Ukokeja Kwikala’ko Nyeke

BANTU bavule betabile mu bipwilo ntanda yonso basangelanga kyepelo kya kwikala na būmi bwa nyeke mu muswelo kampanda nansha kankenge. Shintulwilo i mishile mungya kipwilo ne kipwilo, inoko na bubine lukulupilo i lumo lonka—lwa kwikala mu nsangaji mu ngikadilo milumbuluke yampikwa kutyina kadi lufu. Mwene nobe kino kyo kintu kyoabilanga? Lelo mwanda waka luno lukulupilo i luyukane konso namino? Lelo kino kyepelo kya būmi bwa nyeke kikafikidila bine?

Bisonekwa bilombola amba Umpangi wākunine mutyima wa kusaka būmi bwa nyeke mu nkulwe ya munda mwa muntu tamba’tu ku ngalwilo ngalwilō, paāpangile ba mulume ne mukaji babajinji. Bible unena’mba: ‘Leza wabika kitatyi kya nyekeke mu mutyima wabyo.’—Musapudi 3:11.

Ino pa kuvuija kuno kwabila kwabo kwa kusaka kwikala’ko nyeke, bantu babidi babajinji bādi bafwaninwe kwitabija lupusa lwa Leza lwa kutyiba mbila ya kuyuka kyokya kyoloke ne kyakubulwa koloka. Shi bālongele namino, longa Yehova wēbamwene bu bantu bafwaninwe kupebwa būmi bwa “nyeke ne nyeke-ke” mu kifuko kyawēbalongolwedile, ke mu budimi bwa Edena kadi.—Ngalwilo 2:8; 3:22.

Būmi bwa Nyeke Bubajimina

Nsekununi ya mu Bible ilombola amba Leza wākunine mu budimi “mutyi wakuyukanya buya ne bubi,” wādi na bipa byobādi bajidikile ba Adama ne Eva kudya’ko kutyina’mba bakafwa. (Ngalwilo 2:9, 17) Shi ba Adama ne Eva bālekele kudya ku kine kipa’kya longa bālombwele Leza amba betabije lupusa lwandi. Ino kudya ku mutyi’kwa kulombola’mba abapele lupusa lwa Leza. Ba Adama ne Eva bāpelele kukōkela misoñanya ya Yehova penepo bēkupa ku mutamba wa Satana, kipangwa kya ku mushipiditu kyāfutulwile lupusa lwa Leza. Pa kino, Leza nandi wāmona na bubinga bonso amba ba Adama ne Eva kebafwaninwepo būmi bwa nyeke.—Ngalwilo 3:1-6.

Kintu kyēbatūdile Leza i būmi nansha lufu, kwikala’ko nansha kuleka kwikala’ko. Kipa kyātambile ku kubulwa kukōkela i lufu ne kubulwa kwikala’ko lonso. Kebyādipo bibwanika kadi ba Adama ne Eva nansha muntu ye-yense wa ku lutundu lwabo endelele na būmi mu muswelo kampanda wa majende nansha na kwikala bu muya keufu. *

Lutundu lwa Adama lonso lususukanga pangala pa butomboki bwandi. Bipa bilupukile’ko i bishintululwe na mutumibwa Polo. Wāsonekele amba: “Monka mwatwelele bubi panopantanda ku muntu umo, ne lufu nalo ponka pa bubi, mo monka mwasambakanine lufu ku bantu bonso, mwanda abo bonso bapīle mambo.”—Loma 5:12.

Būmi bwa Nyeke Bubaletwa Monka

Mutumibwa Polo wāelekeje ngikadilo idi’mo lutundu lwa Adama na bupika bwādi bumunwa bantu mu myaka katwa kabajinji. Bana ba Adama ne Eva byobapyene bubi, babutulwanga kala “bapika ba bubi,” ba kufwa kubola. (Loma 5:12; 6:16, 17) Shi Yehova kāfutyilepo mfutwa myendele’mo mwanda wa kupota bwanapabo bwa bano bapika, longa i bikole. Polo ushintulula’mba: “Kutyiba-mambo byo kwaīdile kuponeja bantu bonso pa mwanda wa muntu umo [Adama], kadi i yenka nabya ne pa boloke bwa umo kyabuntu kyaīdile ku bantu bonso kubingijibwa bubinga bwa būmi.” Buno “boloke” bwāfikije Yesu ku kwela kitapwa kya būmi bwandi bwa bu muntu mubwaninine bu “kikūlwa kya bonsololo.” Yehova wāitabije amba mungya bijila kikūlwa kidi na bukomo bwa kunyongolola bantu ku “kutyiba-mambo” kwa “kuponejibwa.”—Loma 5:16, 18, 19; 1 Temote 2:5, 6.

O mwanda befundi ba bintu kebakatanapo nansha dimo kintu kine kya kuleta būmi bwampikwa mfulo mu nsange ya muntu. Ke-pantu mwanda mwine udi’tu kungi. Mungya kunena kwa Bible,  kintu kine kiletela bantu lufu kikwatañene na mwikadilo ne na bijila, ke na ngitupo, mhm. Muswelo wa kujokeja būmi bwa nyeke—kitapwa kya kikūlwa kya Yesu—nao i onka ukwatañene na bijila. Kikūlwa nakyo i kilomboji kya boloke bwa Leza ne kanye ka buswe bwandi. Le penepo, i ani ukamwena mu kikūlwa ne kumona būmi bwa nyeke?

Kyabuntu kya Kubulwa Kufwa

Yehova Leza i wa “ku kala-ā ka kunyuma kutūla ne kala-ā ka ku meso.” Kafwangapo. (Mitōto 90:2) Muntu umbajinji wāpelwe kyabuntu kya kubulwa kufwa na Yehova i Yesu Kidishitu. Mutumibwa Polo ushintulula’mba: “Kidishitu byāsangulwa ku lufu aye kakikamonepo lufu dikwabo, mhm, nanshi lufu pano kelukidipo ne po lumumunine bumfumwandi, ehe.” (Loma 6:9) Bine, Polo wāshiyañenye Yesu musanguke na baludiki ba ino ntanda, wāmutela’mba aye ye umo kete udi na kubulwa kufwa umbukata mwabo. I amo, Yesu ukekala’ko “nyeke ne nyeke.” Būmi bwandi i “bwampikwa kufula.”—Bahebelu 7:15-17, 23-25; 1 Temote 6:15, 16.

Ke’nkapo Yesu bunka bwandi upelwe kino kyabuntu. Bene Kidishitu bashingwe māni batongelwe kubikala bu balopwe mu ntumbo ya momwa mūlu nabo bapebwanga lusangukilo lwa muswelo umo onka. (Loma 6:5) Mutumibwa Yoano ulombola’mba ano madyese i meselwe ne bantu 144 000. (Kusokwelwa 14:1) Nabo bapebwanga kubulwa kufwa. Polo wisambila pa kusangulwa kwabo amba: “Mwita ne mashi kebikamonepo kupyana bulopwe bwa Leza . . . Mwanda ayo mpungi īkavuma, ne bafu bakasangulwa ke bampikwa kubola, ne bātwe tukālamunwa. Ke-muntu mo kyendele i muno’mba, kino kibole kivwale kyakubulwa kubola, kadi kino kyalufu nakyo kivwale kyakubulwa kufwa.” Lufu keludipo na bukomo pa bonso bapebwa luno lusangukilo.—1 Kodinda 15:50-53; Kusokwelwa 20:6.

Bine uno mwanda usokwelwe na Leza i wa kutendelwa mpata. Mwanda nansha ke bamwikeulu bene kebāpangilwepo na kubulwa kufwa, nansha byobādi na umbidi wa ku mushipiditu. Kidi namino mwanda bipangwa bya ku mushipiditu byēkupile ku butomboki bwa Satana bikepaibwa. (Mateo 25:41) Ino balopwe bakaludika pamo na Kidishitu abo bapebwanga kyabuntu kya kubulwa kufwa, kintu kilombola’mba Yehova ukulupile na mutyima onso amba bakamukōkela.

Lelo kino kishintulula’mba bakamona būmi bwa nyeke i enka ba 144 000, bantu batyetye bininge shi twibadingakanye na midiyala ya bantu bekele’ko? Mhm. Tutale bidi.

Būmi bwa Nyeke mu Paladisa Pano pa Ntanda

Mukanda wa Kusokwelwa ulombola mumwekelo mulumbuluke wa kibumbo kya bantu kebabadika bapelwe būmi bwa nyeke mu paladisa pano pa ntanda. Mu bano bantu mudi ne boba bafwile ino kupwa basangulwa ne kujokela ku bukomo ne bunkanka bwa bunkasampe. (Kusokwelwa 7:9; 20:12, 13; 21:3, 4) Bano bantu bonso batwalwanga ku “munonga wa mema wa būmi, weñenya pamo bwa kidisale, ulupuka mu lupona lwa Leza ne lwa Kāna-ka-mukōko.” Ku mungo yao kudi ‘mityi ya būmi, . . . ipa bipa miswelo dikumi ne ībidi, ipa bipa byao ku kweji, ku kweji; kadi ne māni a mityi’ya o akūndapa mizo.’ O mwanda Yehova Leza wita bantu na kizaji amba: “Iyai! Kadi ne yewa wakyumwa, nandi āye; kadi ne uswele, nandi ayate’o, buntu bitupu, mema a būmi.”—Kusokwelwa 22:1, 2, 17.

Ino mityi ne mema ke bwangapo bupāna būmi nansha kyumbu kya bunkasampe pamo na yoya yādi ikimbwa tutwa twa myaka kunyuma na batuenga ba malawa ne banangi. Ino yelekeja mpangiko ikwete’ko Leza kupityila kudi Yesu Kidishitu mwanda wa kujokeja muntu ku bubwaninine bwādi’ko ku ngalwilo.

Mpango ya Leza ya kupa bantu ba kikōkeji būmi bwa nyeke keishintyilepo. Mine mpango’i ikafikidila, mwanda Yehova i wa dikōkeji. Mitōto 37:29 inena’mba: “Boloke bakapyananga ntanda, ne kwikala monka nyeke.” Uno mulao o witutonona batwe, pamo ne bantu bapelwe kubulwa kufwa momwa mūlu, twele lubila’mba: “Abe, Yehova Leza Mwinebukomobonso, bilongwa byobe i bikatakata byakutendelwa; mashinda obe i moloke malumbuluke, abe Mulopwe wa mizo. Abe Yehova, lelo i ani kakakutyina, ne kutumbija dijina dyobe? Ke-wi-muntu abe enka ye ukola,” nansha wa dikōkeji.—Kusokwelwa 15:3, 4.

Lelo nobe usaka kupebwa kino kyabuntu kilēme kya būmi bwa nyeke? Nankyo ufwaninwe kwikala wa dikōkeji ne kikōkeji kudi ‘Mulopwe wa nyeke.’ Kadi ufwaninwe kwifunda myanda itala Yehova ne itala mwine obengidija mwanda wa kwitupa būmi, ke Yesu Kidishitu kadi. Boba bonso betabija na mutyima tō misoñanya ya Leza itala kiyampe ne kibi bakapebwa kyabuntu kya ‘būmi bwa kulādila nyeke na nyeke.’—Yoano 17:3.

[Kunshi kwa dyani]