Bipangujo bya Batangi

Le Yesu wādi usaka kunena bika pa kusapwila Nikodema amba: “Kekudipo nansha umo wakandile momwa mūlu, poso’nka aye watūkile momwa mūlu, ke Mwanā muntu kadi”?—Yoano 3:13.

Mu kine kyaba’kya Yesu wādi ukidi pano panshi, kadi wādi kakandile nansha kujokela momwa mūlu. Inoko, myanda yotuyukile padi Yesu ne mwanda waādi wisambila’po bikokeja kwituyukija byaādi usaka kunena.

Yesu “watūkile momwa mūlu” mwanda ye wādi wikala dibajinji mu kikalo kya mishipiditu pamo na Shandi, ino mu kitatyi kitungwe, būmi bwa uno Mwana bwātundulwidilwe mu ndá ya Madia, ne kubutulwa wābutulwa bu muntu. (Luka 1:30-35; Ngalatea 4:4; Bahebelu 2:9, 14, 17) Kupwa kwa lufu lwandi, Yesu wādi wa kusangulwa bu kipangwa kya ku mushipiditu ne kujoka kukekala pamo na Yehova. O mwanda, kumeso’tu kwa kwipaibwa’ye, Yesu wālombele amba: “Abe Tata, ntumbije ne abe mwine kumo, ne ntumbo yo nadi nayo monka mobe, ne panopantanda pēne kepapangilwepo mhm.”—Yoano 17:5; Loma 6:4, 9; Bahebelu 9:24; 1 Petelo 3:18.

Nanshi pādi pesamba Yesu na Nikodema, Mufadiseo kadi mufundiji mu Isalela, aye wādi kajokēle mūlu. Na bubine, i kutupu muntu wāfwile kupwa wākanda momwa mūlu mu kikalo kya mishipiditu. Yesu mwine wānene amba Yoano Umbatyiji i mupolofeto wa Leza upityile bapolofeto bakwabo, ino yewa “mutyetye umbulopwe bwa mūlu aye nankyo wamukile buleme.” (Mateo 11:11) Kadi mutumibwa Petelo wāshintulwile amba nansha ke Davida Mulopwe wa kikōkeji mwine wāfwile kadi wādi ukidi mu kibundu; bine kāendelepo mūlu. (Bilongwa 2:29, 34) Kudi buluji kebwākandilepo mūlu bantu bāfwile kumeso kwa Yesu, kimfwa ba Davida, Yoano Umbatyiji, ne bantu bakwabo ba lwitabijo. Mwanda bāfwile kumeso kwa Yesu kushitwila bantu dishinda nansha mukenga wa kusangwilwa ku būmi bwa momwa mūlu. Mutumibwa Polo wāsonekele amba Yesu udi pamo bwa kalala-ntanda, wāladile “dishinda dipya dya būmi” dya kwenda mūlu.—Bahebelu 6:19, 20; 9:24; 10:19, 20.

Shi ke pano, Yesu byaādi kafwile ne kusangulwa, le wādi usaka kunena bika pa kulombola Nikodema’mba: “Kekudipo nansha umo wakandile momwa mūlu, poso’nka aye watūkile momwa mūlu, ke Mwanā muntu kadi”? (Yoano 3:13) Tala mwanda mwine wādi wisambila’po ba Yesu ne Nikodema.

Uno mwendeji wa Bayuda wāile bufuku kudi Yesu, penepo Yesu wāmusapwila’mba: “I binebine byo nakunena’mba: Shi muntu kabutwilwepo ne kokwa kūlu [“dipya,” NW], nankyo kakebumonepo bulopwe bwa Leza, mhm.” (Yoano 3:3) Nikodema nandi wāipangula’mba: ‘Le bibwanika namani byabyo? Le muntu ubwanya namani kubutulwa monka?’ Nikodema kāivwanijepo buno bufundiji bwa kwa Leza bwisambila pa Bulopwe bwa Leza. Le kwādi muswelo mukwabo waādi ukokeja kuyuka’bo? Na bubine, kādipo wa kwibiyukila ku bantu; mwanda kekwādipo muntu mukwabo wādi ukokeja kumufundija’bo, ke-pantu i kutupu wādi mūlu dibajinji ne wādi ubwanya kushintulula mwanda o-onso wa mwa kutwelela mu Bulopwe. Umo kete wādi wa kubwanya i Yesu. Wādi ubwanya kufundija Nikodema ne bakwabo mwanda Aye ye wātūkile mūlu ne wādi na muswelo wa kufundija bantu bino bintu.

Nanshi kipangujo kitala pa kino kisonekwa kisokola mwanda wa mvubu utala pa kwifunda Kinenwa kya Leza. Ke biyampepo kukukala pa kisonekwa mwanda’po’tu kimweka bu kikomo kwivwanija. Byobya binena Bible mu bisonekwa kampanda bifwaninwe kubandaulwa mungya bisonekwa bikwabo ne kukwatañana nabyo. Ne kadi, divule mwanda wisambilwa’po—ngikadilo nansha kine kyādi kinenenwa’po—bikokeja kwitukwasha tusokole nshintulwilo myendele’mo kadi miluji ya kisonekwa kidyambakane.