Lelo Tusakilwa Meshiasa?

BINE ukokeja padi kwipangula kino kipangujo, amba “Lelo tusakilwa Meshiasa? Eyo, muntu ukokeja kutatana shi bine Meshiasa uno udi ne kyakokeja kumulongela.

Bantu bamo ba milangwe yokokeja padi kulēmeka bakokeja kukukulupija’mba kilondololwa kidi patōka kadi i kipotoloke, amba: Usakilwa Meshiasa, monka musakilwa’ye bantu bonso. Muntu umo upotolwele bijila bya Bayuda wa mu myaka katwa kabajinji wāsonekele padi Meshiasa amba: “Ke-mintu myanda-ya-mulao ya Leza yonsololo’tu mudi aye i yonka ya eyo.” Bine pano po paālombwele patōka mwingilo mwinemwine wingila Meshiasa na nsangaji mu mpango ya Umpangi wetu ya kwesela mizo yonso ya pano pa ntanda. (2 Kodinda 1:20) Mwingilo wa Meshiasa i wa būmi mpata, o mwanda bupolofeto bonso bwimanine enka pa kwiya kwandi ne pa būmi bwandi. Henry H. Hally wānenene mu dibuku dimo dya ku makasa dyāingidijibwe na midiyo ne midiyo ya bantu myaka 70 ne musubu kunyuma’mba: “Kipwanino Kikulu kyāsonekelwe mwanda’tu wa kwilaija, ne kulongolola dishinda dya Kwiya kwa [Meshiasa].” Ino lelo kwiya kwandi kudi na mvubu? Mwanda waka kukutala ne abe?

Kishima kine “Meshiasa” kishintulula amba “Mushingwe māni” kadi kidingakene na kishima kiyukilwe biyampe kya bu “Kidishitu.” Uno muntu utelelwe na dibuku Encyclopædia Britannica, dya mu 1970, bu “mukūdi mukatampe mpata,” wadi ufwaninwe kwiya pa mwanda wa bilongwa byakubulwa kwakamwa byālongele ba mulume ne mukaji babajinji, ke ba Adama ne Eva kadi. Bāpangilwe babwaninine, na lukulupilo lusangaja lwa būmi bwakubulwa mfulo mu paladisa, ino bājimija’lo. Mwikeulu ntomboki wāyukene mwenda mafuku bu Satana Dyabola; wākunine mobadi mulangwe wa’mba Umpangi wabo udi na kaninga-mpo, ne amba bakekala biyampe shi betyibila abo bene mbila ya kuyuka biyampe ne bibi—Ngalwilo 3:1-5.

Eva wāongolwa ne kukulupila wākulupila bubela’bwa. Mobimwekela, Adama wāikele na kiswelelela kya mukajandi kupita’ko kukōkela Leza, o mwanda nandi wēlungile mu butomboki bwākolomwenwe na Dyabola. (Ngalwilo 3:6; 1 Temote 2:14) Kupityila ku bilongwa byabo, kebājimijepo’tu enka lukulupilo lwabo lwa būmi bwa kubulwa mfulo mu paladisa yādi ibajokolokele, mhm. Ino bāsambulwidile ne babo bana bubi ne kipa kilupuka’ko kine, ke lufu kadi.—Loma 5:12.

Ponka’po Umpangi Wetu Yehova wātana bukidibukidi dishinda dya mwa kufundwila bibi bilupuka ku lunkunkwa-mulongo lwa myanda yākolomwenwe na butomboki. Wādi wa kuleta kipwano kikwatañene na mulangwe wādi wa kuyukana mungya kala bu musoñanya wa boloke udi mu Bijila bya Mosesa—ke wa kwenzankanya kintu na kikwabo kadi. (Kupituluka 19:21; 1 Yoano 3:8) Uno musoñanya wādi ufwaninwe kulēmekwa mwanda wa lutundu lwa kishoto lwa ba Adama ne Eva lutambule būmi bwampikwa mfulo mu paladisa pano pa ntanda, pamo na mwādi musakila Mupangi amba kisaka kya bantu kikale biyampe. Kino kyo kitufikija kudi Meshiasa.

Pa kutyibila Dyabola nsambu, Yehova Leza wānene mu bupolofeto bubajinji bwa mu Bible amba: “Nkabikanga nshikani padi abe ne padi mwana-mukaji, kadi ne pa ntundu yobe ne yandi; aye ukakusanshija ku mutwe obe, nobe ukamusanshija ku kapondo kandi.” (Ngalwilo 3:15) Mwifundi umo wa Bible wanene’po amba “mānga ya milao itala padi Meshiasa, mungya mwikilombwela Bisonekwa, i mishilule na [bino] binenwa.” Mukwabo nandi i mwisambe amba Meshiasa i kingidilwa kya Leza “kikafundula’ko tusua tutambile ku kupona,” ne kuletela bantu madyese mungya kala.—Bahebelu 2:14, 15.

Pakwabo, ukokeja kumona’mba muzo wa bantu dyalelo keweselwepo nansha dimo. Ino, musaka wa bantu i muponene mu kubulwa lukulupilo ne kutyumukwa mutyima. O mwanda, dibuku The World Book Encyclopedia dinena’mba: “Bayuda bavule bakikungile kwiya kwa Meshiasa” ne kadi amba “ukatalula bilubo ne kushinda balwana na bantu.” Ino Bible aye unena’mba Meshiasa ke mwiye kala.