Le Udi bwa Mutyi wa Lagani Auna?

MU KIBUNDI kidi kubwipi na kyabu kitelwa bu Port Moresby, mu Papuazi-Nuvele-Giné, bengidi babidi badi bajokela kwabo kupwa kwa busapudi. Pa kwenda, bamona mutyi wa buya bwa dyangi. Mutame wanena amba: “Ah, lagani auna!” Kupwa waalamukila kudi nkasa kabweja’ko amba: “Dino dijina dishintulula amba ‘mutyi wa mwaka.’ Uno mutyi i mwishile na mityi mivule ya mu ntanda, mwanda ao mwaka ne mwaka ukukulanga mani wita’mba ubaume. Ino mvula pa kunoka, wasanguka, wapamba maluba ne kudimbila dikwabo ke wa buya bwa dyangi.”

Tukokeja kuboila ñeni ku uno mutyi wa lagani auna, uyukilwe pavule mu bulungu bu flamboyant. Mungya bashayuka bamo, uno mutyi ubadilwa mu mityi itano ya maluba a buya bwa dyangi ntanda yonsololo. Nansha byoukukulanga maluba ne mani mu bushipo, mutyi wikalanga na mema munda mwao. Miji yao i mikomo kadi ibwanya kutwela nansha ke mu myala ya mabwe adi munshi mwa biloba. Mu uno muswelo ubwanya kwimanija nansha ke ku bivula bikatampe. Mu kīpi, i mutyi udimbila nansha ke mu ngikadilo mikomo mwine.

Netu tukokeja padi kutanwa mu ngikadilo itompa bukomo bwa lwitabijo lwetu. Lelo i bika biketukwasha tūminine? Pamo bwa lagani auna, tukokeja kutoma ne kungwija munda mwetu mema apāna būmi a mu Kinenwa kya Leza. Tufwaninwe kulamata nkū ku ‘dibwe dyetu,’ ke Yehova kadi, pamo ne ku bulongolodi bwandi. (2 Samwele 22:3) Bine, lagani auna i kivulujo kisangaja kituvuluja amba nansha shi tudi mu ngikadilo ya malwa, tukokeja kwikala nyeke bakomo ku mushipiditu ne ba buya bwa dyangi shi tumwena mu mpangiko itutūdile’ko Yehova. Mu uno muswelo tukekala “bakupyana myanda-yamilao” yalaile, kubadila’mo ne mulao wa būmi bwa nyeke.—Bahebelu 6:12; Kusokwelwa 21:4.