuswa kotuswele Yehova kwitutononanga namani twendelele na kukesha?

⁸ Byotuswele Yehova binebine, tuloelelwanga bikatampe kulonga kiswa-mutyima kyandi. (Mitōto 40:8; Mateo 26:39) Kadi kyotusaka i kwingidila Yehova nyeke. Kino kyepelo kidi nyeke na mvubu nansha byotufwaninwe kwilaija ano madyese myaka mivule kupita na motwadi tulangila. Kutabukidila, twendelelanga na kukesha mwanda tutengele na kyaka bintu biketuletela difuku dya Yehova, ke-dintu dikafikidija mpango yandi. Kadi mutyima wetu wa kusaka kusangaja Leza witutononanga tulonde madingi adi mu Kinenwa kyandi ne kubadikija bidi Bulopwe mu būmi bwetu. (Mateo 6:33; 1 Yoano 5:3) Tutalei pano kwendelela na kukesha mokwikadile na lupusa pa butyibi botukwata ne pa muswelo otwiendeja mu būmi bwa difuku ne difuku.

Būmi Bobe Kobwenda I Kwepi?

9. Mwanda waka bantu ba ntanda bafwaninwe kupēlakana kulanguka ne kujingulula buluji bwa bitatyi byotudi’mo?

⁹ Bantu bavule dyalelo bayukile amba makambakano makatampe ne bimbidikita bisansa bilongekanga bukile bukya, kadi padi kebasangedilepo muswelo wenda būmi bwabo. Ino le bayukile buluji bwine bwikadile’ko ino ngikadilo ya ino ntanda? Lelo bajingulwile amba pano tudi ku “kuvuika kwa ngikadilo ya bintu”? (Mateo 24:3, NW) Le bapotolwele amba kuvula kwavula mwino, butapani, ne tuto twa bwine ntanda i biyukeno bilombola amba bino bitatyi i ‘mafuku a mfulo’? (2 Temote 3:1-5) Nanshi bafwaninwe kupēlakana kulanguka ne kujingulula buluji bwa bino byonso ne kubandaula kwenda būmi bwabo.

10. I bika byotufwaninwe kulonga shi tusaka kwendelela na kukesha?

¹⁰ Le batwe bene netu? Difuku ne difuku tukwatanga butyibi mu myanda itala kaji, bukomo bwa ngitu, kisaka, ne butōtyi bwetu. Tuyukile byobya binena Bible, kadi tulonga ne bukomo bwa kwibilonda. O mwanda i biyampe twiipangule amba: ‘Le kendi muleke kuzumbija mutyima kwa umbūmi kundya kavudi? Lelo mafilozofi a ino ntanda, mulangilo wayo, byendanga bitādila byotulonga?’ (Luka 21:34-36; Kolose 2:8) Tufwaninwe kulombola nyeke amba tukulupile mudi Yehova ne mutyima wetu onso, kadi ketulēmenenepo pa kwivwanija kwetu batwe bene. (Nkindi 3:5) Mu uno muswelo, tukendelela na ‘kukwatyija būmi bwinebwine’—ke būmi bwa nyeke mu ntanda impya ya Leza kadi.—1 Temote 6:12, 19.

11-13. I ñeni’ka yotuboila ku bimfwa bya bintu byāfikile (a) mu mafuku a Noa? (b) mu mafuku a Lota?

¹¹ Bible udi na bimfwa bivule bya kudyumukila’po bitukwasha twendelele na kukesha. Ivwana byobya byālongekele mu myaka ya  Noa. Leza wāleteje kidyumu kumeso kwa kitatyi. Ino kutalula’mo’nka Noa ne kipango kyandi, bantu kebatele’kopo mutyima. (2 Petelo 2:5) Pa kino Yesu wānene amba: “Monka mwadi mwikadile myaka ya Noa ne kukāya kwa Mwanā muntu nako kukēkalanga’nka nabya. Ke-bantu monka mo badi bēkadile mu oa mafuku abadikile ku meso a dilobe dya mema, badi badya bēdīila; batoma bētomena, basonga bēsongela, basongwa nabo bēsongelwa; kutūla ne ku dyodya difuku dyātwelele Noa mu safini, ne kuyūkapo mpika, ino pa kufika dilobe dyatukija bonso kadi, ne pa kwiya kwa Mwanā muntu napo pakēkalanga’nka nabya.” (Mateo 24:37-39) Penepa i ñeni’ka yotukaboila’ko? Shi batwe bamo tuleke bintu bya bwine ntanda—nansha’tu mingilo myendele’mo ya umbūmi—bitādila mingilo ya ku mushipiditu itulomba Leza kutūla pa kifuko kibajinji, nabya tufwaninwe kulanguluka na kusumininwa pa uno mwanda.—Loma 14:17.

¹² Kadi langa’po bidi mafuku a Lota nao. Sodoma, kibundi kyādi’mo Lota ne kisaka kyandi, kyādi kipete inoko mwādi mwikadilo mubole bya mwiko. Penepa Yehova wātuma bamwikeulu bandi kukonakanya kifuko’kya. Bamwikeulu bāsoñanya Lota ne kisaka kyandi banyeme mu Sodoma ne kuleka kutala kunyuma. Abo pa kukankamikwa na bamwikeulu, bālupuka mu kibundi. Ino mutyima wa mukaja Lota umweka bu wādi ulamete mpata ku būmi bwa mwabo mu Sodoma. Pa kuleka kukōkela, wātala kunyuma, bine, wājimija ne būmi bwandi bwine. (Ngalwilo 19:15-26) O mwanda Yesu wādyumwine mu bupolofeto amba: “Vulukai bidi ku mukaji wa Lota.” Lelo tutele mutyima ku kino kidyumu?—Luka 17:32.

¹³ Boba bātejeje bidyumu bya Leza bāpandile. I bine, Noa ne kisaka kyandi, Lota nandi ne bandi bana bana-bakaji bāpandile. (2 Petelo 2:9) Netu potulangulukila pa bino bimfwa bya kudyumukila’po, tukankamikwanga na myanda ya bunyongolodi ilombwelwe’mo, ya boba bādi baswele boloke. Kino kitupanga mityima ya kutengela na kikulupiji kufikidila kwa milao ya Leza ya “madiulu mapya, ne ntanda īngi mipya” mwine ‘mukekalanga boloke.’—2 Petelo 3:13.

‘Kitatyi kya Kidye Kibafika’!

14, 15. (a) Le “kitatyi kya kidye” i kitatyi’ka? (b) Lelo ‘kwakamwa Leza ne kumupa ntumbo’ nako kulomba kulonga bika ne bika?

¹⁴ Le potwendelela na kukesha, i bika byotutengele? Mukanda wa Kusokwelwa ulombola matabula, dimo ne dimo, a mukafikidila mpango ya Leza. Kadi kulonda byobya byounena ko kwakamweno shi tusaka kwikala beteakanye. Bupolofeto bulombola biyampe binkumenkume byadi bifwaninwe kulongeka mu “difuku dya Mfumwetu,” dyāshilwile kitatyi kyābikikilwe Kidishitu momwa mūlu mu 1914. (Kusokwelwa 1:10) Kusokwelwa wituyukija mwikeulu wāpelwe ‘myanda miyampe ya nyeke ya kusapula.’ Unena na diwi dikatampe amba: “Akamwai Leza mumutumbike ntumbo; ke-kintu kitatyi kya kidye kyandi kibafika.” (Kusokwelwa 14:6, 7) Kino “kitatyi kya kidye” i kyaba kīpi; kadi i kitatyi kya kusapulwa ne kya kufikidila kwa butyibi bulombwelwe mu buno bupolofeto. Pano tudi mu kine kitatyi’ki.

¹⁵ Shi ke pano, kumeso kwa kitatyi kya kidye kufula, twi basoñanibwe amba: “Akamwai Leza mumutumbike ntumbo.” Le kino kilomba kulonga bika ne bika? Kwakamwa Leza kuyampe kufwaninwe kwituvundamija ku kulonga bibi. (Nkindi 8:13) Shi tulēmekele Leza, tukamuteja na bulēme bukatampe. Ketukavudilwapo bya kulonga twatunya ne kutanga Bible, Kinenwa kyandi, kitatyi ne kitatyi. Ketukapēlulapo madingi andi a kutanwa ku kupwila kwa bwine Kidishitu. (Bahebelu 10:24, 25) Tukasangela madyese otupelwe a kusapula na bupyasakane myanda miyampe ya Bulopwe bwa Meshiasa wa Leza. Ne kadi tukakulupila mudi Yehova mu bitatyi byonso ne na mutyima wetu onso. (Mitōto 62:8) Tukalēmeka Yehova amba ye Mubikadi wa diulu ne ntanda, kadi tukamukōkela bu Mubikadi wa būmi bwetu. Le bine nobe wakaminwe Leza ne kumupa ntumbo mu ino miswelo yonso?

16. Mwanda waka tukokeja kunena amba butyibi bwa Babiloni Mukatampe butelelwe mu Kusokwelwa 14:8 ke bupwe kumuponena?

¹⁶ Kusokwelwa shapita wa 14 ushintulula monka myanda mikatampe mikwabo inenwe kulongeka mu kitatyi kya kidye. Babiloni  Mukatampe, umbikalo wa ntanda yonso wa mitōtelo yonso ya bubela, ye utelelwe dibajinji, amba: “Mwikeulu wa bidye ulondakene’mba; E! E! E! i mupone! i mupone! Babiloni mukatampe.” (Kusokwelwa 14:8) Kumeso a Leza, Babiloni Mukatampe ke mupone kala. Tamba mu mwaka wa 1919, bengidi ba Yehova bashingwe māni bānyongolwelwe mu bupika bwa mfundijo ne bilongwa bya kine Babiloni byādi bikutyile bantu ne mizo mu bula bwa tununu ne tununu twa myaka. (Kusokwelwa 17:1, 15) Penepa bāmona mukenga wa kwipāna mu kwendeleja kumeso mutōtelo wa bine. Busapudi bwa myanda miyampe bwa ntanda yonso butala pa Bulopwe bwa Leza bwāshilwididila tamba penepa.—Mateo 24:14.

17. Le kutamba mu Babiloni Mukatampe kulomba kulonga bika ne bika?

¹⁷ Ino shayo ke mfulopo ya kidye kya Leza kya kuponena Babiloni Mukatampe. Konakanibwa kwandi kwa mfulo aku kwiya panopano ponka. (Kusokwelwa 18:21) O mwanda mwine Bible udyumuna bantu ba pi na pi amba: “Bānwe bantu bami, mulupukeimo [ke mu Babiloni Mukatampe kadi] . . . amba mwakatambula ku mpupo yandi.” (Kusokwelwa 18:4, 5) Le tutambanga mu Babiloni Mukatampe namani? Ke enkapo na kutyiba kipwano na mitōtelo ya bubela, mhm. Ino lupusa lwa Babiloni ludi’nka ne mu masobo ne mu bibidiji bivule bya bantu, mu kilomonyeka kya ino ntanda mu myanda itala buenda, mu mazua emanine pa majende, ne mu bintu bivulevule. Pa kusaka twendelele na kukesha, i biyampe mu bilongwa byetu ne mu byabila mityima yetu, tulombole patōka amba twi besansanye bya binebine na Babiloni Mukatampe mu miswelo yonso.

18. Mungya byobya binenwe mu Kusokwelwa 14:9, 10, bene Kidishitu badyumuke batele mutyima ku kwepuka bika?

¹⁸ Mu Kusokwelwa 14:9, 10, mudi kintu kikwabo kya kumweka mu “kitatyi kya kidye” kilombwelwe’mo. Mwikeulu mukwabo unena’mba: “Wivwane muntu atōte kyokya kinyema ne kitompekejo kyandi, ne kutambula kiyūkeno kya pampala pandi, nansha kya pakuboko pandi, nabya aye enka ukatomanga ku vinyu ya bukalabale bwa Leza.” Mwanda waka? Mwanda “kinyema ne kitompekejo kyandi” byelekeja maludiki a bantu apela kwitabija bubikadi bwa Yehova. Bene Kidishitu badyumuke batadijanga, kutyina amba bakekala na mumweno nansha bilongwa bilombola amba i bapika ba boba bapela kwitabija bubikadi bukatampe bwa Yehova Leza wa bine. Bene Kidishitu bayukile amba Bulopwe bwa Leza ke bupwe kala kushimikwa momwa mūlu, ne amba busa kufudija malopwe onso a bantu, kadi abo bo bukemana nyeke.—Danyele 2:44.

Kokajimija Mutyima wa Kupēlakana!

19, 20. (a) Potwenda tutakamina mu mafuku a mfulo, i bika na bubine bikasaka Satana kulonga? (b) Netu tufwaninwe kusumininwa kulonga bika?

¹⁹ Potwenda tutakamina mu mafuku a mfulo, mitabakano ne matompo nabyo bikenda bivudila’ko. Ponso potukidi mu ino ngikadilo ya bintu minunu ne byotulwa na kubulwa kubwaninina kwetu, ketubudilwepo kutanwa na bintu pamo bwa misongo, bununu, kufwilwa baswe betu, kutenekwa ku mityima, kutyumukwa umbidyoma pangala pa buñumauma botutana potulonga bukomo bwa kusapula Kinenwa kya Leza, ne bikwabokwabo.  Ino ketwakilwai amba Satana usaka kukwatakanya ano makambakano otulwa nao mwanda wa kwituzozeja—tuleke kusapula myanda miyampe nansha kuleka kulonda misoñanya ya Leza. (Efisesa 6:11-13) Kino kitatyi kyotudi’mo ke kitatyipo kya kujimija mutyima wetu wa kupēlakana na bintu!

²⁰ Yesu wādi uyukile amba tukalwa na mitabakano ipungija, o mwanda wētupele ano madingi amba: “Endelelai na kukesha, mwanda kemuyukilepo difuku dine dīya Mfumwenu.” (Mateo 24:42, NW) Shi ke pano tutadijei i kwepi koketudi mu kulunguluka kwa kitatyi. Tudyumukei bunwanwa bwa Satana bukokeja kwituzozeja pakwabo ne kwitutalaja. Tusumininwei kusapula myanda miyampe ya Bulopwe bwa Leza na bupyasakane bukatampe mpata ne na kininga. Bine ne bine ponka, tulamei mutyima wetu wa kupēlakana pano potulonda kidyumu kya Yesu kinena’mba: “Endelelai na kukesha.” Mu uno muswelo, tukapeja Yehova bulēme ne kukabadilwa mu boba bakapebwa madyese a nyeke ne nyekeke.

Usa Kulondolola Namani?

• Tuyukile namani amba kidyumu kyādyumwine Yesu amba “endelelai na kukesha” kitala bene Kidishitu ba bine?

• I bimfwa’ka bya kudyumukila’po bidi mu Bible bikokeja kwitukwasha ‘twendelele na kukesha’?

• Le kitatyi kya kidye i kitatyi’ka, ne twi bakankamikwe kulonga bika kumeso kwa akyo kufula?

[Bipangujo bya Kifundwa]

[Kapango pa paje 23]

Myanda idi mu kino kishinte kya kwifunda i mimanine pa boloshile Endelelai na Kukesha! walupwilwe ku bitango bya distrike byalongelwe ntanda yonso mu mwaka wa 2004/2005.

[Kifwatulo pa paje 26]

Konakanibwa kwa Babiloni Mukatampe kubafwena