Wilame mu Buswe bwa Leza!
Wilame mu Buswe bwa Leza!
“Bānwe, baswe, . . . mwilamei monka mu lusa lwa Leza, ne kutengela . . . būmi bwa nyeke.”—YUDE 20, 21.
1, 2. Lelo i muswelo’ka obwanya kwilama mu buswe bwa Leza?
YEHOVA uswele bantu ba pano pa ntanda bikatampe, i mwibatumine Mwana wandi wa bunka’mba, boba bakumwitabija batambule bumi bwa kuladila monka nyeke ne nyeke. (Yoano 3:16) Bine, kwimwena buno buswe i kintu kya kutendelwa mpata! Shi wi mwingidi wa Yehova, ukasangela buno buswe nyeke.
2 Mutumibwa Yude wāsokwele mokokejeja kwilamina mu buswe bwa Leza. Wāsonekele amba: “Enka kwitamija bānwe bene pa kwitabija kwenu kukola byamwiko, ne kulombela mu Mushipiditu Sandu, nabya mwilamei monka mu lusa lwa Leza, ne kutengela kanye ka Mfumwetu Yesu Kidishitu ka ku būmi bwa nyeke.” (Yude 20, 21) Kwifunda Kinenwa kya Leza ne kusapula myanda miyampe kukakukwasha utamije ‘kwitabija kukola byamwiko’ kobe—bufundiji bwa Bwine Kidishitu. Pa kwilama mu buswe bwa Leza, ufwaninwe kulombela ‘mu mushipiditu sandu,’ nansha kwendejibwa na lupusa lwao. Shi usaka’mba weselwe ne kukamona būmi bwa nyeke, nabya ufwaninwe kadi kwikala na lwitabijo mu kikūlwa kya kitapwa kya Yesu Kidishitu.—1 Yoano 4:10.
3. Mwanda waka bamobamo kebakidipo kadi monka Batumoni ba Yehova?
3 Bamobamo bādi na lwitabijo ino kwilama mu buswe bwa Leza mpika. Mwanda i batonge kulondalonda kulonga bubi, pano kebakidipo kadi Batumoni ba Yehova. I muswelo’ka obwanya kwiepeja na kino? Kulangulukila pa myanda ilonda’ko’i kukokeja kukukwasha wepuke bubi, ne wendelele kwilama mu buswe bwa Leza.
Lombola Buswe Bobe Kudi Leza
4. Lelo kukōkela Leza kudi na mvubu’ka?
4 Lombola buswe bobe kudi Leza na kumukōkela. (Mateo 22:37) Mutumibwa Yoano wālembele amba: “Ke-luntu luno namino lo lusa lwa Leza, lwa’mba tulame bijila byandi, kadi bijila byandi kebikolengapo, mhm.” (1 Yoano 5:3) Kibidiji kya kukōkela Leza kibwanya kukuningija ukomene matompo ne kukwikadija na nsangaji. Mulembi wa mitōto wānene amba: “Ē! keye wasangaji shandi! yewa muntu wakubulwa kunanga mwendele ñeni ya babi, . . . mutyima wandi i umutōkele mu mukanda-wabijila wa Yehova.”—Mitōto 1:1, 2.
5. Kuswa Yehova kukakutonona wepuke kulonga bika?
5 Kuswa Yehova kukakutonona wepuke kulonga bubi bukata bubwanya kutukija dijina dyandi. Akula wālombele amba: “Ndīshe ne bidībwa bimfwaninwe biyampe; kutyina’mba nakekuta, ke nkwalakana, na’mba: Lelo Yehova i ani, a? Shi kadi ngibe byakwiba pa mwanda wa bulanda, nakakobakanya dijina dya Leza wami.” (Nkindi 30:1, 8, 9) Ikala musumininwe kutyina ‘kukobakanya dijina dya Leza’ na kwidifutuluja. Inoko, longa nyeke buninge bwa kulonga byoloke bimuletela ntumbo.—Mitōto 86:12.
6. Lelo bibwanya kwikala namani shi ubalonga bubi ku kusaka?
6 Lombela kitatyi ne kitatyi kudi Shobe wa mūlu akukwashe kukomena matompo abwanya kukufikija mu bubi. (Mateo 6:13; Loma 12:12) Londa nyeke madingi a Yehova kutyina’mba milombelo yobe yakalāla. (1 Petelo 3:7) Shi ubalonga bubi ku kusaka, yuka’mba usa kwangula bipa bilula, mwanda mu muswelo wa kyelekejo, Yehova wipūtanga dikumbi kumeso kwa bantomboki kutyina’mba milombelo yabo yakafika kwadi. (Madilo 3:42-44) Pa kino, ikala na mushipiditu wa kwityepeja ne kulombela amba uleke kulonga kintu kikokeja kukukankaja kufwena Leza mu milombelo.—2 Kodinda 13:7.
Lombola Amba Uswele Mwanā Leza
7, 8. Kuta mutyima ku madingi a Yesu kukwasha muntu namani elame ku kulonga bubi?
7 Lombola amba uswele Yesu Kidishitu na kukōkela ku bijila byandi, mwanda kino kikakukwasha unyeme kulonga bubi. Yesu wānene amba: “Shi kadi mulame bijila byami nabya mukēkalanga mu lusa lwami monka mo nalamina ami bijila bya Tata, ne pano ngikele mu lusa lwandi.” (Yoano 15:10) Lelo kulonda binenwa bya Yesu kubwanya kukukwasha muswelo’ka wendelele kwilama mu buswe bwa Leza?
8 Kuta mutyima ku binenwa bya Yesu kubwanya kukukwasha ulame bululame mu ngikadilo yobe. Bijila bya Leza ku Isalela byādi binena’mba: “Kokalāla makoji, mhm.” (Divilu 20:14) Inoko Yesu wālupwile musoñanya umo ku kino kijila na kunena’mba: “Yewa wakutala mwanamukaji meso a mutyima wakumusaka, nankyo wapu kupya kala mambo nandi umutyima wandi.” (Mateo 5:27, 28) Mutumibwa Petelo wānene amba bamobamo mu kipwilo kya mu myaka katwa kabajinji bādi na “meso abo mēne mayūle bonka busekese,” “bōngola ne mityima yampikwa kunyinga.” (2 Petelo 2:14) Pa kyaba kya kulonga bwa abo, abe ubwanya kwepuka bubi bwa busekese shi uswele Leza ne Kidishitu ne kwibakōkela ne shi wi musumininwe kulama kipwano kyobe pamo nabo.
Leka Mushipiditu wa Yehova Ukuludike
9. Pa bitala mushipiditu sandu, bikekala namani shi muntu wendelela na kulonga bubi?
9 Lomba mushipiditu sandu wa Leza, kadi wiuleke ukuludike. (Luka 11:13; Ngalatea 5:19-25) Shi wendelele na kulonga bubi, nabya Leza ukokeja kutalula mushipiditu wandi. Davida pa kupwa kulonga bubi ne Bafesheba, wālombele Leza amba: “Kokansonsolola mu kifuko kyobe; kadi kokantekuna mushipiditu obe ukola.” (Mitōto 51:11) Mulopwe Solo aye wābudilwe mushipiditu wa Leza, mwanda wādi kipya-mambo wampikwa kwisāsa. Solo wālongele bubi pa wāelele kitapwa ne kupandija ñombe ya mikōko, bambuji, ne bañombe, pamo ne mulopwe wa Bene Amaleke. O mwanda Yehova wāmutalwile mushipiditu sandu wandi.—1 Samwele 13:1-14; 15:1-35; 16:14-23.
10. Lelo i muswelo’ka okokeja kupangila kulampe mulangwe wa kulonga bubi?
10 Nyema mulangwe onso wa kulonga bubi. Mutumibwa Polo wāsonekele amba: “Wivwane kadi, tupyanga mambo a mu lupata popa po twatambwile ñeni ya kuyūkidila byobya byabinebine, nankyo nanshi kekukishelepo pano kitapwa kikwabo kya pa mambo, mhm.” (Bahebelu 10:26-31) Bine, kikekala kya bulanda shi bubi bukufikije ku dino ditabula!
Lombola Amba Uswele Bakwenu Binebine
11, 12. Lelo buswe ne bulēme bibwanya kukankaja namani muntu aleke kwitweja mu busekese?
11 Kuswa bantu netu kuketukwasha tushikwe kwitweja mu bya busekese. (Mateo 22:39) Buswe bwa uno muswelo bukakukunka ulame mutyima obe kutyina’mba wakashilula kusanswa mulumya bene nansha mukaja bene. Ke-pantu kino kibwanya kukufikija ku bubi bwa kulonga makoji. (Nkindi 4:23; Yelemia 4:14; 17:9, 10) Ikala bwa Yoba, muntu moloke, kādipo witabija kuta mwana-mukaji mukwabo mutyima, poso enka mukajandi kete.—Yoba 31:1.
12 Kulēmeka buujila bwa busongi kubwanya kukukwasha wepuke bubi bukatampe. Leza wāsakile busongi bwikale bulēmekibwe ne kusambakena pamo nako kwikale bu dishinda dya kubutwila’mo bana. (Ngalwilo 1:26-28) Vuluka’mba ngitu ya bumvu yādi na mpango ya kulupula būmi, kadi būmi nabo i bujila. Babusekese ne bamakoji kebakōkelepo Leza, bapēlulanga kusambakena pamo, kebalēmekelepo buujila bwa busongi, ne kadi balubilanga ne ngitu yabo mine. (1 Kodinda 6:18) Inoko kuswa Leza ne mukwetu pamo ne kikōkeji kudi Leza bikalama muntu aleke kwitweja mu mwiendelejo ubwanya kumufikija ku kupangwa mu kipwilo kya Bwine Kidishitu.
13. Muntu ulonga busekese “welanga biyampe byandi” namani?
13 Tusaka tutalule mu ñeni milangwe ya bubi kutyina kusanshija baswe betu. Nkindi 29:3 inena’mba: “Yewa upwananga ne babwitwa welanga biyampe byandi.” Muntu ulonga makoji kwampikwa kwisāsa onanga kipwano kyandi na Leza ne kona bijimba bya kisaka kyandi. Wandi mukaji ukekala na bubinga bwa kwilubwila nandi. (Mateo 19:9) Nansha shi bikale kipya-mambo i mulume nansha mukaji, kupomoka kwa busongi kubwanya kusansa bininge shi mukaji, shi mulume wampikwa mambo, bana, ne bantu bakwabo. Mwene ubamone amba kuyuka kyonakanya kileta mwiendelelejo wa busekese kufwaninwe kwitutonona tukomene matompo a kulonga’bo?
14. I ñeni’ka yotubwanya kuboila ku bilongwa bibi bitelelwe mu Nkindi 6:30-35?
14 Shi muntu uyukile amba kekudipo kimwenwa mu makoji, kino kikamutonona epuke kino kilongwa kya kwisakila’nka bya aye mwine. Nkindi 6:30-35 ulombola amba mu byaba bimo bantu bakokeja kwivwanina ngivi wibila nzala lusa, ino bafutululanga wamakoji mwanda udi na mutyima umbi. I kona kwa ‘onakanya wandi mūya’ nansha būmi aye mwine. Mu Mukanda wa Bijila wa Mosesa, wādi ufwaninwe kwipaibwa. (Levi 20:10) Yewa ulāla makoji usanshijanga bakwabo enka’tu pa mwanda wa kupwija kilokoloko kyandi, kadi muntu wa makoji wampikwa kwisāsa kabwanyapo kwilama monka mu buswe bwa Leza, ino upañwanga mu kipwilo kitōka kya Bwine Kidishitu.
Lama Mutyima wa Mundamunda Utōka
15. Lelo mutyima wa mundamunda “mupye mudilo” wikalanga namani?
15 Shi tusaka kwilama mu buswe bwa Leza, ketukalekapo mutyima wetu wa mundamunda utune ku bubi. I kimweke patōka’mba ketufwaninwepo kwitabija misoñanya yampikwa kwendela’mo ya ino ntanda, ne tusenswe kwilama mu myanda ya uno muswelo potutonga balunda, bintu byotutanga, ne bya kwipwija nabyo mukose. Polo wādyumwine amba: “Mu oa mafuku a kumfulo’a bamobamo bakabomboka mu kwitabija, ke bateje matwi kudi bibanda, bibasenga bubelabubela, ne ku mfundijo ya bademona, pa mwanda wa buzazangi bwa bantu bakupeba mabela, ba mutyima wabo wa mundamunda mufwe, pamo’nka bwa mupye mudilo.” (1 Temote 4:1, 2) Mutyima wa mundamunda “mupye mudilo” udi pamo’nka bwa ngitu miteme idi na mukovu, keibwanyapo kwivwana ntenekeji yo-yonso. Mutyima wa mundamunda udi namino keubwanyapo kadi monka kwitudyumuna tunyeme batupondo ne ngikadilo ibwanya kwituponeja mu lwitabijo.
16. Mwanda waka kwikala na mutyima wa mundamunda utōka kudi na mvubu?
16 Kupanda kwetu kwimanine pa kwikala na mutyima wa mundamunda utōka. (1 Petelo 3:21) Kupityila ku lwitabijo lwetu mu mashi amwangile Yesu, mutyima wetu wa mundamunda i mukendwe ku mingilo mifwe, “amba twingidile Leza mumi” mingilo ikola. (Bahebelu 9:13, 14) Wivwane shi tulonga bubi ku kusaka, nabya mutyima wetu wa mundamunda ukasubijibwa ne ketukekalapo kadi monka bantu bafwaninwe kwingila mwingilo wa Leza. (Tetusa 1:15) Inoko, na bukwashi bwa Yehova, tubwanya kwikala na mutyima wa mundamunda utōka.
Miswelo Mikwabo ya Kunyema Mwiendelejo Umbi
17. I kamweno’ka kamwenwa mu ‘kulonda Yehova’ ne pa mfulo?
17 ‘Londa Yehova’ ne pa mfulo, pamo na mwāmulondele Kalebu wa mu Isalela wa kala. (Kupituluka 1:34-36) Longa byobya bikusakila Leza kulonga, kadi kokolwa “kudya pa mesa a bademona” nansha dimo. (1 Kodinda 10:21) Nyema bupondo. Dya enka bidibwa bya ku mushipiditu bitūlwa ku meza a Yehova na mutyima wa kufwija’ko, nabya kukongolwapo na bafundiji ba bubela nansha na mishipiditu mibi. (Efisesa 6:12; Yude 3, 4) Wipāne mu bintu bya ku mushipiditu, kimfwa kifundwa kya Bible, kutanwa ku kupwila, ne mwingilo wa budimi. Kulupila amba ukekala na nsangaji shi ulonda Yehova ne pa mfulo ne kwikala muvudilwe bya kulonga pakatampe pene monka mu mīngilo ya Mfumwetu.—1 Kodinda 15:58.
18. Lelo i bika bikokeja kulupuka ku kwakamwa koakaminwe Leza?
18 Sumininwa “kumwingidila Leza mīngilo ya kumuoeleja ku mutyima, ne ya kwakamwa kwa Leza, ne luzakalo ponka.” (Bahebelu 12:28) Kwakamwa koakaminwe Yehova kukakutonona upele mashinda onso manyengakane. Kukakukwasha ulonde madingi āletele Petelo ku banababo bashingwe māni amba: “Mu milombelo yenu mwitanga Leza bu Tata, aye utyibilanga bantu mambo muswelo umo onka, ulondela’nka mulongele muntu. E kyo kyo mufwanyinwe nenu, mu ano mafuku abemushadila’ko kwikala pano panshi’a, mulombole mu mwikadilo wenu, [kwakamwa ko mumwakaminwe].”—1 Petelo 1:17, MB.
19. Mwanda waka ufwaninwe kwendelela na kwingidija bintu byowifunda mu Kinenwa kya Leza?
19 Endelela kwingidija byobya byowifunda mu Kinenwa kya Leza. Kino kikakukwasha kwepuka bubi bukatampe mwanda wa kulombola’mba nobe udi umbukata bwa boba “badi ne byakwivwana nabyo byabo bībidile kala bya kuyūkidila ne bulumbuluke ne bibi, mwanda wa kwivwanaivwana.” (Bahebelu 5:14) Pa kyaba kya kwikala muntu mwilekelele mu muneneno ne mu mwikadilo, dyumuka ne kwiendeja bu muntu wa ñeni, wa “kumwenamo byakumwenamo” na kukūla kitatyi mu ano mafuku mabimabi. ‘Yuka monka mwikadile kiswa-mutyima wa Mfumwetu,’ ne kwendelela kwikilonga.—Efisesa 5:15-17; 2 Petelo 3:17.
20. Mwanda waka tufwaninwe kwepuka makomwa-meso?
20 Leka makomwa-meso—lwiso lwa kwabila bintu bya bene. Kijila kimo mu Mbila dikumi kinena’mba: “Kokābila njibo ya mukwenu, kokābila mukaja mukwenu, nansha mupika wandi mwana-mulume nansha umpika wandi mwana-mukaji, nansha ñombe wandi, nansha kimbulu kyandi, nansha kintu kimo kine kidi ku mukwenu.” (Divilu 20:17) Kino kijila kyādi kikinga njibo ya bene, mukaji, bengidi, banyema, ne bikwabokwabo. Ino kya mvubu kutabuka i kino kyānene Yesu amba makomwa-meso i kintu kijilula nansha kisubija muntu.—Mako 7:20-23.
21, 22. I mpangiko’ka ibwanya kukwatwa na Mwine Kidishitu kutyina amba wakaponena mu bubi?
21 Kwata’ko mpangiko ya kukukwasha kutyina’mba kwabila kwakakutwala ku bubi. Mwanā bwanga Yakoba wālembele amba: “Bantu bonso, wa pandi, wa pandi, batompibwanga, pa kukokwa na kilokoloko kyāye mwine, waongolwa. Ebiya kilokoloko pa kwimita kibutula bubi, ino bubi nabo pa kutama bwabutula lufu.” (Yakoba 1:14, 15) Kimfwa, shi muntu wadi na mutomeno-mpata mafuku a kunyuma, ukokeja padi kukwata butyibi bwa kuleka kubika malwa akolwañana mu njibo yandi. Muntu ukokeja kushinta kaji nansha kifuko kyandi kya mingilo pa mwanda wa kutyina matompo a muntu wa ngitu ingi obengilanga nandi.—Nkindi 6:23-28.
22 Tyina kutabula’tu nansha ditabula dimo ditwala ku bubi. Dipyaselemba ne makayo aleta milangwe mityani bibwanya kufikija bantu ku kulonga busekese nansha makoji. Kubepa bubela butyebutye kusonshilanga muntu kabepa ne bubela bukatakata, mfulo mfulō ke muntu wibidile kubepa bubela. Kunyokola nansha kwiba tuntu tutyetutye kukokeja kutunija mutyima wa muntu, uyuka washilula ne kwiba bintu bikatakata. Nansha ke kutweja milangwe mityemitye ya bupondo mu ñeni kukokeja kufikija ku kutama’yo ke bupondo bukatampe.—Nkindi 11:9; Kusokwelwa 21:8.
Bikekala Namani Shi Ubalonga Bubi?
23, 24. Lelo i busengi’ka butanwa mu 2 Bilongwa 6:29, 30 ne mu Nkindi 28:13?
23 Bantu bonso i bampikwa kubwaninina. (Musapudi 7:20) Shi wi mulonge bubi bukatampe, ubwanya kutana busengi mu milombelo ya Mulopwe Solomone yaālombele pa kufikijija tempelo ya Yehova. Solomone wālombele Leza amba: “Ino shi lulombelo ka, nansha kwisashila ka bilongwe ne muntu, shi ani shi ani, nansha ne bantu bobe bonsololo bene Isalela bakayuka kipupo kyandi, muntu kyandi kipupo muntu kyandi kipupo, ne misongo nayo mo monka, wa yandi wa yandi, shi ukōlola maboko andi dya ku njibo ino’i; penepo kadi wivwane abe mūlu mu kikalo kyobe, ne kulekela ne kupana ku muntu ense mwendele mashinda andi onsololo, abe ye uyukile mityima ya bantu bonso; (mwanda abewa ke abe enka kete uyukile mityima ya bāna ba bantu).”—2 Bilongwa 6:29, 30.
24 Bine, Leza uyukile mutyima wa muntu kadi ulekelanga bubi. Nkindi 28:13 inena’mba: “Yewa upūtanga kujilula kwandi kakamonepo dyese, ehe; ino yewa usaba ne kwijiba’ko ukafwilwa lusa.” Leza ufwilanga muntu lusa shi wesāsa na kusaba bubi ne kwijiba’ko. Inoko, shi kodi mukōke ku mushipiditu, lelo i kika kikwabo kibwanya kukukwasha wilame monka mu buswe bwa Leza?
Lelo Ukalondolola Namani?
• Lelo i muswelo’ka otubwanya kwilama mu buswe bwa Leza?
• Lelo kuswa Leza ne Kidishitu kuketukwasha namani tunyeme bubi?
• Kuswa bakwetu byabinebine kuketukankaja namani tuleke kulonga busekese?
• I miswelo’ka imoimo iketukwasha twepuke kulonga bubi?
[Bipangujo bya Kifundwa]
[Kifwatulo pa paje 8]
Yude witulombola mwa kwilamina mu buswe bwa Leza
[Kifwatulo pa paje 9]
Kupomoka kwa busongi kusansanga mulume nansha mukaji wampikwa mambo
[Kifwatulo pa paje 10]
Lelo usumininwe ‘kulonda Yehova’ ne pa mfulo pamo bwa Kalebu?
[Kifwatulo pa paje 11]
Lomba bukwashi kitatyi ne kitatyi ukomene matompo