“Difuku Dikatakata dya Yehova Didi Pabwipi”

“Difuku dikatakata dya Yehova didi pabwipi, didi pabwipi ponka, ne kupeja’dyo nakampata.”—ZEFENIA 1:14.

1, 2. (a) Bene Kidishitu batengele difuku’ka dya pa bula? (b) Le i bipangujo’ka byotufwaninwe kwiipangula ne mwanda waka?

 NSONGWAKAJI muyulwe nsangaji, utengele na kipyupyu difuku dyandi dya butundaile. Lolo wa dimi nandi, utengele na buswe difuku dyasa kubutula wandi mwana. Kadi mwingidi mupungile na kaji nandi wabila kushilula konje yaadi utengele pano ke mafuku. Le bano bonso i beifwane pa kintu’ka kimo? Abo bonso batengele difuku dya pa bula—difuku dya kamweno mu būmi bwabo. Bonso badi na malango a mushike, inoko meshileshile. Difuku dyobatengele disa kufika, kadi podifika, bakulupile amba i bapwe kala kwiteakanya.

² Bene Kidishitu ba bine nabo dyalelo batengele na mēlu kwiya kwa difuku dya pa bula. I “difuku dya Yehova” dikatakata. (Isaya 13:9; Yoela 2:1; 2 Petelo 3:12) Lelo kwiya kwa “difuku dya Yehova” kushintulula bika, ne bantu batalwa namani na kwiya kwadyo? Ne kadi, tukokeja kuyuka namani amba twi beteakanye pangala pa kwiya kwadyo? Na bubine pano ye potufwaninwe kukimba malondololo a bino bipangujo, mwanda bukamoni bulombola bubinebine bwa bino binenwa bya mu Bible bilonda’ko amba: “Difuku dikatakata dya Yehova didi pabwipi, didi pabwipi ponka, ne kupeja’dyo nakampata.”—Zefenia 1:14.

“Difuku Dikatakata dya Yehova”

3. Lelo “difuku dikatakata dya Yehova” i difuku’ka?

³ Lelo “difuku dikatakata dya Yehova” i difuku’ka? Mu Bisonekwa byonso, muneneno “difuku dya Yehova” difunkila pa kitatyi kya pa bula kifikidija Yehova butyibi bwandi pa balwana nandi ne kutumbija dijina dyandi dikatampe. Bantu bampikwa kikōkeji ba mu Yuda ne mu Yelusalema pamo ne bekadi ba kasusu ba mu Babiloni ne mu Edipito bāponenwe bonso na ‘mafuku a Yehova’ kitatyi kyebatene butyibi bwa Yehova. (Isaya 2:1, 10-12; 13:1-6; Yelemia 46:7-10) Inoko, “difuku dya Yehova” dikatakata dikidi kumeso. Dino i “difuku” dikaleta Yehova butyibi pa boba bonso bafutulula dijina dyandi. Dikashilula na konakanibwa kwa “Babiloni mukatakata,” umbikalo wa ntanda wa bipwilo bya bubela, ne kunana pa kutukijibwa kwa ngikadilo imbi yonso ya bintu bishele’ko ku divita dya Amakedona.—Kusokwelwa 16:14, 16; 17:5, 15-17; 19:11-21.

4. Mwanda waka bantu bafwaninwe kutyina difuku dya Yehova dyafwena lubilo lonka?

⁴ Bantu bonso bayuke nansha bapele kuyuka bafwaninwe kutyina dino difuku dyafwena lubilo lonka. Mwanda waka? Yehova ulondolola kupityila kudi mupolofeto Zefenia amba: “Dyodya difuku’dya i difuku dya bukalabale,  difuku dya tusuwa ne mutyima kupepa, difuku dya kyonakanya ne musala, difuku dya mfindi ne midima fututu, difuku dya makumbi ne fukutu bwi.” Bine, i difuku dya nzuba! Kadi mupolofeto unena’mba: “Nkaleta tusuwa pa bantu, . . . ke-bantu abalonga bubi padi Yehova.”—Zefenia 1:15, 17.

5. I mumweno’ka muyampe udi na midiyo ne midiyo ya bantu pa difuku dya Yehova, ne mwanda waka?

⁵ Inoko kudi bantu bakwabo midiyo ne midiyo batengele na kipyupyu kwiya kwa difuku dya Yehova. Mwanda waka? Mwanda bayukile amba kino kyo kitatyi kya kupanda ne kya kunyongololwa kwa boloke, difuku dikezunzula Yehova aye mwine ne kutumbija dijina dyandi dijila. (Yoela 3:16, 17; Zefenia 3:12-17) Kutyina nansha kutengela na kipyupyu dino difuku kwimanine nakampata pa bilonga bantu mu būmi bwabo dyalelo. Le abe umwene namani kufwena kwafwena dino difuku? Le wi mwiteakanye? Kufwena kwafwena difuku dya Yehova pabwipi kutala namani būmi bobe bwa bukile bukya dyalelo?

“Bakibengo Bakāyanga ne Kibengo”

6. Bantu bavule bamwene namani “difuku dya Yehova,” ne mwanda waka Bene Kidishitu kebatulumukangapo kino’ki?

⁶ Bekadi bavule ba ntanda kebatelepo mutyima ku kufwena kwafwena “difuku dya Yehova” nansha byotudi mu bitatyi bya kampeja-bukidi. Basepanga na kibengo boba baleta kidyumu kya kufwena kwa dino difuku. Kino kekitulumujangapo Bene Kidishitu ba bine. Bavulukanga kidyumu kyāsonekele mutumibwa Petelo amba: “Pa kuyūka kino kibajinji, amba mu mafuku a kumfulo bakibengo bakāyanga ne kibengo, banangila monka mupityila bilokoloko bya abo bene, ke banena’mba: Lelo mwanda-wamulao wa kukāya kwandi udi kwepi? ke-kuntu kushilwila ponka pa difuku dyaponene bakulutuba mu tulo, bintu byonso byendangaendanga’tu pamo ponka, ne byadi kungalwilo kwa kipangwa.”—2 Petelo 3:3, 4.

7. I bika biketukwasha twikale na mutyima wa kampeja-bukidi?

⁷ I bika biketukwasha tutyumwine umanwi ino milangilo imbi ne kwendelela na kulama mutyima wa kampeja-bukidi? Petelo witulombola amba: “Nsakidila tu’nka kwimuvuluja milangwe miyampe umityima yenu, na’mba muvuluke binenwa bya Mfumwetu Umpandiji byanene bafumiki bajila kalakala, byemuletele batumibwa.” (2 Petelo 3:1, 2, Myanda Miyampe ku Bonso) Kuta kotutele mutyima ku bidyumu bya bupolofeto kuketukwasha ‘tuvuluke milangwe miyampe.’ Padi ke betuvuluje kino misunsa mivule, inoko pano bine i kya kamweno mpata twendelele kuta mutyima ku bino bidyumu.—Isaya 34:1-4; Luka 21:34-36.

8. Mwanda waka bavule i balengwe bivulujo bya mu Bible?

⁸ Mwanda waka bamo baleñwanga bino bivulujo? Petelo ubweja’ko amba: “I kusaka kwilwa kyokya kinenwe’mba: ‘Kalakala Leza wanene tu’nka diwi, diulu ne ntanda byapangibwa. Ntanda yatamba ku mema, yabumbwa na mema, kadi i enka mema aonenwe nao ntanda pakala ku dilobe dikatampe.’” (2 Petelo 3:5, 6, MB) Bine, i kusaka kokebasakilepo difuku dya Yehova difike. Kebasakilepo kintu nansha kimo kikalakanye būmi bwabo. Kebasakilepo kwishintulwila ku meso a Yehova pangala pa būmi bwabo bwa kwisakila! Monka munenena Petelo amba mungya “bilokoloko bya abo bene.”

9. I ngikadilo’ka yādi na bantu mu myaka ya Noa ne ya Lota?

 ⁹ Bano ba kibengo bakimbanga mungya “kusaka” kwabo kulengwa byālongele Yehova pa kala mu myanda ya bantu. Ino Yesu Kidishitu ne mutumibwa Petelo abo batela bidi myanda ibidi—“mu myaka ya Noa” ne “mu myaka ya Lota.” (Luka 17:26-30; 2 Petelo 2:5-9) Kumeso kwa dilobe bantu kebātelepo mutyima ku kidyumu kya Noa. Ne kumeso kwa konakanibwa kwa Sodoma ne Ngomola nako, Lota “wadi bwa ukaya kudi bako bandi.”—Ngalwilo 19:14.

10. I bika binena Yehova ku boba bapela kuta’ko mutyima?

¹⁰ Dyalelo nadyo bintu kebishidilepo. Ivwana munenena Yehova ku boba bapela kuta’ko mutyima: “Nkamwesha malwa bantu bekele ne mutyima-ntenke, bakunena umutyima wabo amba: Yehova kakalongapo biyampe, ehe, nansha kulongapo bibi kwine. Ino bupeta bwabo bukālamuka ke kitūtwa, ne mobo abo ke masala kadi; eyo, bakōbaka mobo, ino kebakekalamopo; kadi bakakuna madimi a mañanza, inoko kebakatomepo vinyu yao, mhm.” (Zefenia 1:12, 13) Bantu bakokeja kwendelela na mingilo yabo “miyampe” ya difuku ne difuku, ino kekudipo kiyampe kya nyeke kyobakamwena mu mingilo yabo. Mwanda waka? Mwanda difuku dya Yehova disa kufika na mu kukopa kwa diso, kadi bupeta bonso bobeungwijije kebukebapandijapo.—Zefenia 1:18.

“Kunga’kyo”

11. Le i kidyumu’ka kyotufwaninwe kulama mu ñeni?

¹¹ Batwe twi beshile na ntanda imbi itujokolokele mwanda tulamine mu ñeni kidyumu kya mupolofeto Habakuka, amba: “Kimonwa kikidi kya kitatyi kitūngwe, kadi kipelakana ne kumfulo ne kukabepapo mpika; nansha kīja, kunga’kyo; ke-kintu kikāya binebine, kekikejepo, mhm.” (Habakuka 2:3) Eyo, nansha shi difuku’dya dibamweka amba dibaije mungya mumweno wetu wakubulwa kubwaninina, tuvulukei amba Yehova kejangapo. Difuku dyandi dikafika pa kitatyi, pa nsaa keilangapo bantu.—Mako 13:33; 2 Petelo 3:9, 10.

12. Yesu wādyumwine bika, ne kino i kishile namani na bilongwa bya balondi bandi ba kikōkeji?

¹² Yesu wādyumwine balondi bandi amba kebafwaninwepo kujimija mutyima wa kampeja-bukidi pa mwanda utala mvubu ya kutengela difuku dya Yehova. Wālaile pa mwanda wabo amba: “Shi yewa mupika mubi ukafwatakanya munda’mba: Mfumwami waije kwiya. Ashilule kukupila bapika bakwabo, ne kudya, ne kutoma na bankolwankolwa. Ino mfumwandi pa kufika mu dyodya dyuba dya kubulwa kutámo aye mutyima, ne kitatyi kyampikwa kuyūka aye, nandi ukamukupila byamalwa.” (Mateo 24:48-51) Kwishila na kino, umpika wa binebine ne wa manwa aye ulamine na dikōkeji mutyima wa kampeja-bukidi. Kano kabumbo ka umpika kendelelanga na  kukesha ne kwiteakanya. Yesu wēkatūdile pa “lupeto lwandi lonso” ludi pano pa ntanda.—Mateo 24:42-47.

Kisakilwa Mutyima wa Kampeja-Bukidi

13. Yesu wānene namani pangala pa mvubu ya kwikala na mutyima wa kampeja-bukidi?

¹³ Bene Kidishitu ba mu myaka katwa kabajinji bādi basakilwa mutyima wa kampeja-bukidi. Bādi bafwaninwe kunyema ponka na ponka mu Yelusalema shi abamone “vita, ibajokoloka konso konso.” (Luka 21:20, 21) Mvita ino yāmwekele mu mwaka wa 66 K.K. Ivwana Yesu pa kulombola amba Bene Kidishitu ba mu myaka’ya bādi basakilwa mutyima wa kampeja-bukidi, wānene amba: “Yewa ukēkala pa musaka wa njibo kakatūkapopo kulupula kintu mu njibo, mhm. Nansha wa mu budimi nandi kakajokela kunja kukayata bivwalwa byandi.” (Mateo 24:17, 18) Ino mungya mānga, Yelusalema wāendelele kwikala’ko myaka iná mikwabo, le Bene Kidishitu bādi basakilwa bine kulonda binenwa bya Yesu na kampeja-bukidi mu 66 K.K.?

14, 15. Mwanda waka Bene Kidishitu ba mu myaka katwa kabajinji bādi basakilwa kunyema pampikwa kwija pa kumona’tu divita dibajokoloka Yelusalema konso konso?

¹⁴ Bine, kufikika ne mu 70 K.K., bibumbo bya Bene Loma kebyāonakenyepo Yelusalema, inoko mu myaka’ya kemwabudilwepo tuvutakanya! Yoya myaka yādi ya bukalabale ne kumwanga mashi. Mulembi umo wa mānga usekununa ngikadilo yādi’ko mu Yelusalema amba dyādi “divita dya abo bene na bene dimwanga mashi ne dilenga moyo, pamo ne bilongwa bya butapani bya nzuba.” Bansongwalume bādi baselwa ku bukomo mwa kukomeneja masakwa a kibundi, kupunga mata, ne kwingila busola. Bādi bebafundija difuku ne difuku mwingilo wa busola. Boba bādi bapela kwibela’ko kuboko bādi bamonwa bu bangabañani. Shi Bene Kidishitu bāikele kulejaleja mu kibundi, longa bādi ba kukolelwa pangala pa makambakano’a.—Mateo 26:52; Mako 12:17.

¹⁵ Tukokeja kadi kuta mutyima amba Yesu wānene amba “ba mu Yudea,” ke ba mu Yelusalemapo, bafwaninwe kubadikila kunyema. Kino kyādi kya kamweno mwanda myeji mityetye’tu pa kupwa kwikoka mu Yelusalema, basola Bene Loma bāshilwile monka kutambañana kwabo. Dibajinji, Ngadilea wānekenibwa mu 67 K.K., kupwa ke Yudea kushindwa yense mu mwaka walondele’po. Kino kyāletele musala mukatampe mu tubundi tonso. Kadi byādi byenda bikola ku yense wāshele mu Yelusalema pa kunyema. Balami bādi kebadi kala ku bibelo bya kibundi, ne yense ukimba kutamba wādi umonwa bu wenda kwilunga ku Bene Loma.

16. I mutyima’ka wādi unenwe kwikala na Bene Kidishitu ba mu myaka katwa kabajinji pa kusaka bapande mu bitatyi byamalwa?

¹⁶ Netu shi tulame ino myanda mu ñeni tukamona kine kyānene Yesu ukoma mvubu ya mutyima wa kampeja-bukidi. Bene Kidishitu bādi bafwaninwe kwikala na mutyima wa kwisuminwa, kuleka kudibwa kavudi na bintu bya ku ngitu. Bādi bafwaninwe kwikala na mutyima wa ‘kuleka byonso byobādi nabyo’ mwanda wa kukōkela ku kidyumu kya Yesu. (Luka 14:33) Boba bakōkele ne kwija mpika bānyemene bukila bwa Yodano ne kupanda bāpanda.

Tulamei Mutyima Wetu wa Kampeja-Bukidi

17. Mwanda waka tufwaninwe kukomeja mutyima wetu wa kampeja-bukidi?

¹⁷ Bupolofeto bwa mu Bible bulombola  patōka amba ketudi batakamine bininge mu kitatyi kya ku mfulo. Pano po pene potusakilwa kwikala na mutyima wa kampeja-bukidi. Sola udi mu bitatyi bya ndoe kamonangapo amba kudi kyaka kya bulwi. Penepa byakadipo na mutyima wa kampeja-bukidi, usa kubozokelwa pobamwita mu kitulumukila ku bulwi, ne byaketeakenye bisa kumutana i enka byamalwa. Ne ku mushipiditu nako monka na monka. Shi mutyima wetu wa kampeja-bukidi utalale, nabya ketukekalapo beteakanye mwa kulwila na bijika bibwanya kwitutana kadi difuku dya Yehova pa kufika diketuponena bwa kibozo. (Luka 21:36; 1 Tesalonika 5:4) Shi ke pano, boba bonso “kebakimbilepo Yehova” bafwaninwe kumukimba pakidi mema mu manwi pano.—Zefenia 1:3-6; 2 Tesalonika 1:8, 9.

18, 19. I bika biketukwasha tulame mu ñeni ‘kwiya kwa difuku dya Yehova’?

¹⁸ Ke kya kutulumukapo shi mutumibwa Petelo witudyumuna tulame “kwiya kwa difuku dya Leza” mu ñeni yetu! Tukalama’dyo namani? Muswelo umo bidi i na kwikala na ‘bilongwa bikola bya mwiendelejo ne mingilo ya bwine Leza.’ (2 Petelo 3:11, 12) Kuputumina mu mingilo ya uno muswelo kuketukwasha tutengele na kipyupyu kwiya kwa “difuku dya Yehova.” Mu Kingidiki kishima kyalamwinwe bu ‘kulama mu ñeni’ kishintulula pa bute pa bute “kupelakanya.” Shako ketukokejapo kupelakanya bitatyi bishele’ko kumeso kwa difuku dya Yehova kufika. Ino, byotutengele dino difuku, bitatyi bikapita lubilo shi tuputuminanga mu mwingilo wa Leza.—1 Kodinda 15:58.

¹⁹ Kulangulukila pa Kinenwa kya Leza ne kutala bivulujo bitanwa’mo nako kuketukwasha tulonge kino: ‘kupeja (kutengela ne kufweneja) kwiya’ kwa difuku’dya, bine, “kusakidila byamalwa” kwiya kwadyo. (2 Petelo 3:12) Mu bino bivulujo mubadilwa ne bupolofeto buvule bulaile kwiya kwa difuku dya Yehova ne madyese a ntanda ne miseke akapebwa boba bonso ‘bendelela na kukungila Yehova.’—Zefenia 3:8.

20. Le i binenwa’ka byotufwaninwe kuta’ko mutyima?

²⁰ Kino kyo kitatyi kine kya batwe kuta mutyima ku binenwa bitupelwe kupityila kudi mupolofeto Zefenia amba: “Bulobo bupyana bwa Yehova po kebwemufikilepo, ne difuku dya bulobo bwa Yehova po kedyafikile po mudi. Kimbai Yehova banwe bonso bakōkele bapanopanshi, balonga boloke bwandi; kimbai boloke, kimbai kwiubija; kepabulwepo padi mukafībwa mu difuku dya bulobo bwa Yehova.”—Zefenia 2:2, 3.

21. I kusumininwa’ka kwa bantu ba Leza mu uno mwaka wa 2007?

²¹ Nanshi i kyendele’mo kisonekwa kya mwaka pa kalandadiye ka 2007 kinene amba: “Difuku dikatakata dya Yehova didi pabwipi.” Bantu ba Leza bakulupile amba “didi pabwipi ponka, ne kupeja’dyo nakampata.” (Zefenia 1:14) ‘Kedikejepo, mhm.’ (Habakuka 2:3) Byotutengele dino difuku, tudyumukei pa kutala bitatyi byotudi’mo, ke-pantu kufikidila kwa mfulo kwa buno bupolofeto kekudi umbisuku!

Lelo Ukalondolola Namani?

• “Difuku dikatakata dya Yehova” i difuku’ka?

• Mwanda waka bavule i balengwe bino bitatyi amba i bya kampeja-bukidi?

• Mwanda waka Bene Kidishitu ba mu myaka katwa kabajinji bādi ba kulonga bintu na kampeja-bukidi?

• I muswelo’ka otukakomeja mutyima wetu wa kampeja-bukidi?

[Bipangujo bya Kifundwa]

[Bushintuludi pa paje 12]

Kisonekwa kya mwaka wa 2007 i kino: “Difuku dikatakata dya Yehova didi pabwipi.”—Zefenia 1:14.

[Kifwatulo pa paje 9]

Bakibengo basa kutulumuka bisa kwibalonga Yehova’nka bwa mu myaka ya Noa

[Kifwatulo pa paje 10]

Bene Kidishitu kebādipo bafwaninwe kulejaleja shi abamone “vita, ibajokoloka” Yelusalema