Kino Kyo Kitatyi kya Kutonga

“Lelo i ku mwaka ka ko mukalekapo kwikala ne mityima ibidi, a?”—1 BALOPWE 18:21.

1. I kika kyalengeja kino kyetu kitatyi kikale kishile na kya kunyuma?

 LELO abe ukulupile amba Yehova i Leza umo kete wa bine? Le ukulupile ne kukulupila’mba bupolofeto bwa mu Bible butelanga kino kyetu kitatyi bu “mafuku a kumfulo” a ngikadilo imbi ya Satana? (2 Temote 3:1) Shi i amo, nankyo usa kwitabija na mutyima umo amba, mu bitatyi byonso, kino kyo kitatyi kya kutonga. Pano po pene paikala būmi bwa bantu pa katele-bulenda kupita myaka yonso.

2. I kika kyāfikile bulopwe bwa bisaka dikumi bwa Isalela mu bula bwa bubikadi bwa Mulopwe Ahaba?

² Mu myaka katwa ka dikumi K.K.K., muzo wa Isalela wādi usakilwa kutonga butongi busumininwe. Le i ani obādi bafwaninwe kwingidila? Ke-muntu Mulopwe Ahaba, pa kutononwa’ye na Yezebele, mukajandi Mujentaila, wāshinsakenye mutōtelo wa Bala mu bulopwe bwa bisaka dikumi bwa Isalela. Bala wādi leza wa bumeni obādi balangidija’mba ye uletanga mvula ne kupeja bidimibwa. Batōtyi bavule ba Bala bādi padi belela nkishi wa leza wabo mukunda nansha kumufukatyila. Bano batōtyi ba Bala pa kusaka kumwisāshila esele bidimibwa ne bidibwa byabo, bādi beela mu busekese bwa malwa na babwitwa ba ku tempelo. Kadi bādi ne na kibidiji kya kwityiba mpete ne mikobe mwanda wa kusoseja mashi.—1 Balopwe 18:28.

3. Mutōtelo wa Bala wādi na lupusa’ka pa bantu ba Leza?

³ Ino kintu kya bantu 7 000 ba Isalela bāsheleshele’po bāpelele kwikuja mu butōtyi bwa bankishi, bwa busekese, ne bwa bikandangobo. (1 Balopwe 19:18) Bālamatyidila na dikōkeji ku kipwano kyabo kilumbuluke na Yehova Leza, ne kino kyēbaletele kupangwapangwa. Kimfwa, Mulopwe-mukaji Yezebele wāipaile bapolofeto ba Yehova bavule bene. (1 Balopwe 18:4, 13) Byokwādi ino ngikadilo ya matompo, Bene Isalela  bavule bāshilwile kulonda mitōtelo ibidi, aku bakimba kusangaja Yehova koku nako Bala. Buno bwādi bine bupondo ku Mwine Isalela pa kuvundamina Yehova ne kutōta kilezaleza. Mwanda Yehova wālaile kwesela Bene Isalela enka shi bamusanswe ne kukōkela ku mbila yandi. Kadi wēbadyumwine monka’mba shi baleke kulombola ‘lulamato’ kwadi kasuku kandi, nankyo bakebatukija.—Kupituluka 5:6-10; 28:15, 63.

4. I bika byālaile Yesu ne bandi batumibwa amba bikamweka umbukata mwa Bene Kidishitu, ne i bifikidile muswelo’ka?

⁴ Ngikadilo ya uno muswelo ikidi’ko ne dyalelo mu Bipwilo bya Kine Kidishitu. Bantu ba mu bipwilo betelanga bu Bene Kidishitu, ino mafetyi abo, mwiendelejo, ne nkulupilo yabo bipatanyanga na bufundiji bwa mu Bible. Bendeji ba bipwilo bya bubela bo abo bemanine kupangwapangwa kwa Batumoni ba Yehova enka na mwādi mulongela Yezebele. Kadi kudi myanda mivule ilombola amba bano bendeji ba bipwilo’ba bakwatakanyanga mavita, pa kino i balambikwe mfu ya midiyo ne midiyo ya babo bana ba bipwilo. Kuno kukwatakanya kobakwatakanya imbikalo ya ntanda kudi bipwilo kutelwanga mu Bible bu busekese bwa ku mushipiditu. (Kusokwelwa 18:2, 3) Kadi Bipwilo bya Kine Kidishitu byendelelanga na kutala kilomonyeka busekese bumwekelele, nansha ke bwa bendeji babyo bwine. Yesu Kidishitu ne bandi batumibwa bāpwile kala kulaya buno bupondo. (Mateo 13:36-43; Bilongwa 20:29, 30; 2 Petelo 2:1, 2) Lelo i bika bikafikila uno mudiyala ne musubu wa balondi ba Bipwilo bya Kine Kidishitu? Ne i kiselwa’ka kidi na batōtyi ba bine ba Yehova pangala pa boba bonso bongwelwe na mutōtelo wa bubela? Tukokeja kutana kilondololwa kya bino bipangujo na kubandaula binkumbulu byāfikije ‘Bala ku kutukijibwa mu Isalela.’—2 Balopwe 10:28.

Buswe Buswele Leza Bantu Bandi Babomboke

5. Yehova wālombwele muswelo’ka buswe bwaādi uswele bantu bandi babomboke?

⁵ Yehova Leza kasangelangapo kupa mfuto boba babulwa kikōkeji kwadi. Byadi Tata wetu  wa buswe, usakanga babi besāse ne kujokela kwadi. (Ezekyele 18:32; 2 Petelo 3:9) Pa kulombola kino, Yehova wāingidije bapolofeto bavule mu mafuku a ba Ahaba ne Yezebele mwanda wa kwibadyumuna ku bibi byādi bya kulupuka ku butōtyi bwa Bala. Mu bano bapolofeto mwādi ne Ediya. Mulanga wa musala pa kupita’po, mulanga wālailwe kala, Ediya wāsapwila Mulopwe Ahaba kungwija Isalela ne bapolofeto ba Bala pamo ku Lūlu lwa Kalamela.—1 Balopwe 18:1, 19.

6, 7. (a) I muswelo’ka wāsokwele Ediya nsulo mine ya bupondo bwa Isalela? (b) I bika byālongele bapolofeto ba Bala? (c) I bika byālongele Ediya?

⁶ Kuno kubungakana kwālongēlwe pa madabahu a Yehova “afulamwininwe panshi,” mobimwekela mwanda wa kusangaja Yezebele. (1 Balopwe 18:30) Ino i kya bulanda, Bene Isalela bāile’ko kebākidipo bayukile—shi i Yehova, shi i Bala—wādi bine ukokeja kuleta mvula mukatampe obādi basaka. Bala wādi mwimaninwe na bapolofeto 450, ino Yehova na Ediya kete. Ediya wātenga pa mwanda mwine, kāipangula bantu’ba amba: “Lelo i ku mwaka ka ko mukalekapo kwikala ne mityima ibidi, a?” Ponka’po mu bishima bimvwanike senene, wēbapa butongi amba: “Shi Yehova ekale Leza, nankyo mulondei; ino shi Bala ye aye, nankyo mulondei.” O mwanda pa kutonona Bene Isalela ba mityima ibidi balombole lulamato enka kudi Yehova kete, Ediya wēbeta balonge ditompo dya kuyuka Leza wa bine. Bādi bafwaninwe kutapa bañombe babidi bu bya milambu, umo kudi Yehova mukwabo kudi Bala. Leza wa bine i yewa wādi wa kutuma mudilo ne kuloteja kya mulambu kyandi. Na pano kala, batōtyi ba Bala bālongolola kitapwa kyabo, kupwa kitatyi kilampe kebete’nka kwita’mba: “A Bala betwitabe bidi”! Ediya wāshilula kwibela mwenji, nabo kebetyibe mpete ne mikobe abo bene kufikija’nka ne byāsosele mashi, kadi ke bete na diwi dikatampe mpata. Ino kilondololwa nansha kimo mpika.—1 Balopwe 18:21, 26-29.

⁷ Pano ke Ediya nandi. Dibajinji bidi wālongolola madabahu a Yehova ne kutūla’po bisudi bya kyana kya ñombe. Kupwa wāsomanya bayuje milondo iná ya mema bamwangile’o pa kitapwa. Bāmwanga misunsa isatu mituntulu kufikija’nka ne byāyudile mema mu luvwa lwādi lujokolokele madabahu. Penepo Ediya wālombela’mba: “A Yehova Leza wa Abalahama, ne wa Isake, ne wa Isalela, kiyūkwepo dyalelo dino’di amba abe wi Leza mu Isalela, kabidi ami nami ne mwingidi obe, ne byo nalonga bino bintu byonsololo bino’bi pa kinenwa kyobe. Ngivwane, a Yehova, ngivwane, amba bantu bano’ba bayūke’mba abewa Yehova wi Leza, kadi ye abe waluja mutyima wabo monka.”—1 Balopwe 18:30-37.

8. Yehova wālondolwele namani ku milombelo ya Ediya, ne mupolofeto wālongele’po namani?

⁸ Leza wa bine wālondolola na kuloteja kitapwa  ne madabahu mene kumo na mudilo wa mūlu. Ne mema mene ādi mu luvwa lwādi lujokolokele madabahu’lwa āumijibwa tē na mudilo! Langa’po bidi mokyātengele Bene Isalela. Ponka’po “bapona mapala abo panshi ke banena’mba: Yehova aye i Leza Yehova aye i Leza.” Pano po pātongele Ediya butongi busumininwe, wāsoñanya Bene Isalela amba: “Kwatai babitobo [“bapolofeto,” New World Translation] ba Bala; kemukikolwa kuleka nansha umo kupanda.” Ponka’po bāipaya bapolofeto ba Bala bonso 450 munshi mwa Lūlu lwa Kalamela.—1 Balopwe 18:38-40.

9. I muswelo’ka wātompelwe kadi batōtyi ba bine?

⁹ Monka mu dine difuku’dyo dishele disekununwa, Yehova wānokeja mvula mukatampe umbajinji kunoka tamba myaka isatu ne kipindi! (Yakoba 5:17, 18) Langa’po bidi byādi bikokeja kwisamba Bene Isalela pa kukajokela’bo kwabo; Yehova wāletele bubinga amba aye ye Leza wa bine. Nansha nankyo, batōtyi ba Bala kebāzozejepo mityima. Yezebele wāendelele nyeke na mwingilo wandi wa kupangapanga bengidi ba Yehova. (1 Balopwe 19:1, 2; 21:11-16) Pa kino, bululame bwa bantu ba Leza bwātūlwa monka pa ditompo. Lelo bādi bakokeja kulamata enka kudi Yehova kasuku kandi pādi pa kufika butyibi bwandi padi batōtyi ba Bala?

Pano Tonga

10. (a) I bika bilongele Bene Kidishitu bashingwe māni mu kino kyetu kitatyi? (b) Kukōkela ku musoñanya udi mu Kusokwelwa 18:4 kulomba kulonga kika?

¹⁰ Mu kino kyetu kitatyi, Bene Kidishitu bashingwe māni bengilanga mwingilo pamo na wādi wingila Ediya. Kupityila ku binenwa byobanena ku kanwa ne mu mabuku obatampa, badyumunanga bantu ba mizo yonso ba mu Bipwilo bya Kine Kidishitu ne ba panja bene kumo amba kudi kyaka kitengēle mitōtelo ya bubela. Kino i kitonone midiyo ne midiyo ya bantu kutonga kutyiba kipwano na mitōtelo ya bubela. Bano bantu i bafike ku kupāna būmi bwabo kudi Yehova ne kubatyijibwa ke bana ba bwanga ba Yesu Kidishitu. I bine, i betabe ku lwito lwa kampeja-bukidi lwa Leza lutala pa mitōtelo ya bubela lunena’mba: “Bānwe bantu bami, mulupukeimo mwanda wa kunena’mba mwakēabila nandi myanda, kadi amba mwakatambula ku mpupo yandi.”—Kusokwelwa 18:4.

11. I kika kisakibwa mwanda wa kwitabijibwa na Yehova?

¹¹ Midiyo mikwabo ya bantu, nansha byoitengelwe na musapu wa mu Bible usapulwa na Batumoni ba Yehova, ino bakyendelela na kutatana pa kyobafwaninwe kulonga. Dimodimo bakwabo bāyanga ne ku kupwila kwa bwine Kidishitu, kimfwa ku kivulukilo kya Bidibwa bya ku Kyolwa bya Mfumwetu nansha ku bipimpo bimo bya ku kitango kya distrike. O mwanda tukankamika bano bonso’ba balanguluke na katentekeji pa binenwa bya Ediya bya’mba: “I ku mwaka ka ko mukalekapo kwikala ne mityima ibidi, a?” (1 Balopwe 18:21) Pa kyaba kya kulejaleja, bafwaninwe kutonga pano ne kwielela’ko na bupyasakane mwa kwikadila batōtyi ba Yehova bepāne ne babatyijibwe. Ke-pantu lukulupilo lwabo lwa būmi bwa nyeke bwa kumeso ludi pa katele-bulenda!—2 Tesalonika 1:6-9.

12. I mu ngikadila’ka ya kyaka mwikujije Bene Kidishitu bamobamo babatyijibwe, ne i kika kyobafwaninwe kulonga?

¹² Ino i kya bulanda, Bene Kidishitu bamo kebengilanga na dimodimo pakwabo ne kwingila kwine mpika mu butōtyi bwabo. (Bahebelu 10:23-25; 13:15, 16) Bakwabo i bajimije bupyasakane bwabo mwanda wa kutyina kupangwapangwa, makambakano a mu būmi, kusaka bupeta nansha kukimba bya kwisangaja. Yesu wādyumwine amba bino bintu byādi bikokeja kukukaja, kutyumuna mityima ne kwikala bu dikinga ku balondi bandi. (Mateo 10:28-33; 13:20-22; Luka 12:22-31; 21:34-36) Pa kyaba kya kwikala na mityima ibidi, abo bafwaninwe ‘kupyasakana ne kwalamuka pa mutyima’ na kutonga butongi mwa kufikijija biyampe kwipāna kobepēne kudi Leza.—Kusokwelwa 3:15-19.

Mfulo ya Kitulumukila ya Mutōtelo wa Bubela

13. Shintulula ngikadilo yādi’mo Isalela pāshingilwe Yehu māni bu mulopwe.

¹³ Buluji bwine bulengeja butongi bwa bantu bwikale ke bwa kampeja-bukidi i bumweke mu byāfikile Isalela kintu kya myaka 18 kupwa kupwija lupata lwa kuyuka Leza wa bine i ani  ku Lūlu lwa Kalamela. Difuku dya butyibi bwa Yehova pa mutōtelo wa Bala dyāfikile kiponka na ponka kadi mu kitulumukila mu bula bwa mwingilo wa mpingakani wa Ediya, ke Edisha kadi. Yolama mwanā Mulopwe Ahaba wādi kaludika Isalela, Yezebele nandi papo ukidi mūmi bu lolo mukaja mulopwe mwendi. Penepo Edisha wātuma mu bufyafya mwingidi wandi kukashinga Yehu māni, mudyavita wa Isalela, ekale ke mulopwe mupya. Yehu papo wādi ku Lamote-ngileade, dya kutunduka kwa Yodano, utangidila divita na balwana na Isalela. Mulopwe Yolama nandi wādi ku Yezelele mu musanza wa kubwipi na Mekido, wilaija kilonda kyōbamutapile ku bulwi kipwe.—2 Balopwe 8:29–9:4.

14, 15. Yehu wāpelwe mwingilo’ka, ne wēutambwile namani?

¹⁴ Yehova wāsoñenye Yehu kulonga kino amba: “Ukatapa njibo ya Ahaba mfumobe, amba ndubule kinongo kya mashi a bengidi bami bapolofeto, ne mashi a bengidi bonsololo ba Yehova, pa kuboko kwa Yezebele. Mwanda njibo yonsololo ya Ahaba ikonekanga . . . Ino kadi bambwa bakadyanga Yezebele mu mutamba wa Yezelele, kabidi kekukekalapo wakumujika nansha umo.”—2 Balopwe 9:7-10.

¹⁵ Yehu wādi mwana-mulume kaladika bukula. Ne kulejaleja kwine mpika, wāikila mu dikalo dyandi kaenda lubilo ku Yezelele. Mulami wa ku Yezelele wājiula mwendelejo wa Yehu, ne kulombola wālombola mulopwe Yolama, penepo Yolama nandi wāikila mu dikalo dyandi kakasambakana mukata wa basola bandi. Pa kwisambakana’bo, Yolama wāipangula’mba: “Lelo kutalala’ni a Yehu?” Yehu nandi wālondolola’mba: “Kutalala kwaka le? Ne kala kene masekese a inobe Yezebele ne majende andi le keadipo mangimangi’ni?” Ponka’po mulopwe Yolama’mba anyeme, Yehu wāsobola muketo wandi wāasa’o Yolama, nao wāsabakanya dityima dyandi ne kufwa wafwa.—2 Balopwe 9:20-24.

16. (a) I ngikadilo’ka ya kitulumukila yālwile nayo bantungu ba mu kipango kya Yezebele? (b) I muswelo’ka wāfikidile kinenwa kya Yehova padi Yezebele?

¹⁶ Ne pa kanwa i pala, Yehu na dikalo dyandi wāpēlakana kwenda mu kibundi. Papo Yezebele utadila pa dilolo, kadi mwidyangule byamwiko’tu, wāimuna Yehu bya lonji. Ne kwitaba i kusaka, Yehu wāloba bantu kānena’mba: “Lelo  udi nami i ani?” Bine pano bengidi ba Yezebele bādi banenwe kulonga butongi bwa binebine. Bantungu shi babidi shi basatu ba mu kipango bālupwila mitwe yabo pa dilolo. Bukidi bonka dikōkeji dyabo dyātulwa pa ditompo. Yehu wāsomanya’mba: “Mwelei munshi”! Bantungu bāela Yezebele panshi mwishinda, ebiya tubalwe twa Yehu ne dikalo dyandi byāmunyantanyanta. Enka nenki kalenga byanzwe wa mutōtelo wa Bala wāfwa lufu lumufwaninwe. Kumeso kwa kwenda kumujika, bambwa bādya mwita wandi, monka mokyālailwe kala.—2 Balopwe 9:30-37.

17. Butyibi bwa Leza padi Yezebele bukomejanga lwitabijo lwetu mu kinkumenkume’ka kīya kumeso?

¹⁷ Mfulo isansa mutyima uno muswelo yo ayo ikafikila ne wabwitwa wa kyelekejo witwa dya bu “Babiloni Mukatakata.” Wabwitwa uno welekejanga mitōtelo ya bubela ya ino ntanda ya Satana, milupuke mu kibundi kya Babiloni wa kala. Mfulo ya mutōtelo wa bubela pa kupita’yo, Yehova Leza ukavundamukila boba bonso bakwatakenye bipindi bikwabo bya ntanda ya Satana. Nabo bakonakanibwanga, ne kushila ntanda impya ya boloke kyaba.—Kusokwelwa 17:3-6; 19:19-21; 21:1-4.

18. Kupwa kwa lufu lwa Yezebele, i kika kyāfikīle batōtyi ba Bala mu Isalela?

¹⁸ Kupwa’tu kwa lufu lwa Yezebele, Mulopwe Yehu wāpēlakana kukepaya bana bonso ba Ahaba ne bakatampe bandi bonso. (2 Balopwe 10:11) Inoko batōtyi bavule ba Bala bādi bakidi mu Isalela. Ponka’po Yehu wātyiba mbila ya kulombola ‘bupyasakane bwandi padi Yehova.’ (2 Balopwe 10:16) Yehu wālongolola masobo makatampe mu tempelo ya Bala yāubakilwe na Ahaba mu Samadia na kwimwekeja aye mwine’mba i mutōtyi wa Bala. Bene Isalela bonso bādi batōta Bala bāiya ku masobo. Byobājikilwe munda mwa tempelo, bātapwa ku bipete na bantu ba Yehu. Bible ufudija mānga na kunena’mba: “Ino i enka namino’u Yehu waonakanya Bala mu Isalela.”—2 Balopwe 10:18-28.

19. I lukulupilo’ka lukatampe lutengēle “kibumbo kikatampe” kya batōtyi ba dikōkeji ba Yehova?

¹⁹ Mutōtelo wa Bala wāfundulwa mu Isalela. I bine ne bine ponka mitōtelo ya bubela ya ino ntanda isa kufula mu kitulumukila, kadi bisansa mutyima. Lelo abe ukekala ku mutamba’ka mu dino difuku dikatakata dya butyibi? Penepo tonga na kusumininwa pano, nankyo umone dyese dya kubadilwa mu “kibumbo kikatampe” kya bakapanda ku oa “malwa makatakata.” Bine, kukabulwepo kuvuluka byobya byapityile abe koku mu nsangaji utendela Leza pa kufikidija’ye butyibi pa wabwitwa mukatakata “wāboleja panopanshi ku busekese bwandi.” Tukulupile amba abe pamo ne batōtyi ba binebine muketabija bino binenwa bya nsangaji bimbwa mūlu amba: “Aleluya! mwanda Yehova Leza wetu, Mwinebukomobonso, wabikala.”—Kusokwelwa 7:9, 10, 14; 19:1, 2, 6.

Bipangujo bya Kulanguluka’po

• Le Isalela wa kala wāpile namani mambo a butōtyi ba Bala?

• I bupondo’ka bukatampe bwālailwe na Bible, ne buno bupolofeto i bufikidile muswelo’ka?

• Mutōtelo wa Bala wātukijibwe na Yehu muswelo’ka?

• Tufwaninwe kulonga kika pa kupanda ku difuku dya butyibi dya Leza?

[Bipangujo bya Kifundwa]

[Kalata pa paje 9]

(Pa kuyukila’ko bikwabo, tala dibuku)

Soko

Afeka

Helakate

Yokeneama

Mekido

Tanake

Dotani

SAMADIA

Ene-dola

Shuneme

Ofela

Yezelele

Ibeleame (Ngate-dimone)

Tilasa

Bete-shemeshe

Bete-sheane (Bete-shane)

Yabeshe-ngileade?

Abela-mehola

Bete-alebele

Lamote-Ngileade

Ngulu

Lūlu lwa Kalamela

Lūlu lwa Tabola

Mola

Lūlu lwa Ngidiboa

[Ngui]

Kalunga ka Meditelanea

Dijiba dya Ngadilea

[Munonga]

Munonga wa Yodano

[Nsulo ya mema ne mushimwa]

Mushimwa wa Halode

[Kutambile Kifwatulo]

Mungya kalata ka Pictorial Archive (Near Eastern History) Est. ne bwipangudi bwa mu Isalela

[Bifwatulo pa paje 10]

Kutambila kitatyi kyonso mu busapudi bwa Bulopwe ne kutanwa ku kupwila kwa Bwine Kidishitu byo bintu bya mvubu mu mutōtelo wa bine

[Kifwatulo pa paje 12]

Pamo bwa Yehu, bonso basaka kupanda ku difuku dya Yehova bafwaninwe kutonga na kusumininwa