Kwivwanija Bible—Lelo I Bika Bikakukwasha?

“WAFĪLE byobya ku bakudyumuka, ne ku bañeni, nanshi ku twana-twa-lukeke ubasokola’byo.” (Luka 10:21) Bino binenwa byānene Yesu kudi Shandi wa mūlu bilombola amba pa kwivwanija Bible, tufwaninwe kwikala na mutyima muyampe. Tunangu twa Yehova i tumweke mu kino: I mupāne dibuku dibwanya kwivwanwa’nka na bantu betyepeje, badi na mutyima wa kufundijibwa.

Kwityepeja ke kintupo kipēla ku batwe bavule. Mwanda batwe bonso twi bapyane kato ka kwitatula. Ne kadi tudi mu “mafuku a mfulo” mudi bantu ‘beswele abo bene, . . . ba lupata lubilubi, ne bakwitatula.” (2 Temote 3:1-4) Tuno tuto to twitukankajanga kwivwana Kinenwa kya Leza. I kya bulanda, mwanda batwe bonso, mu ludingo kamukaya, tutādilwanga na bantu betujokolokele. Le penepo, tukekala namani na ngikadilo miyampe ilombwa pa kwivwanija Bible?

Teakanya Mutyima ne Ñeni

Ezela, mwendeji wa bantu ba Leza mu myaka ya kala, “wādi utēle mutyima wandi kukimba mukanda-wabijila wa Yehova.” (Ezela 7:10) Le kudi muswelo otubwanya netu kuteakanya mutyima wetu? Udi’ko. Tukokeja kushilula na kumona Bisonekwa senene. Mutumibwa Polo wālombwele banababo Bene Kidishitu amba: “Popa po mwatambwile mwanda wa Leza, o mwaivwene kudi bātwe, mweusepelela, kepamo na mwanda wa bantupo, ehe, i na mwanda wa Leza.” (1 Tesalonika 2:13) Eyo, bantu bo bāsonekele Bisonekwa, inoko byobāsonekele byādi bitamba kudi Yehova. Kuyuka uno mwanda wa mvubu kuketukwasha twitabije byobya byotutanga.—2 Temote 3:16.

Muswelo mukwabo wa kuteakanya mutyima i milombelo. Bible byaālembelwe ku bukomo bwa mushipiditu sandu, musapu wandi ukekala upēla kwivwana shi uno mushipiditu witukwasha. Nanshi tulombei buno bukwashi. Ivwana mulembi wa mitōto mwaādi utelele mutyima ku kino kintu, wālembele amba: “Bampeko kuyūkidija, kadi nkalamanga mukanda-obe-wa-bijila, eyo, i binebine, nkeutadijanga ne mutyima wami onso.” (Mitōto 119:34) Ketufwaninwepo enka kulombela mwanda wa kujadika ñeni mwa kwivwanina bisonekelwe, ino ne mwanda wa mutyima wetu witupe muswelo wa kwitabija’byo. Pa kwivwanija Bible, tufwaninwe kwikala na mutyima witabija bu binebine.

Polanguluka mwa kwikadila na mutyima muyampe, langa bidi byobya byokokeja kumwena mu kwifunda Bible. Tudi na bubinga buvule bulumbuluke bwa kutangila Kinenwa kya Leza, ino bubinga bupityile bonso i buno: kitufwenyanga kudi Leza. (Yakoba 4:8) Potutanga mulongelanga Yehova mu myanda  palapala, mwaikadilanga na boba bamuswele ne mwalongela boba bonso bamwela, tujingululanga bumuntu bwandi. Ino kikatampe kifwaninwe kwitutonona nyeke tutange Bible i kino: kukimba kuyukidija Leza ne kuningija kipwano kyotupwene nandi.

Bikoleja pa Kwikala na Mutyima Muyampe

Le i bika bikokeja kwitukoleja pa kwivwana Kinenwa kya Leza? Kikoleja kimo bidi i bantu botupa dikōkeji dyetu byakubulwa kwendela’mo. Kimfwa, padi ulondanga nkulupilo ne milangwe ya bantu kamukaya bolēmekele bikatampe. Ino bikekala namani shi bano bantu na bubine kebadipo na bubinebine bwa mu Kinenwa kya Leza ne kebebulēmekelepo? Nankyo kwivwanija byobya bine bifundija Bible kukokeja kukukoleja. O mwanda Bible witukankamika kubandaula na katentekeji byobya byotufundijibwa.—1 Tesalonika 5:21.

Madia inandya Yesu wātenwe na kino kikoleja. Wāfundijibwe bibidiji bya Bwine Yudea ne ku butame. Wādi ulonda na katentekeji Bijila bya Mosesa, ne kādipo ubulwa kwenda ku shinakoka. Ino mwenda myaka wājingulula amba mutōtelo wāmufundije bambutwile bandi kewādipo kadi ukitabijibwe na Leza. Ku mfulo, Madia wāitabija bufundiji bwa Yesu, ne kwikala wāikala mu bantu babajinji kutwela mu kipwilo kya Bwine Kidishitu. (Bilongwa 1:13, 14) Kuno kekwādipo kupunika bambutwile bandi nansha bibidiji byabo; ino kyādi kilomboji kya buswe bwaādi uswele Leza. Shi netu tusaka kumwena mu Bible, tufwaninwe, pamo bwa Madia, kwikala na dikōkeji kudi Leza kupita’ko kudi muntu kankenge.

I kya bulanda, mwanda bavule kebakwetepo bubinebine na bulēme. Bamo basangelanga kulonda bisela bya mitōtelo bimanine pa bubela. Bakwabo nabo bafutulula bubinebine mu binenwa ne mu mwikadilo wabo wa umbūmi. Pa kino, kwitabija bubinebine bwa mu Bible kwikalanga ke bulwi: Kukakukalañanya na balunda, balondakani, bakwenu ba ku kaji, enka ne ba mu kisaka mwine. (Yoano 17:14) Nansha nankyo, mwana-mulume wa tunangu wāsonekele amba: “Pota bu-binebine’bo ne kwibupotejapo mpika.” (Nkindi 23:23) Shi ukwete bubinebine na bulēme bukatampe, Yehova ukakukwasha wivwanije Bible.

Kadi kudi kikoleja kikwabo pa kwivwanija musapu wa mu Bible, ke kupela kulonda umbūmi byobya byokinena kadi. Yesu wānene bandi bana ba bwanga amba: “Kibemupebwa muyūke byobya byakukutwa kitumba bya mu bulopwe bwa mūlu, ino kudi abo kekibapelwepo. Ke-muntu mutyima wa bano bantu utekamine mu mani, ne matwi abo mene bulemitetele pa kwivwana.” (Mateo 13:11, 15) Bavule bāsapwidilwe na Yesu kebālondele’byopo ne kusaka kushinta kwine mpika. Bine, bādi beshile mpata na nsunga wendakana wa mu kyelekejo kya Yesu! Aye pa kutana dilungo dilēme, wāpejeje kupoteja byonso byaādi nabyo wākapota’dyo. Netu tufwaninwe kumona kwivwanija bubinebine bwa mu Bible na bulēme bukatampe uno muswelo.—Mateo 13:45, 46.

Kikoleja pa Kufundijibwa

Kikoleja kikatampe pa kwivwanija Bible i kwikala na mutyima wa kufundijibwa. Muntu ubwanya kukomenwa kwitabija milangwe impya imulombola muntu wamona bu wa munshi mwandi. Ino ne batumibwa ba Yesu Kidishitu nabo bādi “bantu bitupu bampikwa ne kufunda bikatampe” bine. (Bilongwa 4:13, Myanda Miyampe ku Bonso) Polo ushintulula kino na kusoneka’mba: “Talaipo, bānwe bāna betu, lwito lwetu, byo kebavudilepo badi ne ñeni ya ngitu, ehe, nansha bavule bene badi ne bukomo, nansha bangibangi badi na buleme bētyibwe mhm. Nanshi Leza watongele bintu bilembakane bya panopantanda kwibivutakanya byañeni.” (1 Kodinda 1:26, 27) Shi ubamone amba kufundijibwa na muntu wa munshi ko kukukoleja pa kwityepeja, nabya i biyampe uyuke’tu amba aye i kingidilwa’tu kingidija Leza pa kukufundija. Mwene i dyese dikatampe pa kufundijibwa na Yehova, ‘mufundiji wetu mukatakata’?—Isaya 30:20; 54:13.

Nemani mudyavita Mwine Shidea i muntu wāmwene kupebwa buludiki na muntu wa munshi bu kikoleja. Pa kusaka kundapwa makopo andi, wāendele kukamona Edisha mupolofeto  wa Yehova. Ino bulombodi bwa Leza bwa mwa kundapila Nemani bwāile kupityila kudi mwingidi. Musapu ne muswelo owāsapwilwe nabyo byonka byākoleje Nemani wātunya kwityepeja, o mwanda wāpelele dibajinji kukōkela kinenwa kya mupolofeto wa Leza. Ino kupwa, Nemani wāshinta mumweno wandi ne kupwibwa wāpwibwa. (2 Balopwe 5:9-14) Netu tutanwanga na kino kikoleja ponso potwifunda Bible. Tukokeja padi kuyuka amba pa kundapwa ku mushipiditu ne mu mwikadilo, tufwaninwe kulonda mwikadilo umpya wa umbūmi. Le tuketyepeja ne kuleka muntu etufundije byobya byotusakilwa kulonga? Enka boba badi na mutyima wa kufundijibwa bo bakevwanija Bible.

Mwana-mulume wādi mu lupusa lwa Kandase, Mulopwe mukaji wa Efiopya, wāikele na mutyima muyampe. Wādi ujokela kwabo mu Afrika mu dikalo dyandi penepa mwanā bwanga Fidipa wāmulonda lubilo ne kumufwena. Fidipa wāipangula mukelenge’wa amba le wivwanije byotanga’byo? Uno ntyikala wālondolola na kwityepeja’mba: “Le nekiyūka namani poso ne wakunombola biyampe”? Uno mukelenge pa kupwa kwivwanija senene Kinenwa kya Leza, wābatyijibwa ne kubatyijibwa. Ebiya “aye kaenda dyandi, wenda usepelela.”—Bilongwa 8:27-39.

Batumoni ba Yehova bavule i bantu bitupu pamo bwa bantu bonso. Ino yenga ne yenga bendejanga bifundwa bya Bible ku mobo a bantu kubwipi kwa midiyo isamba. Bible ufundijanga muswelo mulumbuluke wa mwa kwikadila umbūmi, ushintulula lukulupilo lumo kete ku bantu, ne kwitukwasha tuyuke Leza biyampe, o mwanda bantu midiyo ne midiyo i bajingulule amba kwifunda Bible ne kwivwanija byanena yo nsangaji mikatampe kutabuka. Bine nobe ukokeja kwikala na ino nsangaji.

[Kifwatulo pa paje 7]

Nemani wākomenwe kwitabija bulombodi butamba kudi mwingidi wa munshi

[Kifwatulo pa paje 7]

Kwivwanija Bible kusangajanga mutyima wetu