Bipangujo bya Batangi
Bipangujo bya Batangi
Le tuyukile namani amba ñeni nansha tunangu tusekunwinwe mu Nkindi 8:22-31 tufunkilanga padi Yesu Kidishitu kumeso kwa kwiya’ye pano pa ntanda?
Nsekununi ya ku bukomo bwa mushipiditu isekunwine tunangu mu mukanda wa Nkindi itangwa’mba: “Yehova wampeteje mu ngalwilo ya dishinda dyandi, kumeso kwa mingilo yandi ya kalā. . . . Padi ne ngulu mine keyālwilwepo ne tungulu twine, ami nadi mubutulwe . . . Pākomeje madiulu ami nadipo; . . . ne papo pene nadi nandi pabwipi bwa sendwe mwine mukata; ino nadi mafuku onso nsangaji yandi mo bukila mo bukila, kusepelela nyeke ku meso andi, . . . ino kuloelelwa kwami kwādi ne bāna ba bantu.”
Kino kisonekwa kekinenenangapo’tu enka pa tunangu twa Leza nansha pa tunangu ketumweka na meso. Mwanda waka? Mwanda tuno tunangu tusekunwinwe pano ‘twāpetejibwe’ nansha kupangwa bu ngalwilo ya dishinda dya Yehova. Yehova Leza i wa nyeke ne nyekeke kadi udi na tunangu nyeke ne nyeke. (Mitōto 90:1, 2) Tunangu twandi ato ketudipo na ngalwilo; mwanda ketwapangilwepo nansha kulongwa. Kadi ‘ketwabutwilwepo.’ Pakwabo kadi, tunangu tunenenwe pano tunenanga, tulonga bintu, o mwanda tufunkilanga pa muntu.—Nkindi 8:1.
Mukanda wa Nkindi unena’mba tamba kala tunangu’tu twādi pabwipi na Yehova, Umpangi, pamo bwa “sendwe mwine mukata.” Bine ne bine ponka i Yesu unenenwa’po. Kitatyi kilampe kumeso kwa Yesu kwiya’ye pano panshi, wāingile pamo na Yehova, o mwanda Kinenwa kya Leza kinena’mba: “Aye nandi i umbajinji mutabuke byonso, ne mudi aye mo monka [mulongelwe] ne bintu byonso.”—Kolose 1:17; Kusokwelwa 3:14.
Kutela Mwanā Leza bu tunangu i kwendele’mo, mwanda i Aye umo kete wāsokwele mpango ne mbila ya tunangu ya Yehova. Paādi kaile pano pa ntanda, Yesu wādi Mwanda wa Leza, ko kunena’mba Musedi wandi wa myanda. (Yoano 1:1) I mutelwe amba aye i “bukomo bwa Leza, i tunangu twa Leza.” (1 Kodinda 1:24, 30, New World Translation) Kuno shako ko kusāsulwa kulumbuluke kwa Mwanā Leza, mwine wāikele kuloelelwa mu bana ba bantu wāpāna ne būmi bwandi bu kitapwa pa mwanda wabo!—Yoano 3:16.