Bulēmantu—Kyepelo Kifutulwilwe na Bavule

“Myanda yonso ya mu būmi bwa mu komponi yādi bu ditabula dikwabo ditwala ku kufwijibwa bumvu ne ku kupēlulwa.”—MAGDALENA KUSSEROW REUTER, WĀPANDILE MU KOMPONI KA MALWA KA NAZI.

BINE, masusu a mwiko ādi asusukwa mu makomponi a malwa a Nazi mu bula bwa Divita II dya Ntanda keyādipo ngalwilo nansha mfulo ya kulwa na bulēmantu bwa muntu. Shi tubandaule myanda ya pa kala ne ya dyalelo, tusa kumona’tu amba: “Myanda ya kufwija bantu bumvu ne kwibapēlula” yāshilwile tamba kalā kufika ne ku dyalelo.

Kufutululwa kwa bulēmantu bwa bantu kekumwekangapo enka mu bilongwa bya bunyema bibikele mu mānga ya muntu. Ino, bufutululwanga ne mu mashinda mavule a munshimunshi. Langa’po bidi mwana usepwa pa mwanda wa kabulēma kabidye. Nansha mweni ufutululwa pa mwanda wa bibidiji bimobimo “byeni.” Kadi ne muntu usañunwa pa mwanda wa lukoba lwandi nansha muzo. Boba bafutululañana bakokeja kumona bino bu mitembwe, ino ku bene basepwa ke mwandapo mutyetye, mwanda bibasansanga ne kwibapwija bulēme.—Nkindi 26:18, 19.

Lelo Bulēmantu I Bika?

Dibuku dimo dishintulula bishima dishintulula bulēmantu bu ‘mwikadilo wa kwikala wa mvubu, kwikala mulēmekibwe, nansha mukulupilwe.’ Nanshi, bulēmantu bwa muntu i muswelo otwimona batwe  bene ne mwitumwena bakwetu. Eyo, kudi bintu bivule biteñanga malango etu, inoko muswelo witumona bakwetu ne obetulongela bintu udi na mvubu bininge pa kusaka kuyuka bulēme bwetu mu būmi bwa difuku ne difuku.

Muzo ne muzo wa bantu udi na balanda, bakubulwa wa kwibakinga, ne bafudilwe. Inoko, kwikala mu ino ngikadilo ke akopo kutyepeja bulēmantu bwabo. Ino mumweno ne byobya bibalonga bakwabo byo bifutulula bulēmantu bwabo. I kya bulanda, mwanda kyepelo kya bulēmantu bwa bafudilwe kyo kine kifutululwa ne kutyimpilwa panshi. Mwene i dingi dine dyotwivwananga bishima pamo bwa “wabule,” “kapwaipwai,” “kilembakane” bitukibwa balanda, banunu, ne boba badi na ñeni mivutakane, nansha boba badi na bulema!

Mwanda waka bantu befutululanga? Lelo kashā kyepelo kya bulēmantu bwa bantu kikalēmekwa? Kishinte kilonda’ko kikaleta kilondololwa kyotondwa kya mu Kinenwa kya Leza, Bible.