Mwanda Waka Tufwaninwe Kujingulula Antekidishitu?

Mutumibwa umo wālembele ku bukomo bwa mushipiditu pa kala’mba, ‘mwaivwene’mba, antekidishitu wiyanga.’ (1 Yoano 2:18) Bine, bino i bishima biteneka’po kashā! Bantu beipangulanga nshintulwilo yabyo pano ke tutwa twa myaka. Lelo antekidishitu i ani? Le ukaya kitatyi’ka? Le i bika byakalonga pakayanga?

MULONGO wa boba badi betwa bu baantekidishitu i mulampe mpata. Pa kala, mu boba badi batelwa bu “antekidishitu” mubadilwa ne Bayuda, bapapa Bene Katolika, ne bambikavu Bene Loma. Kimfwa, papelele Mbikavu Frederick II (1194-1250) kwilunga ku ditwa bu Divita Dikola dya kipwilo, Papa Grégoire IX wamwita bu antekidishitu ne kumupanga mu kipwilo. Mpingakani wa Grégoire, Innoncent IV, nandi wamupanga monka mu kipwilo. Pa kino, Frederick nandi waita Innocent bu antekidishitu.

Ku balembi ba Bible, i enka mutumibwa Yoano kete wingidije kishima “antekidishitu.” Mu mikanda ibidi yatelelwa, kino kishima kitanwa’mo misunsa itano, pamo bu antekidishitu, pakwabo napo bu baantekidishitu. Mavese mutanwa kino kishima i malombolwe mu kapango kadi pa paje ulonda’ko. Mungya ano mavese, tumona’mba antekidishitu i mbepai ne kadi i ñongojani, wimanine’nka kona kipwano kya bantu na Kidishitu ne na Leza. Pa kino, mutumibwa wāsoñenye banababo Bene Kidishitu amba: “Banwe baswe, kemukītabijai mishipiditu yonso, mhm, nanshi tompai mishipiditu, shi ya kwa Leza; ke-bantu bapolofeto ba bubela bavule bene balupukile panopantanda.”—1 Yoano 4:1.

Yesu nandi wāletele kidyumu pangala pa bano bañongojani, nansha bapolofeto ba bubela, amba: “[Bayanga] bavwele bivwalwa bya mikōko nanshi munda mwabo i bampumpi ba kuzonzelela. Ebiya mukebayūkila ku bipa [nansha bilongwa] byabo.” (Mateo 7:15, 16) Le kubamone’po amba Yesu nandi wādyumwine balondi bandi amba nabo bekale kudyumuka antekidishitu? Tutalei nanshi muswelo otubwanya kujingulula uno ñongojani mukosoke.