“I pa Mwanda wa Kanuke ka Myaka Kitema”

WIESŁAWA wikalanga kunshi kwa Polonye; pafikanga Batumoni ba Yehova ku kyandi kibelo, wibafwijanga’ko’tu na kikōkeji, kupwa wapela kwibatambula. Difuku dimo, kanuke kamo ka myaka kitema, ka dijina dya bu Samuel, kaiya ku njibo yandi pamo na Inandi. Uno musunsa Wiesława wakwata butyibi bwa kwivwana musapu wabo, watambula ne dipepala disambila pa paladisa pano pa ntanda.

Kivulukilo kya lufu lwa Yesu Kidishitu byokyadi pabwipi, Samuel waita Wiesława amba iya nobe utanwe ku uno mwanda wa pa bula. Ebiya, bajokela’ko kadi dikwabo na inandi, bamupaila kakanda katampwe ka lwito. Wiesława pa kumona kano kalumyana kavwale bya dyangi, webalomba’mba ngilaijei’ko bidi bityetye, nandi waenda kukavwala bya dyangi. Kupwa wajoka pa kibelo, kateje Samuel, waitabija lwito, ne kwipangula’mba: “Le mfwaninwe kwiya’ko bunka bwami’ni nansha twiye ne mulumyami?” Kupwa wabweja’ko amba: “Nansha shi mulume apele kwiya, ami’ko nsa kwiya. Kyonkaila’tu kine, i pa mwanda wa abe’wa Samuel.” Waiya’ko monka mwaalaile, mwanda wa kusangaja Samuel.

Kitatyi kyadi kinenwa dishikulu dya Kivulukilo, Samuel wadi ushikete pamo na Wiesława umulombola bisonekwa byadi bisambilwa’po. Kino kyamutengele mpata. Wasangedile Kivulukilo ne kufwija’ko pangala pa muswelo washintulwilwe milangwe mikomo mu bishima bipēla. Wasangedile ne muswelo obamulubwile na kyanga ne kipwilo mokyaikadile nandi biyampe. Tamba penepa, Wiesława i mushilule kusangela bintu bya ku mushipiditu mpata, ne kupwila na Batumoni ba Yehova kitatyi ne kitatyi. Mafuku matyetye kunyuma’ku wanene amba: “Pano ke ngivwana bumvu mwanda wa kupela konadi mpelanga kwimwivwana pomwadi mwiyanga ku yami njibo. Kadi kunena’tu na bubine, shi naivwene musapu wenu, i pa mwanda wa kanuke ka myaka kitema’ka, ka Samuel.”

Pamo’nka bwa Samuel mu Polonye, bankasampe Batumoni ba Yehova bavule batendelanga Leza na kyakanwa kyabo ne kupityila ku mwidyangwilo wabo ne ku mwiendelejo wabo mulumbuluke. Shi ukidi nkasampe, ukokeja nobe kukwasha bantu ba mityima miyampe bafikile ku kusangela bintu bya ku mushipiditu.