Kwivwanija Bible—Nsangaji Yokokeja Nobe Kwikala Nayo

BIBLE udi na bubinebine bulēme butamba kudi Leza. Witulombola kikadile’ko būmi, kisusukila bantu, ne byobya bibatengele kumeso. Witufundija mwa kusokwela nsangaji, mwa kwikadila na balunda, ne mwa kunekenyenya makambakano. Kutabukidila, tuyukanga’mo Yehova Umpangi wetu, Tata wetu wa mūlu. Buno buyuki bo buleta nsangaji ne kwitupa kitungo umbūmi bwetu.

Bible udingakanya kutambula buyuki bwa kuyuka Leza na kudya. Yesu wānene amba: “Muntu nanshi kakamwenapo būmi mu mikate yonka, mhm, poso mu myanda yonso ītamba mu kyakanwa kya Mwine Leza.” (Mateo 4:4; Bahebelu 5:12-14) Monka mwikadile kudya bidibwa binune na kamweno pa kwikala mūmi, ne kutanga Kinenwa kya Leza kitatyi ne kitatyi nako mo monka, kudi na kamweno shi tusaka kumwena mu mulao wa Leza wa būmi bwa nyeke.

Tusangelanga kudya, mwanda tupangilwe na mēlu a kusaka kudya ne mwanda tuvuijanga kisakibwa kyetu kya kyalwilo. Inoko, kudi kisakibwa kikwabo kya kyalwilo kyotufwaninwe kuvuija pa kusaka tumone nsangaji. Yesu wānene’mba: “Kebo ba nsangaji shabo boba beyukile bisakibwa byabo bya ku mushipiditu.” (Mateo 5:3, New World Translation) Tubwanya kwikala na ino nsangaji mwanda kino kisakibwa kibwanya kuvuijibwa na kwivwanija Kinenwa kya Leza.

Shako, bamo bakolelwanga pa kwivwanija Bible. Kimfwa, ukokeja kusakilwa bukwashi pa kwivwanija bisonekwa bīsambila pa bibidiji byokujingulwilepo nansha mineneno ya kyelekejo. Kadi kudi bupolofeto busonekelwe mu muneneno wa kyelekejo ubwanya kwivwanikwa enka na kunyemena ku  bisonekwa bikwabo bīsambila pa mwanda’wa. (Danyele 7:1-7; Kusokwelwa 13:1, 2) Nansha nankyo, ukokeja na bubine kwivwanija Bible. Le ukakulupila muswelo’ka amba usa kumwivwanija?

Nsangaji Ipelwe Bonsololo

Bible i Kinenwa kya Leza. Mo amo mwitulombola Leza bine byasaka kotudi. Ulanga Leza ubwanya kuleta dibuku kedibwanikapo kwivwanija nansha dibwanya kwivwanikwa enka na bantu bafunde masomo malampe? Mhm, Yehova kabwanyapo kubulwa kanye uno muswelo. Kidishitu Yesu wānene amba: “Shi kudi bānwe mwana alombe mukate kudi shandi, amupe dibwe’ni, a? Kadi shi mwita ino amupe nyoka’mba ke mwita’ni? Ebiya pakwabo, shi alombe dī, kadi amupe kaminye? Lelo ino bānweko babi, muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana Mushipiditu Sandu ku bakumulomba?” (Luka 11:11-13) Nanshi, kukulupila’tu amba nobe ubwanya kwivwanija Bible kadi shi ulombe Leza na mutyima umo, bine, ukakukwasha mwanda wa nobe wivwanije Kinenwa kyandi. Ke-pantu, bufundiji bwa kyalwilo bwa Bible bukokeja kwivwanwa ne kutentekelwa ne na banuke batyetye.—2 Temote 3:15.

Na bubine, bilomba kwielela’ko pa kwivwanija Bible, ino kwivwanija’ye kudi na lupusa ne bukomo potudi. Yesu pa kupwa kusanguka, wāmwekele bana bandi ba bwanga babidi ne kwisambila nabo pa bupolofeto bwa mu Bible. Nsekununi ya Luka inena’mba: “Kushilwila kudi Mosesa, ne ku bapolofeto bonso, wadi wibashintulwila monso mo byandi bisonekelwe byakulemenena kudi aye mwine.” Byafula namani? Kyolwa’kya, bana ba bwanga pa kulangulukila pa byobāyukile’bya, kebenena abo bene na bene amba: “Lelo ketubamwenapo konka ku mityima yetu kwitutēma na mudilo, pādi wisamba netu mu dishinda ne byādi witulumbulwila bisonekwa”? (Luka 24:13-32) Kwivwana kobaivwene Kinenwa kya Leza kwēbapele nsangaji mwanda kwākankamikile lwitabijo lwabo mu milao ya Leza ne kwibapa lukulupilo lwa būmi bwa kumeso.

Kwivwanija Kinenwa kya Leza ke kufwapo nkondo bitupu, ino kutobalanga kadi i kwa kamweno, monka mutobelanga bidibwa bya musonso. Ino le ufwaninwe kulonga bika pa kusaka kumwivwanija? Kishinte kilonda’ko kisa kukulombola muswelo okokeja kuloelelwa mu “kuyukidija Leza.”—Nkindi 2:1-5.

[Kifwatulo pa paje 4]

Yehova udi bwa shabana wa buswe, upānanga mushipiditu sandu wandi witukwasha pa kwivwanija Bible