Abasapula Myanda Miyampe ku ba Matwi Majike

“ABO bemuletelanga būmi buyampe bwa ku mushipiditu!” Uno o muswelo washintulwile panopano mwimaniji wa njibo ya bekadi ke banunu ba mu Navalcarnero, Madrid, mu Eshipanye, bupempudi bwa Batumoni ba Yehova mu kino kyabo kīkalo. Le i bika byamuneneje namino?

Bantu bavule bekalanga mu kifuko kya Rosas del Camino i ba matwi majike. Ino Batumoni ba Yehova byobalonga bukomo bwa kwifunda Ludimi lwa Batumama lwa Kiespanyola, i babwanye kwisamba na bano bantu. Mwimaniji watendele Batumoni mwanda bajimije kitatyi kyabo mwanda’tu wa kufundija ku bitupu misoñanya ya ku mushipiditu ku boba basakilwa’yo. Kadi wamwene lupusa luyampe ludi na bufundiji bwa myanda miyampe ya Bulopwe pa bekadi’ba. Ne kadi bano bekadi—kutabukidila boba badi na makambakano a kwivwana ne a kumona—nabo basangelanga mpata bupempudi bwa Batumoni.

Eulogio, mwikadi umo mpofu kadi wa matwi majike, wifundanga pano Bible na Batumoni ba Yehova. Dyuba dimo pobadi befunda, mununu mwana-mulume webafwena, ebiya watambika Kamoni binenwa bya lulumbi byabundile bekadi mwanda wa kulombola kufwija’ko kwabo. Bino binenwa byadi na mutwe wa mwanda unena amba “Kwikala Kamoni.” Kipindi kimo kinena’mba: “Badi na būmi buyampe, bwa kwidingila, kadi kudi Yehova ko kobatambula tunangu twa nsangaji. Benda bāya ku mobo mwanda bakulupile mudi Yehova.”

Bine, kuno kukulupila mudi Yehova ko kufikije Batumoni bavule kujokoloka ntanda ku kufunda Ludimi lwa Batumama mwanda wa kukwasha boba ba matwi majike mu ntanda yabo. Mu uno muswelo, basapwilanga bano bantu musapu ukakankamika ne wa lukulupilo utanwa mu Bible.