Kushintulula Biyukeno I Mwanda Musumininwe!

“Dibajinji nadi nanga amba wetu mwana Andreas wadi’tu ubela mutwe. Ino kupwa waleka ne kudya kwine, kadi ngitu yamwanzakana mpata. Mutwe papo keumuteme, nami nakwatwa moyo. Mulumyami pa kujokela ku njibo, twatwala Andreas kwa muñanga. Muñanga pa kumona biyukeno bya misongo, wanena amba Andreas ufwaninwe kutwelelela lupitalo. Misongo yadi mikatampe, kewadipo’nka mutwe usansa kete. Andreas wādi ubela luba lwa mukake (menenjite). Penepa waundapibwa ne kukoma wakoma bukidi bonka.”—Gertrud, inamwana wa mu Alemanye.

MWANDA watene Gertrud padi utananga bambutwile bavule bene. Bajiulanga biyukeno bilombola amba wabo mwana wabela. Shako ke misongo yonsopo ikalanga mikatampe, inoko bambutwile kebedilwepo biyukeno bilombola amba babo bana ababela. Bine, kujingulula biyukeno ne kukwata’po ñeni kyo kintu kitabukile kulumbuluka. Ke-pantu i mwanda musumininwe.

Uno mwanda i wa bine, mu misongo ne mu myanda mikwabo mwine. Kimfwa kiyampe pa uno mwanda i kinzengele kya tsunami (kutomboka kwa mabimbi a dijiba) kyalongekele mu Kweji 12, 2004 mu bifuko bijokolokele Kalunga-lui ka India. Bitango bya mu bifuko pamo bwa Ostrali ne Hawaii byajingulwile bintenshi bikata byadi bilongeka kungala kwa Sumatra, penepo byabadikila kumona kyaka kikokeja kulupuka’ko. Ino kekwadipo kingidilwa kya kudyumuna nakyo bantu badi bekele mu bifuko bya kyaka. O mwanda myuya 220 000 ne kupita yājimine.

Biyukeno bya Mvubu Kutabuka

Yesu Kidishitu nandi paādi pano panshi, wāpele bemvwaniki bandi ñeni yobakokeja kuboila ku kutala biyukeno ne kudyumuka mobifwaninwe. Wēsambīle pa kintu kya mvubu mikatampe mpata. Bible unena’mba: “Ino baFadiseo nabo ne baSadusea baiya kumutompa ke bamwipangula’mba: Witulombolepo kiyūkeno kya mūlu. Nandi webalondolola’mba: Kyolwa pa koloba mwamona mūlu mwatyila pyā, munenanga’mba, Bukakyanga biyampe. Ebiya kibanga nankyo pa kututyika momwa pyā, makumbi kūlu fututu: ke munena’mba, kebukipo biyampe dyalelo, mhm. Yō, bānwe banzazangi! I bine muyūkileko kuboya ñeni ya  dikumbi, nanshi pa kuyūkapo biyūkeno bya īno myaka’pa na butulu.”—Mateo 16:1-3.

Yesu pa kutela “biyūkeno bya īno myaka” wādi ulombola amba Bayuda bemvwaniki bandi ba mu myaka katwa kabajinji bādi bafwaninwe kujingulula kyaka kya bitatyi byobādi’mo. Ngikadilo ya bintu ya Bayuda yādi keidi pabwipi na kufikilwa na kyamalwa kyadi kya kuponena bonsololo. Ino kumeso kwa Yesu kufwa, wālombwele bana bandi ba bwanga kiyukeno kikwabo—kiyukeno kya kwikala’po kwandi. Byobya byaānene pa kine kyaba’kya bidi na kamweno kakatampe ku muntu yense dyalelo.