Daniel ne Kandi Kayukeno ka ku Kitango

YESU wātopekele bendeji ba bipwilo bādi bemona bu boloke bāfityilwe pa kumona bana batendela Leza mu kibumbo. Ponka’po wēbepangula’mba: “Kemwatangile nanshi amba, mu kyakanwa kya twana, ne mu twalukeke tukyamwa, mo muneñenye mitōto”?—Mateo 21:15, 16.

Daniel, wa myaka isamba, upwilanga mu kipwilo kya ludimi lwa Kirushi mu Alemanye i mulete bukamoni bulombola amba bine ne dyalelo dino bana batendelanga Yehova. Aye ne inandi ne kaka wandi bakatenwe pamo ku kitango kya Batumoni ba Yehova kya mu Duisburg. Uno o wadi musunsa wandi umbajinji wa kutanwa ku kitango kikatampe. Byonso kwandi byadi’tu i bipya: Hotela, kibumbo kya bantu bavule, kushikata mu bula bwa mafuku asatu, bakubatyijibwa, i drame’ni, ko kunena ne kunena. Le Daniel mwine nandi? Weendeje bya bulēme.

Dya Mwanzo kupwa kwa kitango, papo kebadi kwabo, Daniel wabuka lubanga mwanda wa kwenda ku masomo a banuke. Ino uyukile kyadi kikishele pa kotyi wandi? I kayukeno kandi ka ku kitango! Inandi wamunene amba: “Kitango pano kibapu. Dyalelo ukokeja kutalula kayukeno’ko.” Ino Daniel aye amba: “Ami nkimba muntu yense ayuke konadi i kwepi ne byonafundile’ko i bika.” Difuku dyonso paadi ku masomo a banuke wadi wifyela na kandi kayukeno. Mwadimu pa kumwipangula kavwele’ka, nandi wamulombola mpangiko yonso ya kitango.

Bine, byalongele Daniel i bintu bilonga tununu ne tununu twa banuke bana-balume ne bana-bakaji batendela Yehova umbula bwa tutwa twa myaka.