Leza Utele Banunu Mutyima

KUSUSULWA kususulwa banunu dyalelo pi na pi ke kintupo kyeni. Tamba kalā, Bible wālaile amba mu “mafuku a kumfulo” kwa ino ngikadilo ya bintu byampikwa bwine Leza, bantu “bakēsanswa abo bene, . . . ne bampikwa lusa lwa bu-butule.” (2 Temote 3:1-3) Kishima kya Kingidiki kyalamwinwe bu “lusa lwa bu-butule” kifunkila ne pa buswe bwa kwiswa mu kisaka. Mungya buno bupolofeto bwa Bible, luno lusa i lusakane mpata dyalelo.

Yehova Leza i mwishile kulampe na boba basusula banunu, mwanda aye umwene banunu na bulēme kadi wibatele mutyima. Tala mulombwela Bible uno mwanda.

“Mutyibi wa Bakaji-Babafu”

Kuta kutele Yehova Leza banunu mutyima i kumweke patōka mu Bisonekwa bya Kihebelu. Kimfwa mu Mitōto 68:5, Davida utela Leza bu “mutyibi wa bakaji-babafu,” bekalanga divule banunu. * Mu malamuni makwabo a Bible, kishima “mutyibi” i kyalamunwe bu muntu “ulwila,” “ukinga,” ne “kalala.” Nanshi kibamweka patōka amba Yehova utele bakaji ba kishala mutyima. O mwanda Bible unenena’tu amba bulobo bwandi bwakanga shi bantu bebasusula. (Divilu 22:22-24) Bakaji ba kishala—ne banunu bonso ba kikōkeji—i balēme mpata ku meso a Leza ne a bengidi bandi. Nkindi 16:31 ulombola mwibamwena Yehova Leza ne bantu bandi amba: “Mutwe wa mvwi i kilongo kya ntumbo, [shi] ukatanwa mu dishinda dya boloke.”

Nanshi ke kya kutulumukapo pa kumona amba kulēmeka batame wādi mwanda  mukatampe mu bijila byāpelwe Isalela na Yehova. Bene Isalela bāsoñanibwe amba: “Ukamutalukila wa mvwi ku mutwe ne kukafwa kipala mpala ya mununu, kadi ukākamwa Leza obe; amiwa ne Yehova.” (Levi 19:32) Nanshi mumweno wādi umonwa batame mu Isalela wādi wendela pamo na kipwano kipwene umo ne umo na Yehova Leza. Muntu kādipo ubwanya kunena amba nswele Leza shi ususula banunu.

Shako, Bene Kidishitu kebaludikwangapo na Bijila bya Mosesa. Inoko balondanga “mukanda-wabijila wa Kidishitu,” uludika mpata bilongwa ne mulangilo wabo, kimfwa kuswa ne kuta mutyima bambutwile ne banunu. (Ngalatea 6:2; Efisesa 6:1-3; 1 Temote 5:1-3) Kadi Bene Kidishitu balombolanga buswe butamba ku mutyima, ke’nkapo’tu bwa kusoñanibwa. Mutumibwa Petelo usoñanya’mba: “Mwisanswei bānwe bene na bene ku mutyima tō, ne kininga ponka.”—1 Petelo 1:22.

Mwanā bwanga Yakoba uleta buluji bukwabo botufwaninwe kutela banunu mutyima. Amba: “Bwine-Leza bwine butōka tō, bwa kubulwa kubipa kumeso kwa Leza wetu Tata, i buno; bwa kupempula bāna bampikwa shabo, ne bakaji-ba-bafu, mu bishoto byabo, kadi ne kwilama aye mwine, nansha kiko kīne mpika panopantanda.” (Yakoba 1:27) Yakoba wanena mwanda utenga pa mutyima. Wituvuluja amba bano baswe betu badi na mvubu mpata ku meso a Yehova.

Nanshi kuleka kususula banunu kete kekubwenepo. Ino tufwaninwe ne kwibata mutyima bya binebine na kwibalongela biyampe. (Tala kapango kanena’mba “Buswe Bumweke,” pa paje 6-7.) Yakoba wāsonekele amba: “Kwitabija nako kwampikwa mīngilo i kufwe.”—Yakoba 2:26.

Kwibasenga “mu Bishoto Byabo”

Kudi mwanda mukwabo otuboila’ko ñeni mu binenwa bya Yakoba. Tala, Yakoba ulombwele Bene Kidishitu amba bapempule bakaji ba bafu “mu bishoto byabo.” Kishima kya Kingidiki kyalamwinwe bu “bishoto” kifunkila nakampata pa byamalwa, tusua, nansha pa masusu alupuka ku bikoleja bitufikila umbūmi. Na bubine banunu bavule bafikilwanga na bino byamalwa. Bamo badi na bushiyena. Bakwabo nabo bajondwanga mityima na bikoleja bīya na bununu. Enka ne boba bakidi na bukomo bwa kwingidila Leza bene bakokeja kuzoza pa mutyima. Ivwana bidi byatene John, * musapudi usapwile Bulopwe bwa Leza na kikōkeji mu bula bwa myaka 40 ne musubu, inoko myaka 30 ya mfulo i mupityije’yo mu mwingilo wa pa bula wa kitatyi kyonso. Pano John, aye na myaka 80, ulombola amba uzozejanga mutyima kyaba kimo. Amba: “Divule ngelanga milafwe kunyuma kemvuluka bilubo byami, i bilubo bivule mpata. Bine, nañanga kyaba kyonso amba nadi nkokeja kulonga biyampe kutabuka.”

Bantu ba uno muswelo bakokeja kusengibwa pa kuyuka amba nansha Yehova byadi mubwaninine, ketulombangapo kulonga bintu na bubwaninine. Eyo nansha Yehova byayukile amba tulubanga, ino Bible unena’mba: “Shi abe, Yehova, ubangile mambo nankyo le i ani, a Mfumwami, ukēmananga?” (Mitōto 130:3) I amo, Yehova kabambīlepo meso pa bilubo byetu, ino utalanga bidi mu mityima. Le tuyukile’kyo namani?

 Mulopwe Davida—muntu wādi uluba ne kutupatupa—wāsonekele ku bukomo bwa mushipiditu wa Leza binenwa bitanwa mu Mitōto 139:1-3 amba: “Abe Yehova, ubamandaula ubangyūkidija. Uyūkile mushikatyilo wami ne kutaluka kwami, uyūkile kufwatakanya kwami abe kulampe. Usokolanga dishinda dyami ne kulāla kwami, kadi uyūkidije mashinda ami onso.” Kishima “usokolanga” kidi pano kishintulula pa bute pa bute “kupēpa,” pamo’nka bwa kidimye upēpa mfumba mwa kushadila na miseke. Davida, na bukomo bwa Leza, witukulupija’mba Yehova uyukile kupēpa mwa kulamina mu luté lwandi bilongwa byetu bilumbuluke.

Tata wetu wa lusa udi mūlu uvulukanga—ne kusangela—mingilo yetu milumbuluke shi twikale bamukōkele nyeke. Bine, Bible unena’mba shi Leza ekale kwilwa mingilo ne buswe botwalombwele pangala pa dijina dyandi nankyo ukemona bu walonga bukondame.—Bahebelu 6:10.

“Bintu Bibajinji Bibatukidila”

Bible ulombola amba makambakano a bantu keādipo mu mpango ya Leza. I enka pāpwile bambutwile betu babajinji, ba mulume  ne mukaji, kutombokela Umpangi wabo, popāshilwile bantu kufikilwa na misongo ya bununu. (Ngalwilo 3:17-19; Loma 5:12) Ino kebikendelelapo nyeke uno muswelo.

Monka motwamwenanga kala, bibi bivule bidi’ko dyalelo—ne kususulwa kwa banunu kwine kumo—i biyukeno bilombola amba tudi mu ‘mafuku a mfulo’ a ino ngikadilo ya bintu. (2 Temote 3:1) Leza ukwete’ko mpango ya kufundula’ko byonso bilupukile ku bubi, kubadila’mo ne bununu ne lufu lwine. Bible unena’mba: “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”—Kusokwelwa 21:4.

Mu ntanda impya ya Leza, tusua ne misongo bikatukila lonso fututu. Ne kususulwa kwa banunu nako monka na monka. (Mika 4:4) Enka ne bafwile bene, boba bakilaminwe mu luté lwa Leza, bakekala bōmi monka, amba nabo bakapebwe mukenga wa kwikala na būmi bwa nyeke ne nyeke mu paladisa pano pa ntanda. (Yoano 5:28, 29) Mu mine myaka’yo, tukamwenenena patōka amba bine Yehova Leza utele bonso bamukōkele mutyima, ke’nkapo banunu kete.

[Kunshi kwa dyani]

[Kapango/Bifwatulo pa paje 6, 7]

Buswe Bumweke

Umbukata mwa Batumoni ba Yehova, bakulumpe pa kipwilo batangidilanga kumeso mu kulēmeka banunu. Batele mutyima na kusumininwa ku madingi a mutumibwa Petelo anena’mba: “Kumbai luombe lwa Leza ludi umbukata mwenu.” (1 Petelo 5:2) Kuta banunu mutyima na kulonga bintu bimweke i muswelo wa kukumba luombe lwa Leza. Ino le i miswelo’ka imoimo mimweke?

Bilomba kutūkija mutyima pa kupempula ne pa kwisamba na banunu myanda mivule ya makambakano abo. Padi bilomba kwibakwasha na kukebapotela bintu nansha kwibakundwila njibo, kwibatwala ku kupwila, kwibatangila Bible ne mabuku a Bwine Kidishitu, ne bintu bikwabo palapala. Ino shi bibwanika, i biyampe kukwata’ko mpangiko miyampe ne ya lonso ya kwibakwasha. *

Penepa shi tutu nansha kaka mununu pa kipwilo wakolelwa le, padi i na kubulwa bukwashi bwa lupeto? Dibajinji i biyampe kutala shi kudi bana bandi nansha babutule bakokeja kumukwasha. Kino i kikwatañane na binenwe mu 1 Temote 5:4, amba: “Shi mukaja-mufu udi ne bāna, nansha bankana, babadikilwe kulaījibwa ñeni ya kwifwilako lusa abo bene, ne kulōka bakwibabutula; ke-kintu kino namino i kilumbuluke, ne ku mpala ya Leza.”

Pakwabo mununu’wa ukokeja kusakilwa bukwashi bwa kuyuka shi ufwaninwe kukwashibwa na Leta. Pakwabo banabetu pa kipwilo bakokeja nabo kumukwasha. Ino shi ino mikenga yonso ya bukwashi keidi’kopo, papo bakulumpe bakatala shi kudi banabetu pa kipwilo babwenye bisakibwa bakokeja kumukwasha. Ye mobyāikadile ne kyaba kimo mu kipwilo kya mu myaka katwa kabajinji, mwanda mutumibwa Polo wātumīne Temote mwingidi nandi mukanda amba: “Kemukasonekwapo mu mukanda mukaja-mufu wampikwa kudya myaka makumi asamba, nandi i yenka wa kālu, ne wakutendelwa ne ku mīngilo yandi yonka milumbuluke; wakutamija bāna biyampe, ne kizaji, ne koīja maulu a bapandulwemo, ne wakukwasha ne bimona malwa, ne kupyasakana mu mīngilo yonso milumbuluke.”—1 Temote 5:9, 10.

[Kunshi kwa dyani]

[Kifwatulo pa paje 5]

Dokasa wādi ulela bakaji ba bafu.—Bilongwa 9:36-39